عيون تشبه عيون أبويا وأمى
تعرفها وسط الزحمة
صافية زى الجناين والشجر
نظرتها دافية تطمنك
تِلقُفك ساعة الخطر
تلاقيها بتحضنك
تغمرك وِد وحنان
عيون تشبهني
في الرزانة وفي الجنان
فى دنيا تانية 
أو زمان غير الزمان
كنت بردو هعرفك
ألحقك ساعة ماتغرق
تسندني ضد الهوا
من بين كل الوشوش الباردة
أناديلك بالأمان
أو احوش عنك فى عركة نتضرب فيها سوا
كنت هتديلك إجابتى جوا لجنة الإمتحان
كنت هفتحلك السكة وانا عسكري حايش مسيرة
أو تفوقني بعد حلقة ذكر في الليلة الكبيرة
كنت هبص لنفسي في مرة ألاقيني أنت
أو تبص لروحك في مرة تلاقيني أنا
كان لابد هنتكعبل في بعض في حركة جدعنة
تضمنا تخشيبة أو مصيبة أو حتى وقفة حق
أو نتحط في أى جملة مفيدة 
فيها كلمة لأ

Fares Ahmed Shady