الشعر♥

تراك اول مايقرب مارس.....ابراهيم فرج

قصيدة "أخر نداء" كلمات : ابراهيم فرج.. اداء : ابراهيم فرج ومحمد على

شعر بالعامية المصرية .. إبراهيم فرج

المعزوفة الأخيرة لبيتهوفن - إبراهيم فرج - شعر

قصيدة -سوبر يا لبّ- إبراهيم فرج

هذا المغفل أنا - شعر - إبراهيم فرج .

شارع ذكريات الشعر

- انا ..
مش واضح 
و مش كامل
ليا جزء فقدته من فترة
فيا ميل للحزن بالفطرة
عندي فوبيا من عدم خوفي
عمري ما استلسمت لظروفي
بس عمري ما كنت بغلِبها
ياما عرّيت نفسي بحروفي
دون ما أفكر صح و أحسبها
لو تجيني عينيكي هحاسبها
بالورق .. و الحبر من عيني
بالفراق والهجر و سنيني
بالدموع و الشوق و تدويني
للحاجات و الذكريات و زمان
و إن قدرتي تواجهي .. واجهيني
طلّعيني المذنب الغلطان
و إني كنت شيطان و كنت هلاك
أما انتي ..
فـ انتي كنتي ملاك
كان ناقصلك بس جوز أجنحة
لو قدرتي تحاربي .. حاربيني
هبقى أعزل و أوهبك أسلحة
إقتليني .. أو متفلتنيش
لو فلتّي ..
يبقى أموت .. مصلحة
لو قدرتي تعاندي .. عانديني
إدي نفسك فرصة و إفديني
وِدّي نفسك .. قصدي وِدّيني
إفدي نفسك مرة و إديني
فرصة أسلّم نفسي أو أسلّم
فرصة أغمض عيني و أتكلّم
فرصة أعيط لما أتألم
من وقوفي فـ سِلّم المعاناة
فرصة أشوفك لو هعيش بكرة
بس .. لا مش ه‍قدر أستناه
لو قدرتي تفارقي .. ما قدرتي!
و الفراق عمال يعِد سنين
كنتي بنتي يا (.....) و كبرتي
سيبتي ايدي لجل ناس تانيين
مش براقبك .. بس بتحسّر
مش هعودلك .. بس متأثر
قلبي زي إزاز و متكسّر
خايف أحلم .. حلمي يتفسّر
كيف ما قال لي مفسر الاحلام
قال لي : لو شوفت الحبيب ..
 هيغيب
قال لي : لو مَاسكك 
أكيد هيسيب 
خوفت أنام 
أو خوفت من قسوتك
من ساعتها يا (......) مَحْلِمتش
لما بانلك ضعفي
جَت قوّتك
لما جيتلك سِلْمي 
مَسْلِمتش
عدّى ليلة اتنين ولا نمتش
نمت تالت ليل "يا مين قدّي"
فُوقت أول مـ النهار شقشق
زارني طيفك سرقة على خدّي
زارني سيفك .. صدري مترشّق
كنت جايلك لجل ما استنشق
من هواكي يردّلي روحي
فاكرة ؟
كنتي بتيجي و تبوحي
و تقوليلي مستحيل أمشي !
قايمة نايمة فـ قلبي و بكيفك
لما جاتني الضربة موقعتش
مُت لما لقيتها من سيفك
لو قدرتي  .. دافعي عن نفسك
و أوعدك بـ براءة و أظلمني
و أعتبرني إني انا الجاني
و أرفض إني دفاعي يترافع
نفسي أبص فـ عينك ألقاني
نفسي نرجع .. بس مش نافع !
مش باقيلك شيئ .. ولا شافع
إني طول المدة دي لـ حالي
مش مصدق وضعنا الحالي
مش مكدب إن أنا بدونك
لو غيابك مرة أوحالي
إني أخونك .. عِند فـ ظنونك
أه بخونك .. بس مع شالِك
لما أنام ملفوف على رقَبتي
مش بلومك لما يوم سيبتي
بس يوم سَبتي شبه حدّي
بصحى ناسي فـ أي يوم إحنا
لو قابلتك قصد هتمدّي
لو قابلتك صدفة .. تمنحنا
نظرة أولى قبل ما تصدّي
عدّي جنبي .. نفسي ادوق ريحتك
نفسي ألمِس صوتك الدافي
أعذريني حواسّي بتهنّج
بس هـ أمسك نفسي .. لا تخافي
شكلي كان سكران و متبنّج
جيّ جري على الجراح حافي
دمي سايل .. بس ميهمّش
المهم الصدفة تجمعنا
فاكرة ؟
لما فـ مرة دمّعنا
لما سمّعتك #وحشتيني
الكتابة .. مهما كات لعنة
بس ألعن إني أقولهالك
شوفتي بعدك كام سنة هالك ؟
رغم ذلك بدّعي القوّة
الوحيدة شافتني من جوّة
رغم جوة مفيش حاجات غيرك
و الوحيد .. اللي إلتزم سيرك
رغم سيرك عكس مجرايا
فيه حاجات .. ناسياها جوّايا
لو سمحتي .. لمّي أشيائك
ولّا هي رواية و هوَاية 
إني طول العمر أشتاقك
و انتي طول العمر تقريلي
لو قدرتي تجيلي ..  لا تجيلي
مستحيل تستحملي ليلي
أو تشاركي الكون في تحويلي
من إزاز مكسور لـ زُهريّة
من عنب معصور لـ كاس ميّة
من حاجات بالفعل لـ النيّة
من ضمير بيموت لـ مهنيّة
مستحيل الليل هيقبلنا
أو يساعد مرة فـ لقانا
كنت ليكي مقام .. بقيت حانة
للي رايح جيّ يطّوّح
و اللي يرمي همومه و يروّح
 و اللي جاي و فاكرني مستشفى
و إن انا اللي هعالجه بسهولة
مش هلومك .. لستِ مسؤولة
مش بلومك .. لا بفضفضلِك
لو قابلتك مرة من فضلِك
خبّي عني عينيكي .. غمّيها
فيه مابينّا حاجات بسمّيها
"لعنة المشتاق" بتدبحني
فضّي فيا الحزن لو فاض لِك
فاضلي بينه و بيني و انا محني
و إختاريه .. لجلِنّ لا تميلي
و إرسميلي حدود كتير بينّا
والله لو حضنك يكون جنة
مش داخلها فـ يوم ولا عايز
نفسي نرجع أه .. و مش جايز !

