كلمة باحبِك ف ذاتها إختبار مش سهل 
دي كلمه صعبة وعصية وجايه بالعافيه 
كلمة وراها بيوت وحنين وتر مكبوت 
وعيال بتشبهلنا ف الصورة قبل الصوت 
ووراها شك وشوق وعناد مالوش آخر 
ووراها حزن وخوف وكلام عبيط ساخر 
كلمة قصادها الألم بيلين ويتاخر 
وتلاقي نفسك ف لحظة وسط عزوة وأهل 
والأمر ده مش سهل ..
ولا سهل اجيلك واقولك كلمة واسحبها 
انا سيرة مش ولابد 
وسنين غلط وصواب 
انا جوه مني ضباب 
راجل حزين واتساب اكتر ماساب بكتير 
فقد الأمل بالألم ولقاكي بانله ضمير 
فان كنتي هترديه .. عداكي عيب واتنين
وان كنت هتطاوعيه .. تاخدي الثواب ثوابين 
وان كنتي هتضميه وتكوني أم وأب
هيكون عشانك سكن وحاجات كتير تتحب
راجلك ف وقت الضيق 
وصديق مابعده صديق
وطريق اذا مشتيه هتلاقي فيه نفسك 
الشعر مابيديش الا اللي حب وداب 
وانا طفل مابيَديش الا احضنك ف غياب 
اقصد تجاهك باب والقاكي مش قافلاه
عايزك ومش طالب غير ضحكتين لله 
جايلك باقول ياحياة وباقول تكوني الجي 
نظرة عنيكي نجاه ودليل بإن انا حي 
والأعمي سر عماه اهمال وجود الضي 
ف ازاي عنيا تضل اذا حان وبان ضيِّك
بسأل على نفسي .. فبقولك ازيِك 
كان نعمه من ربنا زيك يفوت من هنا
ياللي انتي مش زينا ازاي لقيت زيِّك
وازاي بحبِك كده ؟ 
انا عمري ماتخيلت انك تكوني انتي 
اول ماشوفتك لقيتني يعني مش طايقك 
عمال اضايقك كإنك حد تاري معاه 
وانتي الصراحه كمان لا كنتي حباني 
ولا كنتي حابه تشوفي هزاري وجناني 
ولا كنتي عايزاني 
تشوفيني ماشي طريق تمشي ف طريق تاني 
فجأة بدون أسباب لقيتني بمشيلك
ولقيتني بحكيلك كل اللي ماحكيتهوش 
ولقيتني بآمنلك 
ولقيتني بقى منك 
أو حد من ناسك 
وانا يعني مش ناسك ف الحب ولا قديس
انا صوفي مش ماسك الا ف هدوم ابليس 
فانا يعني مش ولابد وتاريخي مش هوّ
لكني والله ... كما طفل من جوه 
دماغه زي الحجر ويبان ف طبعه عنيف 
وف لحظة يقلب مطر وتلاقي روحه رصيف 
عيل ف اصله نضيف محتاج شوية شغل 
وهمّتك وياه 
على قد ماتساعديه وتحطي أملك فيه 
على قد ماهتلقيه بينقّي اخطاؤه 
فيه حد جايلك هنا 
واقف بأوراقه 
ف ايديه كتاب ربنا وف قلبه اجزاؤه 
بيحلّفك بالأمل وبفرصة ما اخدهاش 
تنسيله ذنب اتعمَل بجريمة ماعملهاش 
وتكوني ستر وغطا وكفوف تضم ب وِد 
وتكوني جنب ومع 
ف زمان بعكس وضد 
وتباني شمس ف شتا وتكوني برد ف حر 
وتكوني اول بر ، ارسى عليه ومخافش
انا عندي هنا كفين ولازلت مابسقفش 
طاوعيني من فضلك 
انا جاي افضفضلك 
وجاي طالب وجودي ف بيت يكون بيتِك 
وجاي أقولك بإني لما حبيتك 
حبيتني فيكي ولقيتني أب شاف بنته 
وبقيتي كفه وعينيه وصحابه وسفينته 
وانا يعني مش هاكدب ولا هاحكي اي خيال 
بكره هنتخانق وهيبقى بيننا عيال 
واكيد هيتغير شكلك وتفاصيلك 
وانا برضه هتغير 
هبان كده قصير وتخين بنضاره 
وهلاقي نفسي باطلع همي ف سيجارة 
وبلعن الأيام وباقول ما كنت جميل 
ويجوز تعاقبيني وتشيّليني غسيل 
ومافيش ف ايدي ضمان اطفالنا يبقوا جُمال 
لو يعني جيبنا عيال 
ومافيش معايا جبال من وهم ابيعهولك 
لكن ف قلبي كلام محتاج اقولهولك 
انا جي بحلفلك ان انتي مالية العين 
واني مشيت جيتلك ماعرفش ماشي لفين 
واني بحبك وناوي ابقي بطل الفيلم 
ارجوكي لا تزعلي من شخص شافك طَبّ
وقوليلي هل تقبلي .. ابنك يكونلك أب ؟
#قصيدة_ماكتبهاش_نزار

