مترصصين
حبال غسيل من أعلى دور بتبُصّ
وعرقنا نازل والأرض شاربانا
في كل خطوة بنمشي فيها لابد
فيه ألف روح في خطانا هربانة
سككنا ياما مشيها ناس تانيين
ولو مش هنعرف أرض..
فهتبقى عارفانا
العالم الواسع في عينينا راح يصغر
في لحظة جايه ويعدي م الإبرة
-إحنا النهارده بنكتشف بكرة-
صَدَّق في كل حكاية مركونة
جايز تشوف الشمس.. تنفعنا
 مترصصين زي الغسيل ع الحبل
مش جهجهوني
لكن لنا معنى
فَتَّح عينيك شوف كل شيء حواليك
قبل أما ييجي الحر.. يلسعنا
محناش ملايكة
ولكل شيء حكمة
وإيماننا مشبَك لو نفوسنا تسيب
هوجة النهار عبّت قلوب كراكيب
من فوق سبع سماوات
لينا رب يحرسنا
قادر يخلي ختامنا أحلى كتير
قبل أمّا عَجَل المعصية يدوسنا

محناش ملايكة.mp3 من ديوان #سينما_الحلم #حسن_علي

النُص التافه م الدنيا
خايف م النُص اللي بجد
خايف لو شوفنا حقيقة الدنيا
نزهد زخرفها
ونزهد بعض

Hassan Ali Al-gayar