محوطانى السلالية قصاد الدنيا مازل

قعدة مزيكا - فرقة عمدان النور (Gazaga Band) - مسارح و سيما

آخر سيجارة

عُقب السيجارة الاولى
قال اوعى ترميني
ولَّع بناري التانية
فـ التانية تحييني

عُقب السيجارة التانية
قال اوعى ترميني
ولَّع بناري التالتة
فـ التالتة تحييني

قاعد ومستنِّيكي مع قهوتي السادة
مع وشها المجروح باتملَّى فـ غيابِك
حيران وباسأل فين فـ الحلم باتمادى
عطشان وروحي ايدين بتدق على بابِك

عُقب السيجارة التامنة
قال اوعى ترميني
ولَّع بناري التاسعة
فـ التاسعة تحييني

عُقب السيجارة التاسعة
قال اوعى ترميني
ولَّع بناري العاشرة
فـ العاشرة تحييني

فاتح قصادي كتاب متلخبطة سطورُه
هشَّة الحروف م الخوف مش قادرة تتماسك
بيني وبين الناس الليل نصب سورُه
مستنِّي ييجي النور ممزوج بأنفاسِك

آخر سيجارة معايا
شافت دموع عيني
قالتلي يا ابني كفاية
قوم ياللا واطفيني
----------------------------------
كلمات والحان : أنطونيوس نبيل
توزيع : وليد ميمني

آخر سيجارة - جوني

ليه عينيكي؟

ليه عينيكي بتحلى أكتر
لما عنِّي بتبعدي
ليه فـ قُربك منِّي باقتل
كل حلم بيبتدي
ليه شفايفِك وانتي جنبي
بالدموع متلونين
هوَّ ذنبِك ولاّ ذنبي
نبقى دايماً مجروحين

ميت سؤال شايفُه فـ عينيكي
تبقي جنبي ومش لاقيكي
لو خلاص الخوف ماليكي
عرَّفيني وماتداريش
لو خلاص م الخوف تعبتي
ودَّعيني يا حبيبتي
مش هـ أقولك ليه فارقتي
مش هـ ألومك ماتخافيش

غصب عنِّك بتسيبيني
برضُه أحسن ماتخونيني
واللي كان بينِك وبيني
ويَّا غيري هـ تلاقيه
دوَّري على حلم تاني
تمحي بيه الأولاني
بكره طيفِك لو نداني
هـ ابتسم واعمل ناسيه
------------------------------
كلمات والحان : أنطونيوس نبيل
توزيع : محمد يسري

ليه عينيكي؟ - جوني

Video Clip
https://www.youtube.com/watch?v=6wK3KCNWNa8

Follow Johnny
https://www.facebook.com/JohnnyEgyptianSinger/

(إنتا مجنون.. إنتا مجنون
إنتا مجنون.. إنتا مجنون)

أنا مش برغوت من براغيتكم
ولا صوتي مراية لبلاغتكم
تخاريفي بكيفي بأسرسبها
على غفلة هـ أبادر وأباغتكم
هـ أباغتكم من غير ما أحسبها
ولا حدش يستجرا يغيتكم

(إنتا مجنون.. إنتا مجنون
إنتا مجنون.. إنتا مجنون)

خلُّونا كائنات متدربة
بطريقة خبيثة متجربة
العقل اللي فـ يوم يعارضهم
يدُّولُه أوام بالكهربا


محوطاني السلاسل
قُصاد الدنيا ماثل
بتهمةْ إني عايش
على هيئة سؤال
لمحني القاضي برَّق
سألني إزاي أفرَّق
ما بين دنيا الحقيقة
وبين دنيا الخيال

ساعتها قلبي دق
وأعلنت اكتئابي
صرخت وقلت لأ
ماتستناش جوابي

(بعد ما قولت.. مش هـ أتبنِّج
علُّوا الفولت.. قالوا اتشنِّج)

رجع وعاد سؤالُه
ضحكت وقلت مالُه
ه‍ـ ألخَّصلك حكايتي
فـ كلمتين وبس
بأسجل اعترافي
بإن جناني صافي
وبأشهد إن قلبي
فـ أوهامُه اتحبس

ساعتها القاضي أصدر
حكم بإعدام جنوني
صرخت بحُرقة أكتر
ياريتكم تشنقوني

ياريتكم تشنقوني
سيبوني أموت معاه
عشان من غير جنوني
مافيش معنى لحياة

ياريتكم تشنقوني
سيبوني أموت معاه
يا ناس من غير جنوني
مافيش معنى لحياة


(بحكم القانون.. دا عقله عليل)
ألا تعلمون.. قانونكم ذليل
لإن القانون يا ناس فرضُه
طاغوت عايز يروَّضكم

(بحكم القانون.. دا مالهوش علاج)
ألا تعلمون.. بإنه احتجاج
دا عقله العليل يجوز مرضُه
يكون ترياق لأمراضكم 

