سلام الشِعر على سَطر البدايه 
بكل ما فيا من وجعي وهوايا
وكل مافيكي من مَّنِك ومِنّك 
تدور الدايرة وتعود للنهايه 
صادفتك زي طيفْ بيمر غفلة
كإنك صدقْ من كدب المرايه
صباح الخير ياستي ، ياورد أحمر
بيشرُق عطر ويزودني آيه
ضحكتي ضحِكتْ .. خوفتي حضَنتْ كفِك
كإن الشعر فيكي وسيله غايه 
بطاوعك رغم قلقي من التورط 
بجرح قديم فاضلّي من حكايه
وقولت الدنيا بوجودك هتضحك
وقولت الورد هيحرر غنايا
وقولت امشي وظني فيكي طيب
اطيّب حزن واكتبلك روايه 
ومر البرد وانا بكسَب سحابك
ومر البحر وانا بخسر سمايا 
قتيل الوقت مصلوب الاغاني 
اسير الحرب متحاط بالمنايا 
أهم القلب ولا الفعل مثلاً
وأولى الرد أم صدق النوايا 
دوايا البُعد أنعم بيه وأكرِم 
مريض بارادتي ماخترتش دوايا 
منين الحب بيداهم فـ قال لي :
ساعات ( ازيَّك ازيِّك ) كفايه 
ثواني كلام وممكن صمت يشرح 
كلام ماتقالش ف مشاهد غوايه 
بتضحك بنت 
يبدو شاب واقف 
يبص عليها من كل الزوايا
بحكم الوقت كان لازم اقرب 
وحكم القرب كان وقتك لقايا 
قابلتك وانتي لغز حاولت احلُّه
اميرة بجد مش ضمن السبايا
شتانا جميل 
ده مطرك ولا مطري ؟
سجايري ازاي بتولع من بكايا !
يمُر العطر من كفك لروحي 
ويغرق جسم من دمع الملايه 
لفين وديتني نَفسي وكل نِفسي 
ف وقت ماشُفتك اوهبلك عنايه 
وهبت عنيا 
شعري 
وبعض كُّلي 
وكُلي اخدني علي صمتي وعمايا
ساعات الحضن بيغيّر لاسوأ 
ساعات القرب مابيبقاش مزايا
غلطت ازاي وانا كان قصدي اقولك 
بانك وهب رباني وهوايه 
واني لقيت ف اول خطوة بيننا 
مساحة بيت وطفل وبونبونايه 
وشوفتك يشهد الله اني شوفتك 
نزيلة قلب مفتوحلك بنايه 
اقولك ايه وانا والله ردي 
لاينفع حكي ولا ينفع قرايه 
لكني فهمت 
وكنت فهمت فجأة
بإن الكل كان فاهمك عَدايا 
رموكي بظن شيلت الرمي عنك 
وجيتي عليا جربتي الرمايه !
ابص عليا وانا كان ضهري ليكي 
عملتي جريمة ماعملهاش عِدايا 
لكني سكتّ وكتمتك بسيرتك 
خسرتك وقت مابدأتي الوشايه
عزيز النفس من عيّط ما بيّن 
قليل الأصل من فضح الكنايه 
يُثاب بالضعف من أمسى حنيّن 
يُجازى ف قلبه من رد الهدايا
اديكي معاكي زي ماكنتي عايزة 
ياريتني ارجعلي وده املي وعزايا 
بان اللي انتهي جوايا منك 
يسيبني اتأكد 
انك مش معايا

https://m.facebook.com/kemiakarim?refid=7&ref=m_notif&notif_t=like

متلازمة هي | عمرو حسن

عمرو حسن | On the run وموسيقى الكيت كات

انا لو هاقول ع الفراق 
هابدأ كلامي منين !
والشعر قال ياما عن الفراق بالعين 
وقال كلام أكتر عن برد صاب الايدين 
والشعر قال ع الفراق انه الوجع بالليل 
وانه البكا والسهر وانه السلف والدين 
وقال ف باب علّته " إن اللقا فراقين "
أوقات خسارة بفوز أو نصر بهزيمتين 
وكتير كتب ع السبب أو مين موّدي لفين
الشعر وصف اتنين كانوا زمان واحد 
لكنه ماوصفشِ واحد 
كمّل حياته " اتنين " !

من بُنِّنا المظبوط لضحكنا ع النيل 
من حضننا المبسوط لحضننا في رحيل 
ومن عيال جدعان بيعيّطوا بالبعد 
رجالة أيوة صحيح بس احنا مش تماثيل !
الراجل العادي
وقت الفراق (عادي) 
يعني البعاد ده نصيب والرك ع البادي
ويقول لها اسف واتمنى ليكي الخير 
وانا ماشي وانا عارف انك هتبقى لـ غير 
ويروح يكمّل سير مع واحدة بتنادي 
ده الراجل العادي !
أما الرجال بصحيح وقت الفراق بتموت
العِشرة ليها جلال ومحبة بنت بنوت 
ف زمان بهذا الشكل م الصعب تلقى شريك 
نادر تلاقي بنات جدعان ويبنوا بيوت

بس اللي له أثره والعامل المشترك 
اللي البعاد كسره وسابه بيفكّرك 
هو الكلام بينكم ووصفكم للبيت 
وشكل أوضة الولاد
ولون دهان الحيط 
بتحب تاكل إيه 
وهي شاطرة ف إيه
والحضن وقت الشتا وحبيب ايديك ف ايديه 
سألني صاحب وقال : إيه أصعب الأشياء
قولت ان حد يروح وتبكي منه عليه

طمنيني
عاملة ايه ؟
كلميني عن حياتك يعني عاملة ازاي بدوني 
لسه بتحبي الشوارع والمطر والمبلولين ؟
لسه بتحبي العيال الشحاتين الطيبين ؟
لسه بتحبي المراسلة بالحنين !
مش هاقولك اسمه إيه 
مش هاقولك هو مين 
احنا بنكمل حياتنا بناس أساًساً حلم غيرنا
غيرنا بيكمل حياته بناس أساساً حلمنا 
لولا إني بجد مؤمن كنت أقول ده حرام بجد 
بس انا عمري ماباكره شيء يجيبه ربنا
باسم كل الناس معايا المجروحين ف القلب جرح 
باسم مَن بص ف مراية شاف ملامحه ناقصها شرح 
نخل شوقنا جريده خوفنا .. نخل رامي الحزن طرح 
كل واحد ساب حبيبه 
ثم كمل شيء بدونه 
كل واحد مهما يضحك 
تلقى فيه دمعه ف عيونه
الفراق قسمة ونصيب 
واحنا مضطرين نسيب 
الفراق والله لعنة 
نشكي للرحمن وجعنا 
نحكي للناس دون مانجرح 
لو خدعنا او اتخدعنا
اذكروا حُسن اللي سابكم واوعى مره تشوّهوه 
واخرجوا بره اكتئابكم واحنوا خوفكم واقتلوه 
واضحكوا يمكن تلاقوا 
حلم بكره تكملوه

https://m.facebook.com/kemiakarim?refid=7&ref=m_notif&notif_t=like

الفراق | عمرو حسن

ربنا عالم باللي ف قلبي
أنا شايل جداً ومعبّي
مبحبش حد يشوفني ضعيف
فبعيش موجوع / بس مخبّي
بتشوفني تقول عمّال يضحك
وتقول متفائل أو مبسوط
مع إن الناس كلها عايشين
وأنا طول الوقت لوحدي بموت
إياك تتّخم ف مظهر شيء
أو تلمس يوم شيء من براه
مش يمكن شايل حاجة وراه ؟
مش يمكن جرحه كبير وغويط
وعشان مايشوفش الهوا غطّاه ؟
فيه ناس لو تدخلهم جوه
تخرج بتقول سبحان الله
والناس أنواع
فيه ناس شكاية وحكّاية
وفي ناس بتداري ونسّاية
وأنا واحد م النوع التاني
أنا مجني عليه بيبان جاني
والشكل مخبي حاجات جوّاه
سيبك من اني سعيد خالص
وادعيلي بجد لوجه الله

https://m.facebook.com/kemiakarim?refid=7&ref=m_notif&notif_t=like

ربنا عالم باللي في قلبي | عمرو حسن

بقيت عادي
كإني ديكور 
مابتكلمش عن حاجه ومابعلقش
ومبكدّبش حد ف شيء ، ومبصدقش
ومش مهتم بالدنيا ولا بالحرب 
ومش باحزن على الرايح ولا الآتي 
ومش حابب ادخّل حد ف حياتي 
بقيت مابقيتش من ساعة وجع ف الروح 
ولا شرير ولا طيب ولا حساس ولا سادي 
بقيت كما طيف
بقيت كما ضيف 
بقيت ،، عادي

