مُفتتح 
------
فيه واحدة مرت من هنا ضيّعتني 
مع ان طيفها لسه فيّا ما ضاعش 
ماشفعش شوقي لما للأيام سابتني 
وسابتني فاكر كل شيء ماشفعش 
كان نسر شايل يمامه وقتها ففهمت 
ان " الطيور على أشكالِها " مابتقعش

* قصيدة
------

اسكندرية 
جالها المُسافر من بلاد شاردة
اداها وردة 
وحضُن من رئتيه

أخرجها يوسف شاهين 
وساب سؤاله الوجودي 
اسكندرية 
ليه ؟

داقها الخواجه اليوناني ع الفطار ف ديليس 
دندنها عازف كمنجه لنفسه ف الأتوبيس 
كتبتها بنت ف وشم على إيدها 
وقالها شاعر من خمستاشر سنه 
واظنه أنا ، أو حد يشبهني 
غنّاها عم أحمد فؤاد 
بيّنها درويش لما لحّن " أنتِ غايتي والمُراد "
صبحت بلاد تندهك ف الحُزن والفرحه 
من جرح ف صدور الرجال مكتوم 
لبحر مش مكتوم طالل من الطرحه 
وقد ما تكون الحاجات غايبه 
قد ماتكون السنين جارحه 
تفضل عشيقتي وصاحبتي وأول مكان ليّا 
حدوتة الحُب القديم لما عصف بيّا 
والحب حظ الغلابه 
شمس أيامهم 
والشمس حظ الكتابه 
جهر أو نيّه 
اسكندرية صبيه وربنا يعلم 
كل الطرق ف القلب شايفه اسكندرية

أضواء على الممشى ف طريق البحر
أيادي ع الأبواب 
دخان قديم متساب 
وضحايا أكل العيش بيغنوا ع الكورنيش 
ويعرفّوا الأغراب ياكلوا السمك من فين 
لولا اختلاف الذوق 
ماكنا نبقى اتنين 
لولا اتفاقنا ما كنا مختلفين 
لولا اننا راهنين دهب الغياب ف البحر 
ماكنا جينا هنا ندفع بداله سنين 
قال المسافر لصاحبه
روح البلد دي تجّن 
شبه انسياب الفن ف شخّص لما يفنّ 
ترجعلها وتحِّن 
وان طالت المُدة 
تحسها مش مدينة 
تحسها غُدّه
حاجه كده ف جسمك 
بتطُل من اسمك وبتجري مجرى الدم 
مش فيه بلاد تتزار 
اهي دي بلاد تتشم 
واتفاجئوا بالبحر خارج من نهاية الدرب
له صوت كإنه الحرب 
نسيوا الكلام كله 
بقى كله مع ضله 
وخلوا راجح داوود 
ينهي الحكاية بلُطف

اما البلد دي غريبة يا صديقي بشكل 
مش بس طعم الأكل 
ولا ريحة الأيام الناشعه ع العمارات
لكن كمان الصدف ليها نصيب أكبر 
جاري اللي يمكن بشوفه مره ف الكام شهر 
ونتفق ع اللقا بدل التاريخ مليون  
بلاقيه ف وشي هنا 
واتأكد انه زبون 
قدّم زمان عربون وجاي معاه دُفعه 
الجار هنا بالذات مش أولى بالشُفعه 
الأولى منه المُحب 
الأولى منه اللب ف كف مبترميش 
أهو لينا حظ نعيش ونيجي مره كمان 
انا وانت م السكان لو حتى بلا أملاك
هنا البيوت مش مساكن ولّا يبقى معاك 
هنا البيوت أحضان 
ومافيش هنا ياصديق أغنى من الصعاليك 
حافي ف وشه ابتسامه يُعتبر معاليك 
ومليونير بلا قلب لازم تجوزله زكاة 
اغني الناس اللي حب ولسه حبُه معاه 
وكل من فارق 
مهزوم ياحول الله 
واسكندرية نجاه وانا وانت م الدراويش
تعيش اسكندرية وكل حب يعيش
بيرم وسيد وكل المخلوقين بالريش 
بلد الخيال مُدمن والفؤاد مؤمن 
خلطة كأنك شيخ وبتتمسك بحشيش 
زي الجمال اللي طالع من بيوت الرمل 
بوسه ف كل ترام 
صدقة ف كل طريق 
هنا كل شيء له صديق 
الليل مع الدخان 
البحر والأحزان 
الناصية والجدعان
الزردة والابريق 
والفن قبله وقُبله ع الخدود لها حس 
ف اسكندرية وبس 
واسكندرية وبس بوابة التفاصيل 
حيث الجماد له قلب 
ولاحظها ف التماثيل 
والصخر عند الموج 
هنا فيه فنادق بتبكي لما يمشي الفوج 
وفيه بشر بتخاف ع البحر م العالم 
اربط ف قلبك حاجه من فيروز وارمي الحنين ف البحر 
- شط اسكندرية ياشط الهوا -
وتعالى نوصل سوا 
من أول الشارع لآخر الحواديت 
وف اخر الحواديت نوصل لأولها 
فيه ألف حاجه هنا محتاجه نعملها 
فيه حاجات كتير مفتوحه لابد نقفلها 
ونسيب حاجات ناقصه 
نوقّف الرقصة
علشان ف وقت ماجاش 
نيجي نكملها 

#السيرة_الذاتية_لاسكندرية

قصيدة السيرة الذاتية لأسكندرية "عمرو حسن"

قصيدة ميعاد مناسب للقيامة "عمرو حسن"

عُمر فرحان من حفلة الساقية "عمرو حسن" 2018

ازازة ڤودكا مرميه علي الكورنيش "أسامة عطية" من حفله الساقية"عمرو حسن" 2018

من يومين شُفتك معاه
كنتي ضهرك ليا وعنيكي ف عينيه
طفل مش مني ف ايديكي 
دبلة مش ليا ف ايديه
كنتي ثابته وبنت نفسك 
انكسر ضلي ساعتها والبشر مرت عليها 
كان بوّدي اعتذرلك 
حتى اقولك : عامله ايه 
بس سيّب قلبي دقّة 
لما عقلي قاللي لأه 
دي النهاية المستحقة 
لحد ساب وماقالش ليه

