عمرو حسن2

يا الحبيبه | عمرو حسن

بطلتي توحشيني - عمرو حسن

الفراشة | عمرو حسن

بحسن نية أو بسوء ادراك 
بتبص قدامك ع اللي سيبته وراك
كل الغلط كان فيك 
أي استراحه ف الطريق تنزل وتشرب شاي مع ناس ماتعرفهمش 
ف طبيعي تفضل مطرحك واقف
من شله على شله 
من شغل للتاني 
من بيت لبيت غيره 
تتغير الأشياء والمشكلة جواك 
الاكتئاب العنيف ضل السعادة السريعة 
والخضر قال لك مرة والتانية 
ان الحياة مش سهلة كما ظنك 
وانت اللي أضعف من غلام تقتله 
أو من جداره تهدمه 
أو من سفينة تدلها ع الغرق 
لم تستطع صبراً ولسه بتكابر
ولسه بتواجه مشاكلك بالهروب منها 
كل الحاجات الغامقة ف حياتك سميتها بُن النهار 
وبقيت غريب أطوار 
كافر بكل اللي انت عايش فيه 
شبح بيدخل سينما مع نفسه 
كل الكراسي عرفتها وعارفاك 
الليل سواده ضل تحت عنيك 
وانت بتدخل حرب شرسه عليك 
طرفينها انت ف الخسارة الفوز 
لو كنت وقفت خطوه قبل باب بيتها 
أو كنت يومها ابتسمت وبس من غير ماتعزمها على عمرك الفاضل 
أو كان موبايلك فصل وفشلت تكتب نمرة هتضرك
كان زمانك بتمشي جنبها ف شارع وتشوفها مش اكتر من جمال عابر
لو كنت يوم الخروجه انت وصحابك وقع عليك الشاي 
وقعدت طول الليل ف بيتك حُر ماخرجتش
ماكنش وجعك خيالك من صديق خاين 
عرفته لحظة خروجه وبعدها قتلك 
باقول لنفسي : 
مش كان كفاية فيلم عربي قديم ف قناة بدون اعلانات 
قاعد ممدد رجلي ع الكنبه 
والصاله شجرة سجاير والحياة سهله
لا هند رستم هتزعل اني نمت ف نص مشهدها 
ولا كلبي هيلومني على عشان بارمي الريموت ع الأرض
ولا بنت مرت ورد على حضني 
هتقولي اني مريض فصام أو شخص مستهتر 
هي الحياة كما قلت 
مضرب تنس مجاني لشخص بلادراعات 
أو غنوة ف الراديو والسماعات بايظة 
أشباه فرص 
أو كوبابات انصاص 
باحسد بقلبي شخص عاش وخلاص 
الصبح يصحي يشتري الجرنال 
ويروح لشغله وبعدها يرجع
تكتبله زوجته لستة الطلبات 
ويروح لأهله مرة ف الأسبوع
هذا البسيط اللانهائي 
ملك الحياة والمستفيد منها على أكمل سبيل
هذا الذي لايكتئب الا عشان له حد مات أو جاله خصم 
أما احنا بنعيط اذا فيه قطه نامت دون طعام 
مشغول خيالنا بمين وصل أو مين فشل 
وقلوبنا دواسة قدم للعابرين - فادخلونا آمنين
وامشوا ببساطه وبانتظام 
ماتعكروش صفو الغنا ف الأوردة
قلبي العظيم - كلبي الوفي
ارمي عليه السلام وانظر من الداخل 
كتابات على الجدران 
صور قديمه على الحيطان لاحمد زكي وميريل ستريب 
وصورة أصليه لريال مدريد الفين وواحد
سامية جمال وسيرة الحب واحد 
الفرق بينهم كاتب الكلمات 
ف القلب عمال النضافه هما أصحابي 
غير انهم بيطفوا أحياناً سجاير حزنهم وهما قاعدين عند شط الدم 
فتجيلي نغزة مفاجأة ف صدري اظنها كدمة
من يومها وانا فاهم ان الألم ف الصدر نصه من الصحاب 
والباقي برواز المليجي لو وقع ع الأرض
كل الحاجات ف القلب مختلطة 
طرح الحاجات الصحيحة من لقا الغلطة 
وبدأت افهم امتي تحديداً تحصل الجلطة 
لابد ان اتنين ف قلبي قرروا العصيان أو جندي سايب خدمته ف الذكريات 
ونام له ساعه عند باب الحزن 
او امي نزلت دمعه منها في انسياب النهر 
مع كل مرة بازور طريق اسكندرية 
on the run انزل ف أول 
واطلب لنفسي اسبرسو وابص من لوح الازاز ع الناس 
يعجبني جداً فكرة المشروب ف كل طريق اروحه 
حق المسافر يلقى جزء سعيد ف روحه 
فيه حد غيري يحب يسمع أم كلثوم ف السفر ؟
فيه حد غيري يحب يشرب حاجه سخنه كل ما بيصبح سعيد ؟
فيه حد زيي بيربط الناس بالاغاني والسنين بالاعلانات ؟ 
لو فيه بشر زيي ف حاجات 
أكيد هيوصلهم كلامي بدون ما اوضح
علشان كمان مش حابب اشرح
النص ده 
وانا لسه باحزن دون سبب 
وانا مكتئب والله من غير أي شيء 
قافل عليا الباب وطالق لحيتي 
ماشي ف ايدي مخدتي وبنام ف كل خلاف بسيط 
on the run حاسس كإني 
والناس بييجوا يريحوا 
ويخشوا صدري ويفتحوا صناديق كاكولا وشيبسيهات 
وبيمشوا مع شرب الحاجات 
ويخش غيرهم يعملوا نفس السيناريو برسمته 
الحزن لمع جذمته 
واداني حقي ف ضحكتين 
وحبيبتي شتمتني بهدوء وشكرتها 
خدت الحاجات من قُصرها
ورجعت أكمل عزلتي 
دي مش كئابة ولا انهزام 
بالعكس 
ده شعور بالسلام 
زي الشجر مابيرمي ورقه ف الخريف علشان يروح المصبغه 
فيه فترة ف العام اسمها 
مغلق عشان التحسينات 
والفترة دي لابد تتعاش كلها من غير محاولة للهروب 
بابعتلكم كل التحية من هنا 
من عند مدخل غرفتي 
باستني يبدأ فيلم عربي واكمّله 
وف ايدي حاجه تتشرب ماعرفش ايه 
ناسي البشر 
وبصاحب الليل والمطر 
وملامحي يمكن كلها متغيره 
معرفش هابعد قد ايه 
معرفش برضه بعدت ليه 
بس الأكيد واللي احنا متفقين عليه 
تجمعنا صدفه قريبة 
on the run ف

