شعر وغنا

YouTube - آخر كلام - فرقة الشارع - على إسم مصر

اصحى يا سيدى - سامية جاهين وآية حميدة - كلمات أمين حدّاد - ألحان محمّد عزّت

دوشة - حسن المنيلاوى و سامية جاهين و آية حميدة - كلمات أمين حداد - ألحان محمّد عزت

طلعت أدب نزلت أدب
و طالع نازل أئزئز لب


طلعت أدب أدب دبيب
و نزلت أدب سبع سراديب
أنا اخوك الدب مانيش الديب
ومفنجل عيني تقول دا أديب
ولا دا عاشق داب في دباديب
الحلو إلّي بيغطس و يئب
طلعت أدب نزلت أدب

طلعت أدب البط ما بضش
نزلت أدب أخوك ما أبضش
أنا باستعبط و ما بستعبطش
أنا بتلخبط و ما بتلخبطش
أنا صاحب رقه و صاحب تتش
 تزفّر بوئي و لا أسب
طلعت أدب نزلت أدب


طلعت أدب برجل و إيد
و نزلت أدب و عيشه بتإيد
ريحت رقبتي من التحويد
و عملت صغيّر قلت يا سيِّد
إن كانّك مش شايف لبعيد
إعمل زيي على ضفرك شب
طلعت أدب نزلت أدب

طلعت أدب السئف إترج
نزلت أدب البير إعرج
العالم ماله العالم وج
و يا حبيبي كان طعمك فج
إن كنت حبيب أنا برضه مُحب
طلعت أدب نزلت أدب

طـــلــعـــــــــــت أدبّ ولا الأمــــــراء
ونــزلــت أدب يـــا وز عـــــــــــــراق
يـــا حياتي وموتْي ولـقا و فـراق
ويومـــأتى   بـتاكلْ  مني  في  راق
آخـرتي  شـمــاعه  في  قصــر فـراء
مــا حـاســــيبش غير الفرو المجربّ
طلعت أدب
طلعت أدب نزلت أدب
و طالع نازل أئزئز لب

طلعت أدب - امين حداد وكورال جمعية الصعيد

كلمات وأداء : مايكل عادل
ألحان وتوزيع : شادي مؤنس
غناء : دياب أبو زياد وشادي مؤنس

العازفين
احمد عبد الستار - كمان
جون - ناي
ايمن صدقي - ايقاعات
حسام ناهد - تشيللو
شادي مؤنس - عود

الكلمات

قبل الكلام ما بيتكتب وبيتشطب
قبل اختراعهم للدقيقة بكام دقيقة
قبل اختراع الكدب والسكك الغلط
قبل أمّا أصلا نكتشف إيه الحقيقة
قبل اكتشاف ان الحنان شبه العَبَط
وان الطريق المستقيم بين نقطتين أصعب طريق
كان اللي باقي في الحياه أبسط كتير
من إن ضحكة تتسرق تصبح مفيش
أو إن غيرك يقتلك علشان يعيش
علشان نعيش..
لازم نكون وقت اللقا
فاكرين معاد الافتراق
لازم تراعي فـ وحدتك أمَل اللقاء
لازم تراعي في الزحام
عدم الدوام
واعرف بإن الاشتياق قد لا يدوم
وانك في اخر التجربة
لازم تقوم..
علشان تعيش..

.. علشان تعيش
بطّل تفكّر في الخلود
أعصر في أوقات الفَرَح
والابتسام وقت الأمَل
فكّر في إن اللي بيمشي
لن يعود
أعصر في أوقات الحنين قبل اللقا
فكّر في إن أكيد فيه ناس متشوّقة..
علشان تعيش..

علشان تعيش..
قابل جنونك بابتسام
قابل معاركك في الحياة من غير سلام
علشان تعيش..
اعرف بإن قضيتك ليها تمن
وهاتدفعه
مهما يطول بيك الزمن
علشان تعيش..

