كلها أيام

غربة 
نص: فادي ايمانويل
ناي: عبد الله حلمي 
اداء: أشرف شعلة

متجلجيش يا أماي، مهعاودش وَاخري. ربنا حارس الطريج يا أماي متخافيش.
راح أعاود من الجامعه للدار، و معصادجش أغراب، و عَنْحر كتبي نَحر و مش عَهَوَب نواحي البحر.
ما أنا دايج غدره يا أماي، خطف وِلد جليله و عامر من سنتين. هو و أصحابه التْانين اللي إتدلوا معاه م الجَطر.

إسكندرية مليحة و زينة و ريحة الموج مِغَرجة هِدمان عُشاجها. خابره يا أماي مِسعده جارتنا، والله بَتوُحشَها و بَتوُحش خَبيزِك و خَبيزها.
يوماتي ليلاتي مع ضي الجَمر عـ الميِ تزورني .. و يوجعني فُراجها.
إهنِه كِلاتها دروب أسفلت و الخَلج كتيرة كلاتهم فوق بعض. ما يليج يا أماي أعزف عالناي كيف ما تعودت عَشَط الترعة تحت جميزة عثمان في الفجرية.

أمانه عليكي ما تشيليني هم، و متطيري من عيني النوم يا نبع الضي. أمنتك أمانه يا أماي ما تهمّلي دواكي، أنا وصيت منصور الصايغ يمر عليكي عغربة الشمس يوماتي.

عبعتلك جوابات يا أماي يامه، وعد عليا. بس و رحمه ستي ما تنسي توّكِلي البجرة الغلبانه. دي شايلة و مماشيه الساجية و مدوره الجيراطين اللي حدانا.
مسك ختامي ليكي سلام. و بَبَوُس يدِك يا أماي لاجل تكوني راضية عليا يا نني عنيا.
في حفظ الله.

F Emmanuel

Popular tracks