مديح بينيوت آڤا كاراس | الأرشيدياكون إبراهيم عياد | كلمات الشاعر رمزي بشارة

لا ماسُه ولا دَهَبُه 
بَص لده كله باسترخاص
كنزه فـ السما فـ السما قلبه 
بينيوت آڤا كاراس

راس الحكمة مخافة الله
وده ماخافشي حد إلاه
سجد لمولاه فَعَلَّاه
بينيوت آڤا كاراس

رمى حُب الدُّنيا وراه
حَب الخير حَب الله
حُب المال لا أغراه
ولا سُلطة كانت شاغلاه

شاغلاه السما ده عظيم
ومحَبِّته كالسيرافيم
وحكيم زي الشيروبيم
وفضايله كتير مالياه

مال ياما على ناس يائسين
فَرَّحهم بَعد سنين 
وفِرِح قلبه بتايبين
والسما فِرحت ويَّاه

ياه لو نتمثل بيه
يجي الحُزن نمَشِّيه
وطبيعي هنحزن ليه
ومعانا أعظم إله!

لا همومه ولا آلامه
تخطف منه سلامه
وده باين فـ كلامه
وظاهر في أفعاله

عالُه ربنا واللي يعوله 
ربُّه.. مايكونشي بطولُه
لا قلق ولا خوف بيطوله
على طول مرتاح باله

باله طويل قوي وصَبور
ياما قلوب كانت بور 
صَلَّحها وداوَى كسور 
وصلاته سور يحمينا 

نادى على كل بعيد 
وصِبِر على كل عنيد
لو نوصفه بالتحديد
كان راعي حاسس بينا 

بينا بقى نتعَلِّم مِن
آبو قلب تملي يحِن 
عاللي بيبكي وبيئن 
ومع اللي احتاجوا لطيف

ضِيف إنه كان إنسان
مع طالبين الإحسان
كان بيعامل الغَلبان
إنه صاحب بيت مش ضيف

تفرق فعلًا لو كان
الراعي صالح.. بيبان
نوره للناس وده نوره بان
كان مُستقيم.. وكان صالح

صالح ناس صادق صانع
سلام.. صافي قلبه وقانع
وحُبُّه ماكانشي طالع
قُدَّام المصالح

صالح انه يكون أيقونة
للرعاية.. قُدوة مضمونة
يستحق نقول له "أبونا"
ويكون نموذج وَمِثال

سال دمعُه كتير علشان
الخاطي والغفلان
كان دايمًا عنده إيمان
فـ رجوع الابن الضال

قال وعاش اللي قاله 
واعظ ناري شهدناله
طَلَب الوداعة واللي طلبه ناله
رغم الكرامه متواضع

واضع ربِّنا قدامه
مش منصبه وللا مقامُه
ياما قال أنا هِنا خَدَّامه
مِلكه وبين إيده خاضع

ضِعِف اللي ضِعِف قواه
كام بيت كان اتهد.. لولاه
اسألني ليه الناس حَبَّاه؟
"ماطلبشي حاجة لنَفسُه"

اتنافسوا الخلق على
مين أكتر زاد وعَلا
وده بالتعفف قلبه اتملى 
شيء اللي اتعامل وياه لَمَسُه

لا ماسه ولا دهبه 
بَص لده كله باسترخاص
كنزه فـ السما فـ السما قلبه 
بينيوت آڤا كاراس

راس الحكمة مخافة الله
وده ماخافشي حد إلاه
سجد لمولاه فَعَلَّاه
بينيوت آڤا كاراس

رمزي بشارة

مديح بينيوت آڤا كاراس | الأرشيدياكون إبراهيم عياد | كلمات الشاعر رمزي بشارة

رسالة إلى الشعب المصرى 
لا لتقسيم مصر   " فى العامرية "
كتبها الشاعر رمزى بشاره
بصوت مايكل عياد
لحن الرسالة من التراث الفلسطينى 
__________________________


الحب والإتحاد كانوا للى فيها سِمَة
لكِن بعض الناس عايزينها متقسمة
يامصر لمى الولاد من تانى فى حضنِك
وإنسى الدموع عايزِك من تانى متبسمة


فى العامرية فى العامرية

هَجَّروا 8 أسر قبطية
 
 
ماأغلطتش لكن بيغلطونى
والحق معايا وبيظلمونى
من جوه بيتى بيطردونى
من غير لا رحمة  ولا إنسانية
 
غلطان؟ أتحاكم وماأتظلمشى
مش أمشى وإللى من طرفى يمشى
قلنا قانون يحكم . قالوا مايحكومشى
فى الموضوع غير. جلسات عرفية
 
 فى شريعة مين يغلط إنسان
فيحاسبوه هُوَّ وقرايبه كمان !
لا سيادة لدولة ولا حقوق إنسان
ولا عشرة وجيرة وأخلاق مصرية
 
المصريين دول طيبين
لو مسيحيين أو مسلمين
وضرورى نشوف الغلطان مين
ونحاسبه لكن بطرق قانونية
 
يعنى لو الجانى فى الكشح جابوه
وللا فـ أطفيح كانوا مِسكوه
ماكانوش قالوا سهله وجُم قلِّدوه
ولا عملوا زيه أعمال وَحشية
 
من مصر بلادنا بيهجَّرونا
بسلاح وبنادق بيهدِّدونا
ولممتلكاتنا بيبيَّعونا
ولا حدش مانع عنا الأذيه
 
مش أول مره لكن مسبوقة
عقاب جماعى وبيوت محروقة
أقباط غلابه فلوسهم مسروقة
والفاعل مجهول والإيد خفية
 
لو إنتوا سكتوا عاللى جرى لينا
بكره الدور يجى عليكم زيينا
عايزين عدالة وقانون يحمينا
مـ الإرهابيين والبطجية

أمنا الغاليه الحلوه الحنونه
وكإنك قاسيه ومرات أبونا
بيقسموكى ويقسمونا
عايزينا نبعِد عن بعض يا غاليه
 
ياأحمد ياأخويا بيفَرَّقونا
وفـ بعض يا صاحبى بيوقعونا
إيدى مع إيدك لا هيغلبونا
ولا يزرعوا بيننا فتنة طائفية
 
  ياأحمد أخويا وهتفضل أخويا
من أمى حوا وآدم أبويا
سبحان الله مع هلليلويا
مهما حصل برضو إيدك فى إيديا

***___***

لمزيد من الأوديوهات تابعنا على الصفحة الرسمية للشاعر رمزى بشاره

https://www.facebook.com/Ramzy.Beshara.official



لا لتقسيم مصر- أغنية فى العامرية

Conversations Kill

Poet Ramzy Beshara
The most famous Christian song lyricist in the world
He is known by his nickname: El Beshara

مديح بينيوت آڤا كاراس | الأرشيدياكون إبراهيم عياد | كلمات الشاعر رمزي بشارة

El Beshara

Related tracks