عارف !؟ انا عمري م حسيت بأمومتي غير وقت م حبيتك جدا ❤️ من قبل ما نتجوز حتى بدعيلك و الفجر بيدن💞 و كأنك ابني اللي انا بنته مسنوده عليه و حضناه بايدي😍 كل الموضوع ان انا عايزه اتدلع و اتحب ي سيدي 🤭

وكأنك ابني اللي انا بنته💜

#عنها
حلم ياما حلمت إني أنفذه , فضلت سنة كاملة بكتب فيها حوالي 12 قصيدة , كل قصيدة بتحكي عن وجع و عياط و ضلمة و خوف و قلق عنها ..

كلمات و القاء : شيماء عبدالله
كلمات الراب : شيماء عبدالله & كريم تايكو
غناء الراب : كريم المعداوي ( تايكو ) 
مزيكا و ميكس : الكويتي
تصميم البوستر : أحمد دولا
تم التسجيل ب زحمة ستور .

Lyrics : shimaa abduallah
Rap Lyrics : Shimaa abduallah & Kareem Taiko
Rap : Kareem El Ma`dawy ( Taiko )
Mazzika & mix By : El kwetty
poster Design : Ahmed Dola
Recorded At Za7ma Store Mansoura

Shimaa Abduallah account : https://www.facebook.com/Sh.H.Abduallah

Kareem Taiko account :
https://www.facebook.com/K.Taikoo
https://soundcloud.com/tai-ko-2

#عنها Shimaa Abduallah FT Taiko Prod.By:Elkwety

محمد ابراهيم - كان يوم عادي

عن حدوته الحب الأول .. اللى عمرها ما خلصت بالجواز .. و عن الصدفه اللى بتجمعنا بناس كنا ما صدقنا نسيناهم 


_________________________________________________________

كان يوم عادي

سبتها من ست سنين فاتو ..	
_دلوقتى انا متجوّز غيرها _ 

مبحسش ناحيتها بحاجه 
مع ذلك و الله فاكرها 
ده لإن الجرح اللى يعلم 
عمره ما بيروح ..

مشهد متعاد .. 
بصيت لمراتى و قولتلها 
" بابك مفتوح "

فتحت بابها و قفلته تانى
بس يا سيدى  
مسكت إيدى .. و قالتلى 
هنسهر فين طيب ؟!
" ودينا مكان يبقى قريب "
علشان الزحمه وضيق الوقت 
و عشان مش حابه ان انت تسوق
شكلك مخنوق ..
رديت " أبدا " .. مضغوط 
و الشغل مهوش ماشى ..
ردت ماشى .. 
ودينا كافيه نشرب حاجه 
محتاجه أحس ان انا جنبك 
_ انا نايمه إمبارح زعلانه _
جه الوقت تكفر عن ذنبك 
قولتلها خلاص قلبك أبيض 
فـ قالتلى لا أبيض ولا ألوان 
ودينى مكان ..
 ويكون هادى 
ولحد الآن اليوم " عادى "
و مكانش فـ بالى انه هيقلب 
بحنين و بشوق ..
نازلين بهدوء 
و لقيتها قصادى معديه ..
معقوله بجد تكون هى ؟!!!!

معقوله الست سنين عدوا 
وبقينا بعاد 
" مشهد متعاد " 