على الحال ده بقالي زمان
بقالي كام سنه يمكن 
ماحدش منّكم خد بال 
روبوت تشغيله بحجارة 
وطول ماحجارته فيه شغال 
شجر اخضر ما بيجرّحش عين الناس 
فانوس بيقيد ونوره سبيل 
ده مش تمثيل 
ولا تطويل ف مشهد ما 
لكن اسلوب وشكل حياه 
فماتلومنيش علي غيابي انا موجود 
ف اعيادكم 
واحزانكم 
صديق ف كافيه بيسرح ف اللي ضاع منه 
شريك منزل 
نزيل غرفه 
وجع بيبص م الشرفه 
انا موجود ومش بفسد فرح بينكم 
ولا بزعل قوي منكم 
انا على غير ما جوايا 
مهرج باسعد الشله 
وصاحب افيهات حاضره 
وعامل لجلكم حضره 
تقولوا ف وصفها الله 
فلو وجعاكو كلمة آه هابطلها
يومين عزله واكون احسن 
وهارجع تاني للشكل اللي كان بادي

انا عادي 
فخد راحتك
وقول عني اللي بتقوله 
انا وكتير من الناس اللي بقوا زيي 
مابنقربش م العالم عشان يحلو 
ومابنفسدش ابدا جو 
ومبنأذيش
لكن بنخاف من التجديد
من الناس اللي بيخشوا الحياه فجأة 
وبيفاجئونا بوجودهم 
عملنا سياج علينا عشان 
ماتتعشمش ناس فينا 
ف كل مساحه تلاقينا 
نميل لاغاني شتويه 
ولون غامق ف لبس عتيق
ريحتنا بيوت فارقناها 
هدومنا ناس قلعناها
وسمّيعه 
بنعرف نكرم العالم ونقراهم 
مبنملش من الحكايات 
ولينا ف كل صدر نبات 
ولينا الجدعنه الكامله 
ماننساش عيد ميلاد صاحب 
ومبنبخلش بالمواعيد 
جدير بيكم تساعدونا 
تغنولنا 
وتحكولنا 
وتسقونا 
يجوز دون قصد تحيونا 
وتدونا امل ف الضي
يجوز نتراضى على روحنا 
ونتطمن لبكره الجي 
يجوز بالوقت نتطمن 
ونرجع نبتسم عادي

https://m.facebook.com/kemiakarim?refid=7&ref=m_notif&notif_t=like

وما أدراك ما الفوبيا | عمرو حسن

ربك كرَم من وَسَع والشاري هيبيعك
واللي ف لقاكي اتلسع ينفخ ف توديعك
قولتي عليا كلام وانا كنت منه بريء 
ومافيش بقى حضرتك أسهل من التلفيق 
كل اللي بيننا اتقال 
وصار مشاع للناس 
حتى اللي كان احساس 
حتى البكا حكيتيه 
ده اللي انتي بتحبيه 
موهوبه جداً فيه وبتعمليه مظبوط 
مش قولتي اني مُدان خاين وما لي أمان 
مش قولتي اني كئيب وباغيب وجرّحتك
مش قولتي اني حزين ودخلت ف مساحتك 
طب اديني ريّحتك 
اتمنى تبقي تمام
واتمنى نخلص بقا من جرح مابيهداش 
رغم اني اشك ف سلام من واحدة مابتنساش
ادي الغزالة الفريسة بتقتل الصياد 
بتشوفه قاعد ف حاله وتغدُره فجأة 
نحكي لمين المفاجأة ويفهم المعنى 
ان الأسد ماقصدش يصيد غزالة اليوم 
بعض الضحايا الأبرياء قتلة 
بعض الوحوش ماكانوش
ناويين على الصيده 
بس التاريخ كسلان 
مش فاضي للتفسير ومراجعة الأحزان 
عنده الغزال طيب 
عنده الأسود جانيين 
مع انه سهل يشوف مين اللي جار على مين 
  ـــــــــــــــــ
ملتوتة ياتوتة ياحدوتة
الواد كان حب البنوتة 
وعيون الحزن المبسوطة 
بتنزل دمعه ف زغروطة 
وبتزرع جنة ف وسط النار 
فيه حاجات مطلوقة ومكبوتة 
انما لازم تفضل اسرار
والحبكه الصح المظبوطة 
تغلطي فيا وتقولي ده جار 
طب حتى الجار له حقوق جيرة 
والجيرة ف حيط بيتنا كبيره 
مش كل كسور ليها جبيره 
ولا كل الوارد ف السيرة 
نعمل منه كلام ومسيرة 
وعسيرة جراحنا مانجبُرهاش 
اللي ف جسمي ده مش تعويره 
ده جرح فراقك ماتغطاش
واللي بيقصد ف حاجات مرة 
تيجي مرة حاجات ومايقصدهاش 
يا سموّك مَنِّك جه مِنِّك
الجاني اتجنّ بروح جنِّك 
وكإنك إنك لا كإنك 
واحدة انا باعرفها وماعرفهاش 
العهدة على الراوي ياحلوة 
والراوي الصامت متكلّم
كان ماتعلمش من الغنوة 
لكن جه اليوم اللي اتعلم 
واتعلّم يعني عليه واحدة 
والواحدة مسيرها هتتعلم 
ان اللي مسلّم طول عمره 
لو مدت ايدها ماهيسلم
ربنا سَلّم
وجعك سِلِّم اخره تعافي 
بالصدفة لقيت سِمِّك شافي
الصبح قلعت همومي يقين 
مالقتش صوابعك ف كتافي 
ولأول مرة ماشمش طيف 
بارفانك بالشكل الكافي 
القصه اياها المتعادة 
ملّيتها وقرصت بزيادة
لو علة قلبي ان انا باهوى 
ف القهوة بتفضح بزيادة 
السكر ف حضورك سادة
واللي ماغلطوش هما السادة
مسكين من شاف فيلم لآخره 
وبيحسن ظنه على اعادة 
كان لازم آخر للقصة 
ملعونة يا ( لسه ) ف كل غرام 
" شعراً " تضميد الحب حرام 
والأصل ف أي خلاف تركه
العيب على كل اللي اشتركوا 
ف تحويل الحب لحزن طويل 
للوردة ان تدبل الف بديل
غير ري بشوك من بستاني 
بوستك على خدك ماضحكتيش
وفضلت مُصّرابوس تاني 
كان ليه الشوق ملا بستاني 
وحنين الوردة بيقتل فيه 
انا ليا زمان جرحي باخبيه 
مبُتلى وبيصبر ع اللي باليه 
بس انا أصبحت فلان تاني 
مش نفس الشخص اللي قابلتيه 
ــــــــــــــــــــ
محتاج اضحك 
محتاج أهتم 
القى الافراح من لحم ودم 
محتاج اتلم 
محتاج اقطع علاقات بالهم
محتاج ابني شوارع تانيه 
حواديت تانية
الحق اخر فتافيت مني واحطها ف مكان 
هو الانسان ايه كل مناه غير بس يميّل على انسان 
يسمع همسه 
يعرف أمسه ويعدل سيره 
هو الانسان ايه غير غيرُه ؟ 
الشخص اللي بيعرف امتى يكونلك ضله
 ويعرف امتى بيبقالك شمس   
 واحد يعرف انك مكسور وبقيت باللمس 
مش لازم شبهك قوي لكن 
شبه الحواديت اللي عارفها 
شبه الافلام اللي شايفها 
شبه المزيكا اللي سامعها وحافظ صوتها 
والقصه ماتخلصش يا مجروح غير مع موتها
السكة اللي تفوتك فوتها
ـــــــــــــ
توتة ياحدوتة يامظبوطة 
الواد هيقابل بنوتة 
وهيعمل بكره جميل وجديد 
الصايم فيما بعد صيامه 
موعود بالعيد 
والفيلم نهايته سلام نفسي
وجديدة بجد المرادي
الملفت بقا فعلا عادي
والواد بقا بطل يتألم
الساكت مهما يكون ساكت
هيجيله الوقت ويتكلم 
لسه هنتعلم ونقابل
ونقابل ناس 
وهنتعلم