On The Run

عمرو حسن - وسط البلد

عمرو حسن - الشتا

عمرو حسن - المايسترو - حفلة مكتبة الاسكندرية - لايف

عمرو حسن السيره الذاتيه لحي الزمالك

يظهر غيابك بقّع الأيام 
من يوم ما مات الحضن ريحه على الهدوم
وانا باسكنك أوطان من الذكرى
وكإن إيدي ف بنطلوني الجينز مش مهتم
زي الموسيقى بامُر لحن ودم على نوتة فاضية اسمها الدنيا
بابكي بيوت فيها الأمل مهجور
كان ايه لزومه بس تبني السور 
ما دُمنا لسه بالحنين برّاه ؟
وايه يفيد الصوت ف ودن من الجبل 
الا المسافة بين خروجه وبين صداه
يا هل ترى يعرف فؤاد حداد 
" ليه كل مانقول آه الناس تقول الله "

دلوقتي ممكن أقولكم بالظبط 
فنجاني ليه دايماً بإيد واحدة
وليه السماعات بيبوظلها ناحية
ونعيش بنسمع من ودان واحدة 
أُكَر الباب بإيد واحدة 
رؤؤس الشماعات واحدة 
وليه القناص عشان ينجح 
يشوف هدفه بعين واحدة 
كإن ف كل شيء غايب 
أمل دايب وطيف واحدة 