و انا قاعد باصص لمراتى ..
_مزيكا حزينه بصوت واطى _
تقتحم المشهد و انا سارح 
و الوقت بيرجع ست سنين 
و كأنى مودعها إمبارح 
قاعد فـ كافيه و فـ إيدى كتاب ..
تدخل مـ الباب 
و فـ إيديها إكياس فيها هدايا ..
و حاجات انا كنت جايبهالها 
_ الشك بيكبر جوايا _
مستنى تقرب و أسألها 
فـ تقرب   و انا دقات قلبى 
عماله تزيد ..
الشك بيتحول تأكيد 
و بتسحب روحى مع الكرسى 
و بتقعد و تكلم عينى 
بنظرات مقدرتش أحللها 
و بتمسك ايدى و تفتحها 
و تحط الدبله و تقفلها  
و تعيد فـ كلام معناه مفهوم 
و تقول " معلش  انا لازم أقوم "
و المشهد يقلب تراجيديا 
وسواد متغلف بكوميديا 
ودراما فـ فيلم إسمه الدنيا
وده حالنا وحال كل العايشين 
 الحب اللى بيكبر فـ سنين 
يتهد فـ جزء من الثانيه 
ومحدش عارف ايه الأسباب 
 ومحدش عارف مين مسؤل 
يقطع سرحانى سؤال ..
بيقول ..
مالك يا حبيبى سرحت فـ إيه ؟!
_ أبدا يا حبيبتى انا مش سرحان _
انا بس فصلت عشان تعبان 
و أتنهد و انا ماسك إيدها 
و أوعدها انى أفضل أسعدها
و أضحك و أسأل بتحبينى ؟!
فترد تقول " طبعا يعنى "
مع انك بتطلع عينى 
وبسببك قلبى بيوجعنى 
 
" نكديه بطبعك هعمل ايه "
و مشاكلك فـ الغالب تافهه
فتقولى اسم الله و نتعاير  
و أطلع مـ العلبه سيجاره
فتمد اديها و تخطفها 
و تقولى بلاش شرب سجاير
عارف ؟! .. 
انا عمرى ما حسيت بأمومتى ..
غير و قت ما حبيتك جدا 
من قبل ما نتجوز حتى ..
بدعيلك و الفجر بيدن 
و كأنك إبنى اللى انا بنته 
ومسنوده عليه .. وماسكاه 
فـ إيدى ..
كل الموضوع ان انا عايزه 
أتدلع و أتحب يا سيدى 
حقك .. و الله انا حبيتك 
حسيت انك فعلا بنتى 
مع انى مكنتش متخيل 
اللى أتجوزها تكون انتى 
ده لأن انا و انتى زمان كنا 
إتنين إصحاب يدوا نصايح 
يا بنمسك دايما فـ خناق بعض
يا بنمسك على بعض فضايح
ومكانش فـ بالى ان قلوبنا 
مشاعرها فـ لحظه هتتحول 
و أكتشف ان انا بعد ده كله 
حبيتك انتى من الأول  
أيوه الواقع عمره ما كان 
يشبه للأفلام يا جماعه |
لو دققنا فـ كل الناس 
هنشوف كل الناس متباعه 
واحد سايب واحده وواحده 
سايبه فـ واحد سايب غيرها 
آه الأحاسيس فـ الأول حلوه 
بس وجعها يبان فـ آخرها 
الجارح بكره هيتجرح 
و المجروح ده مسيره يخف
كلنا أدوارنا بتتبدل 
طول مالأيام دايره تلف


كان يوم عادى _  محمد ابراهيم

متعتذريش القصيده الكامله
من ديوان لما كنا 
معرض الكتاب 
2017

الكلمات 

متعتذريش .. لا حبك آخر الدنيا ..
ولا وجودك سبب لحياه 
انا فـ " مآساه " .. 
بحاول أجمل المشهد 
و أمثل انى مش مهزوز 
" شبح أراجوز "
مركب وش على وشه 
عشان ميبانش ايه جواه
 