Friend Zone

Amr Hassan - Qsida Maktbhash Nizar

خلينا صحاب 
شايفاك انسان طيب حسّاس 
راجل ورقيق 
تنفع كصديق ، لكن كحبيب ؟ عمري مافكرت 
تستاهل أحسن مني كتير 
والله ياواد لاهجيبهالك 
عاوزين بقا نفرح بعيالك 
وبحبك جداً صدقني وجوايا حاجات 
بس احنا اخوات 
سِكتِتْ وسكِتت
مشيّت ووقِفتْ 
وكإن الدنيا بتتحول اسود بهتان 
لون أنا مش عارفه لحد الآن
وكإن فيه خيط مزيكا حزين 
طالع من مطرح وقفِتْها 
هل حبيتها ؟ أم ان الأمر بحاله سراب 
قولتلها : انا رافض نبقى صحاب 
ياتكوني معايا يامتكونيليش 
سِكتِتْ لحظة .. علشان كانت هي ملاحظة 
ان انا مكسور وبهددها 
مدت إيدها مسكت ايدي 
وقالتلي خلاص فُك ياسيدي عازماك على قهوة ماتكسفنيش
كانت فاهمة ان الموقف صعب 
والصعب حبيبتك تتعاطف علشان تواسيك
فأخدت قرار اني انساها 
من يومها وانا بدونها معاها 
براقبها بعين عيّل محروم 
وباقول ما اطلبش باكلمها 
وبفكّر هي بتعرف مين 
ضحكتها لمين 
وباموت لو كانت بصاله 
أصبحنا لاننفع متصاحبين ولا عُدنا صحاب 
وبقينا برغم اللي مابيننا 
شخصين أغراب
تسعين في المية من الأشخاص المكتئبين 
بيحسّوا حنين لقلوب بتحِّن لناس غيرهم 
الواحد ضيّع وقت كبير مع ناس مش شاغل تفكيرهم 
هذا التفكير الغير صحيّ
هو المتسبب في القهوة 
ف عمر خيرت وtrio goubran 
وف قلب نظام النوم للعكس 
وصداع القولون العصبي
تضييع ستاشر ساعة ف شات
ودخولك ف مشاكل وحاجات 
وخروجك منك آخر الليل 
هتروح لطبيب هيبص عليك 
وهيكتبلك أدوية للنوم 
ومهدأ ويسيبك تمشي 
وهتفضل برضه مابتنامشي 
وهيفضل جسمك بيعاندك 
كل الموضوع انك عندك 
" متلازمة حُب اللي ماحبكش "
انت معندكش سبب عضوي 
يمنع عينك تقفل لساعات
السبب الأصلي ف عدم النوم 
انها شايفاكوا اتنين اخوات 
بالنسبالها .. هي بتعشق في اللي قَتَلها 
واللي ماقدّرش ودخلها ف مساحه كبيرة من الإهمال 
بتحب جنونه وعصبيته 
وتحب تشوفه بيجرحها
وتحب انه مابيكلمهاش 
مع انه مكلم ناس تانيين 
وتحب عدم غيرته عليها 
وتحب قساوته وهي تلين 
بالنسبالها .. عمرك ماهتبقى اللي ف بالها 
فافهم ياحزين 
واعرف دستور البني آدمين
عمرك بيضيع والوضع وضيع 
والعالم أجمل من غيرها 
عمرك ماهتيجي ف تفكيرها 
مع انك شاغل ناس تانيين 
وحاططهم ف القايمة اياها ( خلينا صحاب ) 
داين تتدان 
ومافيش مجروح مابقاش جارح
كله بيبحث على ألمه الخاص 
وكإن الحب بدون راحه 
وكإن الشوق لازمُه جراحه 
علشان مايروحش لناس ببلاش
اعتبره ماجاش 
ونصيحة ياريت لو كنتوا صحاب ، خليكوا صحاب 
علشان لو قولت على مشاعرك 
هتكون بتضحّي بصداقتها 
وان فعلاً فعلاً حبيتها 
استنى عنيها تقول قبلك 
واستنى الشوق فيها يقابلك 
وساعتها يجوز تنسى المسافات 
فيما عدا ذلك ف انت هتسمع 
انا آه حباك بس احنا اخوات .

Amr Hassan - Friend Zone

وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

Amr Hassan - Wahashtiny

وظننا بالله انه لن يضيعنا

karim71992

Popular tracks