،،،، 

أنا العابر على الشارع وحيد المشي
باربي ف قلبي كل القطن ف الرحلة
واسمّي الشيء بعكس الشيء عشان يحلى 
لوحدي كل شيء أوضح 
لا هاتهجّى الحاجات اتنين واكون مضطر اغّيرهم مع الأوقات 
ولا هتهزني الأشياء ولا التواريخ ولا البدايات 
 

 أنا التانيين 
أنا نفسي وأنا الباصين عليا من شكوك ويقين 
أنا المعني بأحزاني وانا وجهة نظر فيا ورأي العالم الباقيين 
كده أجمل 
أواجه ما فضل ليا وفاض ليا بضمير مُفرد 
أقود مجموعة الفراشات الي الوردة
أو اقتل من بناية بعيدة شخص سئيل
اخلي الكنبة مرتع للكلاب والتبغ
واصاحب بالطو ف التلاتين من الوحده 

قال لي صديق :
( لو ضاقت المواعيد اصطاد مكان بإزاز على الشارع
واسمع أغاني قد ماتقدر)
لكن صديقي ماقالش شيء مقنع بخصوص خروج الأغنيات م الجلد 
ازاي نحرر نفسنا م الساكنين ف الجرح 
ونسيب مكان صالح لزرع العادي ف المدهش 
ماتسمعش النصايح م اللي مش واقف معاك ف الحرب
لا الوضع هو ولا الظروف متشابهات
لكن على الأرجح صدقت ظنه عن مكان بإزاز بيطل ع الشارع 
واديني باكتب منه هذا النص 

يظهر غيابك بقّع الأيام 
بارجع ورجلي بتمشي على قدام 
ف البعد يبدو الشيء كما هو 
بيبان سليم مع ان روحه رخام 
ملايين بيمشوا بذكرى ف الطرقات
مساكين بنمسح دمعة الخطوات 
وبندخل المعركة بخيال نشط ساكن 
“الأماكن كلها مشتاقة لك” 
بقينا أسرى للأغاني وللأماكن 
أصبحنا زي الفصله بين يمكن ولكن 
وبقينا جرحى من حروب ماقامتش 
رمينا رسايلنا ف ازازة جوه البحر
لكنها ثبتت وجع ، ما عامتش
لا أرض توصل لها ولا موج يوصّلها
قاعدين على السكك الحديد من مدة منتظرين 
ومافيش حبيب ف القطر جي من الغياب
وزي ناس بتشوف دمانا تظنها عناب 
فيه ناس تشوف الانتظار محض اكتئاب 
حربك لوحدك 
اعرف صحابك مهما كانوا قليلين وضعاف
وامشي بخفة ف وقت من ألغام 
واما غيابها يبقّع الأيام 
غني معايا الغنوة دي واضحك بشكلٍ عام : 

" يا العالم السخيف والأيام اللذيذة
يا الواقع المخيف والأشياء العزيزة 
يا الدافع الشريف والثابت ف الغريزة 
يا المشي إلي الخريف بالعلاقات الوجيزة 
الليل رفة بريزة 
والصبح رهان جديد
الفيلم ده مش سعيد 
ومالوش نهايات لطيفه 
دلوقتي على الجريد 
وشوية على القطيفة 
ضم الذكرى اللطيفه واتصور ذكرى بيها 
فيه حاجات بتنام فاكرها وحاجات بتقوم ناسيها 
وحاجات ف شروقها سهلة ييجي غروبها تقاسيها 
أول سلامات بتبهر وبتبهت من تاليها
فيه واحدة تنام ف حضنك 
ف تبيع طول ما انت ليها 
وفيه واحدة تمُر جنبك 
فتنسيك من تليها "

