amr hassan

لو كنتى استنيتى شويه

عمرو حسن وحشتيني ٣ للمرة الأولى

بطلتي توحشيني - عمرو حسن

خلينا صحاب 2 عمرو حسن حفلة مكتبة الإسكندرية 26 أغسطس 2022



عمرو حسن | للمرة الأولى (خلينا صحاب الجزء الثاني) 

حظها الاغبر
خلاها تسيب كل المخاليق وتفكر فيه
كان يوم منحوس
مش طلعالو في الصبح شموس
لو جه صحابها يوم سألوها ليه بتحبيه
عايشه متبعاه
وكأن الدنيا بتبدأ عنده وتخلص بيه
ويقولو يا بنتى دا مش شبهك فتقول حباه
ويقولو يا ستي دا مش عاوزك فتقول عاوزاه
علاقه من طرف بائس يا حول الله
قصادها الدنيا وما فيها
وناس عاشقين وناس شاريين وناس دايبين
لكن هي آه هتقنع مين
مفيش في عينيها خلق سواه
مفيش غيره في وزن يطب
وادي القصة وادي المعاناه
وادي الجيباه مراية الحب
بتبعتله وتستناه
وتدعيله وتترجاه
وتنتظره وتتمناه
وهو دا حب بالذمه
دا إسمه عقاب
لحد ما خدها مرة حماس
ودلدق منها الإحساس
فجالها الرد خلينا بجد اصحاب
بنرجع خطوتين للخلف
وبنشوفها بتصدم حد وتقوله الكلام ذاته
بترمي حد بحجاته لعطف الناس
وبنشوفها في نفس المشهد الثابت
بتشرب برضو نفس الكأس
يادي الدنيا اللي عجنانة
وعاملة مشكلة معانا
وسَيبانا لدواير كل يوم تتعاد
مفيش لحظة علينا تمر
بدون ما تجيب ضحايا جداد
صاحبنا زي ما في بالكم
ولا في باله
بيرمي بياضه على البنت اللي في خياله
وهي لا واخده بال منه
ولا بولا حاجة حساله
يحب القط خناقه
يحب الشخص قتّاله
يعدي اليوم وراه اليوم
يعدي الشهر والتاني وصحبتنا بتستناه
أملها كله على لحظه يفوق فيها
يخل توازنه في الدنيا ويشعر وقتها بيها
تخيل واحدة بتقرر تضيع عمرها في سراب
لواحد مهما تعمله حاططها في خانة الاصحاب
والله احنا نستاهل وتستاهل
عشان قفلت عينيها بايدها على أوهام
ورضيت تبقى آخر واحدة كاتبها في ليستة الأحلام
وقبلت يجي يحكيلها غرامه لواحدة مش قبلاه
دا ملعون الهوا
لو كان يذل الشخص قدام اللي عاوزه معاه
تصحى تقرأ بوستاته
تتابع صوره وكلامه مع الناس اللي في حياته
وتكتب اسمه على القلب الحزين بالجاف
إذا شافت في يوم اسمه على التليفون
دا يوم العيد وما أدراك
ترد كأنها في ثانوي وجابت طب
يا عيني حل مش طايله وعايزه تحب
شوف الحكمة
شوف يجيلها مرة شاعر شاب
تقوله يا ريت نكون أصحاب
وبعد سنين تحب فلان ويصدمها
ويجري لواحدة مش شبهه
ويكلمها تكون بتحب شاعر شاب
بيكتب شعر دلوقتي ومهملها
تكون الدايرة دايرة ازاي
بدون اشخاص تكملها
وتبقى الدنيا دنيا ازاي
بدون حرقه هوا واعصاب
عشان في المشهد الكامل نعيش أغراب
واللي زمان قالك اصحاب خلينا
دلوقتي بيتقالو في وشه
خلينا اصحاب خلينا اصحاب

