اشكر علي انك مسافة بيضا بين الخلل والخلل ..

جدع مفتون 
----------
بحب البحر 
وكام شاعر .. 
زمان غنوا 
لأنه .. المصدر الدايم 
للحظة عشقنا الهايم 
ونبع اليود 
بدون مجهود 
يحول نفسّك المسجون 
لطير مجنون
طليق الفكرة والجناحات 
عفيف الذات 
كإن إله 
سكن جواه
وعاش بالسحر 
بحب البحر 
!
وأحب الورد 
لغة حيّة 
وكل الناس 
فدا الإحساس 
تشوف وردة 
تروح تهدا 
وأنا بشوفها فبتألم
لو إن الورد يتكلم 
ليشكي قطفته صغير 
ويشكي الشوك ويتحير 
ويشكي الوحدة وسط البرد 
بحب الورد 
!
وأحب البُن 
كوباية 
وأسافر .. عدتي معايا 
لا هي زيادة 
ولا سادة 
أنا والقهوة والكشكول 
نغم موصول 
قصيدة جديدة متعادة 
أنا والقهوة يا سادة 
نهد الدنيا والأحزان 
ونرسم بالأمل ألوان 
بتنشينا وتشجينا 
وتخلق م الشعور فينا 
حالات مليانة طعم الفن 
بحب البُن 
!
وأحب الفجر 
ف شوارعنا 
مين يسمعنا ؟
يانسيم يفتح للقلب براح 
ويسيب مصر بتهدا وترتاح 
يادقايق من زمن الجنة 
ياثواني بخور وبحور حنة 
يا أدان عطشان لشعاع نوار 
يا لبن صابح ياعسل يا فطار 
يافقير خارج تبني وتكدح
يا ولد بيذاكر وهيفلح
يا قدرة فول ع العربية 
يا عم الصول يا فواعلية 
يا بشر بتنام تصحى مسامحة 
يانفوس سامحة 
تشقى وتشتاق 
ربك رزّاق 
ربك رايد لبلدنا تعيش 
زي الدراويش 
حاكمين ع الليل بالميل والهجر 
بحب الفجر 
!
وأحب بلادنا 
شرق وغرب 
أكني في حرب 
نفسي أركع 
وأتوب وأرجع
من الغربة 
وأدوب صحبة 
وشاي بحليب 
وزيّ نجيب 
كتبها كنوز 
ومات محفوظ 
وأدوب حكايات 
ودايما ودني سامعة نجاة 
وأحب منير 
وأحب كتير 
في كل مجال 
غنى وموال 
يا مزيكا 
يا أبو تريكة 
وسير يعقوب 
بيشفي قلوب
ونجم ومصطفى وحداد
وعم فؤاد 
قاعود وإمام 
وصوت أنغام 
وسومة تعيش 
وبيرم والنشيد درويش
وأحب المولد النبوي 
وأحب أنوي 
عشان راح أصوم
في أول يوم 
وبحلف إن أنا صايم 
وغاوي مناكفة وعزايم 
في أرض البركة يا خضرا 
يا ست الكل يا عدرا
يا مارجرجس 
يا سيدي البدويّ 
يا عدويّ
يا ارض الجد والجدة 
يا بكرة يا جاي بالوحدة 
يا سحر يا بحريا مواني 
يا فن يا بُن يا أماني
يا برد ياورد يا معشّق 
يا هجر يا فجر يا مشقشق 
يا كل الكون 
جدع مفتون
عشيقك والهوى صابه 
بيوصل ود أحبابه 
عشان بكره وأولادنا 
هفضل أحب في بلادنا 
!
#بشرى_عجبان

جدع مفتون - بشرى عجبان

Oriental Jazz

انـا لسه تايه
الحان وغناد..نـــــــــــــوح
كلمات..حسن إسماعيل
توزيع..كاميليو

آنـا لسـه تايه.. الحان وغناء،،نـــــوح،،كلمات..حسن إسماعيل،،توزيع،،كاميليو

إن البرايا - من الليتروجيا البيزنطية - حسام حداد

من ساعة ما عرفت الكون ..وأنا خايف

من ساعة ما آمنت.. حزنت
من ساعة ما عرفت الحب .. دنت
سكتت الحزن في قلبي .. ونمت
وهويت تاج الشوك .. ضفرته
وكأنه ضفيرة بنت
خبيته في آخر حتة .. في قلبي

وقفلت عليه النور
وبنيت حوليه السور
واتناوب قلبي وعيني
حراسة عليه بالدور
وعشقته عشق الدبة .. عشق الأب
عشق عيون الليل .. والأصحاب
عشق الغربة للأغراب
ورسمت دواير حواليه
نشنت عليه وصلبته
سيبت عليه كل هواجس أهل الحي .. قومته
قوّمته من عز النوم .. فشنقته
صحيته من أحلي أحلامه .. ورفعته لفوق
قام شق حجاب السما نصين
نص في قلبي الصغير.. ونص في العينين
واختفي .. دورت عليه
وقلبت كل ضريح منقوش الإسم عليه
ما لقتش غير عقب سيجارة .. وحبة زيت .. وجنيه
وعرفت سر المهنة
سبيت .. وضحكت
ضحكتيني يا بنت الإيه
بصيت علي الماضي .. وعشقت عامود الملح
ونقشت عليه بيت إيل
سمرت عليه حلم الجيل
وعشقته بديل .. ومشيت
واديت ظهري للبحر.. وجريت ناحية فرعون
وكسرت عصاية موسى بجنون
ورمتها لفوق مطرة
وضحكت …وفي نفس الوقت بكيت
لما لقيت عين فرعون
كانت منتظراني أعدي البحر
كان نفسه يتوب
كان نفسه يغرق في النهر
ضحكت عليه .. وسبيت
وقلت بعلو الصوت يا إبن الإيه
قربت لحد مابقيت .. عيني في عنيه
وحضنته…
زي الطفل كان علي صدري
خبيته .. رجعته لبيته
وأنا عارف إن مخازن يوسف
كانت عايشة علي غيطه
حبيته
وركنت بظهري علي حيطه
بصيت علي الآب ونديته
ماسمعتش رد
وعرفت إن الغلطة
إني سندت بظهري علي حيطه
فضحكت .. وسبيت ..
وجريت علي بيته

المتفرج .. حسن اسماعيل

هامش التجلى - Hassan Ismail

Recent comments

Asma Hassan 🦋💎🦋

Hana Salama

RO7 W 7AYAT Ψυχή και Ζωή

Mona Karim

Related tracks