لا هشحت إهتمام تانى ..
ولا هطلب حنان لله 
انا كويس ..  كده أحسن
ومش هنكر ساعات بحزن
و أحن لكلمه متقاله ..
وذكرى و صوره ورساله 
فمتحاوليش .. تكونى ضحيه 
فـ القصه ..
و إوعى تصدقى الحاله
ده زى ما فيه بنات إتكسروا بسببنا 
فـ ياما بنات كتير حاولوا و نجحوا
فـ كسر رجاله 
وياما بشوف من الدنيا 
حاجات اغرب من السيما 
وربك برضه ليه حكمه
و ليه حسبه و تقسيمه 
و انا اللى مشيت و انا مآمن 
وسبت مشاعرى و اطمنت 
نسيت ان البلاء وارد
وقد يأتى فـ هيئة  "بنت "
انا يا حبيبتى مش تمثال
و ليا شعور و بعرف احس 
و اتأثر 
و قلبى ازاز .. 
يعور لما يتكسر 
متتخدعيش فـ كام ضحكه 
بخبى الحزن جواهم 
ده لو بصيتى جوايا 
هتلقى الحزن متفسر 
و تلقى الجرح ساب فيا 
علامه الوقت ممسحهاش 
وممسحكيش 
متعتذريش ! 
متعتذريش .. 
و صلى جنازتى وياهم ..
قصاد القلبه حطى الدبله و إدعيلى 
و قولى كان مريض و إرتاح 
كفايه نواح .. 
على القلب اللى شافك ورد 
فـ وطى لجل ما يشمك 
قتلتى قتيل ؟! .. و ايه يعنى 
فداكى .. خلاص و لا يهمك 
مسير اللى إتكسر 
يتلم .. مسير اللى اتقتل هيعيش 
متعتذريش .. 
ساعات الإعتذار بيهين 
ويجرح قبل ما يداوى ..
سلالمك كلها تعابين ..
و انا معرفش أكون حاوى ..
يا حبل إتلف بالتدريج على رقبتى 
و انا من طيبتى سبت الحبل عـ الغارب 
بنبعد مهما نتقارب .. و أشوفك غلطه و أستمتع 
بطعم الغلطه فـ بعيدك ..
يشاء ربك .. بإن الطيب الغلبان 
يبطل طيبه على إيدك ..
 
برائتك .. شكل من بره 
ديكور بيدارى سوء طبعك 
و انا مقلبش أكون تابع 
و خاتم تلبسيه فـ صابعك
انا راجل .. و ليا كرامه لو راحت 
حياتى تروح 
 وبابى لا عاد لا متوارب ولا مفتوح 
ومهما تحنى و تنادى 
خلاص باب الرجوع اتسد
بكيت بعد الفراق ؟! .. عادى
بكيت على نفسى مش على حد
معدش ما بينا شئ فاضل 
عشان نرجع نقول يا حنين 
ده لو نزلت دموع راجل 
ينضرب الوجع فـ اتنين  
مفيش راجل مبيعيطش لو فارق 
الفكره بس ان احنا بنخبى 
معرفش ببكى عليكى ليه و إزاى 
معرفش ليه وعلى ايه بتتحبى 
يوماتى عـ الله بسأل نفسى ..
ليه انتى ؟!
و ليه بالذات  
و كان فين قلبى  و انا مسحوب 
لتيارك 
و كان فين عقلى و انا بغلط 
و بختارك
وداخل جنتك عشمان ..
أتارى جنتك .. نارك
مخدتش بالى انك " وهم " 
مشيت عكس اتجاه السهم 
و قلبى اتذل و إتعلق بأكتر حبل كان دايب 
انا اللى اتسابت طول الوقت 
عشان مرضيتش أكون سايب 
رضيت أطلع فـ حدوتك بدور الحاضر الغايب 
 و أحبك من طرف تايه 
وراكب قطر مبيمشيش 
متعتذريش .. عشان و الله مش فاهمك 
و مش قادر أحدد موقفك بالظبط ..
براجع كل تفصيله .. 
مفيش فـ القصه حلقة ربط ..
مفيش حبكه .. مفيش ربكه 
مفيش فـ القصه دمعة عين 
 و قبضة قلب أو قهره 
أكيد فيه حاجه مش ظاهره 
تعالى نبص عـ المشهد .. 
نراجعه من الألف للياء ..
نشوف مين فينا كان مشتاق 
و مين قصر .. ومين إهتم 
و مين نايم بكل برود 
ومين سهران يعيط دم 
أكيد حبك مهم .. أكيد 
لكن يعنى كرامتى أهم 
فـ كان من حقى أقول همشى ..
و أقول سبتك لكل الناس 
و انا كداب ..
صحيح سبتك انا لكن 
انا المتساب ..
انا المتساب بأفعالك .. 
و إهمالك .. 
و إحساسى ان فى حياتك 
مجرد طيف ..
و ساكن جوا منك ضيف 
لا ليا حقوق ولا كرامه 
و عايش بس من غير صوت 
وطول الوقت بتذلل 
و بشحت كلمتين حلوين 
فـ آخر اليوم ..
عشان أعرف انام مبسوط 
بقول سبتك لكل الناس و برضى غرورى 
وسطيهم .. و انا جوايا نار قايده 
" مفيش فايده " .. بكابر قد ما بكابر 
و قلبى من الحنين مفضوح 
قريب وغريب .. يبص فـ عينى 
فيشوفك بكل وضوح ..
و لسه انا تحت تأثيرك .. 
ومش شايف بنات غيرك 
لكن أصبحت مبشوفكيش 
متعتذريش