عمرو حسن - خلينا صحاب الجزء الثاني | Amr Hassan 2022 - Friend Zone 2

عاوزة أفرح بيك
لما أفرح بيكي انتي الأول
اتلم ياواد بتكلم جد
انا عاوزه اتطمن ليك وعليك
والنبي فكّك 
والله عبيط
انا يابني هاروح مش هاقعدلك 
محتاجة اشوفك ساكن بيت
هو انا يعني بنام ف الشارع ؟
ياحمار اديني عقاد نافع 
مش هتجوز انا كده مرتاح
أنا أمي كمنجة وحضن متاح 
ومشاعر معرفش احكيها
أنا متجوز أمي أساساً 
متطمن وانا عايش بيها
أنا كل ما بهرب منها واغيب 
بكتشف إن انا بهرب فيها 
الست دي حالة ماتتكررش
نتغير ..... هي ماتتغيرش
الدنيا تشيلها وتهبدها 
تطلع تنزل
تكسرها تقوم 
أنا أمي أنوثة بـ100 راجل
ورجولة بدرجة ناي مكتوم 
ساعة ماتوفى أبويا وراح 
شوفت ف نظرتها كلام وجراح
من يومها وهي عمود البيت
والآمر دايماً / والناهي 
الدوا جيبته ؟
فاكراني نسيت ؟؟
انا عارفه ان الدنيا تلاهي
احضنها تقوللي امشي يانصاب
بتغيب أيام زي الاغراب 
وتقولي مشاغل وأبصر ايه
انا أصلي بقيت شاعر معروف
قالك معروف .. بأمارة إيه 
كوافيلك تشهد يامهزأ
ف رضاكي يامزة أنا بتلزق 
واخرج على أوضتي شوية وانام 
واسمعها تصلي وتدعيلي
الواد تلفان
انما طيب .. وانت قريب
ارزقه رزق بحجم السماوات 
وارزقه بالخلفة ولاد وبنات
وتنام وتقوم تلاقيني مشيت
فتقوم تبدأ ترويق ف البيت 
أنا اسف جداً ياحبيبتي
علي سفري الدايم والاشغال 
علي كل كلام ضايقك واتقال 
انا مهما بدور وباعيش ف الدور 
باطلع وانزل واجي عليكي 
أنا راجل جداً 
ورجولتي تلخيصها ف بوسة علي ايديكي 
والدنيا ان ضاقت ف انتي براح 
وانا جنبك باتطمن وارتاح 
وخناقنا ساعات بيكون راحة 
وخصامنا كتير بيكون تلكيك 
الأم مكان لسكون الروح
وخضار من قلبك طارح فيك
أيوة ياماما ؟
عاوزة أفرح بيك

قصيدة عاوزه أفرح بيك

من حفلة إتحاد طلاب كلية زراعة " جامعة قناة السويس " 4 \ 12 \ 2014





الأوّلة : يابلد 
والتانية : ياولد
والتالتة : ياقلم
الأولة : يابلد ، خالد سعيد ماشربش 
والتانية : ياولد ، سجِّل حضور ماهربش 
والتالتة : ياقلم ، أنا اموت اذا ما اكتبش
الأولة : يابلد ، خالد سعيد ماشربش ، وربنا شاهد
والتانية : ياولد ، سجِّل حضور ماهربش ، وفي الحياه زاهد 
والتالتة : ياقلم ، أنا اموت اذا ما اكتبش ، وكلمتي تجاهد
الأولة : يابلد ، خالد سعيد ماشربش ، وربنا شاهد ع اللي حصل ويّاه
والتانية : ياولد ، سجِّل حضور ماهربش ، وفي الحياه زاهد والحياة تاعباه 
والتالتة : ياقلم ، أنا اموت اذا ما اكتبش ، وكلمتي تجاهد ياعباد الله