https://m.facebook.com/kemiakarim?refid=7&ref=m_notif&notif_t=like

الغزالة | عمرو حسن

لو كان بايدي يارب أتحوّل كمنجه
لو كنت أقدر اكون جنينه أو مطر
لو كنت أغنيه يارب 
أو روايه 
كنت هاعرف أعبّر اكتر عن مشاعري
يعمل ايه دلوقتي شعري لو حاولت اكتب قصيدة عنّها ؟
انت يارب خلقتها 
وادتني شعر ما كفّهاش 
ازاي اقابل زيّها وماكتبلهاش 
ادي حكمتك 
...
دلوقتي وانا قاعد هنا 
ف مكان بسيط يشبهلها 
مستني أي بدايه تنفّع عنّها 
ولازلت غرقان من سكات 
عمال أفكّر من ساعات 
بشرب ف شاي 
ومسكنات
واكتب كلام وباشخبطُه 
ادي اللي قضى طول حياته بدون حوادث 
جاتله واحده تخبطه 
وتلخبطه 
وتفنطه يرجع جديد 
وانا مش حديد يارب 
بالعكس أضعف من قلوب الأمهات 
أنا بيت مقفّل بس كُلي بلكونات 
انت يارب خلقتها شجره 
وخلقتني محتاج لضل وأمنيات 
ليها مزاجها الخاص 
خوفها وحزنها
وبراءه بتخلي الحاجات ترتاح لها 
ماشية بخفه على الحنين وكأنها 
حضن المطار بعد الغياب لسنين 
امشي ف الشاعر لآخره وانت تفهم هي مين 
سلة النعناع ف حجر الريح 
أو صوت موسيقى قديمه ف بيوت من خشب 
،، 
باقول لنفسي : انت محظوظ الحقيقه 
تلقى طيفها ف المكان اللا مكان 
جوه شارع شك وكباري انتظار 
وقلت : 
الفجر عربون النهار 
...
انت وجمالها وحزنكم 
قاعدين ف ركن لوحدكم 
اتلو السلام على حُسنها 
واعزمها على شاي بالحنين 
احكيلها عن طفل انت هو 
عن سنين مرت عليك زي انتظار اهل المسافر ف المحطه 
واحكيلها عن امك 
عن فوبيا الاسانسير القديمه 
وعن برشام ملازمك من خمستاشر سنه 
واستخدم ( احنا ) مكان ( انا)
أو 
زي راجل قولها انك بقيت محتاجلها 
وانك تحب تموت ف بيت من حضنها 
...
ساعتها قُلت : 
باحب شبابيك الخشب اكتر
واحب الوان المعيشه دافيه أكتر 
كلب طيب ف التراس 
بورتريه ف الصاله من فنان صديق 
وبخور مفاجئ عند باب البيت
ــــــــــــــــ
- ما أفسدتهُ العلاقاتُ القديمةُ ، تُصلحهُ أحلامٌ جديده طيبه - 

على أي حال 
مهتم أقول كلمه أخيره للتاريخ 
انتي أجمل ست ف العالم عموماً 
أو عموماً انتي ألطف مارأيت 
بنت / بيت 
حتى بعيوبك ياستي 
عصبيّتك 
افراطك المدهش ف ايام عزلتك 
وانا اللي خارج من جيوب حنيّتك 
باضحك لأيامي اللي جايه 
...
هاكتب كده خارج حدود الشعر 
بلا اهتمام بالمجازات العريضه والكلام المستعار 
اثبات لقدرات الكتابه 
لينا شعرا يعملوا الأسياء دي اجمل مني بكتير الحقيقه 
أما انا 
ف هاكتفي بسذاجة العشاق 
وعشان ( بحبك ) هي أبلغ شعر يتقال عن ( بحبك ) 
هاقولها صافيه مجرّده 
لو كان بإيدي يارب اتحول كمنجه 
كنت هافرح لما ايدها تشدني
واسكن ف اعلى كتفها 
واقول باني بحبها 
مرة يارب وبعدها اروح لحالي 
فيه واحده أبعد من خيالي 
اقرب اليّ من حبل الوريد 
الشعر يفعل مايريد الشعر 
والحب يفعل في النهاية ما يريد 

https://m.facebook.com/kemiakarim?refid=7&ref=m_notif&notif_t=like

كما يليق بوردة | عمرو حسن

تقوللي ايه العلاقة مابين دخول الشتا 
وبين الدخول ف الاكتئاب  
اسكت
شالوا الهدوم الصيفي م الدواليب 
قفلوا البيبان 
واتبدلت مشاريب خفيفة بمشروبات سخنه 
وانا انكمشت كاني قنفد خام 
فيه عطل ف الأيام خلانا نتذّكر
أو عطل ف الحواديت خلانا بنفكّر 
ف حاجات كسرها الزمن ورمانا مطرحنا 
الغلطة مش ف الشتا 
الغلطه فينا احنا
ماتورطوش فيروز ف حاجات ماعملتهاش 
احنا اللي مافهمناش 
ان القصص شادي 
وان الحنين الحي
ضل الرصاص الحي 
لا احنا انتظرنا الجي ولا عملنا حساب 
لباب وراه كذا باب 
اسمه الغنا الكداب او الغياب النيّ
دخل الشتا وشارعنا لبس البيوت الصوف 
قفلوا الحريم بالخوف ع البلكونات والسطح 
لبسوا البنات القلق 
بدأوا يحسوا بحلق بيزيد مع الأيام 
واتلمع الاسفلت من عرق السما 
دخل الشتا بملحمه 
ودخلته مش مرتاح

انا النهاردة صحابي نقصوا اتنين 
واحد مسافر من هواة جمع السراب 
والتاني مات من غير ما يسألني 
مين اللي يقبلني وانا طير بدون جناحات !
فيه حاجات كتير دابت من وقت ماتسابت 
بس اللي بقى ثابت 
تركيزي ف المفقود 
قتلتني تفصيلة ( امتى اللي راح هيعود ! )
احنا ف زمن كداب 
مافيهوش ياصاحبي وعود 
ولا فيه كرامة لجرح 
حتى الوجع دلوقتي ياصاحبي بقا موضه 
مافضلش ليك بالوقت 
دلوقت غير أوضه 
تقدر تكلمها 
تقدر تلونها بلون تقيل غامق 
وتفتكر بشويش
رفاقى أكل العيش 
زملا الدراسه القدام 
او رحلة المصيف مع الجامعه
وتبص ليك وتشوف 
شكل اللي وقع اتكسر 
وتعد مين ساب أثر 
ومين كإنه ماكانش
امتي الشتا ييجي 
ييجي الشتا امتي
الجملتين غير بعض 
بس انت مش هتشوف لو كنت مافارقتش
او كنت مافرقتش مع حد في حياته
( امتى الشتا ييجي )
تكتر اغاني الليل 
توسع عيون الناس 
وتمطر الذكرى على الخيال تفاصيل 
( ييجي الشتا امتى )
واحد تركنا وغاب 
من فتحة السرداب لغياهب الدنيا 
ويزيد لقانا فرص ف مواكب الصدفه 
ييجي الشتا 
وتتفتح سينما البشر علي وسعها
كواليس حاجات بنحبها
الصيف وجع 
الصيف مبالغة ف اختبار النور 
اما الشتا طيب 
عجوز بيضحك للعيال بهدوء
بالطو بيقابل جونيلا ف شارع المطره 
انا ف انتظار الشتا 
بكل شيء فيا 
بقصيده وكوفيه 
باغاني شتويه
وبسهره صباحي 
خد الرصيف ماتبسش من فترة 
كل الحاجات فاتره 
كل الحاجات بلا طعم 
والله ياحبيبتي 
اقسم بربك وربي ورب علاقتنا
اني اشتريت بيتنا 
ف خيالي من مدة 
وإني برغم الفراق 
بكلم الاشياء عن ضحكتك ليّا
أقسم بمن لمّنا ، من جمّعك بيّا
إن اللي بينّا ده حيّ
والليل وأنا معاكي
هو النهار والضيّ
وإني نويت اعتذر أول شتانا الجيّ
إمتى الشتا ييجي ؟ 