(بعد ما قولت.. مش هـ أتبنِّج
علُّوا الفولت.. قالوا اتشنِّج)


---------------------------------
كلمات وألحان ورؤية: أنطونيوس نبيل

توزيع: أحمد العسال

جيتار: روكيت

ساكس: حموصو

هندسة صوتية: Shankur

مكساج وماستر: محمود عزت

اشترك في الغناء: ريم نسيم

محاكمة مجنون - جوني

يا عتمة ليه جوايا بتئني
مش كنتي قلتي إن الأمل أوهام
بتبصي ليه ع الجرح وكإني
شباك قديم بيطل ع الأحلام؟

بلاش تئني يا عتمة قلتْ بلاش
اتماسكي حبَّة أنا لسَّه بأتمنَّى
أضحك كإن القلب ما اتمنَّاش
وأقتل فـ حضنِك حلمي بالجنَّة

بأتحامى مِن بطش الألم فيكي
وأنده معاكي لموتي واستناه
طب ليه شفايف جرحي فـ عينيكي
ترجع تغني لضيّْ مش شايفاه؟

بلاش تئني يا عتمة قلتْ بلاش
اتماسكي حبَّة أنا لسَّه بأتمنَّى
أضحك كإن القلب ما اتمنَّاش
وأقتل فـ حضنِك حلمي بالجنَّة
.......................
كلمات وألحان: أنطونيوس نبيل
توزيع: محمد عبد الودود     (Doddz) 
جيتار: مصطفى أصلان
إيقاع: ماجد الصواف
ساكس: حموسو
قانون: محمود عامر
كمان: إيهاب صبحي
ميكس وماستر: Shankur

بلاش يا عتمة - جوني وإيمان فؤاد

كان بلياتشو متخصص.. يموت قدامها تضحكله
وكان عارف بيبني ازاي.. ملامح ضحكة على شكله
وقف على كرسي قدامها.. وشد المشنقه بإيديه
وهو لقى إنه بلياتشو.. مقالشي هو نفسه ف إيه
ده كان لما يشوف دمعة.. يروح ويشيلها في المونتاج
وكان لو يوم يعوز ضحكة.. يقوم يرسمها بالمكياج
وقف قدامها عالكرسي.. وشد المشنقه بإيديه
فجه واحد و قال وقف.. وضحكوا الناس علي الإفيه
فضل يضحك علي نفسه.. ومش عارف بيضحك ليه
***
كان بلياتشو متخصص.. يموت قدامها تضحكله
وكان عارف بيبني ازاي.. ملامح ضحكة على شكله
وقف علي كرسي قدامها.. وشد المشنقه بإيديه
دخل بدماغه في الحلقه.. وشدوا الكرسي من تحتيه
وهو لقى إنه بلياتشو.. مقالشي هو نفسه ف إيه
وفي المرة دي تحديدا مجاش واحد..
كما العادة في آخر لحظه قال وقف
وبص ف عينها وقت الموت.. تخيل وقتها شاف إيه
لقاها واقفه بتصقف.. مع الجمهور على الإفيه
وكان بلياتشو متخصص.. مقالش هو نفسه ف إيه
و كان عارف بيبني ازاي.. ملامح ضحكة أو إفيه
وكان بلياتشو متخصص.. وراح مع دوشة السوكسيه
كلمات : عمرو حسن
الحان : يحيى نديم

تابعنا على فيسبوك:facebook.com/GazagaBand
تابعنا على تويتر:twitter.com/GazagaBand

بلياتشو - عمدان النور

 جيبتلي صاحب وحبيته
زقنى فى المترو زقيته 
واما مات فيا ومت انا فيه 
روحتله بيته وعزيته 

حزن يا بقال ورا الجامع
هات بنص ريال عسل فى الكوز 
دة اللى كان عيل بقى شاعر
واللى كان ضاحك بقى أراجوز 

حبنى الشارع وحبيته 
عض قلبى الليل وعضيته 
خضنى الأنسان وخضيته 
لما بان من وشه عفاريته 

عدى فيا القمح سمرنى 
عدى فيا الفجر صبرنى 
عدى فيا الحزن غيرنى 
عدى فيا العمر كبرنى 

خدنى م اللفة لمريلتى 
خدنى م التسنين لحصالتى 
خدنى من مدرستى ع الجامعه 
خدنى م الترعة على الاسفلت

خدت م الاتوبيس مراياته 
خدت م السواق حكاياته 
خدت م الركاب تذاكر موت 

حزن يا بقال ورا الجامع
هات بنص ريال عسل فى الكوز 
دة اللى كان عيل بقى شاعر
واللى كان ضاحك بقى أراجوز

ياللى وحشانى متوحشنيش 
ضحكك السكر محلانيش 
خوفت م المطرة قفلت الشيش 
ليه فضل اسمك على الشباك 

كنت جايب دبلة وغويشه
كنت شارب حاجه مغشوشه 
شفت شبهك قاعده فى الكوشه 
قلت هى لا مش هى 
فتشتنى الدمعه عن الميه
كنت أنشف من حطب محروق 