مقطع من قصيدة السجن

عمرو حسن _ مابتتنسيش يامعلم - للمرة الأولى

وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

وحشتيني

جوابي ده الأخير ليكي 
يامعاليكي 
ياست الحسن 
ياسبب الحزن والعلة 
ياشجرة حسبتها ضله وطلعت نار 
بداية القول : مساء الفل ع الأزهار على خدودك 
مابنجرّحش 
ومابنسمحش حد يقول كلام عنك 
لذلك ثم أما بعد ،
أنا الطفل اللي كان ف عنيكي متشعبط 
يشوفك روحه تتلخبط 
وقلبه ابن الحرام يضعف ويستعبط 
كإنك زار وانا الدرويش
كإنك غار وانا الحرافيش 
كإنك كنتي قرش حشيش 
دخل رئتيني وملاني 
كإنك دار وانا اللي ماليش 
سوا الدار اللي لمّاني 
بغض الجرح مين خان مين 
ومين قصّر مع التاني 
وغض الطرفْ عن اسمك 
وطعم خروجه ف لساني 
أنا مليّت من القصة ومن لعبة خلاص لسه 
لقيتك غيمة ف حياتي حسبتك مطره قمت جريت 
وفجأة لقيت مفيش غير ليل 
سحابة ضلمة كنتي انتي
اشوفك ف الوجع بنتي 
واحسك ارضي وسفينتي 
وشمس بتملا ليلي شروق 
مافيش كام يوم لقيتني بافوق 
واشوف القاتل الفعلي 
لقيتك أرض ماتضمش سوى المطاريد 
وانا عيل بيفتح إيد يشوفك خط على كفه 
عنيا عيال اذا بصيتي يتدّفوا 
حسبتك أم بتدوّر رحى الأحضان على عيالها
لقيتك ماسكة كاتم صوت 
رصاصك فات وجع جواي
وهو ياحلوة يعني الموت
بيفرق شكله كان ازاي 
وهو الجرح للستات ومش لينا ؟ 
ما فيه رجالة بتعيّط 
وفيه رجالة بتفكّر ف عز الليل ف ناس باعوا 
وفيه راجل اذا فات ف المحيط وجعه مابيساعه
وفيه عناوين بتتلخبط 
وفيه بكره بيتشخبط 
وفيه أطفال مايتولدوش ف مستقبل ماجاش قدام 
وفيه زفة مابتقومشي 
وفيه فرحة مابتدومشي
وفيه نغزة ف صميم الروح 
ما دام ف القصة فيه دابح 
أكيد ف القصة فيه مدبوح 
ولو كان القتيل راجل 
ف دمه بيبقي مش بالسهل 
خسرتي معاه وجود الأهل 
خسرتي الضهر والضمه 
خسرتي الجمع واللمة 
وبكره هتندمي لما 
تحسي البرد من دونه 
ياريتك شوفتي ف عيونه دموع الأب 
أنا الشخص اللي كله ذنوب
لكن مليان حاجات تتحب 
ــــــــــــــــــــــــــــــــــ
عملت حاجات لأول مرة بعملها 
وكِملِت أغنيات بيكي 
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب 
عكستي المشهد المكتوب
ماكانش الفيلم دي نهايته 
كده الكاتب لعب ف النص
وفيه لزق ف حياتي وقص 
وفيه تركيب لناس تانية 
فيه مشهد خارجي مش محطوط 
أنا وانتي 
ومطرة بتغسل الشارع من الاحزان 
حضنتيني زمان ومكان 
وقولتيلي مافيش غيرك 
نزلت ف لحظة على ركبي وانا ف ايديا كام وردة 
ضحكتيلي 
وطبطبتيلي علي خدي 
كانك كنتي بتعدي على قلبي بروح حافية 
مسكت الدمعه بالعافيه وضميتك ف عز البرد 
لقيتني الفيلم بالكامل مافيش ولا لقطة ماسك ورد 
طلع فيه حاجات بتتصور 
بتتقصقص من المونتاج
وأول ما المطر لمسك 
لقيتك دوبتي ف المكياج 
عروسة حلاوة أو صورة 
ملامح فازة مكسورة ف اخر جزء ف الذكرى 
خسارة تكمّلي بكره 
يا نور ساطع بيعمي العين ما بينوّرش
انا هافضل كده عيّل ومابيكبرش 
وبكره يجوز تقابليني ف أي مكان 
هاشوفك وقتها دخان 
بقوة ست هاعشقها ف زمان تاني 
ولمسة طفل يشبهني مايشبهكيش 
انا جوايا كام ميّت وحابب اعيش
لا هاتحوّل 
ولا هارجع من الأول 
ولا هاكتب عشانك شعر 
هبيعك دون نظر للسعر 
مكانك وردة ماسقيتهاش ف دبلت من خريف موجوع 
دموعي رصيد باحوش فيه لناس مستاهلة مني دموع 
وحلمي معاكي م الأول 
خطيئة لابد اكفّرها 
رميتك طفل ببراءته 
ندم على حاجة وكسرها 
يا أسوأ حلو كان فيّا
يا أطيب شر ف النية 
كسبت حاجات تسيء ليا 
وجه الوقت اللي انا اخسرها . 