#مش_جايز
#لو_قدرتي
#Ahmed_Shabana

لو قدرتي

هشوفك صدفة معرفكيش - ابراهيم فرج

انا مش هبيع الأمل للناس
ولا هقدر أبيع اليأس
ولا هقدر أبيع فكرة 
ممكن تتقلب بكره و تبقى العكس
ولا هقدر
أسكّت صوتي في دماغي و أقول له خلاص
ما عادتش مستاهلة
الدنيا صعبة ..إلعب السهلة
انت اللي بس مكبر الموضوع
بلاش تكرر خيبتي و غبائي
بطّل تصدّق و انت هتلاقي
عينيك الغرقانين من بكره قاطعين الدموع
بطّل كتابة
و بطّل كآبة
و بطّل تقول عالعبط إخلاص
مش كل صاحب حلم يبقى صاحب حق
....
بس تفضل حتة فيا تقول لي لأ
قلت مش زي ما قلتش
مش كل طرح الدنيا كلام
ولا كلنا ولاد النسيان
لازم هتفضل
ف الدنيا حاجة نقطفها 
بحاول اوصفها
كأني بوصف لواحد أعمى ايه الألوان 
نهنهات الامهات من آخر الطرقة في المستشفيات بالليل
ريحة الطبيخ على السلّم  و ريحة اللب جوه الفصل
عرض جوي لخمسمية حمامة في السما من غير ما يتفقوا
 صوت اليمام في المناور ويّا اول خيط نهار
ريحة كولونيات الغلابة في المواصلة الصبح
صرفيات الاكسوجين لمعلبات المترو مع كل فتحة باب
اول ظهور للملح في طريق المصيف
فرحتك بالنفق و انتا عيّل صغير
و فرحتك بالنوم و انت عيّل كبير
مش كل حاجة بنعرف نحط كلمة مطرحها
الدنيا لسه فيها حاجات ما بنعرفش نشرحها
طول ما موجودة.. الدنيا ما اتهدتش
ما يصحّش آجي للدنيا كأني ماجتش
فيه شفرة جوانا لسه ما اتفكتش
و قدامها لسه كتير

