Lagið, Einn dag í senn, er samið um Jennýju Lilju Gunnarsdóttir sem lést af slysförum aðeins þriggja ára gömul árið 2015. Með þessu framlagi viljum við halda minningu hennar á lofti. 

Jenný Lilja fæddist þann 25.júlí 2012. Hún er eineggja tvíburi og heitir tvíburasystir hennar Dagmar Lilja. Jenný Lilja á tvö önnur systkini, Júlíu Klöru (2008) og Mikael Inga (2016). Foreldrar þeirra eru Rebekka og Gunnar 

Þann 24.október árið 2015 fékk ég þær fréttir að Rebekka hefði misst Jennýju Lilju þá þriggja ára af slysförum. Þann dag fannst mér sorgin áþreifanleg og ég gat ekki hætt að hugsa til Rebekku og fjölskyldunnar allar. Ég settist niður og skrifaði ljóðið Sorg. 

Ljóðið sat lengi í mér og ég gat ekki hætt að hugsa um það svo ég ákvað að senda gömlum skólabróður ljóðið og spurði hvort hann sæi fyrir sér að hægt væri að semja lag við það. Þessi skólabróðir minn, Stefán Jakobsson, var fljótur að svara ,,það yrði að setja vængi á þetta ljóð”. 

Gömul og góð vinkona mín, Rósa Ásgeirsdóttir, kom síðar til mín í kaffi þar sem ljóðið barst í tal. Meðan hún sat hjá mér kom lag upp í huga hennar, hún tók upp símann sinn og raulaði það inn. Nokkrum dögum síðar var komið uppkast af laginu okkar. Fúsi Óttarsson trommari lagsins bauðst til þess að hafa samband við Kristján Edelstein og fá hann til að útsetja lagið fyrir okkur. Kristján tók lagið ljúfum höndum, spilaði á og bætti inn hinum ýmsu hljóðfærum og breytti laginu í drauma rokk- ballöðuna mína. Stefán Ingólfsson spilaði á bassa og Kjartan Valdemarsson spilaði á píanó.

Eftir að hafa klárað að útsetja hljóðfæraleikinn kom Stebbi Jak og söng með sinni kröftugu rödd af mikilli innlifun. 
Foreldrar Jennýjar Lilju, þau Rebekka og Gunni, hafa valið nafn á lagið en það heitir Einn dag í senn. 

Þetta er einstaklega falleg 80´s rokk ballaða sem hjálpar okkur öllum að halda minningu ástvina okkar á lofti.

Með kærum þökkum fyrir að hlusta
#SCFIRST

KatrínÖsp