ولّ يا قلب فارقت الفرح والطروب 
‏نجمك اللي رجيته في سما الحب طاح
‏المصيبه ان كان الخل قلبه لعوب 
‏وش يفيد التوجد والبكاء والصياح 
‏لابسٍ لّك عن الهجران والصد ثوب 
‏وإن شكيتك تقول الحب ذنبه مباح 
‏لاكن الله يغفرلك جميع الذنوب 
‏وعلى ذنبً جنيته يغفره بالسماح

وش يفيد التّوجد والبكا والصّياح؟ / عبدالله بن عون

.
- 

تأثير الحب 
على محمد المقحم 

يقولون يمكن تعشق ؟ قلت ما ظنيت 
وأنا أجيك من باكر ما أمداني 

بديت أتعلا بالمشاريف وأختفيت 
وصار الأكل والنوم ماهوب يهنالي

وأنا عادتي لا شفت طرد الهوى صديت 
أخاف إنقطاعت السرجي وكبوة حصاني

ولكن يسيرك القدر وأنت ما حسيت
ولو إنك تقول الحب مهوب يقواني 

أنا الظاهر إني طحت بالحب ما سميت 
تغيرت في يومين ما أعرف وش جاني

أحط الحطب وآخذ لي شوي ما شبيت 
من السجة اللي فيني الله لا يبلاني 

ويضحي الضحى وهو مخلى رواق البيت
وأنا أفتحه قبل الفجر في غالب أحياني 

انا طار عقلي فالهوى صدق وإنجنيت 
ولا يدي الا واحدٍ كنه إياني 

إلا أخذت فالمجلس ربع ساعه إنسليت
أحس إن قبلي ودي أصير وحداني 

سلامي على اللي كل ما مني عنه أقفيت 
يقوم الغلا والحب والولف يشعاني 

وأروح لمحادثته من الشوق ليا حنيت 
لعلّه يجي يرسل رساله ويلقاني 

ولا شفت "يكتب" تطلع وتختفي هجيت 
من الهبله أدخل لي برنامجٍ ثاني 

قبلي معه كيف أنت؟ وين أنت؟ وش سويت؟
أخاف أغفل لي عنه ساعه وينساني 

وإلى جيت أبي أعلمه إني عليه أشفيت 
أخاير ويرجف قلبي ويبس لساني

ولا رحت أبرقد أخذت لي غفوه وفزيت 
أتلمس جوالي وأنا الشوق يحداني 

وأنا لو بجي له وأعلمه ما أخفيت
لو أذوب في دمه من الشوق ميزاني

يزين الشعور اللي يجي فيك ليا حبيت
أنا قمت أحس بطهر روحي وبإيماني

وأحس إن كل شيء يبتسم لي ليا لديت 
أحس أن نور الصبح يطلع على شاني 

ولا عاد فكرت بحياتي ولا إهتميت 
طغى الحب فيني لين سامحت عدواني

سمابي هوى اللي يوم أحبه وأنا ما أخطيت
أنا أخطيت ما حبيت في ماضي أزماني 

أحبه ولا ضعفت عزومي ولا مليت 
لو أبتل على ذا الحب كان الله أحياني

أنا الظاهر إني طحت بالحب ما سميت / محمد المقحم

على الهون ياجرح المفارق وضيق البال
على الهون ياهم سطابي وقدرته
اعزك لوانك جرح ومجاهدك قتال
وروضت جسمي لاجل سقمك وصبرته
لاجل من ملك قلبي من الجال لين الجال
وفجيت له باب عن الناس سكرته