علشان تعيش..
إنزل على الأسفلت وامسح دمعتك
والمس دماء سالت عشان حريّتك
واحجز مكانك في الصفوف
حدد ملامس كف إيدك في الكفوف
يحرم عليك تلمس كفوف الخائنين
حافظ على الفكرة اللي عاشت من سنين
حافظ وعدّي الاختبار
علشان تعيش..
علشان الدنيا بتقلب فجأة بدون إنذار..

"علشان الدنيا بتقلب فجأة بدون إنذار
وعشان الناس علشان الجنة
جابولنا النار
ولأن العالم فجأة بيفضى وتبقى وحيد
وعشان الضلمة وشيل الهم
ولإنك لو هتروح للشارع
تغرق دم
والزحمة هتخلص من حواليك
من غير أعذار
والناس لو شايفينك طيّب
هايقولوا حمار
ولعدة أسباب اتقالت..
هتروح لبعيد
بالتالي هتبدأ م الأول..
فأكيد مشوارك هايطوّل..
وحنينك لحمارك ياخدك
على هَمّ جديد..


علشان تعيش - مايكل عادل وشادي مؤنس

"نهارك زي قلبك يا عمو سيف. مستنيينك تقوم تكمل معانا المشوار وتملا حياتنا "قصاقيص ورق

رسالة لعمو سيف - قصيدة قصاقيص ورق

قابليني

آدى أيّـــــــام العجـــــــب والمـــــــوت
جـــات بســـرعه زى غمضـــة عـــين
ليــــه ماقلــــتش زىّ لمْـــــح البَصَــــر
كنـــــت باتقلّـــــب علـــــى الجنبــــــين
والكــــابوس مـــن كـــل جنــب يجيبنى
زىّ أعمـــــى يحـــــسّ لمـــــّا يجــــسّ
ألقـــــى نفســــــى والاّ اشوف نفســـى
بالتفـــــــت مـــــــن آخـــــــر الــــــدنيا
الحميـــــــر بتجرجـــــــر العَربَـــــــات
الســـما اللــــى تحـــت منهـــا حابــات
عنــــد كـــوبرى أبـــو العـــلا بتشـــتى
أنكمــــش فــــى جتّتــــى مـــن البـــرد
لسّــــه حــارجع طفـــل تحـــت المطــر
وأنحنـــى ع الأرض وافضــل عجـــوز
اتوهمـــت الخـــوف دهســـنى الخطــر
كـــــل شـــــئ إلا الخيانــــــه يجـــــوز
ألـــبس التـــوب اللـــى مــــش تـــوبى
أعمـــل الممكـــــن مــــع المســــتحيل
أمشـــــى زى الخنفســـــه و البــــــــد
جنــب حيطــــه فـــى ركـــن ع الســـلّم
الحجـــــــــر الاصـــــــــفر بيتــــــــــألّم
فيـــه أثـــر للعشـــره مهمــــا تهــــون
أقبـــل الظلـــم اللـــى فــــى الأشــــياء
والليـــــــالى بخـــــــدّها المـــــــدهون
والحيــاه والنــاس وحتــى فى نفســى
واقـــرا فـــى الجرنـــال كـــلام تــــانى
وانتقـــل فـــى الماضــــى واســـتغرب
وابكــــــى ع المســــــتقبل الفـــــــانى
واحمــــل الضلمــــه علــــى عينـــــىَّ
وانتبـــه مــن نـــومى واســـمع نعــى
الزميـــــل جـــــوده ســــعيد الـــــديب
إســـمه بالكامـــل يـــا فجـــر الطيـــب
اللــــــى ضــــــاعت مَّنــــــى أيّامـــــه
وآدى أيّـــــــام العجــــــب والمــــــوت

