Aawedt Aini

ام كلثوم اسمها الأصلى فاطمة ابراهيم البلتاجى ، اتلقبت بـ " كوكب الشرق " و سماها المصريين " الست " و " ست الكل " و " ثومه " ( طماى الزهايره، السنبلاوين، مصر 31 ديسمبر 1904 - القاهرة، 3 فبراير 1975 ) ، قمة الغناء المصرى و أكبر مغنيه ظهرت فى مصر فى العصر الحديث و بتعتبر من أقوى الأصوات على مستوى العالم.
اتولدت فى قريه بسيطه من قرى مصر اسمها " طماى الزهايره " و حبت الغنا من صغرها فكانت بتغنى بين مروج القطن فى قريتها و سحرت الفلاحين بجمال صوتها و اتعرفت فى القرى المجاوره فبدأت تغنى فى الحفلات اللى كان بيعملها الموظفين و اشتهرت فى الاقاليم. راحت القاهره سنة 1920 ، و اعجب الموسيقيين بصوتها ، و كان منهم محمد القصبجى فشجعها بألحانه. الف لها الشعرا احمد شوقى و احمد رامى و بيرم التونسى و غيرهم اغانى و قصايد و اناشيد، و لحن لها الملحنيين المصريين الكبار رياض السنباطى و زكريا احمد و محمد عبد الوهاب و بليغ حمدى و سيد مكاوى. اشتركت فى كذا فيلم مصرى زى فيلم " سلامه " و شاركت بصوتها بس فى فيلم رابعه العدويه ، و اتلقبت بكوكب الشرق و ست الكل و ثومه.
غنت اناشيد و أغانى وطنيه كتيره الهبت بيها حماسة المصريين و دوى صوتها مع الأحداث اللى مرت على مصر فى عصرها فغنت " ذكرى سعد " و " منصوره يا ثورة أحرار " و " فرحة القنال " و " والله زمان يا سلاحى " و غنت " طوف و شوف " قدام جمال عبد الناصر و خورتشوف. و اتبرعت بحفلات عملتها فى باريس و فى اماكن تانيه للمساهمه فى المجهود الحربى بعد حرب 1967. كرمتها الدوله المصريه و اديتها جايزة الدوله التقديريه.
اتوفت أم كلثوم فى 3 فبراير 1975 و خرج ملايين المصريين يودعوها فى جنازه من أكبر الجنازات اللى شافتها مصر.

Egyghost

Popular tracks