गीत ज्ञानेश्वरीतले ज्ञानेशांचे बागलाणी भाषेमधले अतिशय अनोखे असे काव्यरत्न आपणापुढे सादर करीत आहोत. परितोषने या गाण्याला अप्रतिम संगीत दिले आहे, त्यामुळे हे गाणं हेडफोनवर ऐकल्यास जास्त प्रत्ययकारी अनुभव देऊन जाईल. ज्ञानेशांनी हे गाणे बागलाणी गवळणीच्या भूमिकेतून रचले आहे. बागलाणी भाषा गुजरात आणि नाशिकच्या सीमेवरील भागात बोलली जाते.

मे दुरर्थी कर जोडुं । ता-हो सेवा न जाणुं ।।१।। मन्हा रे कान्हा मन्हा रे कान्हा । देखी कां न गिणा रे । मन्हा कान्हा रे ।।२।। तन्हा मराठा देश । मन्ही बागलाणी भाष ।।३।। घटि पटि विजार । खंडे भाले तरवार । बापरखुमादेविवरु जाण । ऐसें मन्हा कान्हा ।

या अभंगाचा सरल भावार्थ -

मी तुला दुरूनच हात जोडते,  तुझी सेवा कशी करायची, हे खरंच कळत नाही रे, माझ्या कान्हा ! तुझ्या अगणित रूपांची मोजदाद मी कशी करू रे माझ्या कान्हा ? अरे माझ्या कान्हा, तू महाराष्ट्र देशात राहतोस, मग माझी बागलाणी भाषा तुला कळणार का ? म्हणून मी तुला दुरूनच हात जोडते.घटामधले अवकाश घटाकार आणि वेगळे भासले तरी अवकाश हे एकसंध असते, किंवा वस्त्रांचे आकार व रंग विविध भासले तरी त्यातलेे कापड केवळ एका धाग्यापासूनच बनलेलेे असते. (त्याप्रमाणे हे विश्व वैविध्याने भरले असले तरी त्यामागे एकच मूलतत्त्व आहे.) 

असे अवघड तत्वविचार मला उमजत नाहीत. अशावेळी तुझे नाम हेच माझे ढाल तलवार बनून माझे रक्षण करतात. असा आहे माझा कान्हा !

गीत ज्ञानेश्वरी - मन्ही बागलाणी भाष

गीत ज्ञानेश्वरी म्हणजे ज्ञानेश्वरीतल्या अव्यक्त संगीताची अभिव्यक्ती ! Rendering of divine melody quietly present in Dnyaneshwari.

Geet Dnyaneshwari - गीत ज्ञानेश्वरी

Popular tracks