وافتكرتك 
وانتي جنبي 
كنتي بنت أصول وصالحة 
عاملة مع روحك مصالحة 
كنت بستغرب مشاعرك 
ف الفرح بلاقيكي وردة 
أم معجونة بطفولة 
ف الألم بلاقيكي ثابتة 
تسندي ضهري برجولة 
تلحقيني كل مرة 
كل مرة بتبقي سابقه خطوة عن كل اللي جنبي 
كنتي تتحبي الحقيقه 
بس انا كنت اعمى فعلاً
كنت باهرب بالطريقة 
مرة خايف مرة اسف 
مرة ليّن مرة ناشف 
مرة مش قادر أكمل 
مرة مش عارف أجمّل
عشتي شايلة وعشت احمّل 
لما فاض الكيل ف روحك 
للأسف كنتيلي دنيا 
وكنت أكبر ما ف جروحك 
مين يجيب اللوم عليكي وانتي كل مافيكي طيّب 
ده انتي حتى الاه ماكنتيش بتقوليها 
كل حاجه عشاني كنتي بتعمليها 
لسه فاكر 
وانتي نازلة ف وقت متأخر لجل تجيبيلي الدوا 
واما اقولك : دول شوية برد يعني ، كحه من لسعة هوا 
تعمليلي أم بتزعّق ف عيل 
( قولتلك تلبس كفاية ، برد طوبة مش قليّل ) 
واما ابوس ايدك تقولي 
طفل مزعج بس طيب 
كان عليكي نشان براءه عمره مرة ما كان يخيّب 
كنت ماسك ايد جنينة 
عيّلة ف تانية ابتدائي 
مش صبيّه مخلصة جامعة وقوية وليها شخصية وكيان 
النهارده انا كنت نقطة 
واقفة بين أصبح وكان 
واما خفت ل حد ياخد باله مني ف المكان 
خدت بعضي ورُحت ماشي 
زي شجرة بغير فروعها 
كان ف ضهري عمري فات 
بنت ولا كل البنات
كان تاريخ كامل ورايا 
ضحك واغاني وسلام 
صمت ومعاني وكلام 
كوكب الاحلام بحاله كان ورايا 
كنتي واقفه هناك معاه 
وكنت باتمشّى معايا
كان ضروري تشوفي حالك 
عين بسيطة ومرتحالك 
أب للحزن اللي جالك
لما سبتك واقفة وحدك 
وكان طبيعي اني اسقط 
ف اللي انا جرّبته بعدك 
فين هلاقي حد زيك 
زّيُه زيِّك
لونه لونك 
انتي ابسط من معاشرة شخص كان عايش يخونك 
يا بمشاعره 
يا بهروبه 
يا بمحاسنك 
يا بعيوبه
ان مكنتيش انتي فرحانة وسعيدة مين يكون !
مين يكون الام للطفل الجميل ده 
مين تكون ضفايرها دلتا وحضنها صافي وحنون

الحقيقة
كل شيء كان شيء طبيعي 
زي ما الخواجات يقولوا : 
" Fair enough "
شخص فرّط 
لف كل الكون ده لف 
وواحدة زيك ليها أسرة 
مش هاخلصها بحسرة
أو هاقول : لو كان ،، هايبقى
بس هادعيلك كأم وطفلة سابقة
تيجي بنت تشيل ملامحك
طير مايلقطش الا قمحك
مطرة صافيه ماتنتهيش

ربنا يفكرني بيكي 
وتفضلي ماتفتكرينيش

قصيدة ذكري بتاريخ انهارده "عمرو حسن"

معاد مناسب للقيامة "عمرو حسن" من حفله الساقيه 2018

يظهر غيابك بقّع الأيام 
من يوم ما مات الحضن ريحه على الهدوم
وانا باسكنك أوطان من الذكرى
وكإن إيدي ف بنطلوني الجينز مش مهتم
زي الموسيقى بامُر لحن ودم على نوتة فاضية اسمها الدنيا
بابكي بيوت فيها الأمل مهجور
كان ايه لزومه بس تبني السور 
ما دُمنا لسه بالحنين برّاه ؟
وايه يفيد الصوت ف ودن من الجبل 
الا المسافة بين خروجه وبين صداه
يا هل ترى يعرف فؤاد حداد 
" ليه كل مانقول آه الناس تقول الله "

دلوقتي ممكن أقولكم بالظبط 
فنجاني ليه دايماً بإيد واحدة
وليه السماعات بيبوظلها ناحية
ونعيش بنسمع من ودان واحدة 
أُكَر الباب بإيد واحدة 
رؤؤس الشماعات واحدة 
وليه القناص عشان ينجح 
يشوف هدفه بعين واحدة 
كإن ف كل شيء غايب 
أمل دايب وطيف واحدة 

،،،، 

أنا العابر على الشارع وحيد المشي
باربي ف قلبي كل القطن ف الرحلة
واسمّي الشيء بعكس الشيء عشان يحلى 
لوحدي كل شيء أوضح 
لا هاتهجّى الحاجات اتنين واكون مضطر اغّيرهم مع الأوقات 
ولا هتهزني الأشياء ولا التواريخ ولا البدايات 
 

 أنا التانيين 
أنا نفسي وأنا الباصين عليا من شكوك ويقين 
أنا المعني بأحزاني وانا وجهة نظر فيا ورأي العالم الباقيين 
كده أجمل 
أواجه ما فضل ليا وفاض ليا بضمير مُفرد 
أقود مجموعة الفراشات الي الوردة
أو اقتل من بناية بعيدة شخص سئيل
اخلي الكنبة مرتع للكلاب والتبغ
واصاحب بالطو ف التلاتين من الوحده 

قال لي صديق :
( لو ضاقت المواعيد اصطاد مكان بإزاز على الشارع
واسمع أغاني قد ماتقدر)
لكن صديقي ماقالش شيء مقنع بخصوص خروج الأغنيات م الجلد 
ازاي نحرر نفسنا م الساكنين ف الجرح 
ونسيب مكان صالح لزرع العادي ف المدهش 
ماتسمعش النصايح م اللي مش واقف معاك ف الحرب
لا الوضع هو ولا الظروف متشابهات
لكن على الأرجح صدقت ظنه عن مكان بإزاز بيطل ع الشارع 
واديني باكتب منه هذا النص 