https://m.facebook.com/kemiakarim?refid=7&ref=m_notif&notif_t=like

تحت تأثير المخدر | عمرو حسن

زي أي ترابيزة قمار بتحترم نفسها 
ييجي إعلان التبرع بعد الفيلا بدقيقه 
دي الحقيقه 
وانت باصص ع الحاجات بعنيك 
والزوم مبين جودة الصورة وفاضح ما بدا منها
هو ده تمن الكواليتي 
الفرق بينك وبين الفطرة عمال يتسع
قاعد بتنسى حاجات مهمه بغيرها يومياً 
ويومياً تعلق جسمك الهمدان على الشماعه وقت النوم 
لا النوم حقيقي ولا الصحيان 
فوار وماتعلمش حاجه من الزمن 
ولا زال بيخدم فكرة الفوران 
الارض ثبتت 
واحنا بنحافظ على الدوران
شفت الكوميديا 
تدفع فاتورة حزنك المحمول 
وتضيع الوقت اللي فيه على سرد قيمة الزهد 
وكتابة نصايح للبشر على اعتبارك حي
ولا زلت رايح جي 
عيّان بضيق التنفس وبتبيع الهوا للناس 
منظومة مكتملة 
دلوقتي بستوعب معنى الجريمة الكامله 
وافهم يقين الشعوب وهي بتحارب وف ايدها مُنتج صنّعه القاتل 
احنا صدّرنا الهباء الخام وجالنا ف اعلانات
وبقينا من ضمن الحاجات 
من ضمن اسعار الهدوم والأكل والمعلومه 
الناس الغنية بتحصّل زكاه من خلق محرومة 
والقربه مخرومة 
الرحمة نسبية حسب من شاف 
والحزن فرحه عند ناس غيرك 
ارضي ضميرك بدقيقه م التليفون لمرضى القلب 
واهرس بايدك قلب ناس منك 
دلوقتي ممكن ف لحظة تكون نبي مُتبّع 
وتبيع براحتك والجميع شاري 
الكدب يتصدق واجباري 
والمنبوذين ف الارض هما الطيبين 
الجو متلوث من الكدب المشاع والنفس أمّاره 
عادي بقا
حط الثقة كلها ف مشروب وغنوة وكلب 
واستنى حاجه تفوّق العالم 

شكراً بصدق لكل واحد شك 
شكراً لعمال النضافه بيمسحوا الأيام ببهجه وبانتظام 
شكراً لركاب الترام وبياعين الورد
لسميعة الموسيقى مش لشايفينها 
شكراً لبلكونة تساع اتنين وشاي مظبوط 
كلمة صباح الخير مساء الخير 
لاتنين حبايب مغرمين صيّع 
شكراً لمن داوم على السينما 
لصوت الضحك ريحة الأكل 
للقهاوي ام الكراسي الخشب 
للجرايد 
للقصايد 
للكتب 
لكل حد بيمحي شيء م المهزلة اللي اسمها التجديد 
لايد بتبني جدار ف بيت التجربة 
وبتهد الكواليتي

https://m.facebook.com/kemiakarim?refid=7&ref=m_notif&notif_t=like

المول اللي اسمه الدنيا | عمرو حسن



https://m.facebook.com/kemiakarim?refid=7&ref=m_notif&notif_t=like

شُفتي يامّا | عمرو حسن

بالنسبة لواحد زيه اتوفّى اتناشر مرة بأساليب مختلفة 
واترمى ف الأوضه لحد ما ضاقت أوضته عليه 
بقى صعب يواجه أي مشاكل من نوعية امتى وليه 
بقى كل مشاكله تخص المزيكا 
مواعيد السينما وطعم الشاي ، درجات الطقس ونوع الأكل وتمن الوحده 
والبُعد لاخر بُعد متاح 
انما موضوع تتعب علشان ترتاح 
مابقاش له معنى مع الصدمات 
فلسفة فارغة 
وكإنه حوار بين واحد وصديقه اللي ماجاش 
مسألة الموت أملاً ف حاجات تتعاش بتخلي الواحد يضحك على نفسه

بيقول : 
" يومياً باطلب قهوة زيادة عشان البنت اللي انا ماعرفش مكانها 
بافتكر الفايت وبافكّر كان مين ساب مين " 
يتأمل ناس بقوا بني أزمات مش بني ادمين 
يتذكّر نصه اللي اتسحّب منه 
وازاي بقا واحد بيعيط بس ف مكانين 
ويقول بحنان معجون بحنين :
" واحشاني حبيبتي ومش هانكر ، وواحشني كلامي معاها بجد ، بقى مرعب انك تتعلق وتعلق مفاتيحك مع حد ، تتمشى مكان ما انتوا مشيتوا ، تتذكّر ساعة مابكيتوا ، وتخش السينما وتنسى فتحجز تذكرتين ، الكون بقا شيء مضروب ف اتنين "
يتنهد ويبصلى فجأة ويكمل بهدوء شخص حزين : 
" للدرجة اللي تخليك وانت بتشرب سكر معلقة واحدة 
اول هي ماتيجي ف خاطرك تتناسى وتشرب معلقتين ! "

كان طقس بيشبه هبه طوجي ف تراك " لابداية ولانهاية "
والدنيا فلاش باك التفاصيل 
نسيت سجايرها ف يوم عنده وهو مبطّل من ست سنين 
لو كان ممكن بايديه مثلاً انه يبطلها مع التدخين 
كان ممكن جداً يتحسن 
بس الادمان درجات ياما 
أعلاهم إدمان الغايبين 
بيقول والخمره ف ايده بتطوّح : 
بقى فين أيامنا وليالينا 
حكاوينا وشوقنا وغناوينا 
كان لينا ايدين بتشبّك قدام الأيام 
بقت الأيام بتشبّك بُعد ف ايادينا
ويحط الكاس على طرف البار 
ويزيح بايديه كل الموجود 
" ادي اللي كسبته معاك ياحليم ، مفقودٌ مفقودٌ مفقود " 
بعدها بينام زي ماهو 
ودموعه تسيل منه لجوه 
فتغرّق روحه عياط مدفون 
مش كل جراح شرطها ف جروح 
ولا كل البكا تلزمله عيون 

شُفت يا صاحبي 
الورد اللي انت مشيت تلاتين كيلو علشان تعرف تتأسف بيه 
امبارح شُفته ف مدخل بيت قاعد خايف 
اترمي بايدين ناعمه وبارده 
الورد اللي انت فضلت تكوّن فيه وردة بوردة 
اتوفى الصبح من الإهمال 
شُفت ياصاحبي 
وفضلت احرّك فيه علشان يتهز ويرجع لحياته 
انما كان قرر يتحول مزيكا ماتسمعش نصايح 
الحب ازاي كله فضايح
وازاي الجاي أصبح رايح 
نفس الشخصين بقوا أي اتنين غير نفس اللي زمان اتقابلوا 
هي ف آخر العالم يمكن 
يمكن دلوقتي بتتعرف على شخص جديد 
ف مكان بيقل رومانسيه عن أول مطرح يجمعهم 
يمكن بتحط ف ماكياجها علشان سهره 
او نايمه ومش حاسه بحاجه 
يمكن ناسية ومش محتاجه بحد يفكرها بعهد قديم 
او يمكن زيه ف طرف البار بتعيط على حس حليم 

ادخل بيته 
ابيض واسود من بيت ألوان أيام هي ماكانت ساكناه 
كان بيها بيقعد مع نفسه كان زي لوحده وهي معاه 
يادي المعاناه 
الكل اتورط كده وياه 
البيت اللبس الطفايه ، الشجر الميت ف المأساه
الأكل هدومه القصافه ، الفازة البارفان اللي معاه 
بقا كل جماد له روح وحياه 
الليلة 
لقيته بيتمشى ف شارع كان ليهم فيه قصه 
لحيته أطول من خوفي عليه 
كان ماشي بيتطوح وايديه فيها سجاره بعد مابطلها لست سنين 
دخل المطعم قلقوا القاعدين 
قاله الجرسون : 
كل ده محجوز 
وقبل ماتنزل منه دموعه 
مال على رجليه وبرق للنور 
بقا ميّت بعد ماكان مكسور 
ادي الفنان 
وادي الجمهور 
ادي اللي ماجاش ف خيالها اهو كان 
قتلت انسان 
كسرته بالبُعد وبالخذلان 
واتكاترت على نفسه همومه 
ماقدرش يكمل بقا يومه ريّح وارتاح 
ادي المايسترو 
بيموت ف مكان فيه مزيكته والناس سمعاها ومش سامعاه
فيه يوم هتخشوا عليا البيت 
تلاقوني مشيت 
من غير اسباب ولا شرح عبيط 
قالي وانا نسيت 
واديني باقول 
احترموا المتعوّر من دول 
حاوطوا المهموم قبل فراقه 
ان كان ساكت يبقى لأسباب
اوعوا تشيلوا ايديكم م الباب 
املوا حياته بحب وأحباب 
قبل ما يدبل قدام عينكم 
وان شوفتوا حبيبته ف يوم بينكم 
خلوها تكون عارفه مقامه 
وانها عدت من قدامه وخلته مقتول بغياب أعمى 
ملعونه ايدين مجرمة ناعمه 
مادتش الفرصه لحد يعيش 
مع انه اتوفى قصاد منها اتناشر مرة 
واترمى ف الأوضه لحد ماضاقت روحه عليه