وحطيت له عن شمس قيظ الغرام ظلال
وشيدت له بيت بقلبي وعمرته
عشقته ودللته وجريت له موال
وتخيرت قربه ليتني ما تخيرته
رعى ريف قلبي لين صار الحشا مدهال
وعن مدهله جنبت غيره وذيرته
سقيته من عدود الغلا والغرام زلال
بعد ماجذب من دم قلبي وصدرته
اداري عليه من الزعل وازعل العذال
وخطاه ان كبر في عين غيري تصاغرته
ترافقت انا وياه من يوم كنا اطفال
تكون غلاه بوسط قلبي وكبرته
قبل مايغطي ليله المنتثر بالشال
سرقت الكرى من نون عينيه وسهّرته
نقش كل حرف من حروفي على السلسال
تباهى بها واغاظ ناس مجاكرته
وكتبت القصايد في عيونه علي اليامال
وليا مرني صوت النواخذ تذكرته
تكاثر علي الله يجازيه كيف الحال
وانا يوم اسوق العمر له ما تكاثرته
وبعد كل هالتقدير والحب والاجلال
تغير وهقواته عليه مغيرته
لبسته ثياب الغطرسة لين جا يختال
وكبر في عيونه يوم الاوهام غررته
واذا السالفة ضحك ومهازل ولعب اطفال
خبطت الغصن لين ابرق الريش طيرته
خلصنا وقفلنا الصناديق بالاقفال
ومن جور حكمه كامل القلب حررته

أعزك لو إنك جرح ومجاهدك قتّال / تركي الميزاني

الصدور أطرافها متراميه والليل هادي
‏لايروح الليل قبل أستنطقه وأخذ جديده
‏كل ماسقت القدم بين المبادي والمبادي
‏أعترض لي طاري الشوق وخذيت الشعر بيده
‏أرتجل للشرد من الصيد عن صهوه جوادي
‏وأعتق الي من سهوله صيدته كلٍ يصيده
‏لاخذتني غايتي وابطيت ياغاية مرادي
‏والمسافة كايدة والحب باقي له شريده
‏أحتريني والبسي لي كل لون الا الرمادي
‏الرمادي كل ماشوفه عرفت انه مكيده
‏ودّي أضحك من بعد طول المعاتب والتمادي
‏ضحكه الي يضحك من أدناة حاجه من حفيده
‏زمّليني من هواجيس الغياب الّا أرادي
‏إن ذبحني طاري الفرقا وش أنتي مستفيده ؟
أعبري بي لا غدي عادي و أنا مانيب عادي
‏الحريص تورده للموت غلطته الوحيده
‏ياعنيده مامعي صبراً مثل صبر المهادي
‏لا تعذرّتي مثل عذر المعقّد بالعقيده
‏في رجا الله مايخليني لـ جّدي وأجتهادي
‏مارجيت الا وعده ولا خشيت الا وعيده
‏لا أستوت فـ عيونك الثنتين قربي وأبتعادي
‏والظروف أقسى من الماضي على الي يستعيده
‏المصافح فالقلوب أصدق من مصافح الأيادي
‏أسمحي لي كل يوم أصافحك وأنتي بعيده
‏لا تحاتين الضمى والجوع في رحله جهادي
‏الحظوظ مقسّمه والذيب ماياكل وليده
‏شاعرك لا هامو أصحاب الشعر في كل وادي
‏مستعد يوقّف الدنيا على مطلع قصيده