يظهر غيابك بقّع الأيام 
بارجع ورجلي بتمشي على قدام 
ف البعد يبدو الشيء كما هو 
بيبان سليم مع ان روحه رخام 
ملايين بيمشوا بذكرى ف الطرقات
مساكين بنمسح دمعة الخطوات 
وبندخل المعركة بخيال نشط ساكن 
“الأماكن كلها مشتاقة لك” 
بقينا أسرى للأغاني وللأماكن 
أصبحنا زي الفصله بين يمكن ولكن 
وبقينا جرحى من حروب ماقامتش 
رمينا رسايلنا ف ازازة جوه البحر
لكنها ثبتت وجع ، ما عامتش
لا أرض توصل لها ولا موج يوصّلها
قاعدين على السكك الحديد من مدة منتظرين 
ومافيش حبيب ف القطر جي من الغياب
وزي ناس بتشوف دمانا تظنها عناب 
فيه ناس تشوف الانتظار محض اكتئاب 
حربك لوحدك 
اعرف صحابك مهما كانوا قليلين وضعاف
وامشي بخفة ف وقت من ألغام 
واما غيابها يبقّع الأيام 
غني معايا الغنوة دي واضحك بشكلٍ عام : 

" يا العالم السخيف والأيام اللذيذة
يا الواقع المخيف والأشياء العزيزة 
يا الدافع الشريف والثابت ف الغريزة 
يا المشي إلي الخريف بالعلاقات الوجيزة 
الليل رفة بريزة 
والصبح رهان جديد
الفيلم ده مش سعيد 
ومالوش نهايات لطيفه 
دلوقتي على الجريد 
وشوية على القطيفة 
ضم الذكرى اللطيفه واتصور ذكرى بيها 
فيه حاجات بتنام فاكرها وحاجات بتقوم ناسيها 
وحاجات ف شروقها سهلة ييجي غروبها تقاسيها 
أول سلامات بتبهر وبتبهت من تاليها
فيه واحدة تنام ف حضنك 
ف تبيع طول ما انت ليها 
وفيه واحدة تمُر جنبك 
فتنسيك من تليها "

غنّي معايا الغنوة دي
واقطع خيوط الماريونيت من السما والظن 
وابقى ابتسم 
لحظة ما تكتشف ان همك كان سحابة صيف 
وان الأغاني بتتولد تاني
أجمل وأقرب للي يشبه لك 
وان كان غيابها بقّع الأيام 
أو مر طيفها ف الشوارع والزحام 
درّب بكاك يملى المدى مطره 
زي الموسيقى التصويرية ف فيلم مش فاكره
خلفية سابقة للحن تاني جديد
صوت جي من لاشيء تجاه لاشيء
وجع بعيد بيمس جرح بعيد 
انت الوحيد ف المعركة بطولك
انت الوحيد
انت الوحيد
انت الوحيد
#الموسيقى_التصويرية

الموسيقي التصويرية "عمرو حسن" من حفله الساقيه 2018

" أول قصيدة فصحي من ديوان أحدهم " لـ عمرو حسن

ياما الخليج خد بشر من عيالهم
عيال كانو إملهم يحسو بمعاني الأبوه وجمالها
يخافو لو الساعه عدت 11
ويستنو ياخدو في حضنه العيديه
فا مين قال الهروب مسئوليه
ومين قال أن لم الدراهم
هيجعل ولادك يحسو بإمان 
انا اعرف غلابه وعمال نضافه
عرقهم بيملا الزمان والمكان
وكل الفلوس في البنوك والأراضي
متساويش وجودهم في لمة فطار
سلامي للعيط وساب قلبه
واقف بيستني أبوه عند باب المطار
لاكن برضو عيب الوم اللي سافرو
وتعبو وعافرو
وامنو بوطنهم لحد  ما كفرو
اكيد هما يعني قلوبهم بتبكي
مافيش حد عاقل بيتمني غربه
لاكن لو بلادهم بتقتل بأسوه
فلازم هيمشو مدام هي تربه
يصونو اللي فاضل في بكره لعيالهم
يااكل اللي ناضلو وشدو رحالهم
ورهنو حياتهم مقابل مدارس
واكل وملابس وتمن المكيف
وحق المصايف بدم المصيف
وأسره سعيدة قريبه وبعيده
يقابلو ولادهم في شركة صرافه
ويمشو معاهم لحد الأرافه
يصلو عليهم في كام متر رمله
وهل ده أسمه امل ان اموت قبل اما احيا
هل في ف مشاعرك لسه صاحيه
بعيط وبضحك
بلوم بس بعذر
بلادي التي كل يوم فيها موت
بتكتملي صوتي بحق إني اعيش
بابوش لما بفضل واكون بره بايش
اجيب حق موتي وتمن الغوايش
وتسمحلي اشوف العيال في الأجازه
وهل ده وطن يبقي ليه اي عازه
بلاد فيها عالم في عنق الأزازه
ياتطلع في غربه يا تفضل تموت
ياغربه حزينه بتشبه مدينه
بتبني الضغينه وتمحي البيوت
بأكد لذلك بأن السكن في نواحي الزمالك
وان اشتراك النوادي الكبيره
وفكرة وجود الجراش في العماره
لايمكن يساوي الوقوف في السفاره
وأكد بإن الهدوم وسط ناسك
تمنها يزيد  عن وقوفك في Zara
تنقي بسنيين اللي غابو وسبوك
جواكت تمنها مشاعر ابوك
وجزمه تساوي مرتب سكاته
ياكل وجعه لأنه ماشفش اللي ماتو
وحزنه في بلاد الألم والإهانة
يارب اللي سافرو ايدك معانا
يعودو لبلادهم
ويبقو السند والوسيله لولادهم
وتستر فؤادهم
محدش يشوف المصيبه في مسافر
وتجعل طريق المطار عوده بس
يارب اللي عيط وفكر وحن
ورب البلاد اللي خانها الضجيج
تخلي البلدي لأهل البلدي
وتجعل بلاد الخليج للخليج

قصيدة #الخليج
#عمرو_حسن

قصيدة الخليج "عمرو حسن"

والمطر اللي بينزل دلوقت 
مش شبه اللي المطر اللي انا شُفته أول ما بدأت 
الشارع مش هو الشارع 
مش بس عشان طلعت عُمارات 
انما علشان ماتت حَضارات 
ماتت نظرات كانت عن حق 
ضاعت سلامات مخلوطه بأحلام ومحاولات 
والأمر الواقع بقى مش أكتر من اسمه 
الواحد بيعاين جسمه 
زي مابيفتّش محفظته 
بيدوّر على أجزاء منه ، فتحِت مواضيع
خبطت ف كراسي وف مشاعر وخريف وربيع 
وكإن الواحد بيسلِّم 
على شيء هيضيع قبل مابيضيع
--

