[مساحتها الألم والنافذات جروح]

كلمات الأديب جابر الكاظمي
أداء و ألحان الرادود علي مهدي
.....

هالليله الفكر محتار   بين الزهره والكرار
بين الباب   والمحراب
قسَّمْنه الدمع والنار   بين الزهره والكرار

★★★★★

طردني الصبر من بابه ورِحِت للنوح
لگيت ابوجهي باب النايحه مفتوح
أحس چن روحي دار اتشيّدت مو روح
مساحتها الألم والنافذات اجروح
هاي الدار دار الينتحب وينوح
ممنوع الصبر بس الحزن مسموح

حزني اعله ام ضلع مهشوم   نوحي اعله الوصي المظلوم
بين الآه   والويلاه
قسَّمت الحزن أدوار   بين الزهره والكرار

★★★★★

دخلت لدار نوحي وأسفح العَبره
أحس ويّايه يبچي العالم بأسره
ضلع عمري انكسر واستَهْوَنِت كسره
بچيت لكسر ضلع الطاهره الزهره
افْجَرِت بركان حزني ونثَّرِت جمره
ووزَّعت الجمر عالضلع والطبره

واجْعَلِت الدمع نهرين   للزهره ولبو السبطين
بالحسرات   والآهات
شطَّرت الدمع أشطار   بين الزهره والكرار

★★★★★

انفگد هابيل صبري والگلب آدم
وخليل النوح بعيوني حفر زمزم
على ضلوعي ادفَعِت باب القهر والغم
رِدِت ضلعي اويه ضلع الزهره يتهشَّم
ركن حِلمي انصدع عالبضعه واتهدَّم
وصخر صفوان صبري اتنثَّر امْن الهم

نهاري لفاطمه ونّيت   ليلي اعله الوصي حنّيت
يالمحزون   شفت اشلون
أجري ادموعي ليل انهار   بين الزهره والكرار

★★★★★

اخْتَمِت قرآن دمعي ابمسجد عيوني
وعلى كعبة اجروحي طافت اظنوني
ألوذ بصبري أهل الصبر يَردوني
ألوذ اشلون وآنه امجرّحه اجفوني
مصاب الزهره هد حيلي وخطف لوني
أنوح بكل مسافة عمري خلّوني

أجري العَبره يم الباب   لو أجريها بالمحراب
عالمهضوم   دمعي ادموم
أبچي اعله الجره والصار   بين الزهره والكرار

★★★★★

دِليلي اعله الصبر ياما بذل جهده
اشيصبر والرزايه اتجمِّعت عنده
ينوح اعله الوصي وبالنوح ما يِهْدَه
على اللي طاح دامي ابموضع السجده
هالليله أبو الحمله انحفر لحده
وبين آدم ونوح الجثّه متوسده

هالليله الوصي مطروح   بين آدم أبوه ونوح
ما ملّيت   من ونّيت
ونثَّرت الگلب نِثّار   بين الزهره والكرار

★★★★★

انصرع فرض الصلاة ابوسط محرابه
ودين الباري طبروا هامة اكتابه
أبو الحمله علي ما يضمد اصوابه
انطبر واتزلزلت هالدنيه لمصابه
وگع وانخضب وجه اللوح بخضابه
وغابت كل معاني الحكمه بغيابه

دم طبرة علي المسفوح   ما بين القلم واللوح
هالصرخات   والعبرات
يا جمرة حزن تختار   بين الزهره والكرار

★★★★★

مساحة الألم - استديو (كاملة)

حضر بالطف رسول الله وتحير - استديو

حضر عندك علي جدك - استديو

قصيدة كل قطرة دم بشرياني 
الرادود يوسف سعد العاملي

اليوم راحوا كل هلي

الأديب جابر الكاظمي

Related tracks