خمّارة إخناتون                                                                    إلى شريكي في الحزن (إسكافي المودة) 

                                                                                                            قابض على الوقت اللعين
وِ بَمِدّ عُمر الإنتظار ..
الكاس بِيِقْرب ينتهي .. والليل طويل
" لم تأتِ قلتُ: ولنْ "*
يا مخالي سيبك م الكاسات واملالي دَنّ
ميّل وقال: عالنوتة برضُه ؟!
مدّيتلُه يدّي بالسيجارة وقلتُله :
الصبر حلو .. 

كان الشتا بيمِدّ إيده عالمدينة
البرد بيشقق ف جلدي،
الخمره توهبني الحراره
فقلبي يتشنج من الذكرى الحزينه ..
وعيون حبيبتي الطيبين 
منشوره على خيط الدُخَان
كل امّا بتّضوّي المكان
تغرق وتطفي في الكاسات
سامحيني يا امّي !!
بَنَتِيلي حضنك لجل ما احيا
فاخترت تقتلني الدموع
و الرعشه ف احضان البنات .. 

و مخالي ويّا منير يدندن
" ضَلّ الطريق بينا
لا رجعنا ..
ولا ابتدينا "
و أنا قلبي يتشنج
من الذكرى الحزينة ..  

كانت فـ طور الفراشه
و أنا كنت مبني من حجر
أكره الخوف..
البراءة..
الدمع لو غلب الرجال ..
ساعة ما غنّت للمطر
جرّت الدم فـ عروقي
رفرف جناحها جمب ودني ..
رقّص التمثال !
و الليله تاهت فـ الضلام
فسابتني للحزن المليل
و مخالي ويّا منير يدندن ..
و الكاس بيقرَبْ ينتهي ..
و الليل طويل  

و أنا هعمل ايه ؟!
ما لقيت نديم ..
يقاسمني همّي في الحانات
وزّعت سري عالسكارى المجهولين
مفاضلش غير طَعم السُكات ! 

دماغي تقلت
وجفوني خدّرها النعاس
لو زدت كاس ..
هشوف حبيبتي خيال ومسجون عالحيطان
تنادي .. هخطّي ناحيتها
تفرح .. هغني
و عني / عنها هفك الطوق
لَكِنّ الذكرى عقرب 
مهما يوهمني النبيت .. تلدغني افوق ! 

يا حب .. 
من صغري شوكك في قلبي 
و فروعه في ضلوعي
دلوقت سارح في جسمي 
و حصاده في دموعي

كان يجرى إيه يا حب 
لو كنت أبسط من كده !

بدأت أهلوس .. ومخالي هياكُلني بعينيه
مديتله يدّي بالسيجارة وقلتله :
كان يجرى إيه !!
حط السيجارة ما بين شفايفه وابتسم :
الليل طويل ..  خُد كاس كمان.

محمد صلاح ____________________________________________
* خمارة اخناتون : بار كان موجود بفندق اخناتون بأسيوط.
* مخالي : صاحب الخمارة في رواية يحيي الطاهر عبد الله ( تصاوير من الماء والتراب والشمس )
* من قصيدة للشاعر/ محمود درويش.

خمّارة إخناتون _ محمد صلاح

يارب ياللي خلقتني إنسان

"زعلانة ليه"_أحمد ناجي

مرسال لحبيبتي _علي الهلباوي

أٔلف ليلة و ليلة كوبليه يا حبيبي.mp3

مزيج من أغاني لـ " جاهدة وهبي ، و نجاة الصغيرة ، و ماجدة الرومي ، و فيروز ، و عزيزة جلال ، و عبد الحليم حافظ ، و أم كلثوم ، و شادية ، و غادة شبير "

1st Classic Mix " أم كلثوم - حليم - نجاة - فيروز - وآخرون "

فاتت سنة بليغ حمدي

اغنية " بالبلدي "  كلمات : رفيق الشوري .. موسيقي والحان : د ممدوح الجبالي ... غناء : ممدوح بيرم ... توزيع : أحمد صالح & حمادة الموجي ... هندسة صوتية : ايهاب نبيل & محمود عزت

يا حبيبي حبنا مش بس هي الليلة

إنچي

Recent comments

Ashraf Taha

Related tracks