كمان : بدر مصطفى
ناي : محمد مصطفي
ايقاعات : كريم صلاح 
كيبورد : صهيب النجار
تسجيل : من حفل الساقية اكتوبر 
رؤية موسيقية الفنان محمد مصطفي 

جوابي الأخير - من حفلة الساقية 2015

هو أنتوا مين ؟؟ وانا ليه حزين ع ترككم ..
انا لقيتني بحبكم .. أو ليه لقيتكم من الأساس :))..

باندا

بلاش تمثيل عشان صياعتى و فشلى من غيرهم مكنش يجوز تحبينى

عمرو حسن وحشتيني

عمرو حسن - خلينا صحاب (فريندزون) من حفلة ساقية الصاوى


مابتحبكش 
بتتعب ليه وتزرع أرض مش أرضك 
وليه سهران 
وليه قلقان ومش نايم
وليه قاعد وليه قايم تجيب ف سيرتها ومشاعرك تسيل ع الارض ! 
مابتحبكش والله
وكل اللي اتعمل بينكم حكاية وقت مش اكتر 
كلامك كله كان عادي 
ووردك مرمي ف الشارع من الشباك 
بتضحكلك وتبقى معاك 
وتحلفلك تكون وياك
وبعد ماتمشي بتسيبك تاريخ مهجور 
حكيت وياها عن نفسك فتاجرِت بيك 
واديها ياسيدي بتعايرك باسرارك وبعياطك قصاد منها 
تجيب سيرتك واخبارك وتسبكها بدموع عينها 
ولا صانت كلام بيبنكم 
ولا قدرت تراعي حتى حلفانها 
ياراجل ده انت علشانها 
بقيت واحد ماتشبهلكش
مابتحبكش
بتبني ف ايه ؟
بتنكر ليه كلام واضح كضي الشمس 
بقالك قد ايه مشتاق 
لواحده كان لقاها فراق 
وكنت معاها طفل كبير 
حكيت للكل عنها بدون ماتتكلم 
وكنت تشوفها فتسلم 
وكنت تشم بارفانها فتعرف دارها ومكانها 
وتعرف كل الوانها بلمسة ايد 
ادي العيل ف وصف العيد 
لا نفع الشاي ولا الحكايات 
ولا الاحلام ولا البدايات 
ولا الحواديت ولا السلامات
ولا الحرُمات
ولا حتى الكلام بينكم
ف اول لحظة تختلفوا تهين ضلك 
وتشتم فيك 
وتدعي عليك 
ولا بتقول ده كان طيب وكان فيه بيننا ضحك دموع 
ولا بتقول ده صان وجعي ولا حافظ على المجموع 
مسافة ما الكلام بيموت بتنسى كل شيء له أصل
وتترك للمشاع سيرتك 
بتعمل ايه ؟؟ 
ياخي والله عيب فعلاً 
عشان امك ياخي حتى 
عشان حلمك 
عشان لو شفت ف مرايه انعكاس صورتك ماتتعرِّش وماتوطيش 
يادنيا رخيصه مابتديش 
لواحد حد يستاهله 
يشوف الشخص لما يعيش 
نتيجة موقفه وجهله 
نصيبك وانتي من أهله 
هموم الناس مابتضحكش
مابتحبكش
شكلك زفت 
اديك وعرفت
ف ايه ردك ؟
كفايه خيابه من حدك 
كفايه سنين بتتسرسب عشان ولا شيء 
مافيش ف الدنيا حد يبيع وهو بريء 
مقامك وسط كل الناس مقام عالي 
ووزنك في عيون اهلك دهب غالي 
وروحك نجمه بتلالي وقلبك ناي 
رميت نفسك لقلة قيمة بس ازاي 
طلع خوفك عليها ف عينها ضعف شديد 
وقربت بمشاعرك بس هي بعيد 
خيالها مريض بناس عدّوا 
بتتلذذ ببيع وجعك على الرصفان 
وتيجي انت وبتسامح بأي ضمان
لا والأعجب بتطلع منها غلطان 
وتطلع حد مش شاري 
كإن العرض كان ساري يومين بالظبط 
لا منك غِبت ولا قرّبت 
وادي الأيام بتثبتلك وبالاوراق 
غلط نظري ف نظرك فجأة ع الأشياء 
قعدت كتير عشان تفهم وربك شاء 
تضيع أحلى ما ف عمرك عشان انسانه ماتحسكش 
مابتحبكش صدقني 
مابتحبكش.

