amr hassan

عاوزة أفرح بيك
لما أفرح بيكي انتي الأول
اتلم ياواد بتكلم جد
انا عاوزه اتطمن ليك وعليك
والنبي فكّك 
والله عبيط
انا يابني هاروح مش هاقعدلك 
محتاجة اشوفك ساكن بيت
هو انا يعني بنام ف الشارع ؟
ياحمار اديني عقاد نافع 
مش هتجوز انا كده مرتاح
أنا أمي كمنجة وحضن متاح 
ومشاعر معرفش احكيها
أنا متجوز أمي أساساً 
متطمن وانا عايش بيها
أنا كل ما بهرب منها واغيب 
بكتشف إن انا بهرب فيها 
الست دي حالة ماتتكررش
نتغير ..... هي ماتتغيرش
الدنيا تشيلها وتهبدها 
تطلع تنزل
تكسرها تقوم 
أنا أمي أنوثة بـ100 راجل
ورجولة بدرجة ناي مكتوم 
ساعة ماتوفى أبويا وراح 
شوفت ف نظرتها كلام وجراح
من يومها وهي عمود البيت
والآمر دايماً / والناهي 
الدوا جيبته ؟
فاكراني نسيت ؟؟
انا عارفه ان الدنيا تلاهي
احضنها تقوللي امشي يانصاب
بتغيب أيام زي الاغراب 
وتقولي مشاغل وأبصر ايه
انا أصلي بقيت شاعر معروف
قالك معروف .. بأمارة إيه 
كوافيلك تشهد يامهزأ
ف رضاكي يامزة أنا بتلزق 
واخرج على أوضتي شوية وانام 
واسمعها تصلي وتدعيلي
الواد تلفان
انما طيب .. وانت قريب
ارزقه رزق بحجم السماوات 
وارزقه بالخلفة ولاد وبنات
وتنام وتقوم تلاقيني مشيت
فتقوم تبدأ ترويق ف البيت 
أنا اسف جداً ياحبيبتي
علي سفري الدايم والاشغال 
علي كل كلام ضايقك واتقال 
انا مهما بدور وباعيش ف الدور 
باطلع وانزل واجي عليكي 
أنا راجل جداً 
ورجولتي تلخيصها ف بوسة علي ايديكي 
والدنيا ان ضاقت ف انتي براح 
وانا جنبك باتطمن وارتاح 
وخناقنا ساعات بيكون راحة 
وخصامنا كتير بيكون تلكيك 
الأم مكان لسكون الروح
وخضار من قلبك طارح فيك
أيوة ياماما ؟
عاوزة أفرح بيك

قصيدة عاوزه أفرح بيك

 بعد بعدك عني فعلا كنتي اقرب من ما كنتي
كل حاجة عبارة عنك كل حاجة شايفها انتي

سايبة ريحتك بين هدومي سايبة قلقك بين همومي
سايبة أيامك في يومي وذكريات ملهاش نهاية
سايبة صوتك بيحاوطني سايبة صورتك في المراية
سايبة حاجة فى كل حاجة رغم انك مش معايا

هحكي عنك للي فاضل من صحابي ومن جيراني
للي فاضل من سنين واللي عدى من زماني
للي فاضل ليا بعدك بعد ما نسينا اللي كان
هحكي عنك للأماكن كل ما همشي في مكان
خدنا فيه في الماضي صورة أو مشينا هناك سوا
واحكي عنك لما هتعب للأطبا والدوا

هحكي عنك للآمال والأغاني المستحيلة
هحكي عنك ليكي انتي قبل ما هنام كل ليلة 

CDQ 320 Kbps I سوف احكى عنك I 2015هانى عادل

تقابليني
واراقب شعرك المقصوص 
كإن الليل نقص ساعتين 
جميل والله ولايقلك 
وفاتح للخيال طريقين
وطول عمرك بتختاري الهدوم بمزاج 
وعارفة تنقّي برفانك كإنه انتي 
ياواخده العقل من ايده كإنه ابنك
باقولك ايه 
خرجتي منين على الواحد خروج زهرة
خروج مزيكا من ( راجح داوود) مثلاً
بكل مافيكي من ستات فاجئتيني 
فتحتي الحلم والتأويل وسيبتيني
مهرج والسما سيما 
وطايش والطريق مراجيح 
تقول امي :
بقالك فترة مش مظبوط
تبان قلقان لكن مبسوط
ومتوتر كده وخايف 
ومش فاهماك 
تعبت معاك
تكونش ياواد عشقت جديد ! 
تقول امي ف وصف العيد 
( ياريتك جيتنا من بدري ) 
واظن الوصف ده ينفع يكون عنك
( ياريتك جيتي من بدري ) وخدتي الروح وخدتيني
تقابليني 

تقابليني !