https://m.facebook.com/kemiakarim?refid=7&ref=m_notif&notif_t=like

المايسترو | عمرو حسن

( كل الطرق بتوّدي على روما ،، مع ذلك بامشي )
،
تعرفي ياخلود 
ونوفمبر واقف ع الأبواب 
والواحد بيدوّر على ذنب مناسب 
قبل الشتوية ماتعمل ف القلب سحابه 
والواحد بيقسّم نفسه بما يرضي الله ع الخوف واللمة الكدابه
وبيدفع فواتير الأيام اللي ماعشهاش 
بقى عندي يقين ان اللي بيهرب طول عمره بحاجه عملها
بيعيش طول عمره يكفّر ف حاجات معملهاش 
وانا عندك اهو 
انسان مخدوع 
بيبص على الحواديت من خُرم الباب 
وبيمشي برجله تجاه الحزن المجاني 
كل ما يخرج من جرح قديم / يدخل تاني
تعرفي ياخلود 
من سبعه نوفمبر الفين واربعتاشر 
وانا بلعب مع اطفال لسه ماحصلوش 
وبنام على كتف ما بلمسهوش 
من يوم سبعه نوفمبر 
وانا باخرِج فيلم بدون بطلة
وبوارب بيت البيت علشان 
يدخل ابويا واحكيله الحاصل من يومها
انما ياخلود 
وكأن رصاصة من الأيام الفايته 
عدت جنبي ودخلت ف الوقت 
لا انا عارف احدد مصدرها 
ولا حد مصدق احساسي 

أيام بتمر 
شبه الميّه ف ايد الأحداث 
وانا مش أكتر من مانيكان ف الفيلم الهزلي اللي اسمه الناس 
زي الساذج
باتأكد من قفل الترباس والباب مفتوح 
زي المصدوم بيصُب الشاي على كف إيديه 
وبيشرب كوبايته الفاضيه
جرى ايه ياخلود 
هو انا كل ما ابطّل اعيّط ،، اضحك بدموع ؟
 ايه يانوفمبر !  انا كل ما اقولك على حاجة يطلع ( خالد حماد ) عارف ؟
آدي المزيكا اللي بسببك خرجت ع الناس سرب مواجع
الليل واجع 
والذكرى كمنجه مابتسمّيش 
انما تعرف 
العين اللي ماتبكيش بالليل كافرة 
والرجل اللي ماتمشيش للشوق أولى ماتمشيش

فكرت قُلت
 ( سآوي إلي جبلٍ يعصمنى من الحزن )
بس الطوفان لم البكا من كل زوج اتنين
ادي نوفمبر 
احساس بالدفا بيعاشر أيامه الباردة 
 وعنيكي اللحن اللي بليغ حمدي خبّاه م الناس واداه لوردة
وحدهم الناس الشتويين 
هما الفاهمين أنا قاصد ايه
اسألوا شبابيك ورا منها النور 
ومشاعر عايشة ف ضهر السور 
مناديل مبلولة غياب وعتاب 
عشرات الفناجين اللي اتقلبوا لأصحاب 
ملعون اللي اتسحّب من غير مايقول  
 ولحد الان بصمة ايده معلّمه ع الباب 
وآهين يا الليل 
وآهين 
هتاخدنا لفين ؟ 
مرة نوفمبر / مر نوفمبر ، التاء مربوطة ف رقبة مين ؟؟
وكإن رسايل البحر السر 
اللي داوود كان حابسه بقاله سنين 
يحيي ماقررش يعيش نورا
لكن طلعتله من الأيام زي العفريت 
عدت قدامه بشمسية ف مطرة لياليه 
اكتشفت سره اللي مخبيه 
فتحت روحه ف حضنها بالليل 
مابقاش بيتهته ويّاها 
وانا يحيي اللي بينسى وجوده 
انما مش عارف ينساها 

انا نفسي اكون مطرح آمن لشعوب شبهي 
بترد الباب من غير ماتقول 
( كان فيه واحد مابقاش موجود ) 
انا عندي أموت ولا إني اشوف النظرة اللي ف عينك ياخلود 
وانتي بتتأملى وشك ف الشاي 
وتشوفي حضارتك بتعيّط على ايد محتل
نبهتك مرة زمان منك
قُلت ان مافيش علاقات بتدوم بين جرح وخلّ
انما ده نوفمبر ياحبيبتي 
الشمسيّات عمرها ماهتقدر ع المطرة لو جت من تحت 
وانا شكلي سرحت 
فكّرت البوح هيريحني 
واديني دوشتك بسكاتي
فرجتك على فيلم حياتي ف قعدة ساعتين 
النور كلها حبه ويطلع 
وانا وانتي هنصبح عكس السير
كل نوفمبر واحنا غلابة 
بنحّن ونتعكز ع الغير 
بنشوف القشه تنجيّ غريق 
وبنمشي ف كل مكان وطريق 
ونقول بالليل " تصبح على خير " 
كل نوفمبر وانا وانتي بنؤمن بالأبراج 
وبنتشائم مع كل تلات 
وبنتشارك ف الأغنيات
نعمل قدام الساقية نايات 
ونبص لبعض ومانغنيش 
بكره نوفمبر ييجي حنيّن 
ونكون مع ناس تانية ماتأذيش
يمكن في حاجات عايشة وبتموت 
ننده لحاجات بتموت ف تعيش 
،،
يمكن ياخلود

https://m.facebook.com/kemiakarim?refid=7&ref=m_notif&notif_t=like

مرة واحد نوفمبر | عمرو حسن

من يومين شُفتك معاه
كنتي ضهرك ليا وعنيكي ف عينيه
طفل مش مني ف ايديكي 
دبلة مش ليا ف ايديه
كنتي ثابته وبنت نفسك 
انكسر ضلي ساعتها والبشر مرت عليها 
كان بوّدي اعتذرلك 
حتى اقولك : عامله ايه 
بس سيّب قلبي دقّة 
لما عقلي قاللي لأه 
دي النهاية المستحقة 
لحد ساب وماقالش ليه 

وافتكرتك 
وانتي جنبي 
كنتي بنت أصول وصالحة 
عاملة مع روحك مصالحة 
كنت بستغرب مشاعرك 
ف الفرح بلاقيكي وردة 
أم معجونة بطفولة 
ف الألم بلاقيكي ثابتة 
تسندي ضهري برجولة 
تلحقيني كل مرة 
كل مرة بتبقي سابقه خطوة عن كل اللي جنبي 
كنتي تتحبي الحقيقه 
بس انا كنت اعمى فعلاً
كنت باهرب بالطريقة 
مرة خايف مرة اسف 
مرة ليّن مرة ناشف 
مرة مش قادر أكمل 
مرة مش عارف أجمّل
عشتي شايلة وعشت احمّل 
لما فاض الكيل ف روحك 
للأسف كنتيلي دنيا 
وكنت أكبر ما ف جروحك 
مين يجيب اللوم عليكي وانتي كل مافيكي طيّب 
ده انتي حتى الاه ماكنتيش بتقوليها 
كل حاجه عشاني كنتي بتعمليها 
لسه فاكر 
وانتي نازلة ف وقت متأخر لجل تجيبيلي الدوا 
واما اقولك : دول شوية برد يعني ، كحه من لسعة هوا 
تعمليلي أم بتزعّق ف عيل 
( قولتلك تلبس كفاية ، برد طوبة مش قليّل ) 
واما ابوس ايدك تقولي 
طفل مزعج بس طيب 
كان عليكي نشان براءه عمره مرة ما كان يخيّب 
كنت ماسك ايد جنينة 
عيّلة ف تانية ابتدائي 
مش صبيّه مخلصة جامعة وقوية وليها شخصية وكيان 
النهارده انا كنت نقطة 
واقفة بين أصبح وكان 
واما خفت ل حد ياخد باله مني ف المكان 
خدت بعضي ورُحت ماشي 
زي شجرة بغير فروعها 
كان ف ضهري عمري فات 
بنت ولا كل البنات
كان تاريخ كامل ورايا 
ضحك واغاني وسلام 
صمت ومعاني وكلام 
كوكب الاحلام بحاله كان ورايا 
كنتي واقفه هناك معاه 
وكنت باتمشّى معايا
كان ضروري تشوفي حالك 
عين بسيطة ومرتحالك 
أب للحزن اللي جالك
لما سبتك واقفة وحدك 
وكان طبيعي اني اسقط 
ف اللي انا جرّبته بعدك 
فين هلاقي حد زيك 
زّيُه زيِّك
لونه لونك 
انتي ابسط من معاشرة شخص كان عايش يخونك 
يا بمشاعره 
يا بهروبه 
يا بمحاسنك 
يا بعيوبه
ان مكنتيش انتي فرحانة وسعيدة مين يكون !
مين تكون الام للطفل الجميل ده 
مين تكون ضفايرها دلتا وحضنها صافي وحنون