القطر اللي بييجي برُكّاب 
مش زي القطر اللي بيمّشي محمِّل 
والناقص مضطر يكمل 

--
لم شفايفي من ع المجات واحسب 
عدد المرات اللي انا جرّبت حاجات فيها مع ناس مشيّت 
ارفع بصماتي من الأبواب وانت هتعرف 
ان انا ماتركتش باب إلا وجرّبت 
كل ما اقول قرّبت 
اتفرج على نفسي لوحدي
مزروع ف الأوضه اللي انا باقلع فها همومي 
بتأمل ناس لابس هدومي وعايشه مكاني
باتفرج على مشاريع أطفال
اتفق الشُركا يفضّوها
وبيوت كل ما ييجي العمال يبنوا حيطانها 
ييجوا ناس تانيين غير العُمال ويهدّوها 

--

مين المفروض دلوقتي يصبّر مين؟
الناس فاكره الطبطبه بالإيد 
واللي انا عاوزُه / ناقص ف السوق 
محتاج خمره تخلّيني أفوق
أو بِنج يحرّك أوجاعي
انما باجي ف أوقات وباقول مالهاش داعي 
الناس فيها اللي مكفّيها
مش هاتسوّل شلة أصحاب 
يطلبوا مشاريب وامشي آخرهم 
ولا ناوي أعكر صفو حاجات بحاجات غيرهم 
يكفيني أشيل بُرج إداري ، واغرس شجرة
ارفع عمدان من مطرحها ، وازرع أهلي 
اتبع خطوات ع السجادة وابني مكانها معارفي السابقين
مين المفروض دلوقتي يواسي ف مين

-- 

الناس ف الشارع ماشيه بناس مش حابّينهم 
عايشين ف أماكن مش مِنهُم 
واللي مصدّق ف الناس دلوقت 
بُكره يدينهُم 
انما بارجع أوقات وباقول : 
أنانيه ان انا افكّر بس ف نفسي 
لو كنت نجحت ف كل اللي انا دبّرتُه زمان 
كنت هاشرّد عشرين أسرة
هامنع رزق عن السينمات واكشاك الورد 
هامنع أطفال ييجوا العالم من باب غلطي 
واقطع بخيالي اللي انا ماملُكش سواه 
هافصل بين إيد واحد ماشي 
وبين الإيد اللي بتمشي معاه
وكإن المُخرِج مختارني أسلِّم لبديل
شغال عن الحظ مُجرَّد مندوب توصيل 
عقلي يقول لي : 
بإيديك قررت 
ومافيش حاجة اسمها مش عايز بعد امّا اخترتْ
اتفرج على فيلمك بحياد 
قلبي يقول لي :
لو كُنت ف يوم مازعلت هديت
لو كُنت ف يوم ما وقِفْت مشيت 
لو كنت نسيت 
كنت هاتبقى ف مطرح أحسن
بدل التواريخ ماتشيّد دنيا على كتافك 
ملعونه التواريخ اللي بتطلع على أكتافك 
لو كان فيهم واحد شافك زي ماتقصُد / مش زي ماقُلت
لو كان واحد فعلاً حسّك زي امّا بقيت / مش زي ماكُنت 
كان ممكن يبقى الفيلم جميل 
نهايات أسعد 
أعصاب أجمد 
وبيوت فيها ناس مش مهجورة
أحسن ما انت قُصاد الصورة 
بتبُص على الفيلم بحسره 
ولا منّك بتحقّق ايرادات 
ولا منك خارج بـ جوايز 

-- 

في الدنيا اللي بتحرِم محتاج 
وبتدّي لواحد مش عايز.

#الفيلم_اللي_ماخدش_جوايز

قصيدة الفيلم اللي ماخدش جوايز " عمرو حسن "

ميكس " عمرو حسن & احمد فوزي & كريم جوهر " من حفله الساقيه فبراير 2019 " الحفل المسائي "

#مشروع_كاف

Mix "Amr Hassan & Ahmed Fawzi & Karim Gohar "

اتاري الفيلم دي نهايته
 وانا الأعمى
آآمن حيّه من باب انها ناعمة 
واسلِّم ضهري للخوّنه بسلامة نفس 
شيطاني الزرع وسايبه ف روحي كاللبلاب 
انام غافل عن الضرب
واشوف إيدها وهي بتمسك الحربه
واظنه عتاب 
اتاري الباب وراه الغدر 
وانا اللي بطبعه ماتعودش يقفل باب

قليل الأصل ماتغيّرش 
وبنت البيت بتفرق عن بنات الليل 
وصمت القادر انه يرُد بيتفسر بقلة حيل
وليل الوحدة بيعوّد على التسليم 
وسوء الفهم بيبدّي رفاق السوء عن الوحدة 
باسدد بيدي 
بواقي غلطتي الواحدة 
ف واحدة كانت
 جوه مني ( كلهم  )
ولما الزوم طلع خطوة 
لقيتهم كلهم واحدة 