من ديوان "عن قلبه فيما أفناه"

لــ محمد مصطفى
توزيع : ميدو راشد

ليل داخلى- مشهد نهايه
ميدان العتبه - خلف سور الأزبكيه 
مشاهد متعاقبه لبشر ووجوه كثيره وكاميرا تجمع الصوره من نقطة فى السماء
والابطال يبدأو فى الظهور-_ ويبدأ تحميل المشهد بسرعة المـوت 

(1)
تايه بالفطره 
خـايف من بُكره 
يـبدأ يومه بمعلش
ينهى بكدبة (هانت على فكره
ماشى لمكان رجليه ما تروح
سرحان فى تقاطع فشله مع مـوت الروح 
مصاريف وعـلاج 
فواتير فى ادراج 
دايما مـدفوعة بطلوع الروح
يهرب مـ البيت وديونه 
متعشّم فى الجامع ودقونه
يخسر رهاناته 
فاشل فى حياته .. ومنحوس من يومه
يمشى فى جنب مكسور 
على اول شارع النادى
واقف تفكيره على راحة باله فى الماضى
بيوارب باب لشفايفه
مع آخـر نفس فى سجارته 
كان ملك الموت جنبه وشايفه
كام دمعه فى ازاز نضارته
والموت بيظهر بحقارته 
يستأذن من يُتم عياله
ويخفى المشهد بستارته
____
(2)
كئيبة فى بيتها 
لكن قصاد عـيون الناس
بضحكه بتخفى كآبتها 
وتعزف لحن من صوتها 
وترسم سلسله من حلم على رقبتها 
وترمى دبل حبيتها 
وتعشق دبل نصيبها تكون فى غير  إيدها
راسمه الفراق شارع طويل فى وريدها
فى زحمة الكلام تدفى 
فى فُرقة الحاجات .. تبقى 
وتمشى فى الطريق خايفه 
وتمشى خطوط الحزن فى وريدها
وملك المـوت عـ الناصية 
عـارفها لسه مش راسيه 
كتير العـمر بيريدها
لكن المـوت حقن روحه فى وريدها 
______
(3)
مقاس سيادتك مفيش منه 
والـاستاذ ابنك ..
لسه بدرى غلى سنّهُ
وشوذ سيادتك البنى 
لـايق جـدا عالتحجيبة 
كل يـوم على هـذا  المنوال
انا عارف الشغل مش عيبه
لكنى تعبت من دا الموال
عشان مرتب آخـر الشهر 
ابيع كرامتى فى فاترينه 
والشئ الحي يـموت فينا
وملك المـوت كـان جاى شارى 
والمـوت بقى ليه حـق علينا
______
(4)
عــ أد ما حبيتك على أد ما كرهتك 
اخدتى اخواتنا ليه بدرى 
فى كل زقاق وكل مدّق
وطبعا كان لازمنى اجرى 
عشان الجبن ابقى من الحق
..
ندمـان ؟!
طبعا ندمان 
عشان سلمتك كشكول بيشُّر من احلامه 
وسلمتينى انا وجيلى
 وكشكولنا حضن دمّى بأوهامه 
.
وكوردات المـوت .. 
معزوفة بنوتة روحنا
هربانه وسايبه الدنيا تعيش فى جراحنا 
وحياتنا هى حكايتنا 
حكايتنا بصوتنا بنفوحها 
حكايتنا ريحتها بتفوحنا 
فمهما نسكر
نفوق بالوقت
ولما نفوق .. نقول السُكر ريحّنا
والمـوت كائن مابيخسرش
المـوت فى طريقهُ مابيختارش
لكنه اختـار جيلنا فى طريقه
حضرنا جنازات بعض دون تفريقهُ
والمـوت كائن استثنائي 
عشان جايلى من باب تانى 
انا شامم ريحة المـوت 
انـا حاسس طعمهُ فى لسانى
والمـوت ساعات بيكون حل 
الموت مع ميت قاتل برئ
____ 
(5)
كنايه عن الآخره 
هتاخد ناس متعرفهاش فى سكّتك 
"إن قتلت فـ أنت فى الجنة" 
بس اوعى حد يموّتك 
ابعد عن الاطفال حرام
سلّم نفسك للموت
وسلّم اللى هيموتو معاك
ولو مات طفل اديك رحمتهُ
وبلاش تبُّص كتير وراك
ساعة الصفر محدده
والناس بتكره بعضها 
وكل روح فى انتظار حقن المـوت فى الاورده
والمـوت بيعمل Loading
وريموت الشهاده فى إيدك
اظن مفيش فتوى ابسط من كدا

amr hassan

Ich Bin Shimaa