ع القهوة 
_________________________________________________
عاطل قاعد ع القهوة
يلعب دومينو ويلعب طاولة 
يضحك ويهزر مع إن 
الحظ مقضيها مزاولة 
فاشل في اللعب إكمنه 
معملش حسابه يدخل قهوة 
ناجح متبروز على الحيط 
مش لاقي شغلانة حتى في غيط 
وإن حد في يوم قال ده عبيط 
يضحك ويصقف بالإيد 
تعبان مش هيقضيها مناهدة 
لا هيحكي ولا يشكي لحد 
لا هيسمع ( لازم ) و ( لابد ) 
ماهي حياته لا هي مزاد 
ولا حتى مقاولة 
وعشان كده 
مبقاش بيفكر في البصة
ولا عادوا ولا قولنا وقال 
واهو بطل يحكي ولو سألوا 
وقالوا يجي ألف سؤال 
ما هيسمع كلمة معلش 
وهيسمع نفس الموال 
فبيضحك ويهزر برضو 
ويقضي الوقت بطوله وعرضه 
وفي أخر اليوم حظه يعانده 
ويجيب له ذكرى على سهوة 
تتقلب الضحكة لتكشيرة 
يفتكر الطيارة والتأشيرة 
والحلم اللي محدش طايله 
يضحك من تاني ويغمض 
ويقول مفيهاش نوم الليلة 
الحظ قافلها ومش سايب 
للحل مدخل ولا هفوة 
فيبص حواليه ويدور 
على حتة تبقاله وقتها خلوه 
ويفكر مع نفسه في حاله 
فيدمع ويرفع فنجانه 
يتمزج بريحتها الحلوة 
يفتح بوقه ويرفع إيده 
ويكمل شربه للقهوة

Mohamed Ahmed