كاكي نص بالعامية المصرية لمحمد فوزي 

يا قلب واقف ع الحياد

 حيعرو حبيبتى.. وللا حيلبسوها نقاب؟؟
 
وانا المفتون بعفتها ساعة الادان..
 
ومجنون بغمزة عينها وبرقة الفستان
 
وما بين عفتها وجنونى..
 
تعبت م المسافات
 
يا عاشقين قبلى..
 
قولولى حكمه..من سيرة الاسلاف..
 
يا اما تبتسملى..
 
او تشفينى م الاحساس
 
يا مين يقولى.. احبها ازاى؟؟
 
بطريقتى انا؟؟.. ولا بهوى غيرى؟؟
 
اهتفلها بحبى.. 

ولا اكتم واعف ف عشقها..
 
فاموت شهيد باحزانى 

امانه يا خوف ما تملكنى
 
خبينى من عينها 

لتشوف دموعى..
 
فيزيد دلالها وتتعالى
 
عماله نفسى تأنبنى.. بركعتين صلينا فيهم..
 
وأمنا على نهارك.. يمكن تبصيلى 

اخدتى كلامى ف غرامك..
 
وحضنتى غيرى
 
وطلعت في الصوره في وسط حسادك
 
يا حلمها.. خطى عليا بالراحه 

بلاش تسيب جوايا جرح 

سمى عليا وضمينى بحريه
 
سيبى في روحى براح للفرح
 
قلبى كان حافظ.. ومفهمش الشرح
 
يا ريتنى ما حبيت بالشكل ده..
 
ولا وابتليت بالعشق 

مكتوبلها بلدى تموت م الغبا
 
و كأنها مترتبة.. يا أموت انا في ولادتى 

يا اما تموت م الطلق
 
يا سرها.. بوحلى بقى بالسر
 
تعبت من وجعى ومن اه ولا 

نفسى احسها بجد
 
ارسمها وهى فرحانه 

انا بس اللى اشوفها..
 
والمسها وهى عريانه
 
سيبانى ليه.. ولابسه هدوم متعتقه بريحة العسكر
 
سالوكى.. مش احنا اللى حامينك.. واحنا اللى حارسينك
 
والنيل من تحتنا.. تبقى اكيد ملكنا 

قلتى بلى.. ورقصتى ليهم
 
طب ليه مجنون انا بليلك 

ليه بغنيلك.. وانتى اللى ناسيانى
 
ومية وحده غيرك.. يتمنو أحضانى
 
مليش بس.. غير انى أتكلم وأتالم
 
وأملى كتاب بأشعارى
 
اشمعنا انا يعنى اللى حفتح دراعى
 
وأعرى روحى قبالك
 
وانتى مش حاسه غير بأصنامك
 
يعنى حتفرحى لما تشوفينى بلون الكاكى 

واحلف بحبك واخونك في ضهرك
 
و أبقى خيال المقاته ف مظاهراتك
 
يمكن احبك زيهم..
 
وأهتف باسمهم.. واغير ملامحى..
 
وازوق كلامى.. وألبس بيادا ف دماغى..
 
وأمشى في اخر كتيبه لعساكرك 

يمكن ساعتها.. تعرفينى.

 
 
 
محمد فوزى

helkafrawi

Popular tracks