أشعار : محمد ابراهيم 
رؤيه فنيه و توزيع : الموسيقار محمد معانى 
تسجيل و ميكساج  و ماستر : كريم حسن
فوكال : محمد الشبينى _هاله حسن 
ناى : أحمد أبو المجد 
باص جيتار : باسم معانى 
اليكتريك جيتار : أحمد طارق

شكر خاص 
" آيه عماد الدين فؤاد "

متعتذريش

محمد ابراهيم _  "متعتذريش " من ديوان لما كُنا

الحكايه بإختصار - ازازة فودكا
اداء : عمرو حسن
غناء : اسامه عطيه
كلمات : عمرو حسن
من حفل ساقية الصاوي 2016

Amr Hassan Ft. Osama Attia | El Hikaya Bekhtsar - Ezazet Vodka

كلمات وإلقاء : محمد ابراهيم
عود : سعد العود
بيانو : شادي ابراهيم
______

عشر دقايق بُكا

للمره العاشره بقول مالك
وتقولى مفيش حاجه إطمّن
وتحاولى تخبى كلام باين
من غير ما تقولى كلام يداريه
جه عياطك بيقاطع صوتى
وانا بسأل سر سكوتك إيه ؟!
أتاريكى فـ وادى و انا فـ وادى
موجوعه بشكل مهوش عادى
من سبب أنا معرفهوش لسه
ومازلت مُصّر إنك تقوليه
فسألتك " طب بتعيطى ليه" ؟
و أنا عايش ليه أو علشان مين
أو لزمتى إيه أصلا عندك ؟
هو انا مِش قولت فـ أول يوم
حبيتك فيه هفضل ساندك ؟
و إن شوفت دموعك همسحها
من قبل ما عينك تبكيها
_ إن كان فيه حاجه انا معرفهاش
لو حتى هتجرحنى إحكيها _

ردت بعياط أكتر فـ بكيت
وبكينا لحد أما شهقنا
و فـ وسط كلامنا رميتلى سؤال
" تفتكر الموت هيفرقنا "
لكن من قبل أما تجاوب
انا طول مانا عايشه هكونلك قلب
بيحبك ولآخر نبضه
لحظتها لسانى سكت منّى
و إتحول إحساسى لقبضه
وحاولت أكدب إحساسى
علشان ميبانش ان انا موجوع
فبدأت أغير فـ الموضوع
قاطعتنى وطلبت منى أهتم
وقالتلى انها عملت تحاليل
وطلع عندها سرطان فـ الدم
وحياتها يدوب حبة أيام
تتعد على الإيد مش أكتر
وقتها حسيت انى إتشليت
مـ الصدمه ومعرفتش أفكر

وبدأت عياط و مخلصتش
غير لما قالتلى كلام حسيت
منه انها بتقولى وصيه
فسمعته وروحى بتتقطع
وإديها بتبرد فـ إديا
إن انا منساش اللى مابينا
وإنى أحصلها على الجنه
هى هتسبقنى وتستنى
ودى كانت آخر أمنيه