شكر : ستديو زين داوود 

مابتحبكش

معاد مناسب للقيامه

واخد على خاطرك م الدنيا 
مشتاق لحاجات تاهت جواك 
انا قبي معاك علشان زيك 
جوايا كلام 
وف قلبي زحام 
انا زيك خام مليان تجاعيد 
وبتعمل نفسك زيي سعيد 

ييجي الشتا يصحيك ويفوّقك لحاجات
يصحي النايم فيك وتبتدي الحكايات
أوقات وناس وطريق 
وصديق ماعادش صديق 
وحبيبه وقت الضيق رفضن تقرّب ليك 
والصعب ف الموضوع ان ف رقبتك ناس 
حتى البكا ممنوع  
مانيكان كده وخلاص 

الوحدة أقرب ليك من أي ناس تانية 
صدقني مش عيب فيك العيب على الدنيا

كلمات : عمرو حسن 
ألحان : كريم جوهر 
غناء : أحمد فوزي 
بيانو : كريم جوهر 
تشيلو : نور الشامي 
ستوديو live

أحمد فوزي _ واخد على خاطرك

lyrics :                         Amr hassan  
melody composing :  Sherif ghaly 
musical arrangment :   Shady monir
sound engineer :         Gerges sobhy 
studio :                          Surround studios
for contact :::
www.facebook.com/mousaproject
www.instagram.com/mousaproject
www.twitter.com/ahmed_mousa1982