حزن يا محول خطوط سيرى 
حزن يا عطار فى باب اللوق 
شوفلى تحويجه لتفسيرى 
حط ريحه بُن لضميرى 
شوفلى عود أصلب من المغشوش

ردنى عالباب عطب روحى 
جابلى ناى وزتون مطروحى 

مُر انا يا صاحبى لو دوقتنى 
جيت اقول الآه ما صدقتنى 
يطرح ايه الملح غير مالح 
يطلع ايه م الجرح غير مجروح 

ليه ما تصفاشى لغير صافى 
ليه فى عز الحوجه بتجافى 
شوفتنى غاطس ولا طافى 
كنت بندهلك حلاوة روح 

حزن يا بقال ورا الجامع
هات بنص ريال عسل فى الكوز 
خد سنين الجرى وسنينى 
هاتلى سن غزال دهب عينى 
قطع الاسفلت شرايينى 
هات بياض القطن شاش اللوز 

كلمات : خالد عبد القادر
 الحان: يحى نديم
غناء: فرقة عمدان النور

facebook.com/GazagaBand :تابعنا على فيسبوك
twitter.com/GazagaBand :تابعنا على تويتر

Seeret El Aragoz - سيرة الاراجوز

- غنيت غُنايا انتقم
مِن صرخة فضَّاحة
مِن صمت متفرعن

- رافض أنين السأم
مش طايقُه بصراحة
= رفضَك حرام شرعًا

= جرحك لا عمرُه اِلتأم
ولا عمرُه شاف راحة
علشان عنيد وأرعن

= إيَّاك تسيب عشنا
واسمع كلام أهلك
خليك هنا فـ حضننا
دا الموت بيندهلك
هـ تطير بعيد عننا
هـ تموت وحيد طبعًا


- أنا عشي بيرفرف بعيد
ماقدرش يصطادُه النظر

= عايز تطير هـ تطير وحيد
سلسل جناحَك بالحذر

- مايهمنيش.. ما اقبلش أعيش
منقار ذليل حلمُه انكسر
جوَّايا ريش.. مابينحنيش
ع الريش مافيش للخوف أثر

= البحر زيّ السَّما
والطير عشان اتعمى
أوِّل ما شافُه اترمى
ماقدرش يستنَّى

= الموج عليه اتحبك
شاف ابتسامتُه اتربك
دبلتْ عيون الشَّبك
لما السَّمك غنَّى

= ياما قالولُه يا طير بلاش
ونهوه كتير وما انتهاش
قال: اللي مات فـ صعودُه عاش
- أكتر ما يتمنَّى

= فيه حاجات كتير ماحسبتهاش
اسمعنا واتأنَّى
إركح يا واد.. وبلاش عناد
كلّ الطيور كانَّة

- أنا عشي مش قش ودفا
ولا قلبي بالحَب اكتفى
ولا جرحي غاوي الشَّحتفة
ولا أنّْ يوم أنَّة

= خلَّص كلامُه واختفى
فـ صعودُه للجنَّة
الصمت ساد.. صار السواد
أجراس بلا رنَّة

.......................................
كلمات وألحان ورؤية: أنطونيوس نبيل
توزيع: وليد ميمني
كلارينت: حموسو
ناي: محمد عاطف
قانون: وليد حسن
ميكس وماستر: ميشيل عبد الملك

يا طير بلاش - جوني

زحمة المترو - بلاك تيما


متخافش من بُكـره .. 
خاف بس من خوفك ..
خلِّى الحياة فكره ..
و ارسمها بحروفك ..

إفرش سمَاك ألوان .. 
إعشق بكل جنان .. 
واياك تعيش ندمان .. 
أو مَحنِـى لظروفك ..
كل الجراح جواك .. 
بالصبر تطرح ورد ..

خطاويك عيدان خضرا .. 
و مسيرها يوم تشتد .. 
دى الشمس مهما تغيب .. 
يفضل شروقها نصيب .. 
لو حتى كنت غريب .. 
حضـن القلــوب يتمَد .. 

افتح بيبان الصمت .. 
و اصرخ بصوت مسموع .. 
لو زاد عليك الصعب .. 
خلِّى الجبين مرفوع ..
إفتح عينيك شبابيك ..
ضُم الوجود بإيديك ..
دا الفرح مستنيك .. 
و الحلم مش ممنوع .

Mssar-Egbary-Band -mat5fsh min bokra :)

Abo Elshabab -  البرنامج - الحلقه 17

Abo Elshabab -  النـاس مبـترحمش وكإن اللى حصل ما حصل

أمدّْ إيديَّا الاقيكي
والاقي لغربتي نهاية
أنام ماحلمشي غير بيكي
شطوط ممدودة جوَّايا


محاكمة مجنون - جوني

Johnny singer 81

Recent comments

Mahmoud Anis

Habiba Wael

user954390591

على عامر

Related tracks