من الليلة هاهد الشعر بإيديا اذا ذكرِك
وهاضرب قلبي بغيابك اذا افتكرك 
وهاقطع ظني من جدره اذا شكرِك 
عن الموتة اللي طالت ضحكتي وروحي 
منعتك ليه تروحي بعيد 
مادمتي معايا بتروحي 
وعرفّتك على جروحي 
وطوّل قلبي فيهم شرح 
مانابنيش غير إيدين من ملح
اديني بارُد جرح بجرح 
ويشهد ليلك المشتاق وطعم الحضن كل فراق 
ويشهد فجر بينور على النايمين 
عرايا والملاية حنين 
وتشهد سطوتي فيكي وتشهد صحوة الشرايين 
من الليلة 
هاقولك قلة الحيلة بتبقى ازاي 
واقولك بطش احزاني بيبقى ازاي 
وحق اللي اتكتب ف الليل وراح الصبح 
لاخلي المزيكات تصبح ف عينك ناي 
هتلقيني ف ريحة التوب
ومعنى الخوف وطعم الشاي
وجرحي اللي انكشف للخلق من يمّك
هيتداوي ف وقت قريب ومن يمّك 
ودمي اللي اتحرق تفكير على غيابك 
هيحرق بالغياب دمك 
وقلمي اللي كتب مدحك
هيصبح شعره عن ذمِّك
وينزف قلمه في هجاكي
وبكره هتبكي من روحك 
على الكسر اللي جواكي 
وطول ما عنيا شايفاكي 
هتبقى جهنم الدنيا عليكي وع اللي خلاكي 
تردي الحسنى بأذيّه 
وتمحي الحسنة بالسوءات
يا كسر بنات
يا بنت الغدر 
يا مسافات انقضت بالهدر 
ياكاس داير 
يانور فاير 
يادايبة لفّ ف دواير 
وفاكره انك صعيب بَترِك 
انا مارضيتش اكون شوكه 
ف حكمة ربنا ف سترك 
لكن لو قلت مش هاسكت 
ولو فصّلت مش هاسكت 
كبيرك إني اجيب سيرتك 
لزوم العبره بين الناس 
لولايا ماكنتي هتكوني 
ولا تهاودي ولا تخوني 
ولا شكلك ده كان شكلك 
ولا لونك شرب لوني 
لولايا ماكنتي ليكي مكان 
ولولا تاريخي وكتابتي 
وهمّي معاكي والاحزان 
لـ كُنتي أرض صحرا وبور 
مضللها شجر دبلان 
ولولا مر بيننا الليل 
ولولا الارض شربت نيل 
ولولا الستر في التأويل 
ماكنش الأمر هيعدي 
لكن رب السما قادر وخالق قلبي على قدي 
باقول عادي ومايضُرش 
وبمنع حكي مايسُرش 
واقول خلصت ومتراضيين 
أخدتي اللي انتي عايشاله 
وفوقه قيراط وزرع متين 
وخدت اللي يطلع شعر 
وفوقه ليمون وتمر وتين 
وهتمر السنين عادي 
اديني رجعت اهو عادي
ماخلصتش الحياه يعني 
ولا بابي اتقفل يعني 
ولا الناس انتهوا يعني 
نهينا كلام لكن قلبي هياخد حقه بمزاجه 
ووالله انتي كارماني بفوق ماكنت محتاجه 
هطولك كل ما هكتب 
واصيبك كل ماهصطاد
اديني عملتلك قيمه 
وجو وتجربة وأرصاد 
واديكي بقيتي مشهوره 
ومضرب للمثل ساقط 
واديني ببص على نايبك 
وشجرك لما يتساقط 
ولو كان ع الكلام الحلو 
فيه ألف حكاية قبليكي 
ولو ع الشعر والله 
يغور الشعر لو فيكي

#Minimum_Charge

قصيدة مينيمم تشارچ عمرو حسن من حفلة الساقية 2019 - minimum charge Amr Hassan

بحبك رغم إدراكي 
بإني بارتكب غلطة 
ومبسوط اني وياكي 
ورامي روحي للورطة 
وسايبك قاعده تتمادي 
وبتجرّح واقول عادي 
وكل الناس بقوا قصادي
شيوخ بيأدنوا ف مالطة 

يقولوا بلاش 
ومش شبهك 
وسيبك منها وامشي بعيد 
وانا لسه بشوفك عيد 
وداخل طوع ف طواحينك 
كإنك ف الطريق تكفير 
عن الناس اللي سابقينك
بتاخدي حق ناس غيرك 
بدون ماتكوني قاصداها 
باوزّع وقتي ف غيابك
على الريحة اللي سايباها 
محنن ربنا قلبي 
وامتى القلب كان له عنين 
كفيف العشق متعكز 
وماشي ماخدش باله لفين 
بحبك ليه .. مافيش أسباب 
انا أوقات مابعرفش بحبك ليه 
خصامنا كل يوم أيام 
وواصل قلبي ياما كلام 
من الناس اللي بيقولوا بتعشق بس ايه فيها 
مافيش بينكم حاجات تنفع تكون بكره 
لا من طينك 
ولا بلونك 
ولا خوفك 
ولا ظنونك 
ولا براها يشبه ليك
ولا مضمونها مضمونك 
وانا والله متأكد بإنك مش هتبقيلي 
لكن هعمل ف حبك ايه وف الوَحشه اللي بتجيلي
يفوت منديلي ع العالم 
واشوف روجك ف منديلي 
ومهما باقول خلاص جبرت 
أخيراً حكمتي انتصرت 
يدبدب قلبي لو واحد ذكر اسمك بدون قصده 
ونجمك رغم كونه بعيد خيالي ماتابش عن رصده 
باخرج كل يوم ايدك من الابواب 
وبامسح خطوتك بالشوق من الاعتاب 
واقول خفّيت ومش هارجع لأحزاني 
اشوفك بس بتعدي يدبدب قلبي من تاني 
أكيد فيه حد ف العالم دعا مره عليا بقلب 
وقال : يارب بالأيام تسيب قلبك لوجع الحب
وكانت ساعه فيها جواب عن الدعوه اللي تأذيني
ياريتني كنت مش موجود ف ساعة لما شوفتيني 
يارب عملت ايه علشان 
يكون كل الألم فيها 
وايه يعني اللي زاد منها 
عشان ما اكملش غير بيها 
وليه مانشوفش حب قريب لناس بيحبوا يسقونا 
ومشاعرنا بتتبع أرض فيه شيء غيرنا هيرويها 
يا ناس بتقولي ماتكملش وعارف انهم على حق 
انا نفسي لكن قلبي صوابعه كلهم ف الشق 
مافيش ليلة تفوت من غير 
ما بدعي اني اصحى بلا طيفها 
واشوف الصبح دون نورها 
واجرد غمدي من سيفها 
واقطّع حته من قلبي 
عشان عماله تنصفها 
لكني لحد دلوقتي 
باطير م الأرض لو مرت 
ولو لمست ايديا بشوق 
الاقي التجربة اخضّرت 
ولسه بشوفها افراحي 
وتأكيد ان انا صاحي 
ولسه لما تهمسلي 
باكمّل ليلي صباحي 
ولسه بشوفها كل الناس 
بعكس ماهي شايفاني 
قتيل واضح ومجني عليه 
وكل مشاعره للجاني.

