قال الرغيف ابعت لي جوعك

شعر

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
 يدوسه عَجَل الميكروباص
 النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
 مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
 "العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
 القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
 أبو طلق من غير صوت
فيه الجيوش ما بقوش
 لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
 ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
 و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا



www.facebook.com/Mostfa.Ibrahim

هندسة صوتية : رفيق عدلى
One Take Studio

البنكنوت - مصطفى إبراهيم

خلي بالْك معايا ما تسوقش الهبل
بهلوانْ ؟ مش بهلوانْ ، فار ؟ أيوه فار
واللبن فار
وكان زمانْ الجماد له في الحبل
وتمخض الجبل
فولدني!
حد قال يا فار انت طالع منينْ ؟
يا فار أبوك الجبل ثابت وجبت منينْ الوسوسة
تكفر حبه أكفر حبتين
تاخذ خطوه قدام آخذ خطوه كسكسة
تشوح لي أشوَّح لك
سنّ بسنّ وعين بعين
وفْن بفن أصل الفنّ أوله نسنسة
توِّجني مَلِكْ
بارك للأرض وبارك لي
الحشرات سبع تاشرات تحت رجلي
انا من فصيلة أصيله
أخويا الوطواط أعجوبه : حيوانْ وطير
واخويا القنفد أعجوبة : حيوانْ ونباتْ شوكي
وانا اللي مش أعجوبه لكن انا اللي فيهم
انا المشتهرْ المنتشر وكل الدنيا جيراني
انا   فار فيراني
في قلبي كلاكيع لغم ونغم
والاَّ بلاشْ
خلينا في الوصف البراني
انا عيني اللي يمين يمين
وعيني اللي شمالْ شمالْ
والحول حواليَّا
حنختلف في دي ما نختلفش في رجليا
قول أربعه
انا الفار الفيراني اللي جلدي حرير
وفْروى قشعرير
وأسناني مسرسعه
بتشق من بوز
ما تقولش لما يبوسْ
إبرة الدبوسْ
وداني مطرطقة من غير حموريهّ
انا مش بسيط زى ما تظن
انا جحرى مش خن
انا لي ناب مملوك وناب انْكشاري
استني
الوصف لسه ما خلصشي
نسيت ديلي اللي طوله خمسة اعشاري
يعني نُصِّى
ويادنيا بصىّ
حارقص وارقـَّص
وخيالي متقصقص
على الحيطانْ
****
والليله دي بنت عرسه يا ابن آوى
شوفْ دلعها حضن صدّ وحضن آوى
رايحْــه جـايه لعب ميهّ في حوض نقاوة
بــسّ قــــولــــوا يــا دراوشــــــــــــــــهْ
رقصـــى إسمــــــــه دوشــــــــــة روشة
أو منــــاوشــــــــــــه أو شــ ..  أوشــ ..
أو شقاوهْ
اللــــــيه دي القــط بايـــــــت ع البلاطهْ
احْــــــنا كــــــنا أتىن وجـــا تالت تلاته
قــــال له ضد الموتْ ما تنفع الاستماتهْ
بــــــس قـــــولــــــوا يــــــــــــادراوشهْ
رقصـــــى إسمـــــه دوشــــــــــه روشهْ
أو مناوشهْ
 أو شــ ..  أوشــ ..
أو شماتهْ
ســاقطه قدامي ومن غير غشّ اراها
دنــــيا تفـــاحَه زباله مقشراها
مــــن شراها باعها من باعها شراها
بــسّ قـــــولـــــوا يـــــــــــــادراوشهْ
رقصــــى إســـــــمه دوشـــــه روشهْ
أو مناوشه
 أو شــ ..  أوشــ ..
أو شراههْ
تنـــكمش م البرد تغطس في العطارهْ
وأمــــا تدألــــج بتدألـــــــــــــج بَطارهْ
يـــا بـــني آدم ولــــك برضه الصدارهْ
بــــسّ قولــــــــــــــــوا يادراوشـــــــهْ
رقصـــــى إسمـــــــــه دوشــــه روشهْ
أو مناوشه
 أو شــ ..  أوشــ ..
أو شطاره
قلـــت إيــــــه الساعه واحدَه إلا ساعه
قلــــت صـــــاحب كرش بيحب اللكاعه
قلــــــت نـــص الليلْ لفرسانْ المجاعه
بـــــس قــولــــــــوا يــا دراوشــــــــة
رقصـــــى إسـمــــه دوشــــــــه روشه
أو مناوشه
 أو شــ ..  أوشــ ..
أو شجاعه
***
ولا حد يفهم في الشجاعة
زى الطاحْونة الجعجاعة
قال انت أول خلق بتسيب السفينْة
خاين؟ ..لأ
خايب؟.. لأ
خايف؟ .. آه
يا بنت يا نعناعة
أما مش طالع أبيع جرانينْ بالْليلْ
انا طالع آكل أقرض انتش انتشي
واضرب الأخماس في الأسداس
أضرب الحماس في الاحْداث
الحركه بركه
سكرانْ؟ يمكن سكرانْ، خايف؟ أيوه خايف
وسلام على الخوفْ مَلِكْ الاحْساس
سلام عليه متراس
وسلام عليه فرّاس
سلام على الفار اللي بيلْعب في عب الفار اللي
بيلْعب في عبّ الناسْ