صالح النشيرا المرّي

ودّي أضحك من بعد طول المعاتب والتمادي / صالح النشيرا

ألا يا قلب لا تشره عليه ولمتى غيره 
يغيب براحته خله يروح بعالم النسيان
كفاك تدور أعذار لغيابه فضها سيره 
تماديت بغلاه ومن تمادى بالغلا خسران
أبد ما فيه بالدنيا بشر يستاهلك غيره ؟
يغيب ولا رجع ما كنك الا العاشق الولهان
انا ما أقول لا ما اقول منت بشايف خيره 
وانا ماني بقايل صاحبك وافي ولا خوان
يقولون القمر لا غاب يضويله على ديره 
وانا اقول الحبيب ان غاب يضويله على خلان
اجل شأسباب هالغيبه ؟ وابي شأسباب تاخيره ؟ 
وأبي ليه الجفا يا قلب وانت بغيبته حيران
شهر واكثر ولا طرش عن غيابه معاذيره 
يا ليته لو تعذر بالظروف ولايمه غلطان
تعبت ولا طرا له يتصل قل علها خيره 
وش انت متعب حالك مع واحد قليل احسان
يجي ميت وله لامن شكا وقته وتعزيره 
واذا قفا على وجهه حبيبك ناقه عريمان
اقول انه موالف له بشر خلاك تقزيره 
 وأقول انك على هامش حياته ما بقى لك شان
مع الي ماله سبوق اتركه شف واحد غيره 
وانا شوري عليك تلحقه في سبعة الشيطان
ذبحك الطيب يا قلب تعذب من مقاديره 
 يا عن كنك خفوق ما تعرف النكران
تقضََى لعنبوا جد الغلا ما تنفع الذيرة 
ترى من لا تقاضى يا خفوقي هالزمن ينهان
حبيب ما صفا لك طع شوري بدل بغيره 
وانا شوري عليك تلحقه بسبعة الشيطان .

يقولون القمر لا غاب ؟ / حمد السعيد

يامنوة الروح يوم إن الحشا ضمّش 
تلّي حشا القلب تل ورزي القامه 
يافتنة الغيد يوم إن الغلا زمّش 
سمّي على القلب من خلفه وقدامه 
ويا تلعة الجيد لامن قلتي بفمّش 
ودعتك الله حبٍ(ن) يذبح هيامه 
ماني بقايل سقى الله روحتي يمّش 
لكن سقى الله عصر الحب وأيامه 
الشخص في عين من يغليه لا همّش 
ماتطيح له دمعه إلا تطيح له هامه 
روفي بأبو زيد قبل يموت مالمّش 
وهزي قوامٍ(ن) لاهندم كن هندامه 
أصيلةٍ(ن) قد قناها خالش وعمّش 
ولها عقيد النشاما يكرب حزامه 
وخليني أطيح من منحرش لا كمّش 
طيحة كبيرٍ(ن) ماعاد تشله عظامه 
مجرم غلا وش عليه إن شرْب من دمّش 
مادام بعدش بداية لحظة إعدامه 
وإن طوّل البعد وإن ماطال لا يهمّش 
أنتي فْوجهي ووجه الشعر وإلهامه 
القلب كنش فْحضن إبيش وألا أمّش 
إلين يموت الغلا ونكفّن أحلامه

يا منوة الروح يوم إن الحشى ضمَّش / محمد إبن الذيب

‏الزله اللي ضيقت صدري وانا صدري وسيع
‏من واحدٍ ماكنت متوقع علي يزلها
‏لو انها ماهي منه قلت شرهاتي تضيع
‏لكنها جت من قريب والدروب تدلها
‏نويت اعديها لكن القلب عيا لايطيع 
‏وادور لمخرج لها واحلها و املها 
‏لقيت حل اني اعديها لو اني ما استطيع
‏واعلمه اني رضيت بها وهو يفطن لها ‏
ماقصدي اني احسب الزلات للراس الشجيع 
‏ولا قصدي اني اكسر الرياجيل ولا اذلها
‏لكن عشان افهمه راسي ترا راسٍ رفيع
‏ماكل زله جاتني اقول ميده خلها
‏الاوله والثانيه والثالثه في ذب ريع
‏والرابعه بعرف علومه دقها من جلها
‏والخامسه والله لاعرضها على الخط السريع
‏الكبد ماهي فاضيه في كل ليل يعلها