الحقيقة
كل شيء كان شيء طبيعي 
زي ما الخواجات يقولوا : 
 " Fair enough "
شخص فرّط 
لف كل الكون ده لف 
وواحدة زيك ليها أسرة 
مش هاخلصها بحسرة
أو هاقول : لو كان ،، هايبقى
بس هادعيلك كأم وطفلة سابقة
تيجي بنت تشيل ملامحك
طير مايلقطش الا قمحك
مطرة صافيه ماتنتهيش
 
ربنا يفكرني بيكي 
وتفضلي ماتفتكرينيش

https://m.facebook.com/kemiakarim?refid=7&ref=m_notif&notif_t=like

ذكري بتاريخ انهارده | عمرو حسن

صديقي / الحزن 
بعد التحية والسلام 
شكراً جزيلاً ع الأصول والجدعنة 
على انك صبرت معايا أكتر من سنة 
كانوا الجميع بيناموا واحنا سهرانين 
وعملت مني بصنعتك كائن حزين 
لاسألتني عن سني كام 
ولاقولتلي بتحب ايه 
دخلت ورميت السلام 
وصاحبتني ماعرفش ليه 
وعشان كده انا باشكُرك 
وبابلغك .. اني بعتت لضحكتي ( طلب صداقة )
ونويت أكمِّل ف العلاقة 
وان احنا جايز برضه نتقابل قريب 
وانا عارف انك حد طيب 
بس لو ممكن غلاسة من صديقك 
لو مشيت مرة ف طريقك 
شُفتني موجوع باعاني 
سيبني احل مشاكلي أحسن 
وانت صاحب حد تاني

https://m.facebook.com/kemiakarim?refid=7&ref=m_notif&notif_t=like

صديقي الحزن | عمرو حسن

تصبحي على خير
على عالم أجمل من غيري وأطيب بكتير
تصبحي على نفسك مرضيه 
متفائلة وطيبه وقويه وكسرك مجبور 
تصبحي من عالم فيه عتمه لعالم فيه نور 
انا اسف على اخر مشهد 
ومكانش ف بالي انه هيحصل كل ده بيننا 
وانت ف عيني الزاد والزواد وانتي المنّه 
وانتي الفرصه اللي أخدها شيطان يدخل جنه 
أنا مش زعلان منك بالعكس 
انا عارف وجعك ومقدّر 
ومسامحك على كل التجريح 
عارفك انك عود فل رقيق ماعرفش يقاوم سطوة ريح 
برضه اللي حصلك مش عادي 
واللي قابلتيه ما يفوتش بدون مايسيب أثره 
فرعين ماشيين ف طريق غير بعض 
أحسن من فرعين اتكسروا 
احنا الاتنين كنا ضحايا 
لظروف بتدور فينا رحايا 
من غيرك لكن جوايا 
احسن من جنبي وبرّايا 
وكلام الشعر ان كان موزون 
عمره مابيهوّن ويطيّب 
بس انا مش عندي سلاح غيره 
اتصرف يعني ازاي طيب
فيه حاجات مايحسش بوجعها 
الا اللي عايشها وجرّبها 
والست ان بانت كله تمام 
فبيبقي على حساب أعصابها 
فيه حاجات بتموّت أقربها 
سكاكين الليل لما تواجهك 
وتسيبك ليك ف غابات تفكير 
تصبحي على خير

https://m.facebook.com/kemiakarim?refid=7&ref=m_notif&notif_t=like

تصبحي علي خير | عمرو حسن

أنا آسف
وجه الوقت اللي أقولهالك
رماني زماني قدامك وأنا وزماني مش أصحاب
لقيتك فجأة قدامي ماصدقتش
وشوفت البُعد ف التفاصيل مادققتش
مشيت سايب إيديا وبس
وهو لو غريب زيي لقاله مكان وبيت وأمان
هيكره يعني ويقول لأ ؟!
في عز ما كنت متخانق مع العالم
ورابط حُزني علي خِصري كإنه صديق
ظهرتي انتي
وأنا عهدي مع الدنيا ماشوفتش فيها أمثالِك
وأنا كنت في ساعتها وحيد 
وخارج من غرام هالك
اسيبِك يعني وامشي إزاي ؟
ثقافة طفل بيقابل حنان أمه ما بعد غياب
بيتشعبط بدون أسباب
رميت البذرة وأنا طاهر طرحتي انتي
شجر من طيبة ومودة
عرفتك فاق في صدري كلام بقاله سنين
وجيت رسمه بدوم ألوان بتطلب منِك التلوين
لقيت الدنيا مش حباني أكون مرتاح
طلعلي جناح أثر ضحكة ضحكتيها
ومات أول ما شوفتيني بتاريخي البور
لأول مرة شخص كفيف يواجه نور
لأول مرة شخص قعيد يقوم علي رجله ويجرب
بعدت بشكل بيقرّب
وخانّي الظن في الأشياء
حسبت إن الميزان معدول
وتطرح إيه سحابة خوف
سوي شلال مطر ناشف ! 
أنا آسف
بكل ما فـ الأسف منّي
وكل ما فـ الغياب منِّك
يا صافية وناعمة وكإنِّك
مناقشة ما بين جيتار وكمان 
أنا ناي احتواه الحُزن من سنوات
في ضهري حِفنة من تواريخ ورسم بنات
وقلبي منتهي الحكايات
وحبيتِك بدون ما افهم
بدون ما أسأل ولا استغرب
بكل براءة وكإني رجعت جديد
كإني بَعيد من الأول كتابة سطر ف كتابي
يا وقفة بخفة علي بابي وقوف فراشات علي صبّار
أنا استغفرت بوجودِك وجودك توبة واستغفار
بقيت وياكي مش مجرم ولا قاتل ولا لص اشتراه ظنُّه
بقيت وياكي بالفطرة عيال بيحبوا ويغنوا
اشوفِك اكتشف إني لازلت باشوف
واحب الدنيا وأتمني أكون أحسن
رميت قدامك الذنب اللي أنا شايلُه
مُحارب ملّ م الحروبات وجاي عليكي بعمايلُه
وعهد الله ما حسيت بالأمان أبداً سوي فيكي
ولا باعرف من الدوران سوي الدوران في سواقيكي
ولا حسيت بنقص الشيء سوي لما اكتمل بيكي
لسوء الحظ ضميتِك وأنا ف وسطي فُراق ناسف
أنا آسف
لأني مُنتج استعمال ومُستهلك
بلادي فيه بشر غيرِك سكن فيها بقاله زمان
وأول كل حاجة خلاص
رميتها في حضن مش ليّا
وأنا والله كنت خلاص
زهدت الضوء وجيت للضِلّ
مايشغلنيش كلام الناس ولا اللمة
ولا الزحمة ف أفكارهم
ولا نهارهم
ولا يشغلني مين قال ايه 
مايشغلنيش سواكي انتي
يا أمي في محتوي بنتي 
وصاحبي في كون ماليش فيه صحاب 
ومش هحلف ولا هاكتب ولا هاوصف
ولا هبخل ولا هسرف
دليلي بإني حبيتك بإني بجد حبيتك 
يبان ع الوش وع الرعشة ف كف الإيد 
يبان ف عنيكي لو طلّت واحس بـ عيد
يبان ع رسمة التجاعيد إذا شوفتيني وضحكتي 
وسبحان اللي خلقك حين ..
يخلّي وغد من صنفي يسيل كالنهر ف ايديكي
أنا آسف برغم إن الأسف عاجز 
ودلوقتي ف ميت حاجز مابينك يعني ومابيني 
ف يوم هلاقيكي بتعدّي ف شارع تلمحك عيني 
ايديكي ف ايد ما تعرفنيش 
وتثبت عدسة الكاميرا علينا وبس 
تبصيلي علي مسرح ف وضع بلاك 
علينا بقعتين من نور 
وفجأة ف غفلة م الجمهور 
ابوس ايدك تسامحيني 
وتدعيلي 
وانول فرصة اشوف عينك 
لكن فجأة
بيصحي ما بيني وما بينك بشر وزحام 
والاحظ حكمة المخرج علي الأيام 
تدور العدسة ف الشارع ويمشي كل شيء فجأة
أنزّل دمعة جوايا
تغرّق وحدها الشارع
واشوف المسرحية بتطوي ستايرها
هنا فيه شخص ف الشارع بيمشي معاها من غيرها
وطن ناقص بلا سُكان
ألم سرّي ف كل مكان
لا نافع ييجي تاني زمان
ولا نافع أقول آسف

https://m.facebook.com/kemiakarim?refid=7&ref=m_notif&notif_t=like

مأساة الكفيف | عمرو حسن

يظهر غيابك بقّع الأيام 
من يوم ما مات الحضن ريحه على الهدوم
وانا باسكنك أوطان من الذكرى
وكإن إيدي ف بنطلوني الجينز مش مهتم
زي الموسيقى بامُر لحن ودم على نوتة فاضية اسمها الدنيا
بابكي بيوت فيها الأمل مهجور
كان ايه لزومه بس تبني السور 
ما دُمنا لسه بالحنين برّاه ؟
وايه يفيد الصوت ف ودن من الجبل 
الا المسافة بين خروجه وبين صداه
يا هل ترى يعرف فؤاد حداد 
" ليه كل مانقول آه الناس تقول الله "