رقصة الفار- بصوت فؤاد حداد

شَرع التسالي- بصوت فؤاد حداد

إكبَر يا ليل - بصوت فؤاد حداد

من ديوان - "نور الخيال و صنع الأجيال"

ياسامعين : أبناء بلد واحده

تحت السما الواحده وياما جرى

مرت سنين ع الدنيا متقدره

الغرب سماها العصور الوسيطه

ونظر وقال كان الزمن مظلم

أما الحقيقة البسيطة

بتقول فى دار الشرق

مهما جرى ومهما يجرا

من أول تاريخ الهجرة

كان عندى فجر أنشق

نوره فى عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا مانزل من السرج ونصب خيمة

سهل الدموع الا أبتسام الراضي

مايل بجسمه لأستماع الأراضي

وعلى العيدان الطرية

ايديه نديه كيف أيدين الفارس الغارس

هذا الذى رد الثغور البهيه

وبنى باسماء الأئمة المدارس

وحضر مع الخصم لمقام القاضي

وأعاد الى الأم الصليبيه ابنها

أما عن المنكر نهى

وأما فى ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

حامل لواء الفتيه والأجناد

فوق الخيول المسرجات الجياد

وهى ليله من ليالى ربيع

أو هى ليله من ليالى جماد

القاهرة أولى رايات الجميع

عند المقطم كبرت للجهاد

يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى.

************

الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض بتتكلم عربى

***

الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض بتتكلم عربى

***

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض بتتكلم عربى

***

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض بتتكلم عربى

***

الأرض بتتكلم عربى حتى البور

بنت الساقيه والطنبور

حتى فى بطون الأرض قبور

الأرض بتتكلم عربى

***

الأرض بتتكلم عربى بوجد وشوق

الفرع اللى يهم لفوق

لأجل الجدر يشم الضوء

الأرض بتتكلم عربى

***

الأرض بتتكلم عربى جدورها جدود

مد اتوسع زى العود

انت الباكر والمولود

الأرض بتتكلم عربى

***

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض بتتكلم عربى

لما العواطف تكتمل بالعقل
الأرض أطيب من مزاج الحليب
والأرض هى الحاكمة بالعدل
بين ابنها والمستبد الغريب
الجبارين اللى احتموا بالصليب
داسوا على عيسى وكتاب المحبة
عملوا الدمار والقتل والتخريب
والأرض صنعتها الأمل والبشاير
والشمس دوّاره عليها تشاور
تاخد وتدى فى خيال الشاعر
تلقاه عجب فى الدنيا هلل وراج
فى الشام ومصر تنادت الأبراج
الفتح تم فى ليلة المعراج
صلوا على طه الرسول الحبيب
أفتح أيدىَّ لفوق والاقى المجيب
يا قاهره نجومك ملاليه
فيها الهدايه لآخر المعمور
أما رياحك حامله ليه
صوت المرتل فى آيات النور:
” نصرٌ من الله وفتحٌ قريب “