غنّي معايا الغنوة دي
واقطع خيوط الماريونيت من السما والظن 
وابقى ابتسم 
لحظة ما تكتشف ان همك كان سحابة صيف 
وان الأغاني بتتولد تاني
أجمل وأقرب للي يشبه لك 
وان كان غيابها بقّع الأيام 
أو مر طيفها ف الشوارع والزحام 
درّب بكاك يملى المدى مطره 
زي الموسيقى التصويرية ف فيلم مش فاكره
خلفية سابقة للحن تاني جديد
صوت جي من لاشيء تجاه لاشيء
وجع بعيد بيمس جرح بعيد 
انت الوحيد ف المعركة بطولك
انت الوحيد
انت الوحيد
انت الوحيد
#الموسيقى_التصويرية

الموسيقي التصويرية "عمرو حسن" من حفله الساقيه 2018

ياما الخليج خد بشر من عيالهم
عيال كانو إملهم يحسو بمعاني الأبوه وجمالها
يخافو لو الساعه عدت 11
ويستنو ياخدو في حضنه العيديه
فا مين قال الهروب مسئوليه
ومين قال أن لم الدراهم
هيجعل ولادك يحسو بإمان 
انا اعرف غلابه وعمال نضافه
عرقهم بيملا الزمان والمكان
وكل الفلوس في البنوك والأراضي
متساويش وجودهم في لمة فطار
سلامي للعيط وساب قلبه
واقف بيستني أبوه عند باب المطار
لاكن برضو عيب الوم اللي سافرو
وتعبو وعافرو
وامنو بوطنهم لحد  ما كفرو
اكيد هما يعني قلوبهم بتبكي
مافيش حد عاقل بيتمني غربه
لاكن لو بلادهم بتقتل بأسوه
فلازم هيمشو مدام هي تربه
يصونو اللي فاضل في بكره لعيالهم
يااكل اللي ناضلو وشدو رحالهم
ورهنو حياتهم مقابل مدارس
واكل وملابس وتمن المكيف
وحق المصايف بدم المصيف
وأسره سعيدة قريبه وبعيده
يقابلو ولادهم في شركة صرافه
ويمشو معاهم لحد الأرافه
يصلو عليهم في كام متر رمله
وهل ده أسمه امل ان اموت قبل اما احيا
هل في ف مشاعرك لسه صاحيه
بعيط وبضحك
بلوم بس بعذر
بلادي التي كل يوم فيها موت
بتكتملي صوتي بحق إني اعيش
بابوش لما بفضل واكون بره بايش
اجيب حق موتي وتمن الغوايش
وتسمحلي اشوف العيال في الأجازه
وهل ده وطن يبقي ليه اي عازه
بلاد فيها عالم في عنق الأزازه
ياتطلع في غربه يا تفضل تموت
ياغربه حزينه بتشبه مدينه
بتبني الضغينه وتمحي البيوت
بأكد لذلك بأن السكن في نواحي الزمالك
وان اشتراك النوادي الكبيره
وفكرة وجود الجراش في العماره
لايمكن يساوي الوقوف في السفاره
وأكد بإن الهدوم وسط ناسك
تمنها يزيد  عن وقوفك في Zara
تنقي بسنيين اللي غابو وسبوك
جواكت تمنها مشاعر ابوك
وجزمه تساوي مرتب سكاته
ياكل وجعه لأنه ماشفش اللي ماتو
وحزنه في بلاد الألم والإهانة
يارب اللي سافرو ايدك معانا
يعودو لبلادهم
ويبقو السند والوسيله لولادهم
وتستر فؤادهم
محدش يشوف المصيبه في مسافر
وتجعل طريق المطار عوده بس
يارب اللي عيط وفكر وحن
ورب البلاد اللي خانها الضجيج
تخلي البلدي لأهل البلدي
وتجعل بلاد الخليج للخليج

قصيدة #الخليج
#عمرو_حسن

قصيدة الخليج "عمرو حسن"