law konty estanety | لو كنتي استنيتي شويه

موسيقى ديوان مثلاً

بالنسبة لواحد زيه اتوفّى اتناشر مرة بأساليب مختلفة 
واترمى ف الأوضه لحد ما ضاقت روحه عليه 
بقى صعب يواجه أي مشاكل من نوعية امتى وليه 
بقى كل مشاكله تخص المزيكا 
مواعيد السينما وطعم الشاي ، درجات الطقس ونوع الأكل وتمن الوحده 
والبُعد لاخر بُعد متاح 
انما موضوع تتعب علشان ترتاح 
مابقاش له معنى مع الصدمات 
فلسفة فارغة 
وكإنه حوار بين واحد وصديقه اللي ماجاش 
مسألة الموت أملاً ف حاجات تتعاش بتخلي الواحد يضحك على نفسه
بيقول : 
" يومياً باطلب قهوة زيادة عشان البنت اللي انا ماعرفش مكانها 
بافتكر الفايت وبافكّر كان مين ساب مين " 
يتأمل ناس بقوا بني أزمات مش بني ادمين 
يتذكّر نصه اللي اتسحّب منه 
وازاي بقا واحد بيعيط بس ف مكانين 
ويقول بحنان معجون بحنين :
" واحشاني حبيبتي ومش هانكر ، وواحشني كلامي معاها بجد ، بقى مرعب انك تتعلق وتعلق مفاتيحك مع حد ، تتمشى مكان ما انتوا مشيتوا ، تتذكّر ساعة مابكيتوا ، وتخش السينما وتنسى فتحجز تذكرتين ، الكون بقا شيء مضروب ف اتنين "
يتنهد ويبصلى فجأة ويكمل بهدوء شخص حزين : 
" للدرجة اللي تخليك وانت بتشرب سكر معلقة واحدة 
اول هي ماتيجي ف خاطرك تتناسى وتشرب معلقتين ! "
كان طقس بيشبه هبه طوجي ف تراك " لابداية ولانهاية "
والدنيا فلاش باك التفاصيل 
نسيت سجايرها ف يوم عنده وهو مبطّل من ست سنين 
لو كان ممكن بايديه مثلاً انه يبطلها مع التدخين 
كان ممكن جداً يتحسن 
بس الادمان درجات ياما 
أعلاهم إدمان الغايبين 
بيقول والخمره ف ايده بتطوّح : 
بقى فين أيامنا وليالينا 
حكاوينا وشوقنا وغناوينا 
كان لينا ايدين بتشبّك قدام الأيام 
بقت الأيام بتشبّك بُعد ف ايادينا
ويحط الكاس على طرف البار 
ويزيح بايديه كل الموجود 
" ادي اللي كسبته معاك ياحليم ، مفقودٌ مفقودٌ مفقود " 
بعدها بينام زي ماهو 
ودموعه تسيل منه لجوه 
فتغرّق روحه عياط مدفون 
مش كل جراح شرطها ف جروح 
ولا كل البكا تلزمله عيون
شُفت يا صاحبي 
الورد اللي انت مشيت تلاتين كيلو علشان تعرف تتأسف بيه 
امبارح شُفته ف مدخل بيت قاعد خايف 
اترمي بايدين ناعمه وبارده 
الورد اللي انت فضلت تكوّن فيه وردة بوردة 
اتوفى الصبح من الإهمال 
شُفت ياصاحبي 
وفضلت احرّك فيه علشان يتهز ويرجع لحياته 
انما كان قرر يتحول مزيكا ماتسمعش نصايح 
الحب ازاي كله فضايح
وازاي الجاي أصبح رايح 
نفس الشخصين بقوا أي اتنين غير نفس اللي زمان اتقابلوا 
هي ف آخر العالم يمكن 
يمكن دلوقتي بتتعرف على شخص جديد 
ف مكان بيقل رومانسيه عن أول مطرح يجمعهم 
يمكن بتحط ف ماكياجها علشان سهره 
او نايمه ومش حاسه بحاجه 
يمكن ناسية ومش محتاجه بحد يفكرها بعهد قديم 
او يمكن زيه ف طرف البار بتعيط على حس حليم
ادخل بيته 
ابيض واسود من بيت ألوان أيام هي ماكانت ساكناه 
كان بيها بيقعد مع نفسه كان زي لوحده وهي معاه 
يادي المعاناه 
الكل اتورط كده وياه 
البيت اللبس الطفايه ، الشجر الميت ف المأساه
الأكل هدومه القصافه ، الفازة البارفان اللي معاه 
بقا كل جماد له روح وحياه 
الليلة 
لقيته بيتمشى ف شارع كان ليهم فيه قصه 
لحيته أطول من خوفي عليه 
كان ماشي بيتطوح وايديه فيها سجاره بعد مابطلها لست سنين 
دخل المطعم قلقوا القاعدين 
قاله الجرسون : 
كل ده محجوز 
وقبل ماتنزل منه دموعه 
مال على رجليه وبرق للنور 
بقا ميّت بعد ماكان مكسور 
ادي الفنان 
وادي الجمهور 
ادي اللي ماجاش ف خيالها اهو كان 
قتلت انسان 
كسرته بالبُعد وبالخذلان 
واتكاترت على نفسه همومه 
ماقدرش يكمل بقا يومه ريّح وارتاح 
ادي المايسترو 
بيموت ف مكان فيه مزيكته والناس سمعاها ومش سامعاه
فيه يوم هتخشوا عليا البيت 
تلاقوني مشيت 
من غير اسباب ولا شرح عبيط 
قالي وانا نسيت 
واديني باقول 
احترموا المتعوّر من دول 
حاوطوا المهموم قبل فراقه 
ان كان ساكت يبقى لأسباب
اوعوا تشيلوا ايديكم م الباب 
املوا حياته بحب وأحباب 
قبل ما يدبل قدام عينكم 
وان شوفتوا حبيبته ف يوم بينكم 
خلوها تكون عارفه مقامه 
وانها عدت من قدامه وخلته مقتول بغياب أعمى 
ملعونه ايدين مجرمة ناعمه 
مادتش الفرصه لحد يعيش 
مع انه اتوفى قصاد منها اتناشر مرة 
واترمى ف الأوضه لحد ماضاقت روحه عليه.

