الليل🐸😒

عاوزة أفرح بيك
لما أفرح بيكي انتي الأول
اتلم ياواد بتكلم جد
انا عاوزه اتطمن ليك وعليك
والنبي فكّك 
والله عبيط
انا يابني هاروح مش هاقعدلك 
محتاجة اشوفك ساكن بيت
هو انا يعني بنام ف الشارع ؟
ياحمار اديني عقاد نافع 
مش هتجوز انا كده مرتاح
أنا أمي كمنجة وحضن متاح 
ومشاعر معرفش احكيها
أنا متجوز أمي أساساً 
متطمن وانا عايش بيها
أنا كل ما بهرب منها واغيب 
بكتشف إن انا بهرب فيها 
الست دي حالة ماتتكررش
نتغير ..... هي ماتتغيرش
الدنيا تشيلها وتهبدها 
تطلع تنزل
تكسرها تقوم 
أنا أمي أنوثة بـ100 راجل
ورجولة بدرجة ناي مكتوم 
ساعة ماتوفى أبويا وراح 
شوفت ف نظرتها كلام وجراح
من يومها وهي عمود البيت
والآمر دايماً / والناهي 
الدوا جيبته ؟
فاكراني نسيت ؟؟
انا عارفه ان الدنيا تلاهي
احضنها تقوللي امشي يانصاب
بتغيب أيام زي الاغراب 
وتقولي مشاغل وأبصر ايه
انا أصلي بقيت شاعر معروف
قالك معروف .. بأمارة إيه 
كوافيلك تشهد يامهزأ
ف رضاكي يامزة أنا بتلزق 
واخرج على أوضتي شوية وانام 
واسمعها تصلي وتدعيلي
الواد تلفان
انما طيب .. وانت قريب
ارزقه رزق بحجم السماوات 
وارزقه بالخلفة ولاد وبنات
وتنام وتقوم تلاقيني مشيت
فتقوم تبدأ ترويق ف البيت 
أنا اسف جداً ياحبيبتي
علي سفري الدايم والاشغال 
علي كل كلام ضايقك واتقال 
انا مهما بدور وباعيش ف الدور 
باطلع وانزل واجي عليكي 
أنا راجل جداً 
ورجولتي تلخيصها ف بوسة علي ايديكي 
والدنيا ان ضاقت ف انتي براح 
وانا جنبك باتطمن وارتاح 
وخناقنا ساعات بيكون راحة 
وخصامنا كتير بيكون تلكيك 
الأم مكان لسكون الروح
وخضار من قلبك طارح فيك
أيوة ياماما ؟
عاوزة أفرح بيك

قصيدة عاوزه أفرح بيك

انا عندي احساس بالونس
واصل لدرجة الاكتفاء
و لأني بعشق وحدتي
مابخافش اصلا م الفراق
-----
و ساعات كتير بشتاق قوي
و ماتسألوش بشتاق لمين
أناقلبي لسة بدقته
متشال لحد يكون أمين
----
الوحدة لو من غيروجع
انا مستعد اعيشها راضي
لو قلبي محتاج طبطبة
انا ممكن احضن نفسي  عادي
من بكرة فرحي يهمني
ولا يوم هابص لجرح ماضي
و هلاقي قلب يحبني
و مكانه لسة في قلبي فاضي
------
انا كل حد مسكت فيه
سابني على خوانة و خذلني
انا وجعي بايديا مداويه
انا مستحيل اتخلى عني
..
أصل القلوب الطيبة
بيحبوا من غير اتفاق
ماتعشموش حد ب لقا
و مفيش في ايدكم غير فراق

الوحدة لو من غيروجع
انا مستعد اعيشها راضي
لو قلبي محتاج طبطبة
انا ممكن احضن نفسي  عادي
من بكرة فرحي يهمني
ولا يوم هابص لجرح ماضي
و هلاقي قلب يحبني
و مكانه لسة في قلبي فاضي
-------
الناس ماتفهمش العياط
غير انه ضعف وخوف تملي
بسيبوا من باب الاجتياط 
و الحب تمهيد للتخلي

الدنيا لو بردت شوية
انا قلبي عمره ما يبقى بارد
هاحتاج له هايطبطب عليا
و كل شيئ في الحب وارد

الوحدة لو من غيروجع
انا مستعد اعيشها راضي
لو قلبي محتاج طبطبة
انا ممكن احضن نفسي  عادي
من بكرة فرحي يهمني
ولا يوم هابص لجرح ماضي
و هلاقي قلب يحبني
و مكانه لسة في قلبي فاضي

الليل🐸😒

Hâidý Ëlâbd