الزلّه إللي ضيقت صدري وأنا صدري وسيع / عبدالله بن هندي الغامدي

الو لبيه فاضي وش تبي امر
ياجارح القلب جرح لو رحلت ادما
تعبان كني عيون المغرم السامر
لكن انا غير اشرف واغلى واسما
في راس ابوي العزيز وعزوة الدامر
ورجال يام وعزاويها فكل احما
مخزن اسمك بجوالي بسم عامر
يلين شيخت اسم عامر على لسما
وقصيدة محمد المكتوم والسامر
وابداع قيس الملوح وابن ابي سلما
لقيتها في محيا وجهك الغامر
مثل السراج المنير بعتمة الظلما
ونهودك الراهي المتناسق الثامر
مزموم والا غلاي اشتد به وازما
الشوته اللي خسرها حظي الدامر
جمهورها دمعتن في محجر المرمى
تتوقع الهجر طعمه حلو والا مر
الحل واضح لكن قلب الفراق اعما

الو لبيه فاضي وش تبي آمر؟ / محمد بن ذيب

رفعت كفي .. ماقدرت ارفـع الصـوت
لو كـان فالخاطـر .. كـلام ٍ كتمتـه

لحظه وداع وكنهـا سكـرة المـوت
ضاع الطريق .. اللي من اول رسمتـه

ضاع الطريق وصرت في الدرب مبهوت
مدري وش اللي فاتني مـا اغتنمتـه !

العمر مرّ .. وراح مع فايـت الفـوت
صحيح ضعت .. وضاع حلـم ٍ حلمتـه

الا انت ياللي قربـك لروحـي القـوت
لو غبت يبقى وسمك اللـي وسمتـه

يبقى كما نقش ٍ على الصخر منحـوت
حفظتـه .. بشكلـه ولونـه وسمتّـه

مهما الفراق اوجـاع والبعـد ممقـوت
اصبح مصير ٍ من غـلاك  احترمتـه

دمع النصر لو طاح من عين جالوت 
عين العقل  دمع ٍ تكنّـه حشمتـه

ذخرت لك يافرحـة العمـر .. تابـوت
فيـه الغـرام اللـي بديتـه ختمتـه

يبقى الغصن لو مابقى فالغصـن تـوت
تحـرك انسـام الذعاذيـع .. صمتـه

سكّت .. وانا مـن موادعـك مكبـوت
شي ٍ تجاهلتـه .. وشـي ٍ فهمتـه !