عشر دقايق بكا - محمد ابراهيم

محمد إبراهيم وأدهم سليمان - قصة مكملنهاش- 5 شارع زهرة البستان.mp3

محمد ابراهيم - طرف غايب .m4a

" انا و انتي واحد " ميزه هي اننا 
نلقى اللي كان متداري دايما ظهر 
نِقدر نقاوح نومنا ع التليفون ! 
و نقيس فـِ قُدرة بعضنا ع السهر  
العيب بقى 
و العيب أوي .. 
ان اما قلبك خد قرار قتلي 
و قتلني قاصد و البشر شايفين 
علشانا واحد 
قالوا لأ ..  دة انتحر ! 
----
خليني فـِ الأول 
أسمح لنفسي اعدل طريق شَعرك 
فيه خُصله خَارجة من الحِجاب مـِ الشوق 
فـَ بكل لُطف و ذوق ¬
هَعدلها وابدأ حَكي و ندردش 
و الحُزن يرجع تاني يتلاشى 
بس الغريب .. 
ماعرفش ليه 
كُل اما أحاول امدلك ايدي 
الاقيني بخبط أيدي فـِ الشاشه ! 

---

شوفتيني وضعي ازاي و انا لواحدي .. 
شوفتي القَمر/  بيبُص ليا ازاي مِن بعد ما مشيتي ؟ 
صعبان عليه ! 
بيشوفكوا و انتي كُل ليل ماسكه فـِ ايديه 
و يقولي لأ ماتخافش .. 
بقالها نايمة يجي سِت ساعات 
يلاقيكوا مثلا فـِ الكافيه ع النيل 
و يقولي كات سهرانة طول الليل 
تسمع " بعيد عنك " و بتذاكر 
الوقت ضيّق عندها امتحانات ! 
شوفتي الوجع ! 
من يوم ما قررتي الغياب 
حَتى القمر 
حَتى القَمر كدّاب !
..
بحلفلك انك فـِ الصور وحدك 
أجمل كتير مِن كُل صوره معاه 
مع كُل ضِحكة فـِ نظرتك نواحيه 
عينك بتبقى لواحدها مأساه 
زعلان لأنك جَمبه مش لايقة 
ولا حِلوة جدا .. زي ايامي 
و لأنه عمره ما غار مِن اصحابك
او انه جايز دمّه مِش حامي 
زعلان عشان ضِلك فقد روحُه 
ناقص علامة خطوتي جوّاه 
مش قصدي حاجة او لا سمح الله 
غيران عشان ايدك فـِ حُضن ايديه 
ولا حتى مثلا عيني حاميه عليه 
علشان بيحصُد من جناينك ورد  
او ان جاكيتُه الأسود المحظوظ  
بيغطي كِتفك كُل نوبه بردّ
والله شكلك فـِ الصور وياه 
أجمل حقيقي من الصور وحدك 
و فـ كل ضحكة فـِ نظرتك نواحيه 
عينك بتبقى لوحدها جنّات 
والله لايقة عليه و دلوقتي 
أجمل كتير من وقت عدى و فات 
و عينيه تدُل بغيرتُه بـ استموات 
و بـ ان قلبُه بـعشق روحك دق
و انا زي عادتي فـِ كُل اشعاري 
بكدب و فـِ الآخر بقول الحق
..