دلوقتي ممكن أقولكم بالظبط 
فنجاني ليه دايماً بإيد واحدة
وليه السماعات بيبوظلها ناحية
ونعيش بنسمع من ودان واحدة 
أُكَر الباب بإيد واحدة 
رؤؤس الشماعات واحدة 
وليه القناص عشان ينجح 
يشوف هدفه بعين واحدة 
كإن ف كل شيء غايب 
أمل دايب وطيف واحدة 

،،،، 

أنا العابر على الشارع وحيد المشي
باربي ف قلبي كل القطن ف الرحلة
واسمّي الشيء بعكس الشيء عشان يحلى 
لوحدي كل شيء أوضح 
لا هاتهجّى الحاجات اتنين واكون مضطر اغّيرهم مع الأوقات 
ولا هتهزني الأشياء ولا التواريخ ولا البدايات 
 

 أنا التانيين 
أنا نفسي وأنا الباصين عليا من شكوك ويقين 
أنا المعني بأحزاني وانا وجهة نظر فيا ورأي العالم الباقيين 
كده أجمل 
أواجه ما فضل ليا وفاض ليا بضمير مُفرد 
أقود مجموعة الفراشات اللي الوردة
أو اقتل من بناية بعيدة شخص سئيل
اخلي الكنبة مرتع للكلاب والتبغ
واصاحب بالطو ف التلاتين من الوحده 

قال لي صديق :
( لو ضاقت المواعيد اصطاد مكان بإزاز على الشارع
واسمع أغاني قد ماتقدر)
لكن صديقي ماقالش شيء مقنع بخصوص خروج الأغنيات م الجلد 
ازاي نحرر نفسنا م الساكنين ف الجرح 
ونسيب مكان صالح لزرع العادي ف المدهش 
ماتسمعش النصايح م اللي مش واقف معاك ف الحرب
لا الوضع هو ولا الظروف متشابهات
لكن على الأرجح صدقت ظنه عن مكان بإزاز بيطل ع الشارع 
واديني باكتب منه هذا النص 

يظهر غيابك بقّع الأيام 
بارجع ورجلي بتمشي على قدام 
ف البعد يبدو الشيء كما هو 
بيبان سليم مع ان روحه رخام 
ملايين بيمشوا بذكرى ف الطرقات
مساكين بنمسح دمعة الخطوات 
وبندخل المعركة بخيال نشط ساكن 
الأماكن كلها مشتاقة لك 
بقينا أسرى للأغاني وللأماكن 
أصبحنا زي الفصله بين يمكن ولكن 
وبقينا جرحى من حروب ماقامتش 
رمينا رسايلنا ف ازازة جوه البحر
لكنها ثبتت وجع ، ما عامتش
لا أرض توصل لها ولا موج يوصّلها
قاعدين على السكك الحديد من مدة منتظرين 
ومافيش حبيب ف القطر جي من الغياب
وزي ناس بتشوف دمانا تظنها عناب 
فيه ناس تشوف الانتظار ضل اكتئاب 
حربك لوحدك 
اعرف صحابك مهما كانوا قليلين وضعاف
وامشي بخفة ف وقت من ألغام 
واما غيابها يبقّع الأيام 
غني معايا الغنوة دي واضحك بشكلٍ عام : 

" يا العالم السخيف والأيام اللذيذة
يا الواقع المخيف والأشياء العزيزة 
يا الدافع الشريف والثابت ف الغريزة 
يا المشي إلي الخريف بالعلاقات الوجيزة 
الليل رفة بريزة 
والصبح رهان جديد
الفيلم ده مش سعيد 
ومالوش نهايات لطيفه 
دلوقتي على الجريد 
وشوية على القطيفة 
ضم الذكرى اللطيفه واتصور ذكرى بيها 
فيه حاجات بتنام فاكرها وحاجات بتقوم ناسيها 
وحاجات ف شروقها سهلة ييجي غروبها تقاسيها 
أول سلامات بتبهر وبتبهت من تاليها
فيه واحدة تنام ف حضنك 
ف تبيع طول ما انت ليها 
وفيه واحدة تمُر جنبك 
فتنسيك من تليها "

غنّي معايا الغنوة دي
واقطع خيوط الماريونيت من السما والظن 
وابقى ابتسم 
لحظة ما تكتشف ان همك كان سحابة صيف 
وان الأغاني بتتولد تاني
أجمل وأقرب للي يشبه لك 
وان كان غيابها بقّع الأيام 
أو مر طيفها ف الشوارع والزحام 
درّب بكاك يملى المدى مطره 
زي الموسيقى التصويرية ف فيلم مش فاكره
خلفية سابقة للحن تاني جديد
صوت جي من لاشيء تجاه لاشيء
وجع بعيد بيمس جرح بعيد 
انت الوحيد ف المعركة بطولك
انت الوحيد
انت الوحيد
انت الوحيد


https://m.facebook.com/kemiakarim?refid=7&ref=m_notif&notif_t=like

الموسيقي التصويرية | عمرو حسن

( ميم )
،
المرة دي بالذات 
حاسس كإني بتولد تاني 
بلمس بإيدي أول الآشياء 
باتعلم الأسماء 
بانسى اللي شوفته ف الزمان الصعب 
ضيعت عمري قبل ما اقابلك 
بصي ف عنيا وانتي هتحسي أنا شفت ايه ف الدنيا دي قبلك 
أنا كنت مش بلاقيكي
أنا كنت بهربلك
تلاتين سنة عطشان وماليش سبيل للميّ
شباك قديم مقفول ماصاحبش خيط الضيّ
أنا كنت رايح فين بدون كفك 
وكنت من غيرك مستني إيه م الجيّ
عجزت بدري يا حلوة وقابلتك 
لو ليكي رغبة تحبي شاب عجوز 
محجوز ف عمره اللي انسرق منه
مخنوق بحبل العالم السُري 
ومخبي وحده العالم السري
 ومسمّي قلقه المنطقة الدافية 
كان ماشي يضحك بس بالعافيه 
أول ما بنتي يابنتي فتشتيه 
خرجتى منه ضحكته الصافيه
وكإنه نايم زي مصري قديم ف مقابلة السياح 
طائر بقاله كام سنة ع الأرض وعنيه بتدمع عند كل جناح 
قوليلي انك جاية مش ماشيه 
أو ماشية جنبي عشان اكون مرتاح 
 أنا كل أملي ف الحياة انتي 
اتنين ف واحد يعملوا المشهد 
أشهد بإني كنت من غيرك 
مفتاح يتيم الباب 
بيتمسك ساعة دخول الوقت وبعدها يتساب 
واحد حضوره غياب 
ودنيته تكرار 
عابر مابين الماء وبين النار 
طيب كإنه أول الأسرار 
وحزين كإنه آله بلا نوتة 
أمله يشوفك بس مبسوطة 
وعنيكي ضحكة شباكين للنور 
أمله ف كمان يعرف يقول جملة لناي مكسور 
أنا بين هروبي وبين علّو السور 
أملى ف انك تبقي علشاني 
الله 
حاسس كإني
باتولد تاني