لسه كتير - مصطفى إبراهيم

lyrics/
This is for every time you told me speak 
ايوة، انا بفكر فيك 

This is for every time you told me express 

مع الأسف، ايوة انا بحس 

و حاسة ان انت ورطة كبير
 وقعت نفسي فيها 
عن غير عمد 
كل ما أقول ابعد 
الاقيني بغوط اكتر 
و فجاة من غير مافكر 
الاقيني بقولك ها 
هنروح فين النهارده 
طب ايه رأيك في المعارضة 
طب ايه رأيك في كل حاجة 
بتحب قهوتك على الريحة ولا سادة 
طب ما تيجي نطلبلك واحدة 
و نسهر نتكلم شوية زيادة 

بحب العيون العسلي 
ااااه  في العادة 
ماتسدقنيش انا كدابة
انا اقصد بحب عيونك انت، بالتحديد 
بحب اشوفك باصص بعيد 
في الولا حاجة 
و ببقى متأكدة انك شايف حاجة
كل الناس عدت و مالحظوهاش


و اخدها فرصة اني أبص عليك 
قصدي اتنح فيك 

Why are you so cute 
You’re making it hard for me 

فتلف و تلاقيني ببص على السما 
فأقلك اني بكلم ربنا 
باناجي
و انا في الحقيقة بقوله ليه 
ليه خليته irresistible
ليه ماكنش يبقى زي الكل 
ممل 
و يتعصب من الزحمة 
بيشوف ان السواقة حاجة رخمة 
مش رحلة 
اهم حاجة عنده شغله 
مش انه ينبسط 
و زي الكل يمشي ينتقد 
كل حاجة 
البنات و زبالة الشوارع 
مش يقلي تفتكري ايه قصة المنديل ده الي واقع
و مين الي رماه 
تفتكري جواه رقم واحد 
كتبه لواحدة عجباه 
ولما مسكت أيد حبيبها 
زعل فكرمشه و حدفه

ليه يا رب ماخلتهوش زي الي قبله 
تفكيره عادي مايشدش
ليه كل كلمة يقولها تدخل جوايا تدوش

و لما نادتني و بصيت عليك 
لقيت الشمس عكست 
نور غريب في عنيك 

بجد ....

لا و الاجمد اني الاقيق من توهتي ضحكت
فا أبص على غمزاتك و أقول كده كملت 

بقلك ايه انا قايمة امشي 
فا تقولي يا بنتي ماتهدي، مااحنى قاعدين 
لا مرة تانية بقى بعدين 
أصلي هموت و انام 
يلا سلام 

انا النهارده انا جاية أقولك 
اني عمري معاك ما نعست
و لما كنت تقولي مالك 
أقولك مافيش يا زفت 
ببقى نفسي أقولك 
يا حبيبي 
بس مابتطلعش 
ده غير عشان انا دبش
عشان انت بتربكني 
و لما بالغلط بتلمسني 
بحس بكهربة ماشية في كل جسمي
دا انا ممكن ساعتها انور
انا مش بافور 
ده بجد 
كل مرة بنكون مع بعض 
بحس ان انا اخف
كان مزيكة محمد فوزي دايرة جوايا و مش بتقف
انت مستوعب كم البهجة
يعني simple و بأبسط لهجة
بحس بحاجة حلوة  
كان عبد الحليم غنالي انا أغنية الحلوة

ده بجد مش كلام 
صدقني 
ولا مرة سبتك و قلت نعسانة 
روحت و عرقت انام 

انا بروح من معاك و بعد أعيد فاليوم 
بطلع كل صورك و أعد اعمل زوم 
و ابتسم مع نفسي 
أعد أفتكر كلامك و طريقة مشيتك
بعدين أقول 
بس انسي 
نامي 
فأحاول انام و معرفش
و ارجع أفكر فيك تاني 



فا النهارده جاية أقولك اسمعني 
انا كل مرة بنوي 
اني أقولك اني حسالك حاجة 
اكبر من حبي للسفر بالبر
اكبر من عشقي باني أكون شخص حر 
اكبر من حبي لللون الأصفر 
اكبر من رغبتي في اني أكون 
فتاة الفستان الأصفر 
في اهداء ادونيس 
اكبر من حبي للتهيس 
اكبر من حبي للسينما و ال lipstick 

الاقيني بقولك ازيك 


فا انا النهاردة جاية أقولك 

ازيك، ازيك، ازيك او

لصاحب العيون العسلية

رسالة فان غوخ الأخيرة بصوت خالد عبدالعزيز

ماذا بينك و بين نقطة الصفر لترجع إليها كل مرة.

الشعر♥

Essam S. Mohamed