قصيدة بعد ما تشوفك عنيا "عمرو حسن "

هى بتقوله : 
عارف لما يكون الليل محاوطك من نواحى كتير ، وتبقى عملت خير مره ف يتشالك ويرجع خير ، اهو اللى حصلى وانا جنبك كرم من ربنا ليا ، كأنى داعيته واتقبل وقالى بطلى تفكير ، وجودك مش يا دوب فرصه عشان القى لمشاعرى مكان ، وجودك راحه ومحبه وفرحه لكل شئ زعلان ، كفايه بس فيك حاجه بدور عنها طول عمرى ، عيون لما ببصلها احس هدوء ونور وامان ، متعرفش هيجى منين نصيبك برضه ولا امتى ، قابلتك يومها كنا اتنين ومن يومها وانا انت ، بدونك كنت محتاجه احس بحضن دافى وبيت ، لاول مره ف حاجه بتحصل زى ما اتمنيت .. وجودك

وجودك "عمرو حسن"

( ميم )
،
المرة دي بالذات 
حاسس كإني بتولد تاني 
بلمس بإيدي أول الآشياء 
باتعلم الأسماء 
بانسى اللي شوفته ف الزمان الصعب 
ضيعت عمري قبل ما اقابلك 
بصي ف عنيا وانتي هتحسي أنا شفت ايه ف الدنيا دي قبلك 
أنا كنت مش بلاقيكي
أنا كنت بهربلك
تلاتين سنة عطشان وماليش سبيل للميّ
شباك قديم مقفول ماصاحبش خيط الضيّ
أنا كنت رايح فين بدون كفك 
وكنت من غيرك مستني إيه م الجيّ
عجزت بدري يا حلوة وقابلتك 
لو ليكي رغبة تحبي شاب عجوز 
محجوز ف عمره اللي انسرق منه
مخنوق بحبل العالم السُري 
ومخبي وحده العالم السري
 ومسمّي قلقه المنطقة الدافية 
كان ماشي يضحك بس بالعافيه 
أول ما بنتي يابنتي فتشتيه 
خرجتى منه ضحكته الصافيه
وكإنه نايم زي مصري قديم ف مقابلة السياح 
طائر بقاله كام سنة ع الأرض وعنيه بتدمع عند كل جناح 
قوليلي انك جاية مش ماشيه 
أو ماشية جنبي عشان اكون مرتاح 
 أنا كل أملي ف الحياة انتي 
اتنين ف واحد يعملوا المشهد 
أشهد بإني كنت من غيرك 
مفتاح يتيم الباب 
بيتمسك ساعة دخول الوقت وبعدها يتساب 
واحد حضوره غياب 
ودنيته تكرار 
عابر مابين الماء وبين النار 
طيب كإنه أول الأسرار 
وحزين كإنه آله بلا نوتة 
أمله يشوفك بس مبسوطة 
وعنيكي ضحكة شباكين للنور 
أمله ف كمان يعرف يقول جملة لناي مكسور 
أنا بين هروبي وبين علّو السور 
أملى ف انك تبقي علشاني 
الله 
حاسس كإني
باتولد تاني

كل الل جالك من كلام الناس 
اني بلا احساس 
واني جناين من بنات سابقه 
واني سرقت الأمنيات سرقه 
أو اني مجرم حرب أو هارب
ضميري منزوع الظهور ووقتي محفوف بالتجارب 
كانت حقيقة وصدقي قولهم 
والتمسي عذر لطفل بيحارب 
واحد نزف جرحه وماحدش حس بيه 
من غير ما حد يحط نفسه مكاني ويجرّب
وانا كلي متباع ايه اللي ممكن اشتريه 
لا هسوق مبرر عن جرايم حزن 
ولا اقول ملخص ع اللي عايش فيه 
نفسه اللي شافك وابتسم عيل 
كان شخص تاني قبل ماتقابليه 
سامحيني حتى ع اللي كان قبلك 
اسف لإني مشيت مادورتش
اخترت وجعي لما ما اختارتش
واديني جيتلك ايدي ممدوده
وحياة مشيئة ربنا فيكي
ماترجعيش الايد دي مردوده 
ده انا كل صبري ف الحياة دلوقت
ان انتي موجودة 
وكل طلبي ف الحياه تراضيني ع الدنيا 
أنا الصايع عديم الاهتمام بالحب
خرجتي مني حد ماعرفهوش 
وصحابي مش فاهمين ايه اللي غيرني
انا كنت عادي لا شاري ولا بايع 
واهو يعني لا اكسر حد ولا حد يكسرني
لولا شعاع الأم ف عيونك 
هو اللي فكرني
بصيت بعيني بصه على قدام 
شفتك ف بيتي بتفرشي الأحلام وترتبي التفاصيل 
بتسندي لو اميل وبتحضني لو امِّل
عواجيز معاً بيمروا تحت الشمس 
وبيمشوا ضله وضل
بيشاركوا بعض السينما والشارع
والأكل والحواديت
طلعت عيونك توأمين عفاريت 
خلوا المحارب يتقلب عصفور 
طلع الكلام ع الحب مش كدبة 
وطلعت ضلمة بتحتمي بالنور
أنا اهو باحبك باعترف وباقول 
وانا اهو باريدك واجي ف بريدك 
ادفع حياتي مهر وانا مبسوط 
يكفيني نظرة ولمسه من ايدك 
والشعر كله لا يكفي ولا يوصف 
وغنايا كله لا يوفي ولا ينصف
من حب يعمل فعل مش يحلف 
وانا أصلي راجل وانتي عارفاني
أنا مُت قبل ألف مرة بجد 
واديني جايلك اتولد تاني
#ميم

قصيدة ميم " عمرو حسن"

وف الغالب 
بكا الرجالة مش بدموع 
بكا الراجل / سكوته التام 
وقد ماعاش من التفاصيل 
قد ما شاف من الأيام 
بيبقى سكوته مش عادي 
سكوت مرهون بصوت هادي وحزن قديم 
شرود عينه 
بيلغي سؤال اجابته (مافيش) 
وايه أصعب من الميت آذآ جرب بموتة يعيش 
أنا والله مش كارهك 
ومش ناوي أكرهك أبدا 
عقابي مش ف إني أكره / عقابي ف إني ماكرهكيش 
أشوفك زي كل الناس 
مجرد بنت بتعدي التاريخ بسلام 
مطر تفاصيل بينزل ع الحنين الخام 
ف كل نهار اودع حاجه من أثرك 
أشد ايديآ من إيدك واضيع صورتي ف عنيكي 
احس فضيلة النقصان 
بنقص كبير ف اللي اكتمل بيكي قلبي 
ناسيكي لدرجة خضاني 
لدرجة إني لو شفتك م كن أتعرف عليكي
---