أيام العجب و الموت (جودة سعيد الديب)- بصوت فؤاد حداد

تسجيل : أحمد عادل 
حفل تأبين رضوى عاشور من قبل 9 مارس بجامعة القاهرة 18 يناير 

الكون قفل فجأة سابني في العدم واقف
نهر الشوارع فضا، نهر البشر ناشف
يا أمي حق البُكا يبقى حزام ناسف
يطبق الأرض زي التوب حيطان وأثاث
نازلة المظاهرة بعصاية وراسها معصوبة
تخطي فوق الرصيف بمساعدة وصعوبة
الشمس ماشية في مظاهرة وابنها محتاس
خمسة وتلاتين سنة بتحارب العِلة
خمسة وتلاتين سنة ولم تنكسر إلا
لما ظهر وكأن الطيبين قلة
وأما الدهب في الميادين اتبدل بنحاس
رضوى عاشور إقتراح بوجود بشر أحسن
بسمتها بتقول يا ناس جربتها وأمكن
لو يخذلوها أشوف وش الصباح يحزن
وأبوس إيديها أشوف إيد الصباح تنباس
القمح في إيديا ليه يا طيري مش شايف
يقولها أنا شايف إنما خايف
القمح طيب وأنا قلبي عليه لايف
بس الرصاص في الهوا و الصيادين أنجاس
تكسر خاطرها الطيور والقمح في إيديها
خايفة الطيور مـ الرصاص مهما تناديها
فتقوم تروح للطيور هي وتهيدها

أرزاقها في الجو من غير ترس أو متراس
وكسر خاطر نبية مش حدث عابر
يوم القيامة بدايته كسرة الخاطر
اتحضروا لكرب له أول مالهوش آخر
صفحة تاريخ كاملة نحرقها من الكراس
شر السلاح البُكا خير البُكا بالسلاح
بكرة يا أمي نجمع من سيوفنا الصباح
وبكرة راح ينفرض فرض اللي كان إقتراح
مش وقت ندن لناس طارشة وندق أجراس
الثورة لو قادها أهل الحكمة مبتنجحش
يبدأ علاجك بإعدام الطبيب الجحش
أصل الشهيد لما يرجعلك هيرجع وحش
وإذا الحسين اتقتل يصبح أبو العباس
يا أمي يحيا الحزام الناسف العادل
يا أمي بيسوي بين القتلى والقاتل
يا أمي ويريح الاتنين من الباطل
ويشرّب اللي سقونا المُر نفس الكاس
السلطة تشبه شعارها نسر واخد قلم
على الرتب والطقية والجواز والعلم
يا تدبحوه وتنفدوا يا تعيشوا بين الأمم

بين الشهيق و الزفير تستأذنوا الحراس

رضوى عاشور يا فلسطينية مصرية
خطوط جبينها وخطوط كفيها حُرية
لو في سلاطين بتسعى للأولوهية
هي أولوهية جاية تسعى بين الناس
مطرح ما تبقي هوا مطرح ما تبقي نور
مطرح ما تبقي مفيش خاطر يبات مكسور
اللي قعد مغترب واللي مشي مسرور
عقبالنا يا شُهدا عرسان بلا أعراس
خُديني جنبك يا أمي لأرض فيها مكان
وفكرة الأنبيا واردة وفي الإمكان
غيري ينفذها يمكن بس أنا تعبان
خديني جنبك أبوس إيدك يا تاج الراس


قصيدة تميم البرغوثي عن رضوى عاشور ... الكون قفل فجأة سابني في العدم واقف

كلمات صلاح جاهين, ألحان سيد مكاوي
أنا دبت و جــزمتى نعلهــا داب
من كتر التدوير ع الاحـــــباب
يا سلملم لو أعتر فى حبيـــــب
ده انا أرقص من كتر الأعجاب

أنـا قلبى مـزيكـه بمفـاتيــح 

من لمسـة يغنى لـك تفاريح 
مع إنـى مـافـطرتش وجعان
و مـعـذب و مـتـيم و جريح
باتنطط واتعفرت واترقص كدهه
! كدهه ! كدهه ! كدهه
! كدهه ! كدهه ! كدهه

بـيانولا و ألابـنضـه و حــركـات
أطلعى بقى يا نصاص يا فرنكات
أنا عازمك يا حبيبــى لما ألاقيك
على فسحة فى جميــع الطرقات
نتنطط نتعفرت نترقص كدهه


البيانولا -غناء صلاح جاهين

رااائعة تميم البرغوثي في مدح مصر
أتحداك هتسمعها أكثر من مرة

شعر وغنا

fayrouz elsawy