حبل الرجاء من جور الايـام مفلـوت
ياليت قلبـي عـن غرامـك عصمتـه

ياما .. بنيت بيـوت وبيـوت وبيـوت
اليوم .. كـم بيـت ٍ بنيتـه .. هدمتـه

رفعت يدي ما قدرت أرفع الصوت / مشعان البراق

مانيب مجازيك في صدك وهجرانك
ودعتك الله وتلقى واحدٍ ثاني

أتعبت الأعيان والأقدام من شانك
وانته ولاشئ سويته على شاني

فزيت لك يوم قلت اسمك وعنوانك
لوكان ماتنتمي لسمي وعنواني

ماجيت ادورك و لا أطق بيبانك
والا أترجاك مثل أفلان وافلاني

أنت الذي جيت لي وأعلنت بلسانك
انك على شوفتي جايع وعطشاني

صدقت هجرك ومنطوقك من السانك
وأقبلت لك مندفع من كل وجداني

ما كنت أفكر يجي في يوم نسيانك
وأنساك وانته معاهدني ماتنساني

الابعد ما قريت الكذب فاعيانك
حاولت اوادعك وانسى كل ماكاني

خلاص ماني بمتعني علشانك
ودعتك الله وتلقى واحد ثاني

ماني مجازيك في صدك وهجرانك / تركي الميزاني

بس لحظه يامهملنى وناوى فى غيابك
دامك اللى ناوى الفرقا باأقول اللى باأقوله
أنت يعنى لانويت تغيب باقف عند بابك
لاوربى تاقف الدنيا وأنا " تأبى الرجوله "
ماتعودت اتبع المقفى ولو حضرت جنابك
رح عساها خيرة والدرب لك عرضه وطوله
روح لاجابك امجيب الغيم واترك لى صوابك
جيت حلم ورحت حلم تشبه احلام الطفوله
ماأنت بأول من طعن هالقلب والدرب انتهابك
ياثقل خطواتك البارح وهالليله عجوله
باغى الفرقا !!جعل ربى يعجل فى ذهابك
بايع قلب لك الله كنت ماتحلم تطوله
من يلومك..؟ شايف حالك وف.. بداية شبابك
طاغى تجرح قلوب الناس تحسبها بطوله
بسألك: كم واحد قبلى هقابك واشتقى بك؟
أنت ياللى نظرة عيونك قبل عرفك خجوله
ياكثر ماكانت ظنونى دخيل الله تهابك
بس اكذبها واقول اوهام والقلب وميوله
اثرك اللى تستلذ ان ذاقوا العالم عذابك؟
مشكله !! والمشكله هذى بسيطه ومحلوله
كان مالبستك الغيره مثل لبست ثيابك
قل عوافى.. قل مثل غيره تركته وبسهوله