الأرض بتتكلم عربي - بصوت فؤاد حداد

مره واحدْ قال لابوه جوّزني يا بابا، قال له:
يا ابني دا الجواز يكلف كتير، – يكلف إيه يا با؟ قال له:
يكلف سَمْنه ومَمْنه ورزّ ومزّ وجهاز ومهاز، قال له:
خلاص يابا، النصّ بالْنصّ، عليك الرُزّ وعلى المُزّ،
عليك السمنه وعلىَّ الممنه، عليك الجهاز وعلى
المهاز، … إضرب مهماز يا إبليس وغني.
البني آدم يا بتنجانْ
عايز يبقي علىَّ الرز عليه المزّ
علىَّ السمنه عليه الممنه
يعيشْ الدنيا ويضمن جنهّ
                                 بالْمجّانْ
عايز يرجع صبي تلميذ
يمشي يهزرّ مع مزاميز
تضحك في خدودْهم
غماميز
يلبس شجري ويركب
مجرى
عقله الحجرى غوى
التقميز
البني آدم يا بتنجانْ …
شميت قلبه لقيته بارودْ
خدته أشعه طلع نمرودْ
جوه العقده لبد مفرودْ
ولا فلاَّيه رايحْه وجايه
في جبلايه ملانه قرودْ
البني آدم يا بتنجانْ …
أيها فرده عاوزه تعيشْ
تمشي تغني تقول تهويش
وحياة دقني لتصدقني
إبليس عتقي ما رقعنيش
وحياة داءها لتصدقها
وتفرقها من البراطيش
البني آدم يا بنتجانْ …
يا ما شكالي الحما والضُر
كلمني في ينفع ويضُر
بيني وبينه بدرت الدُر
بعد موالسه رفع الجلسه
قال يا أبالْسه خلفا دُر
البني آدم يا بنتجانْ …
البني آدم يا بنتجانْ
عايز يبقي علىَّ الرُزّ عليه المزّ
علىَّ السَّمنه عليه المَمْنه
يعيشْ الدنيا ويضمن جنهّ
بالْمجانْ

رقصة إبليس - بصوت فؤاد حداد

كلمات: أحمد فؤاد نجم
 ألحان : الشيخ إمام

الأولة آه
والتانية آه
والتالته آه
***
الأوله آه
والغدر لمن حكم
صبح الأمان بقشيش
والتانيه آه
والندل لما احتكم
يقدر ولا يعفيش
والتالته
آه
والحر مهما انحكم
للندل ما يوطيش
الأوله غربتي
والتانيه بلوتي
والتالته كلمتي
***
أرغول يا أرغول
يا أبو النغم موصول
شطره تجيب شطره
والشطره غنيوه
منظومه وحليوه
والسامعين أدرى
والسامعين أشتات
زي النغم مقامات
قسَّم وغني وهات
واملى المكان خضره بالفن والقدرة
والأوله آه
والتانيه آه
والتالته آه
***
يا عم يا قوال
يا أبو الحرير موال
كيفك
وكيف الحال
اغزل وسمعنا
واشطح مع النغمات
ودوس على المقامات
هات اللي عندك هات
لمن تشبعنا
دا حنا الحيارى دليل
مستنظرين مواويل
توصل مع المراسيل
والصهبة تجمعنا
صهبتنا صباحي
طول ما الألم صاحي
يا شوقي يا جراحي
يا حبي يا بكرة
يا صحبتي في الهم
يا شركتي في الدم
عزوتنا
لو نتلم
ونغني للفقرا
أخضر خضرضر مال
للعشق والموال
وكان أصيل الخال
لكن فقير الحال
شد الرحال في الحال
جاب البلاد رحال
ينزف على الأرغول
دم الصبا سلسال
أخضر خضرضر مر
على كل بحر وبر
داق الشتا في الحر
والعشق له أهوال
رجع صاحبنا حزين
يقعد مع المساكين
ويغني للعاشقين
ويقسم الموال
يا ليلي آه يا عين
يا عم يا جمال
ترعى جمالك وين
وأنت فقير الحال
يا ليلي آه يا عين
والمرعى للأندال
والخطوة للخيال
يا عم يا جمال
يا ليلي آه يا عين
يا عم يا جمال
 والصبر مهما طال
ما حينفتلشي حبال
ألزم قلوب وإيدين
يتمدوا ع الشطين
ويعمروا العيارين
ويطخوا راس المال
والأوله آه
والتانيه آه
والتالته آه

الشيخ إمام - على الأرغول

الشيخ امام _ بستنظرك

                              