وسبحانه اللي بيغير قلوب الناس 
من اللهفه إلي العادي 
وم العادي إلي اللاشيء 
مافيش قطرين بيتقابلوا ويمشوا ف درب 
وحاسس اننا ف سلام 
أشد ضراوة من ميت حرب 
ساعات الصمت رد الفعل 
بيووجع ضعف ضعف الضرب 
زمان لو حد يحلفلي بانى ممكن أتغير 
وان القصه مابيننا هيبقى عمرها قصير 
ماكنتش حتى هاسمعله 
غرامك ربنا جعله علاج النصل للعله 
و (انتي) تنفع استثناء 
بيغني عن انتظار (إلا) 
وأي حلول غير الفرقة 
نهايه بطيئة وممله 
آى رجوع من المبدأ هيبقى خطيه وسذاجة 
نكرر كل حاجة بحزن 
ونصحى نلاقي ولا حاجة 
رأيتي العالم ابن حلال وانا اللي شيطان 
وشفتي الدنيا اهي لفِّت
وابن الحلال ماخلاش لابن الحرام حاجة 
----- 
ماتعتذريش 
عشان طعم الأسف بايخ 
آذآ بعد الدبايح مر 
رباط ف بلوفر العشره 
مسكتيه من رقبته اتكر 
وحزنك بعد كسر قلوب / بكاك على اللبن مسكوب 
---- 
ماتعتذريش 
لأنى بخير 
باسمي الإنسحاب أعراض 
وافوت ع الذكرى مش مهتم 
ألم بكسرتي الانقاض 
من الجرح اللي عمره ما لم 
ياريت ترتاحي ف غيابي 
وتلقي حد من توبك 
يكون حظك ومكتوبك 
ويصبح نصك التاني 
لآخر مره باطلبها 
ياريت تنسيني علشاني 
وبزيادة وجع صابح 
وعين شارده ونور رايح 
وبزيادة حنين لاغانى وروايح 
لأول مره بتأمل مرور العمر قدامي 
نزول الميه من كفّي
ف بيكفي 
أملنا ف بكره بقا لازم يكون أكبر 
مافيش ف القلب مطرح للبكا تاني 
أنا وانتي بعاد عن بعض 
مسافة ماتتمحيش بكلام 
مافيش غير كرسي واحد بس 
وقطر الدنيا مايسعناش 
وفيه مليون مكان تاني 
ومليون شخص ما يسيبناش 
ولسه ف كل يوم فيه صباح 
بدون كسره وخوف وجراح 
وزي ماجالي حلم وراح 
فيه حلم حقيقي لسه ماجاش
#بطريقة_الشخص_اللي_حبك
#عمرو_حسن
لينك قصيدة ع يوتيوب 
https://youtu.be/LQ_DB7zI8F8
لينك قصيدة ع بروفايل عمرو حسن الرسمي ع فيس بوك
https://m.facebook.com/story.php?story_fbid=113686506470211&id=100034865862815

قصيدة بطريقة الشخص اللي حبك عمرو حسن

غيابك طال 
وبوّختي في هزار بعدك 
انا بعدك عرفت اني ماليش بعدك 
كبر سني
يا أول حاجه احوِّشها واشوفها بتتسرق مني 
ابص من الغياب ع الباب واقول بالوقت هتحني
قعدت استني واتحوّلت 
  لشطره ف غنوة الأطلال    

- غيابك طال - 

خصامنا مهما كان حاصل 
ماكنش ف بالي يقلب جد 
ومتطوّح لا عارف اغيب 
ولا بشكي اللي فيا لحد 
بقيت زاهد ومش مشغول
ولا برحيل ولا بوصول
وباسكت وامّا قلبي يقول
يقول فينك !

ياريت كل اللي عارفينك .. قالولك اني بيكي بعيش 
ياريت كل اللي عارفينني .. سابوني ف شكي ويقيني 

وحشتيني 
رماني الشوق عليكي من يومين فايتين
فتحت رسايلك السابقة من الآخر 
فضلت اقراها واطلع فوق
اطلع فوق
وكل ما تنتهي دمعه تسيل أخرى
وكل ما تنتهي جملة يهِفّ الشوق

- ما فيش داعي لكلام تاني ... لقيت منك مكالمة الصبح! في حاجة؟؟
- يا ريت لو شفتي رناتي تردي حتى برسالة
- مالوش لازمة الكلام ده خلاص .. دي آخر مرة أقولهالك ما تتكلمش
- خلاص مش طايقة مني كلام .! 
نقطة .. علامة إستفهام .. نقط أكتر .. تعجب .. نقطة .. واستفهام
- انا عاوزك يا ريت تتصلي من فضلك

فضلت أقرا .. فضلت أرجع .. شهور وايام .. شهور وايام

كلام متقال كأنه النار في كومة قش
رصاص طالع من الشاشة لقلبي الهش
رجعت أكتر .. فضلت أرجع 
وفجأة لقيت كلام أجمل .. سلام أجمل
ورود ووعود .. كلام في الحب وسنينه
جُمل من أغنيات الست
فضلت اقرا .. وكل ما أقلب التفاصيل .. تزيد سنوات على سنيني
رسالة توّدي لرسالة 
أهو رجعتي تحبيني
فضلت ارجع 
كذا فلاش باك
وكل ما اراجع الأيام 
تروّح دمعتي لعيني 
فضلت أرجع .. لحد ما رحت للآخر 
وفي الآخر
 لقيت أول وحشتيني

بحطة ايدك الناعمة أنا ما زلت
و وزني زي ما هو لكنّي تقلت
وبمشي لحد ما بنسى بإني وصلت
طباعي ثابته ما اختلفتش
برَّبي كلاب .. بسيب واتساب 
دوا المعدة تلات مرات 
بفوِّت مرتين منهم
وكالعادة فيه كام موضوع 
بيرفض عقلي يحسمهم
ورقمي زي ما هو
 وبرايا نقيض جوه
وبفتكرك اذا بصيت بالليل من الشباك 
واقول هتفوت
ياخدني بعدها سرحان .. يرد سكوت
حبيبك كل يوم بيموت 
لكن واقف على رجليه
وضِحكُه مع الصحاب طالع 
لكن برضه في شيء في عينيه
لا بد الشيء ده يبقى سؤال 
رفضتي عليه تجاوبيني
وحشتيني عشر مرات وانا بكتب وحشتيني

ولو كان الزمن بقى غير
ولو حتى الظروف صادّه 
وحشتيني ف رجوع الطير 
لعش اتهد من مدة
بقيتي نشيدي وحكايتي .. وصمتي وصوتي ومرايتي
بقيتي نهايتي وبدايتي .. ومعجزتي اللي جيت بيها
جدع زيي مخبّي الدنيا في جيوبه
لكن اشواقه ليكي تبان 
ومش عارف يخبيها
لا عشت معاها يا قلبي 
ولا لك نبض بعديها
بشوف نفسي في ظهر الباب 
براجع كل لوم وعتاب
ومستني الزمن يصفى 
وبرد الأمنيات يدفى
وتصفالي الظروف مرة
 وتنسي الدنيا وتجيني 

بقولك إيه 
وحشتيني.