عمرو حسن - مرة واحد نوفمبر 2019

قصيدة الدفتر ل عمرو حسن من حفلة ساقية الصاوى أكتوبر ٢٠١٩

عمرو حسن الدفتر

مين اللي سلّم للشتا المفتاح 
سحَب سيجارته الباقيه م العلبه 
وخلى ضهره يميل على الكرسي الخشب 
الجو ساقع 
زي كف رخام على صدر الإضاءة
خَد نفس وخياله كامن ف المكان قلقان
سيجارته مش والعه وطلعت دخّان 
بردان وعقله الله يسامحه / دفاتر
بينسى قبل ما ينام الحاجات وبيصحى فاكر 
اول ما ايده ترتعش والنسمه تلسع رف أحزانه 
أول مايتنفس نوڤمبر فيه 
تتحرك الذكرى اللي عايشه معاه
لسه اللي بتروحلهم مابيطلعوش هي ؟
نفس السؤال القديم من غير جواب واضح 
فاضح ياعم الشتا جرى ايه !! 
مالبسش دبله وبرضه معلمه ف ايديه 

ـ قولي بحبك بقى طلعتي عين أهلي 
هو انتي ايه ؟ قلبك محرّم ع العيون راحه ؟
حاسه بلذّه في الفراق ؟
 جاوبيني بصراحه
لو كنتي بتحسي البعاد شهوه
حليني من ربطتي بالحب والقهوة 
وسيبيني شارد في الغياب مرتاح
 
( الخطوه بيني وبين حبيبي براح
مشوار بعيد وانا فيه غريب 
الليل يقرب والنهار روّاح 
سواح وداير في البلاد
سوّاح )

لَسَعِت ايديا البرودة واترعش ضلي 
والدنيا غامقة علشان بدون خِلّي
خَلّي اثر علشان امر عليه 
وسيبي ضل عشان اجِس ايديه 
وعشان اشوف للدنيا دي معنى
قفلت عيني عشان اشوف أوسع
وضِقت ذرعاً والمكان ساعنا
قولي كرهتك علشان اشوف حبِك 
وعلّي صوتك شويه لَحدّ يسمعنا
شجرك بيكبر وانتي بتنبِّتي
مشتاق ِاشوفك وانتي بتتبِّتي
وانتي بتمشي ف أول الحكايات 

ثِبْتِت صوابعي عند اخر حضن
ثِبتِت صوابع عمر خيرت على الكوردات

لحظة لُقا تحركني وتحركه 
ياتغيبي ونكمل حياتنا ثبات
الغيم ورق حائط من الشبابيك 
يادي الشتا اللي ماليك
يادي الحنين اللي غارس زرعته ف اراضيك
يادي الحنين وياديه
البرد دفا اياديه 
والمطره دمع عيونه
الحزن مش مظهره 
الحزن مضمونه
والناس بيحلفوا يفضلوا 
وبرضه بيخونوا 
والليل ماليش خاطر عنده ولا عندي
خليكي بتعاندي 
وخلي صوت فيروز خلفية المشهد 
خليني ادور عليكي كل ما ادخل بيت 
وسيبيني متعلق بأثر الناس 
وتحت عيني يتهري من كتر ماحنيت 

طب ايه ياعم الشتا 
سكت الشتا مانطقش
طب ايه ياعم الشتا 
سكت الشتا لم قال 
وانا زيه ومعنديش كلام يتقال
مين اللي سلم للشتا جرحنا 
مين اللي وطنه هناك ومنفِي هنا 
مين اللي مره طار دعاه لربنا 
خلّي الشتا بيطول
مين اللي فينا ع الغياب مسئول 
لسعت ايديه السيجارة وهي مطفيّه
قال ياشتا يارفيق في ركن مات فيّا
وبص من طرف الازاز ع الحي
الناس بتدعي والمطر سيال 
طب ايه ياعم الشتا
سكت الشتا لم قال 
قفل الستارة ف اخر الموال
وساب كلام متشال ف العين وفي النيّة

في برد يشبه ده 
عبد الحليم حافظ غنى لأول مره 
سعاد حسني سندت على الشباك 
وبصت بره
اينشتاين خبط الإزاز بايديه واستجمع الحسبة
ومد ايده
 يكتب النص الأساسي من قانون النسبة 
هتلر جمع قادة عموم الجيش وقالهم رأيه
دينزل واشنطن عرف اخبار عن الأوسكار 
والابنودي جاله مرسال ع البلد
 