أنت يعني لا نويت تغيب باقف عند بابك؟ / حمد السعيد

مرحوم ياحبٍ ترعرع بالأعماق
متغذي دم العروق الصّخافي

في كل عضو له مقر وميثاق
بين الضلوع العوج بيّن وخافي

يروق مع روقه مزاجي اليا راق
ويحس بي اليا لحقني أخلافي

ويحس بأشواقي اليا صرت مشتاق
قدّام يصبح فالامور اختلافي

واليا هنا علقّتها فوق معلاق
وسليت سكين الخيانه ياكافي

ودعتك النسناس ياورد الأشواق
كرامتي تحكم علي بأنصرافي

قطفت منّك ما تهيّا وما لاق
ورميت باقي ذكرياتك خلافي

لا دمعة طاحت ولا خاطر ضاق
ماقول غير اللي على البال كافي

يكفي ثلاث سنسن مرّت على ساق
عين فراش لك وعين لحافي

واليوم في تسعه وتسعين طقاق
قلبي كذا طبعه اليا عاف عافي

واليوم في تسعه وتسعين طقّاق / سلطان الهاجري

تبيني صدق والا ما تبيني
قبل لا أبهذلك وتبهذليني

وقبل لا أفقد شموخي واحترامي
وقبل لا أشمت العذال فيني

أنا ماني بلعبه في يدينك
متى ما تعشقيني تعشقيني

أبيك ان كان جيتيني حبيبه
تجيني بصدق ولا لا تجيني

أنا ما أجرح مشاعر من عشقني
ولا أرضى لي عشقتك تجرحيني

ما دام أني عطيت بكل قلبي
مثل ما اعطيك من قلبي عطيني

وإذا بعت العذارى واشتريتك
تبيعين الرجال وتشتريني

عشان أكون صادق لي عشقتك
وعشان أريحك واتريحيني

دخيل الله وقولي وبصراحه
تبيني صدق والا ما تبيني

أنا ما جيت ألعب واتسلا
أنا جيت أحتويك وتحتويني

تبيني مثل كل الناس والا
تبيني أقدرك واتقدريني

مثل ما استحملك لامن زعلتي
إلى مني زعلت استحمليني

عرفتيني وأنا رجال وافي
وأنا وافي قبل لا تعرفيني

أحب الصدق لو هو من عدوي
وأعاف الكذب لو من والديني

مثل ما أقبل بليني وبشموخي
لو أكره رحت بشموخي وليني

إذا عن عاذلي ديني ودينه
وإذا عن غيرتي دينه وديني

أنا لي ثارت الغيره بقلبي
تقول الجن الأزرق معتريني

أبي وأنتي معي منتي لغيري
وإذا كنتي لغيري جنبيني

أغيب وتذكريني بالحشيمه
ولا أمرح في ذراك وتلعنيني

طويلين الشوارب ما احقروني
تبين أنتي تجين وتحقريني

إذا نفسي رضت لي بالمذله
أبذبحني قبل لا تذبحيني

مادام أني وفي كوني وفيّه
لاني ما أخدعك لا تخدعيني

أنا لي أخذت قدري واحترامي
خذيني مثل ما تبـ تاخذيني

تبين بخوتي سيف(ن) مجرب
وإذا بمروتي ليث بعريني

فأن ألفيتني شهما شجاعا
فليس البر أن تستضعفيني

فأني ذقت بالآلام ذرعا
وما في الغدر رمح يتقيني

أكف الدمع حزناً بعد حزن
وعشت القمع حيناً بعد حيني

لعمري كم حويت الناس قلبا
وما في الناس قلب يحتويني

أنا الحزن الذي لا حزن بعدي
ولا يغني حنينٌ عن حنيني

فلا من كان قبلي كان قبلي
ولا من قد يليني قد يليني

أنا المملوء حزناً وانكسارا
وما فرّطت في عرضي وديني

أنا المختال من فخري بفقري
وتبّت كل عينٍ تزدريني

أنا من ذاق ملئ الأرض هونا
وما أخضعت للدنيا جبيني

فإن جاءت بي الأقدار يوما
أجوب الأرض خوفا من أنيني

فـ روفي واحفظي لي ماء وجهي
ولاتخشيني واخشي الله فيني

فلو أني رجوت الله شيئا
فأرجوا الله أن لا تظلميني

علشان ان عشقت اعشقك كلي
أبيك كلك تجين وتعشقيني

فلا تقفي عيونك عن عيوني
ولا تدفي يديك ألا يديني

أكون أقرب لقلبك من عروقك
وأحسك بين شرياني وبيني

اسامح لك خطاك اليا خطيتي
وأنا لا من خطيت تسامحيني

ولك مني عهد ما أصد عنك
وأبي منك عهد ما تخذليني

عشان أبقى معاك العمر كله
وأشيل محبتك برموش عيني

أنا بحلف يمين أني لصونك
فلا أخونك ولا أرد بيميني

وعساني للهلاك أن خنت
وأنتي عسى الله يلعنك لو تتركيني

تبيني صدق ولا ما تبيني؟ / حامد زيد

الشخص يلدغ من جحر ويتركه
‏وأنا لدغت عشر مرات لكني

‏مازلت أنوخ ركابي في مرابعه
‏سفاه رأي ورجليني يودني