العطش يحلى مع الميّه - بصوت فؤاد حدّاد

صلاح جاهين - الشاى باللبن

الشيخ إمام عيسى - أحمد فؤاد نجم

******

شال الهوى بينا
حط الهوى تاني
واحنا والسفينة
في بحر الأماني

عمّ ياللي ماشي
ع الشط القريّب
قولّي وانت ماشي
لأه ولا طيب

حِبي راح ماجاشي
مش هييجي تاني

شال الهوى بينا
حط الهوى تاني


شال الهوى شاله
بان المستخبي
شاف قلبي ناداله
يا عيني يا قلبي

حط الهوى شاله
خبى السحر عني
هو الهوى ماله
داير باله مني

كل ما يلاقيني
أشوف عينه تراعيني
كأنه بيناديني
أفوت أهلي وجيراني

شال الهوى بينا
حط الهوى تاني


شال الهوى شيلة
حط الهوى حطّة
هما يوم وليلة
كان فَرَش وغطّى

شال الهوى بيّا
من بين الحبايب
حط الهوى بيا
وأنا قلبي دايب

والتقتني ماشي
أدور مالتقاشي
واللي راح ماجاشي
فكرني ونساني

شال الهوى بينا
حط الهوى تاني


شال الهوى بينا
رُحنا عشمانين
حط الهوى بينا
جينا عطشانين

يا عُشاق بلدنا
يا ولاد الغرام
لا رُحنا استفدنا
ولا جينا بسلام

خدنا الهوى رُحنا
واحنا زي ماحنا
ورجعنا بجراحنا
وبحبّة أماني

شال الهوى بينا
حط الهوى تاني


شال الهوى بينا
حط الهوى تاني
واحنا والسفينة
في بحر الأماني

عم ياللي ماشي
ع الشط القريب
قولّي وانت ماشي
لأه ولا طيب

حِبي راح ماجاشي
مش هييجي تاني

شال الهوى بينا
حط الهوى تاني

شال الهوى - الشيخ إمام

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

قصيد عين شمس - من ديوان أيام العجب والموت بصوت فؤاد حدّاد
Ain Shams (Heliopolis) - Fouad Haddad

عين شمس - بصوت فؤاد حدّاد

الوهم يبدأ من الدقيقة 7:47  

▶ الشيخ امام عيسى - سايس حصانك

الحمد لرب مقتدر
وصلاة الله على البدر
و اللعنة نهديها درة
للقلب الصخرى الحجرى

فيمَ الاحسان وحتاما
فى قوم أكلوا أقواما
بالسحت و بالباطل عاما
وسنينا بصنوف القهر

قد فاض الكيل أيا سادة
و الجوع يبشر بزياده
و الهم لحاف ووسادة
يقلقنا الى وجه الفجر


قد كان الناس إذا شبعوا
طعموا الأقوام كما طبعوا
و اليوم تراهم قد تبعوا
سُبل التخزين أو الحذر

ففقير القوم إذا جاعا
و جميع عِزاله قد باعا
لا يجد العون إذا ضاعا
بل يسمع لوما كالصبر


وغني القوم ومولاهم
لا يمنح شيئاً إياهم
غير الترحيب برؤياهم
جوعى .. والجوع أبو الكفر

فيضيع الحب المكنونُ
و يشيع الحقد المجنونُ
و يذاع السر المدفونُ
بفضيحة سكان القصر


سبحان الله أيا بلدى
قد زاد القهر على جَلدى
فإذا لم تعطى ولم تلدى
سأموت غريقا فى قهرى

فالناس تئن من العيش
فى ثوب الفقر من الخَيش
والسيد يمشى بالبَيش
مزهوا فى ثوب الفخر

قد قالوا سلاما ورخاءا
فالخير الى الناس تراءى
فازدادوا غلاءً فثراءا
فكرهنا أقواس النصر

فالنصر اذا لم يعطينا
قوت الاطفال ويحمينا
فبماذا نفرح يا سينا
عدتِ أو غرتى إلى القبر!

ElShahateen - Sheikh Emam & Nabiha Karaouli ( CD Version ) الشحاتين - الشيخ إمام

انا والد الشعراء ..فؤاد حداد
أيوه...
انا الوالد ...
و ياما ولاد.. !!

إكبَر يا ليل - بصوت فؤاد حداد

Foad Haddad

Recent comments

محمود سلام أبو مالك

Amr Abdou

Related tracks