ف برد يشبه ده 
ميسي اتولد 
ضربوا ظباط التحالف مخزن الاسلحة
وجت حاجات بتغم وجت حاجات مفرحة
وناس ملت عينها وناس بكت عينها 
واتجمعوا احباب واتفرقوا احباب 
وف برد اصبح ده 
بتواصلي لسه غياب ومكمله الموضوع 
وانا مش ف بالي فراق 
وانا مش ف بالي رجوع 
رجلي على الكنبه 
حواليا ليل 
وشموع 
وايديا سقعانه وورودي مرميه 

فكرت يومياً ف كل الناس 
ونسيت افكّر في اللي فكّر فيّا.

#شتا_٢

قصيدة شتا 2 عمرو حسن من حفل يناير ساقيه الصاوي

الحلوة قالت: 
ماله ده؟
 فارد جناحه ف الفضا وراسم خطاه 
امّا اعرفه وازرع جناينه واخطفه
 واطلب رضاه 
تسلّية برضه ومعرفة ورسم وصفه 
بكره هيلحس الارصفه
 علشان اخلّي اللأه آه
والواد بسيط ولاجاش ف باله 
شادد رحاله ماكانش بيأمّن وراه 
شارد ف عينها اللي اكتشف منها البكا 
طايح ف حضن معلقُه وجارح صِباه 
أمّنتها .. ومقام نبينا المصطفى
حلّفتها .. بحق نور اللي اصطفاه
تضم قلبي اللي اتأذى
وتصون لقانا وليل صفاه
قتلتني وف ليلة العزا 
قالت: وماتصلوش وراه!!
على ايه ياست ؟
على ايه و ليه ؟ 
هو احنا داخلين معركة؟
أمّمت طين الباشا والدك وانتي جايه ترديهالي؟
بيني وبينك دم يعني ولا تار؟
مش يوم ما شُفتيني ابتسمتي وقيدتي نار؟
مش ده صباعك اللي شاور! 
مش ده خيالك اللي ناور 
مش ده لسانك اللي حاور لجلي خلق وناس كُتار؟
طب ايه بقى؟
ولّا انتي اكل وبحلقه؟
عجباكي حاجه
 ياتشتريها يا روّحي!
عمّاله ليه تطوّحي؟ 
ولا انتي متربيه تاخدي وتشطحي
 وترمي ودادي يجيب جديد؟
انزفك شعر وقصايد واحكي للناس غنوتك
امدح بصوتي محبتك
وافرد ف توبك 
بتحدى نوري بضلمتك واستر عيوبك
وانتي التهم متجهزه صفّين طوال 
خاين وضيع وكذا وكذا وسفيه وضال 
وانتي الأمان والاحترام 
وانتي التمام والمايُرام
انتي اللي صلحتي الترام
وانا اللي وقفّت النضال 
على ايه ياست؟
مانفُضها 
بفرة مناهدة نرولها وشكراً سلام 
من غير كلام 
من غير مانهري ف مين غلط او مين تمام 
دلوقتي فعلاً مستعد اني امسحك 
مسحة عظيمه تريّحك من ذكرياتي 
سكران وفُقت وخمرتي كانت وجودك ياحياتي
يا اللي جيبالي الكلام والغمز واللمز السخيف
وان كان على لحس الرصيف 
اديه بقى صف مرايات 
اذا كان على الحزن اللطيف 
دول مش صوابعي دول نايات 
وانا بعترفلك بالصواب في كل شيء 
انتي الأماكن والطريق 