‏ما كان صبراً عزيز النفس يمنعه
‏بل كان ظني وأظنه خايب ظني

‏هوجاس ياللي مضى لي وقت أصارعه
‏أنا سجينة وهو ذلحين ساجني

‏لابد أبين خصيمي قاتلي من هو
‏وأدفنه حياً قبل برضاي يدفني

أنا سكيعً مشرد في شوارعه
‏وهو عزيز مكرم مادرى عني

‏القرش يرفع بيت لاعماد له
‏والفقر يهدم بيت العز ويدني

‏الله.. وربي..وديني لا أضيعه
‏شاء القضاء وجاني من يجنني

‏أبو جديل أليا منه نطق شنهو
‏كنه يشقق حشاي و ييبعني 

‏عين الحمام صفاءً في محاجره
‏ورمش ضليل ولكن مايضللني

حاز الكمال جمالاً حتى أصبعه
‏والعين والخد والأذنان والسني

‏الله وأكبر عليه وكل مامعه
‏لاشفت زوله مقفى تقل يلفعني

‏غروٍ وضعني جزافاً وسط مدفعه
‏و عقل قليبي وحاول بي وأقنعني

‏أن الذليل عزيز النفس يتبعه
‏والظن ظني وأظني صايب ظني

الشخص يُلدغ من جحرٍ ويتركهُ / ياسر التويجري

لاتحرك جرحي الماضي الاليم
ولاتحسب ان طول بعدك طهره
كل جرح يهون يالجرح القديم
وكل شي قد مضا معك اذكره
جرحي وذكراك والليل البهيم
حزت فوادي بمثل المنشره
العذول غراب وانا اكبر غشيم
والجروح الماء وطاريك حجره
والزمان اكرم من الحظ الكريم
لانفتح لي باب صوبك سكره
وحبك اللي لاطرى لي رحت اهيم
قمت احسب اصغر كلامك واكبره
ليتني عاد الهوا توه فطيم
انعذلت لعاذلي بس خيره
مالقيت من الوفاء يااول نديم
كون صدق الحزن وجهه وظهره
عقب رمح الشوق في وجه الصميم
سيف هجرك في قفاه وشف ثره
وانت شكلك تحسبني في نعيم
لني اخبي صوابي واستره
لايغرك حلم رجال حليم
مهون اللي من سكوته فجره
ولاتحسب الجفن من دمعه عقيم
يستحي منك والى اقفيت انثره
ولايغرك وان بدا جسمي سليم
والله ان جسمي سوار المقبره
والله ان امر من ضحك الغريم
شوف حقي بين اياديه اشكره
والله ان احر من دمع اليتيم
دمعة الرجال من فرقا مره

لاتحرك جرحي الماضي الأليم / محمد حمد بن فطيس المري

غصن الحنين 


اهتز غصن الحنين وطاحت اوراق ابيك
من ريح فرقاك مير الله ستر ماانكسر

واسقيتها الذكريات واردفت هذي بذيك
واستورق بلا تغيب ولا يطول الهجر

تلاحق الي تبقى من الغلا بين ايديك
وش يجمعه لو تطول غيبتك وانتثر

يتلني شوق لك رحمه على والديك
ماني بقد الصبر ولا انت قد الصبر

شف حالتي فالغياب اشكيك منك واليك
هم برى الحال وعيون ذبحها السهر

وش يمنعك لاتواصلني وانا اموت فيك
ظروف ليله ثلاث اسبوع ياخيّ شهر

كمّلت ثالث وانا كليّ شغلني عليك
ثلثين قلبي يباس وثلث باقي خضر

إن ماسقيته وصل ماعاد هو مرتجيك
باكر إليّا هبت الجوزاء يطير الشجر

﻿صبري على غيبتك باسم الغلا مشتريك
لا فارق وسع عين ولا انت فارق خصر

في غفلة من زماني كنها تحتريك
غنت مقادير روحي لين جابك قدر

مريتها كنك الطرقي قبل تهتويك
من شفت زولك وخفاقي يكر الجمر

ألين قهواك شعر من الغزل يحتويك
من يومها وانت لامن جيت فالمختصر

واليوم في غيبتك ماني بعاجز لا جيك
لكني اخاف لامن جيت مالي قدر

ابيك واكذب عليك ان قلت ما تشتهيك
مشاعري يا نظر عيني وكلك نظر

اما احتضنها وصل والا تسلم عليك
تلقى بدالي وانا بشحد زماني صبر

أهتز غصن الحنين / حمد السعيد

مشكلتي أني … لا قريب ولا بعيد
‏وآلذ حاجاتي … بديت أملها

‏أنا عنيد وخابر حظي عنيد
‏والله على الأيام من يامن لها

‏مشاعري مابين سادات وعبيد
‏هاذي تداويها … وذيك تعلها

‏نفدا عيونك لا تعيد ولا تزيد
‏المشكلة بيدك، وبيدك تحلها

‏لو كان تعطيني من أيامك رصيد
‏مافي مثل الي تجي في حلها

‏ثم قلت لك مشتاق ما يحتاج أعيد
‏لا تمنع دروبك على من دلها

‏مابيك تحصرني على بيت القصيد 
‏محتـاج لأبيـات القصـيدة كُلـها

777

Popular tracks