#وحشتيني_٢

قصيدة وحشتيني 2 عمرو حسن من حفلة البروچ

فبراير ٦٦

خارج من الحاره 
ببنطلونه الچينز وجزمته الباتا 
وعيونه طالعه من سباق لسباق
الشمس ساعة حيط ف ضهر الحي
وهو جي ما بين لقا وفراق 
كإنه دي ستيفانو / مش يحيي
وكإننا ف أسبانيا 
مش في بولاق

الصبح يخرج من شقوق الحيط 
 عيون بتحدف نفسها للساحه 
وهو يلعب كورته بالمرتاح
زي "انت عمري"
 لما بتتعزف مرتاحه
الليلة لعب ويحيي حاضر 
يبقي فيه كوره
الحي كله بيقضي اشغاله 
وبينهي حاله قبل بعد الضهر 
والناس بتحجز مكانها زي ف السيما 
الماتش لو فيه يحيي
يبقي كومبليه 
ودي مش بحيرة البجع 
دي كورة يابتوع الباليه 
الصبح نقاش 
والعصر فلتة زمانه ونجم منطقته
برضه النقاشه فيها فوره وماتش
وان كنت حريف هتعرف تدفع الديّة
الاسطي يحيي زي يحيي الكوتش 
لتنين فراودة
 والاتنين صنايعية

" العب يا يحيي " 
  الصوت بيمشي زي خيط العنكبوت 
م الشوارع
للنواصي 
للحواري 
للبيوت 
الولايا ف الغسيل 
يرموا المشابك ع الفريق الخصم 
والقهاوي تفتح الرهانات علي الاخر
موسم رياضي طويل وفاخر 
وانتعاشة لكل أرباب المصالح والمطارح 
العيال بيقلدوا يحيي ف شكله 
وف مشاكله 
ف القميص الكحلي وف شعره الكنيش
والمعافره عشان بلن جه من مافيش 
كان فتي أحلام بنات الحي كله 
يسرقوه من نظرته ويعاكسوا ضله 
كل واحدة تنام وبالها شاغله يحيي
والعيون ف الددنيا توسع بعد صيته 
النوادي كلها كانت ف بيته 
يخطبوا وِدُّه وحديته
والحياة بدآت تنور
واللي جاي باين هيضحك 
للي رجله ف راسه واصله بدون وساطه

فيه حاجات أكبر كتير بدأت تقوله 
ان فيه أوسع كتير من جزمة باتا

أغسطس ٦٨

نادي البلاستيك خد بطولة دوري شركات المناطق
والسبب هداف جديد جاي من بولاق 
ما في ماتش بدون ماسجل أو صنع هدفين تلاته 
راس فاروق جعفر ورجل حسن شحاته
الفلوس بدأت تزيد
خدله مطرح مش بعيد
اوضه اه 
بس شِرحه 
واما جاب جون النهائي
جابله خالد بيه النشرتي لادا زرقا
كل شيء كان ماشي أجمل من دخول العيد 
لحد ما قرر مدافع شركة السكة الحديد
ينهي كل مشاهد الفيلم السعيد
يحيي متشخص بكسر هيجبره
يبقي فجأة 
أمين مخازن شركة في الوادي الجديد

يا الحياة 
يا غريبة الشكل واللون المقاصد 
عمري مامشيت فيكي قاصد 
كلمتين ف الصدر خرجوا بيوجعوه 
الألم فجأة بقا أمه وابوه 
والسجاير صاحبته علي غفله منه
كان كإنه بيتسرق من عمره بونط
ادي اللي كان من ساعة شارب فرح عمره 
صار مجرد صدر ينفع تسكنه البلمونت

لما واسطه اتوفّرت علشان يعود للقاهرة
كان كإنه غريب عليها 
كان دخوله بولاق مغامرة كبيره منه 
ف المكان ده كل شيء خد حته منه 
شبّهوا الناس من بعيد 
خبّي وشه بكف إيد
وامّا روح مطّر الجرح اللي ساكنه ف حضن أمه 
كل آه خرّجها صحِت بيت بناسه 
كل دمعه غرقت مطرح بأهله
ادي صعب العمر سهله 
وادي حلم كإنه م الأول سراب 
اللي فاضل
 ان يحيي يعيش مناضل 
يمحي حزنه 
بالاغاني 
والشوارع
 والصحاب 

أكتوبر ٩٩

كوبري قصر النيل ف ساعة مغربية 
كاميرا مان ومذيعه سمجه 
بيعملوا تقرير مع بياع بطاطا 
شخص ف الخمسين مكافح 
سُمرته فشلت تداري كسرته من جرح سابق 
ضحكته ماسابتش وشه طول كلامهم

- عم يحيي .. تحب تهدي حاجه ف نهاية حوارنا ؟
كان ف باله يقول كلام متحاش ومنعه 
ابتسم وبإيد شكرها 
وبإيديه التانية دوّقها البطاطا
فات عليه تلاتين سنه من يوم ماجاب جونه الأخير
النهاردة فيه رونالدو لعيب كويس 
وفيه زيدان 
كان تملي يحكي ويّا الناس زباينه 
عن لعيبة الكورة 
وتاريخ الحكايه 
بس كان دايماً يقول 
مهما مر لعيبه ف العالم وعدوا 
مش هييجي زي مارادونا العجيب 
أوضته معجونة بصوره
ع الدولاب 
وف مراية الحوض 
جنب شباك السرير 
وحتي ع التلاجه فيه مارادونا برضه
لما مر ف يوم لبيته قبل نص الليل بساعه 
بص بعنيه شاف جماعه بيلعبوا ف الحارة كورة 
شيء ف روحه شدّه يحضر بس فوره 
واما داري وجوده عنهم 
وانزوي ف مساحه ضلمه
كورة شارده من مهاجم 
جابها حظه تحت رجله 
وافتكر كل السنين من لمسه واحده 

نص ساعه 
حي كامل كان بيتفرّج علي بياع بطاطا 
بيخلي كورة تحل ف ايديه شعرها 
خرجوا سكان العماير 
شغلوا كل البلكونات 
والبنات كان ف عينهم نظرة الإعجاب بعينها  
والهتاف بيعود لجسمه 
عم يحيي رد اسمه 
خد حقوقه كامله في عيون مشدوداله

في مدافع 
ملعون دلوقتي 
عن مُجمل غُشمه وإهماله

وفيه نجم بيحضر 
بالصدفه
ف الشارع 
ماتش اعتزاله.

#الحريف

Kawther Darwish

Popular tracks