انتي الطريق الدولي والفرعي البطيء 
انتي علامة النصر 
صوت الحب 
سيدة الغناء العربي والوجه الرقيق 
وانا زكي رستم
 هتلر
 موسوليني
 تشرشل
متعالي فضولي اناني ومش مظبوط وبذيء
وانتي بتقولي لصحابك قد ايه
انا شخص قاسي وطبعي في غاية السئالة 
ابقي قولي ان انا سبب البطالة 
سبب انخفاض منسوب مياه النيل
وان وقتك ضاع ف تخفيف دمي التقيل 
وان لبسي كله ذوقك
واني بتمرمغ ف شوقك بس جاحد
اشتميني تعلي مني 
ذّمي سيرتي هتمدحيني 
خرجي الطبع اللي فيكي وفرحيني 
دول كاسين منقوعهم ايه اللي يجيبوني 
ارمي عمري بين ايديكي وأقول يادوب 
خمرة ايه اللي تاخدني لواحدة بتكسّر قلوب 
كنت بستحمل مصايب مش ببيّن 
عشت أقول ع الغلطه شاردة
كنت اشوف الشوكة وردة
واوصف القاسي انه هيّن
سُكر بيّن
هانج أوڤر
كنتي ليه ف هدومي رقعه وقلبي معمولك بلوڤر؟ 
كنت مش بصعب عليكي وانتي بتلمي السيناريو وتنشريه 
كل شيء من قلبي عامله تكدبيه 
ده انتي شككتيني فيا لدرجة اني 
قولت كتر خيرها واخده بالها مني 
وانت ابعد واحده عني
اللي عاش بيبوس ايدك تضلي 
جي يبوسها عشان توريه التخلي 
اللي طول العمر بيقولك هينفع 
جي يقولك مش هينفع 
السنين اللي اترموا ف الأرض حتى مش هتشفع 
قولي ان انتي اللي سايبه 
وان انا مصاص دماء وانتي غلبانه بغباء وعبيطه خايبة
واني جيبتك بالطريقه 
وان اغراضي دنيئة 
وان خطواتي بطيئة 
والحبال ف الوصل دايبه 
اللي عاوزاه يتعمل وتحلّي عني
عاوز ارجع للي راح ف الزحمه مني 
عاوز اكسر وحدتي واخرج براسي
عاوز اوهب مر كبي لغير المراسي 
ارمي للايام شراعي 
اتركه للناس تراعي والقى منهم كلمه تفرح
حد م الناس اللي خسرانهم عشانك
ييجي ويحل ف مكانك 
يبتسملي ويملى عيني 
عاوز اسمع حد بيقول اني طيب
واني لسه قلبي صافي 
حد يمشي ف روحي حافي وهو آمن 
واحدة تحلفلي ان ممكن ييجي بكره 
انتي مش غلطانه فيا 
كله غلطي 
كله كان زرعي وحصادي 
قلبي بعد سنين معشش صاحي فاضي 
واتكسر كاسك ف ايدي وخمره طار 
النهاردة 
خدت بالي م النهار 
خدت بالي من ملامحي 
ثغري باسم لوني قمحي
قلبي عيل 
النهاردة 
التئم جوايا جرح مكانش هين او قليل
فُقت بعد ما وقت فات
بس فُقت
بالسلامة 
سايبه فيا علامه عادي
فيها ايه ماتسيب علامه 
بس سابت بعد منها 
حد اطيب من سنينها 
حد مش هتشوفه عينها 
من هنا ليوم القيامه