المايسترو

بقيت عادي 
كإني ديكور 
مابتكلمش عن حاجة ومابعلقش
ومبكدبش حد ف شئ، ومبصدقش
ومش مهتم بالدنيا ولا بالحرب
ومش باحزن علي الرايح ولا الآتي 
ومش حابب ادخل حد ف حياتي 
بقيت مبقتش من ساعة وجع ف الروح
ولاشرير ولاطيب ولاحساس ولا سادي
بقيت كما طيف
بقيت كما ضيف
بقيت عادي
ع الحال ده بقالي زمان
بقالي كم سنة يمكن
ماحدش منكم خد بال
روبوت تشغيله بحجارة
وطول ماحجارته فيه شغال
شجر أخضر مابيجرحش عين الناس
فانوس بيقيد ونوره سبيل 
ده مش تمثيل
ولاتطويل ف مشهد ما
لكن أسلوب وشكل حياة 
فماتلومنيش ع غيابي انا موجود
فاعيادكم
واحزانكم
صديق ف كفاية بيسرح ف اللي ضاع منه
شريك منزل 
نزيل غرفة 
وجع بيبص من الشرفة 
انا موجود ومش بفسد فرح بينكم
ولابزعل قوي منكم 
انا علي غير ما جوايا
مهرج باسعد الشلة
وصاحب إفيهات حاضره
وعامل لجلكم حضره
تقولوا ف وصفها الله 
فلو وجعاكو كلمة اه هابطلها 
يومين عزلة واكون أحسن
وهارجع تاني للشكل اللي كان بادي
انا عادي 
فخد راحتك
وقول عني اللي بتقوله
انا وكتير من الناس اللي بقوا زيي
مابنقربش من العالم عشان يحلو
ومابنفسدش ابداً جو
ومبنأذيش
لكن بنخاف من التجديد
من الناس اللي بيخشوا الحياة فجأة
وبيفاجئونا بوجودهم
عملنا سياج علينا عشان
ماتتعشمش ناس فينا
ف كل مساحة تلاقينا
نميل لأغاني شتوية
ولون غامق ف لبس عتيق
ريحتنا بيوت فارقناها
وهدومنا ناس قلعناها
وسميعة
بنعرف نكرم العالم ونقراهم
مبنملش من الحكايات
ولينا ف كل صدر نبات
ولينا الجدعنة الكاملة
ماننساش عيد ميلاد صاحب
ومبنبخلش بالمواعيد 
جدير بيكم تساعدونا 
تغنولنا .. وتحكولنا .. وتسقونا
يجوز دون قصد تحيونا
وتدون امل ف الضئ
يجوز نتراضي علي روحنا
ونتطمن لبكرة الحي
يجوز بالوقت نتطمن 
ونرجع نبتسم عادي.

amr hassan

Hussein-3