Sabri Baba Bihamdillâh ki islâmım... Naat

Derd-i hicrânınla bâr-ı dil doldum, kandım Ellahım meded,
Firkatinle dil-i sûzân oldum, yandım Ellahım meded,
Bâde-i hecrin ki içdim, kandım Ellahım, meded!
Çâresiz bir derde düşdüm, yandım Ellahım, meded!
Ben bu derdin çâresin var sandım Ellahım, meded!

Yakdı cânım leyl-i hicrân içre bir nâr-ı elim,
Esmedi subh-i visâlinden henüz bâd-ı nesim,
Dâğlar sînemde yer yer, merhemin bilmez hekîm,
Çâresiz bir derde düşdüm, yandım Ellahım, meded!
Ben bu derdin çâresin var sandım Ellahım, meded!

Derd kim, keyfiyetin bir nüsha tahrîr eylemez,
Dâğ kim, hiç bir muâllic re'y ü tedbîr eylemez,
Âh ü efgânım, niyâzım sana te'sir eylemez,
Çâresiz bir derde düşdüm, yandım Ellahım, meded!
Ben bu derdin çâresin var sandım Ellahım, meded!

Akmada cûlar gibi seyl-i sirişk-i iftirâk,
Lâle-i sîr-âba döndü zahm-i sûz-i ihtirâk,
Bir yana firkat gamı, bir yana derd-i iştiyâk,
Çâresiz bir derde düşdüm, yandım Ellahım, meded!
Ben bu derdin çâresin var sandım Ellahım, meded!

Şems-i âteş-hîze yol ver, vuslatın eyvânına,
İştiyâkınla boyanmıştır sirişki kânına,
Çâre sendendir, olursa yâre-i hicrânına
Çâresiz bir derde düşdüm, yandım Ellahım, meded!
Ben bu derdin çâresin var sandım Ellahım, meded! 

Erdoğan Arslan 1