بعد السكران ما يفوق | عمرو حسن

طلاق عمرو حسن

"الوصيه"
بودعكم وانا معكم
وبطلب تسمعو شويه 
انا طول عمري بسمعكم
بقلب يجوز يزعلكم 
ولكن عمره مايخدعكم
بودعكم
واودع كل ما بينا وكأنه ما رأت عيني
فمن منكم ضدي وعاش معادتي وآذيني
فمتمناش يودعني ولا ببكاه يصدعكم
ومن كان له قلبي نصيب فهذا حبيب وحاوطوا دعاءه باسمعكم
وأما بعد
فهذا ما رايت اليوم
ف ساعه نوم صحيت منها بعين اوسع وبال مرتاح
انا هخرج من المشهد بنفس دخولي وانا عريان
واكبر حلم حققته مروري ف الغابات انسان
لا ايدي كسرت شباك ولا رجلي في يوم خطت ع جثه
دخلت المدرسه الدنيا واخدت نصيبي من الحصه 
واد الفهم والتحصيل   
اد ماكنت وغد جميل 
وديب طيب
بحط دماغي اخر اليوم وانا مظلوم ومش ظالم
ولو ف حد مديني فيعلم ربنا العالم 
ف عن مالي مخدتش شئ 
وعن بالي مسبتش شئ 
وعن وقتي فأنا لحد دلوقتي مخلص مجمله عالناس
زهدت ف كل شي فيها وعيشت حياتي بلاغيها  
واصاحب كل بلاويها واقول معلش
منبنيش من بياض القلب
غير تجاعيد نامت عالوش
و دوقت ف ضربها الضدين 
من الكفيار لحد المش 
وعدت رجلي ف ضروبها 
خفيفه وقابله مكتوبها
ومرت روحي جواها متاهه تودي لمتاهه
واقول دنيا ومتكلمش
نهايه الدنيا اسهل من وقوع الرمش
كل اللي اتحكي عني كلام باطل
انا دلوقتي في مساحه ملفتش فيها ولا اماطل
كلامي زي ماهو بدون تزويد
واي كلام مقولتوش يعتبر تلفيق
فاوصيكم
تمر جنازتي من ناحيه منا مريت
وترمولي السلام عالبيت 
ومتخلوش اصحابي يتعبو 
كفايه سبتهم هما هناك ومشيت
وأما الدمع لو لين فهين 
واتركوه انسان
واما لو بكي عالي فحاسبو ف وسطكو كداب
وعلي قبري ايده تتصد
وتدعولي بأن يشفعلي ما اصلحت ما اجرمت
تلاته يمشوا ف وداعي بقلب سليم 
يزيدوا عن آلاف يمشوا بكدب عظيم
وراعو وسطكو واحده ف شالها ريحتي وغيابي
وشاورا لامي ع بابي 
وقولولها البار
وحاوطوا القبر بالياسمين مش بالصبار
ومروا ف هدوء يليق عالمشهد 
واوصيكو 
عيون كلبي متدمعشي  
وعصافيري متسمعش كلام عالموت
واوصيكو توطو الصوت  
ف وقت الحزن 
وتسقو زرعه النعناع لحد الريحه ماتحاوط نواحي البيت
وحاجتي تنقسم بالعدل عللاصحاب 
موبايلي يتكسر ف وجود تلاته شهود 
مش عاوز ف يوم حفله بكي
هتنعو ف ناس ومش عارفين بتنعو ف مين
وهتلاقو اللي قتلوني بيبكوني عالشاشه
فشاورو عاللي كان مني وقولوا دا حق
وشاورا عالي جاي يكذب وقولوا دا لا
انا جيت الحياه لوحدي وماشي منها لوحدي  
واصحابي اللي عاشروني يدوب كام فرد
فمش هبلع كمان الكدب تحت الارض
في عزايا إذا حبيتو تتقابلو 
فياخد دمعتي صاحبي في بدء الصف
وهتحسوه لوحديكو ف شكل الكف
وهتبصوا ف عنيه تلاقيه بيسند روحه من الواقعه 
وقلبه  السخن هيخلي ايده ساقعه دف 
مورو عليه
وبصو ف عنيه تلاقوني
واوصيكم
ف ساعه من تركتوني 
تقولو سلام
محبش ف الختام اترك دموع والآلام
سلام يا اصحابي
 سلام يابيوت 
ويا خطاوي
معدش اضايق العالم بازعاجي 
ورايح يعني مش هاجي
مش هخلف ميعاد مع حد بمزاجي
واوصيكم
بلاش تفترضو سوء الظن مع غيري
يجوز غيري  بسيط زيي وحاصرينو ف دور شرير 
وهو بجد اجدعكم
بلاش نفس الغلط تاني
اذاكم حلي موت عن الحياه معكم
وخلاني وانا معاكم بودعكم
بودعكم

قصيدة شتا 2 عمرو حسن من حفل يناير ساقيه الصاوي

Kawther Darwish

Recent comments

ahmed elbherry

Related tracks