تدوم البسمة على طفلة
بيحتل الوجع جوفها ....
تدوم الدعوة من أمي
ل ابطال موِّتوا خوفها ...
تدوم العزة يا بلادى 
يا موطن كل جبهة ل فوق..
تموت الخِسّة في الباقي 
عشان سايبينها ب ظروفها...
تعيش الصرخة في الأطفال
في وش كلاب نباحها رصاص ....
يعيش كل اللي مات واقف
يموت كل اللي سابله قَصاص ...
يعيش الفصل في الأنقاض
ب كلمة ب دم في الكُرّاس 
"فلسطينتي يا رافعه الراس نموت وتعيشي متصانة "
هناك الطفل شاف الموت 
فَ عاش وسلاحه كان طوبة...
هناك في كلاب وماسكه سلاح
وتحضن حيط ومغصوبة...
هناك القصف.. بيدوِّي
هناك الضربة .. بتقوّي
هناك خانة الكرامة تعيش
وفي بلادنا؟ دي مشطوبة....
بيوتك شاهدة على فكرة
وهي 'الخوف مالوش عنوان'...
وأرضك شاهده على فكرة
على كل اللى ضحّى زمان...
وعلى كل اللي هيضحّي ..
هييجي اليوم و هنصحّي
في كل جروح ساكنها خمول
فَ عايزك تؤمني بالله ....
لإن مصير واحد قاتل
-
هييجي في يوم يبات مقتول.

فلسطينتي

بمرور الوقت..
بصيت لقيت كل اللي كان بيميّزك راح، كل اللي حابب تعمله وقت الفراغ اتنسى، وقت الفراغ نفسه اتنسى، ودخلت الساقية إياها متغمض بقى كل همك توجد الشقة لاجل العروسة اللي انت لسا متعرفهاش، حطوك في خانة المستعجلين وشدوا تحتك خط وبدأوا يلوموك ان انت متدلع ولازم تشد الحيل، بتقيس زوايا الميل في كل مرة تبص في مرايتك تلقى الشباب شاب، تفتح الفيسبوك تلقى الصحاب بتوع زمان ايام ماكانت فسحتكو واحدة وحصصكو واحدة وكلامكو جوا الفصل كان كله غزل على واحدة، تسرح في ملامحهم تلقى الهموم بالكوم، تلقى العيون بتقول غير اللي الوش مصدّره، الضحكة مش أصلي، مش زي بتاعت زمان ايام ماكنتو سوا، وقعك فخ الهوى، ورميت حبالك في مرسى مش نفس مقاس سفينتك، خليت عيونها مدينتك، طبّيت بقيت تايه، كل الشعرا من قبلك حذروا سحر العيون، انت اللي كنت مصمم، طرد الموج هيلبك في عز موسم العشاق، طبيعي بقيت تشتاق طعم الوقوف مختلف بعد لف كتير ع الرجل، تحس باستقرار حتى ولو تعبان، تعب الوقوف أهون من انك تكون هيمان، ماشي معكش خريطة، رايح ملكش مكان، صاحبت كل الموقف من كتر مرواحك ومجيك على الوظيفة الثابتة، ام حبة وشوية اخر كل شهر، ودنك داقت طعم سماعات ياما، وبلاي ليستك بقت محفوظة، كل اللي عديت بيه ساب أثر، و بنى جواك جبال عليها جبال، حجبت الرؤية وغطت شعاع الشمس وخبت روحك عن كل اللي بيمروا، إلا اللي انت بتقولّه، ضمن الأثر اللي اتساب، ميكونش ليك أحباب، وإلا هيولّوا.

#مش_شعر

مش شعر

الوحدة ساعات بتكون أهون
من لمة تصحِِّي في أوجاعك
حُبَك للوحدة ده شئ ناتج 
عن حد اهتم و راح باعك
و بدون مايقول أى مبرر
قام ساحب نفسه و خد روحك 
ف اتعود هو يعيش بيها 
وانت اتعودت على جروحك 
ف تعيش تتنفس .. مش قادر
بينك ومابين الناس عايش 
بينك ومابين نفسك لأه...
قلبك راح عجّز واتداين
أصبح متعسّر في الدقة...
اغانيكو زمان كنت حافظها
دلوقتي بتهرب ليه منها ؟
و الهاند فري كانت شاهدة
دلوقتي في جيب شنطة دافنها ...
شاتكم كان دايما بينوَّر
دلوقتي كلامكم بات قِلّة ...
كلمني بتفاصيل عن أخر
إفيه اتقال منك للشِلّة ؟
من جوا بقيت رغاي جداً
من برا هدوئك بقى مزعج
ف بقيت بتروح لطبيب لكن
عمرك ماشكيتله من العِلّة..
قام صنَّف حالتك بسذاجة 
راح خبَّط فجأة على دراعك
"قوم يابني....
-
الوحدة ساعات بتكون أهون
من لمة تصحِِّي في أوجاعك"

الوحدة ساعات بتكون أهون

رغم خوفه من الفراق -فوبيا جاتلُه من البشر- 
كان حاكيلك بالمفيد المختصر ...
إنه حاول مهما حاول 
يطوي نَفسُه فِ السطور 
ضلمة الأشعار دي نور 
و إنه نِفسُه يبقى "واحد" 
روحه عايشه بدون "كسور" .. 
-عزلة المتساب في ذاته / عزلة المسجون في سور- .. 
رغم خوفه من الفراق -فوبيا جاتلُه من البشر- 
كان حاكيلك بالمفيد المختصر ...
 إنه عاشر وإنه حب ..
و إنه ساب في قلوب صحابه ١٠٠ علامة...
و إن ضِحكُه -كله كدب- ...
أصلُه خنقة في يوم و سكنت
جوا mask الإبتسامة...
رغم خوفه من الفراق 
كان قراره ب إنعزاله لا يُطبق في وجودك.. 
وقت ماحتاجتيه لقيتي ..
وقت ماحتاجك ، مافيش ..
-
كل خوفه م الفراق / صابُه من بعد أما سيبتي
لما قال أنا مُت فيكي
غيبتي -خوفتي
 عشان يعيش!


كريم محمد

Popular tracks