يا عم ادريس
يا عم ادريس
يا بو المرجيحة و القواديس
ما جاش الدور
عشان يطلع قادوسى لفوق
وابوس النور
و اطفي للعلالي شوق
و أغني ف الهوا موال
على ورد الخدود و الخال
و أدوق الحب سحر حلال
و أشوف الدنيا و أبقى عريس
يا عم ادريس
يا عم ادريس
 
 
يا عم ادريس علي الدور
ادور و اطلع مع الطالعين
كفاية سنين يا عم ادريس
يا عم ادريس كفاية سنين
و انا و عيال كما العصافير
رفاقة كلنا و فرافير
يا دوب يعلا القادوس بينا
يعدينا الجناح و يطير
و ننزل تاني
لا فرحنا
و لا عرفنا الطريق من فين
و جينا زي ما رحنا
حيارى و محرومين لتنين
نداوي بالغنا جراحنا
ونغسلها بدمع العين
و جرح النفس له وجعين
يبكي القلب
قبل العين
و قاضي الحظ له شرعين
لأهل البخت
و المتـــاعيس
يا عم ادريس
يا عم ادريس
 
و آه لو بختنا يشوفنا
و نرمي الزهر يدينا
و قاضي الحظ ينصفنا
و يحكم بالأمل لينا
و نتمرجح على كيفنا
و ينساب القادوس بينا
ياخودنا بعيد و يحدفنا
و عند الشط يرمينا
على بحر النسيم نسبح
تلعلع فيه غناوينا
و نبدر ف الهوا حبه
تقول للهم يتجنى
وترسى هناك مراسينا
و يبقى الجو هليلة
تلعلع فيه غناوينا
و نبدر ف الهوا حبه
اغانى كلها محبة
تقول للهم يتخبى
و ترقص ف الفضا الفوانيس
يا عم ادريس
يا عم ادريس

الشيخ إمام | عم نجم - ياعم إدريس

هتجن يا ريت يا اخوانا ماروحتش لندن ولا باريس
دى بلاد تمدين ونضافة وذوق ولطافة وحاجة تغيظ


ملاقيتش جدع متعافى وحافى وماشي يقشر خس
ولا شحط مشمرخ افندي معاه عود خلفة ونازل مص
ولا لب اسمر وسودانى وحمص وانزل يا تقزقيز
هتجن يا ريت يا اخوانا ماروحتش لندن ولا باريس

ولا واحد طالع يجرى وواحد تانى بيجرى وراه
ويقول ها هع حصلتك يابن اللى ابصر ايه عاملاه
لا الشارع غيط يا اخوانا ولا احنا بداره ولا احنا معيز
هتجن يا ريت يا اخوانا ماروحتش لندن ولا باريس

ولا واحده فى وش الفجر تبرطع مالية الدنيا صوات
قال ايه جوز خالتى ام احمد سلفة اخوها السيد مات
سبحانك ما اعظم شانك والله الموت دا مفيد ولذيذ
هتجن يا ريت يا اخوانا ماروحتش لندن ولا باريس

ولا واحد بيبيع حاجة يقول بريال وتاخدها بصاغ
يا اخوانا دى حتى الابرة تاخدها بوشة وقلب دماغ
حلفان وخناق ومناهده ويمكن ضرب كفوف يا حفيظ
هتجن يا ريت يا اخوانا ماروحتش لندن ولا باريس

ولا شفتش ده اللى بلاسة وده اللى بعمه وده بطربوش
ملابسنا يا ناس تشكيلة تعد أصحابها ما يتعدوش
والنكتة ان احنا قراشوة وضحكة وشاطرين في التهليس
هتجن ياريت يا اخوانا ماروحتش لندن ولا باريس
 
ولا عركة فى نص الليل دايرة بالحيل وساحبها بوليس
قدامها جدع متجرجر وشه معور قال دا عريس
الخلق ماهى بتتجوز واشمعنى احنا مفيش تمييز
هتجن يا ريت يا اخوانا ماروحتش لندن ولا باريس


ولا فيش ميت الف جعيدى بتوع يانصيب هاجمين ولا فيش
ميت الف معوض هاجم جاي معاه صندوق ورنيش
والله كرهت القهوة وحرمت اقعد ع الافاريز
طبعًا هتجن يا ريت يا اخوانا ماروحتش لندن ولا باريس


دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى اخدناه
والله ده عيب نتهجى دروس يا اساتذه على التلاميذ
هتجن يا ريت يا اخوانا ماروحتش لندن ولا باريس


كلمات : بيرم التونسي

هاتجن ياريت ياخوانّا مارحتش لندن ولا باريس - بصوت الشيخ امام

شَرع التسالي- بصوت فؤاد حداد

إملالي الشيخ إمام

شعر احمد فؤاد نجم
غناء وتلحين : مصطفى سعيد

إضراب - مصطفى سعيد(كلمات أحمد فؤاد نجم)

                              

أطيب من شراب الورد  - بصوت فؤاد حدّاد

درب البهلوان - بصوت فؤاد حدّاد

موّال قتيل المحبّة - فؤاد حدّاد

الشيخ امام عيسى - اقبلى يانشوة المشتاق مرة

في الذكرى السابعة والعشرين لوفاة الشاعر فؤاد حداد ننشر ثلاثة تسجيلات نادرة بصوته لثلاث من قصائده

إضراب - مصطفى سعيد(كلمات أحمد فؤاد نجم)

Karmel Jaarah

Related tracks