سامحيني والله ..
انا كُل ماجي اكتب .. مابكونش قَصدي اكتبك 
 ولا قصدي اعكّر صفو تليفونك مع صوت غَريب بالليل 
انا كُل ما اكتب أي سطرالاقيني كاتبك .. قُصر ديل 
مثلا فـ يوم ما كتبت 
آسف على المواعيد
انا كُنت قصدي اكتب سَطرين عن الأوطان 
بلسان قلم فَرحان بيغنّي لـ بلادة 
نمت وصحيت فـ لاقيت 
وسط الورق مكتوب .. 
 " انا بس بستسمحُه و هسيبكوا بعديها " 
بالعقل طب .. 
فيه حد يستسمح الغُرب فـِ حاجاتُه 
دة انتي اللي مِلكي .. أنا 
من وقت قُرص الشمس ما كان حداشر سَنه ! 
و أحلف لكل الناس 
اني ابقى ليكي " الناس " 
من و انتي قد الكفّ .. لا روحتي ولا جيتي 
و ان انتي تَربيتي 
فـَ ولادكوا بالتالي .. 
هيكونوا تَربيتي 
أبنك هيشبهني .. مع اني ماعرفهوش 
هيكون بيكتب شِعر و يبقى ليه إسمه 
واخد جَمال طلّتك 
يشبه ابوه فـ جِسمُه 
و هقابله يوم صُدفه .. 
من غير معاد سابق 
يمكن فِـ روض الفرج 
او فـِ اتجاه حِلوان 
و يجوز فـِ أي مكان 
مريّنا فيه مع بَعض 
هلاقيكي فيه و اعرفك 
من كلمتين ع القد 
من خَطوته فـِ المد 
من شامه تحت الخَد 
ورثها مِن حُسنك 
جايز يكون زعلان 
فـ هلاقي فيه حُزنك
لكن اكيد هعرفُه لو شوفته وسط الناس 
مش عاوز ابقى لحوح و بسابق الاحداث 
لكن يجوز هلمسك
من لمستي لايديه 
علشان هييجي فـِ يوم 
مع بِنتي مـِ الجامعة 
الاتنين بقى كِبروا 
و اتقابلوا فـِ تجارة 
ما الدُنيا دوّارة 
هَيحبوا بعض اكيد 
و هَيجي يوم تِجرحه 
و هَتبقى فـِ الكوشة
 فـِ ايدين جدع تاني 
فـِ ساعتها هيعاني 
و يجوز هيتدمّر
 هيسُكّ باب البيت
و يخش و يسلم 
مايبانش  متألم 
بطريقة مقصودة 
يقفل عليه الاوضه 
يمسك صورها /  و يبكى لمّا ينام 
هتزورُه فـِ الأحلام 
و يومين ويبقى تمام 
هيصاحب الأقلام 
ولا عُمره هيسيبها 
يفتح صورها عشان 
يكتبها فـِ قصيدة 
زي اللي يا للأسف 
دلوقتي بكتبها 
سامحيني والله .. 
كل اللي فات وارد ..
 فـَ كتبتُه و انا شارد 
دمّ الفُراق بارد  
وانا دَمي بيعاني .. 
من يوم غيابك و انا 
كُل اما باجي اكتب 
ألقى ان انا بكتبك 
فـ امسح و اعيد تاني .. 
و امسح و اعيد تاني ..
و امسح و اعيد تاني !!

من غير ميعاد سابق _ مصطفي ناصر

الشاعر محمد إبراهيم  
 أحمد سعد  عود وغناء 
 أحمد الغريب جيتار

***** 
ابيض واسود 
***



كان عندى زمان 
علبة ألوان ..
بس ملونتش ولا صوره 
ومكنتش باكل اطلاقا 
عـ السنه دى علشان مكسوره
كان عندى جيوب 
جوا الجاكت ..
ومشتلش فيها فلوس خالص 
علشان ممعيش !
وإن حتى معايا مبيكفيش 
غير حق ازازة كوكاكولا ..
بشربها وبعطش من تانى
انا كنت ساعتها فـ سنه أولى 
وكنت أٌقعد فـ الدرج التانى ..
وعشان الصف بتاعى يمين 
كان نور الشمس يزعلل
نص السبوره ! ..
خرزانة استاذ بتدفى ..
مصروف مش دايما بيكفى ..
لكن أهو كان بيجيب حاجه 
العجله اتخرمت كام مره 
ورجعت البيت عليا رجليا 
وهدومى اتقطعت وانا بلعب
تعويره اتسابت فـ اديا ..
وجريت علشان قبل ما تورم
الحقها بتلج التلاجه !
أول ما كبرت بدأت أفهم ..
ان الميت مش راح يرجع
عيطت كتير علشان " تيتا "
وفضلت سنين برده بدمع 
على صاحب خبطته عربيه 
زمان وإحنا بنلعب كوره ! 
كل حاجه كنت اقرب منها 
تبعد ..
عشت كل سنين حياتى أبيض
وإسود .. 
مش فارق شكل لدلوقتى 
من شكل زمان !
مانا لسه اساسا معرفتش 
معنى الألوان


محمد ابراهيم - كان يوم عادي

Heba Monsef

Recent comments

Dody Daleda

Heba Farg

Mohamed Misho

Magdy Amr

Related tracks