كل الل جالك من كلام الناس 
اني بلا احساس 
واني جناين من بنات سابقه 
واني سرقت الأمنيات سرقه 
أو اني مجرم حرب أو هارب
ضميري منزوع الظهور ووقتي محفوف بالتجارب 
كانت حقيقة وصدقي قولهم 
والتمسي عذر لطفل بيحارب 
واحد نزف جرحه وماحدش حس بيه 
من غير ما حد يحط نفسه مكاني ويجرّب
وانا كلي متباع ايه اللي ممكن اشتريه 
لا هسوق مبرر عن جرايم حزن 
ولا اقول ملخص ع اللي عايش فيه 
نفسه اللي شافك وابتسم عيل 
كان شخص تاني قبل ماتقابليه 
سامحيني حتى ع اللي كان قبلك 
اسف لإني مشيت مادورتش
اخترت وجعي لما ما اختارتش
واديني جيتلك ايدي ممدوده
وحياة مشيئة ربنا فيكي
ماترجعيش الايد دي مردوده 
ده انا كل صبري ف الحياة دلوقت
ان انتي موجودة 
وكل طلبي ف الحياه تراضيني ع الدنيا 
أنا الصايع عديم الاهتمام بالحب
خرجتي مني حد ماعرفهوش 
وصحابي مش فاهمين ايه اللي غيرني
انا كنت عادي لا شاري ولا بايع 
واهو يعني لا اكسر حد ولا حد يكسرني
لولا شعاع الأم ف عيونك 
هو اللي فكرني
بصيت بعيني بصه على قدام 
شفتك ف بيتي بتفرشي الأحلام وترتبي التفاصيل 
بتسندي لو اميل وبتحضني لو امِّل
عواجيز معاً بيمروا تحت الشمس 
وبيمشوا ضله وضل
بيشاركوا بعض السينما والشارع
والأكل والحواديت
طلعت عيونك توأمين عفاريت 
خلوا المحارب يتقلب عصفور 
طلع الكلام ع الحب مش كدبة 
وطلعت ضلمة بتحتمي بالنور
أنا اهو باحبك باعترف وباقول 
وانا اهو باريدك واجي ف بريدك 
ادفع حياتي مهر وانا مبسوط 
يكفيني نظرة ولمسه من ايدك 
والشعر كله لا يكفي ولا يوصف 
وغنايا كله لا يوفي ولا ينصف
من حب يعمل فعل مش يحلف 
وانا أصلي راجل وانتي عارفاني
أنا مُت قبل ألف مرة بجد 
واديني جايلك اتولد تاني

https://m.facebook.com/kemiakarim?refid=7&ref=m_notif&notif_t=like

ميم | عمرو حسن

تقابليني ....
كإنك فيلم خمسيني 
كإنك وردة في البدلة بيرويها مطر عيني
كإنك أرض 
كإني ف حضرتك بابقى ( روائي لا يمَل السرد ) 
أميل لك بس مابملِّك 
اشيلِكْ عمري ما أشيل لِك 
واغازلك شعر واغزِل لك
ضفاير شكّي ويقيني   

تقابليني 
.......
واطُل ف عينك استشهد 
يامزيكا بتتنهد 
شموسك كيف بتتجدد وضلِّك طيف مغطّيني 
أراقبك لما بتشاوري ف وقت ماتطلبي حاجه 
وعارفك لما بتناوري عشان تلهيني عن حاجه
وامتى بتبقي محتاجه اكونلك حضن ان يلزم 
واقولك امتى تحديدا بإن غرامنا لن يُهزم 
وعارف امتى بتبُصي بعين من خوف 
وصوتك وانتي تعبانه وشايله الهم
يا اقرب من فصيلة الدم 
ماكونش ازاي بقا مهتم 
بواحدة رضاها يحييني ؟

 ،،،
تقابليني
واراقب شعرك المقصوص 
كإن الليل نقص ساعتين 
جميل والله ولايقلك 
وفاتح للخيال طريقين
وطول عمرك بتختاري الهدوم بمزاج 
وعارفة تنقّي برفانك كإنه انتي 
ياواخده العقل من ايده كإنه ابنك
باقولك ايه 
خرجتي منين على الواحد خروج زهرة
خروج مزيكا من ( راجح داوود) مثلاً
بكل مافيكي من ستات فاجئتيني 
فتحتي الحلم والتأويل وسيبتيني
مهرج والسما سيما 
وطايش والطريق مراجيح 
تقول امي :
بقالك فترة مش مظبوط
تبان قلقان لكن مبسوط
ومتوتر كده وخايف 
ومش فاهماك 
تعبت معاك
تكونش ياواد عشقت جديد ! 
تقول امي ف وصف العيد 
( ياريتك جيتنا من بدري ) 
واظن الوصف ده ينفع يكون عنك
( ياريتك جيتي من بدري ) وخدتي الروح وخدتيني 

تقابليني 
،،،،،
بدون اسباب 
زكاه عن ضحكتك مثلا
كفالة طفل نُصه يتيم 
هنتكلم عن الدنيا 
وعن حبي لشهر اتنين 
وممكن اقول اسامي صحابي بالترتيب
وتحكيلي عن القطة اللي ف عيونك 
ولون اوضتك 
هاقولك اني متورط بعصبيتي 
باحب احمد زكي جداً
موسيقى نهاية الكيت كات 
وممكن تحكي عن والدك 
وعن اخر خطوط الموضه ف العالم 
وعن حلمك تعيشي ف ارض محدوفة وبيت واسع
هنتكلم ف أي كلام 
وأي كلام ف ذاته كلام 
كلام تافه بدون ترتيب 
مسافه وقت تسمحلي اكون جنبك لاطول وقت 
- هتوحشني 
- وحشتي القلب من دلوقت
واحط ايديا علي قلبي واراقب مهرجان الصيف 
ابطل حب امتى وكيف
وحبك كيف ف شراييني ! 

،،،،،
تقابليني
عشان محتاج اقابلك موت 
فيه عندي حوالي ( ولا موضوع )  احب افتح كلام فيهم 
اصالح عمري ف وجودك
وانقّح نفسي م الأخطاء على حدودك
وعارف اني شيء بائس 
واني مصاب بمتلازمة ( وحشتيني ) 
وعارف برضه اني كسول 
بسيب كل الحاجات ع الأرض 
وريحتي كلها دخان
وعارف برضه اني كمان بشجع نادي مش حباه 
ياستي حياة ولازم نختلف فيها 
يا أجمل حاجه ف الدنيا ابتليت بيها 
واطيب ركن ف الاوضه اللي جوايا 
ف قلبي فيه كذا حكايه 
وحابب احكي ساعديني 
تقابليني !!

https://m.facebook.com/kemiakarim?refid=7&ref=m_notif&notif_t=like

تقابليني | عمرو حسن

والمطر اللي بينزل دلوقت 
مش شبه المطر اللي انا شُفته أول ما بدأت 
الشارع مش هو الشارع 
مش بس عشان طلعت عُمارات 
انما علشان ماتت حَضارات 
ماتت نظرات كانت عن حق 
ضاعت سلامات مخلوطه بأحلام ومحاولات 
والأمر الواقع بقى مش أكتر من اسمه 
الواحد بيعاين جسمه 
زي مابيفتّش محفظته 
بيدوّر على أجزاء منه ، فتحِت مواضيع
خبطت ف كراسي وف مشاعر وخريف وربيع 
وكإن الواحد بيسلِّم 
على شيء هيضيع قبل مابيضيع
--

القطر اللي بييجي برُكّاب 
مش زي القطر اللي بيمّشي محمِّل 
والناقص مضطر يكمل 

--
لم شفايفي من ع المجات واحسب 
عدد المرات اللي انا جرّبت حاجات فيها مع ناس مشيّت 
ارفع بصماتي من الأبواب وانت هتعرف 
ان انا ماتركتش باب إلا وجرّبت 
كل ما اقول قرّبت 
اتفرج على نفسي لوحدي
مزروع ف الأوضه اللي انا باقلع فيها همومي 
بتأمل ناس لابسه هدومي وعايشه مكاني
باتفرج على مشاريع أطفال
اتفق الشُركا يفضّوها
وبيوت كل ما ييجي العمال يبنوا حيطانها 
ييجوا ناس تانيين غير العُمال ويهدّوها 

--

مين المفروض دلوقتي يصبّر مين؟
الناس فاكره الطبطبه بالإيد 
واللي انا عاوزُه / ناقص ف السوق 
محتاج خمره تخلّيني أفوق
أو بِنج يحرّك أوجاعي
انما باجي ف أوقات وباقول مالهاش داعي 
الناس فيها اللي مكفّيها
مش هاتسوّل شلة أصحاب 
يطلبوا مشاريب وامشي آخرهم 
ولا ناوي أعكر صفو حاجات بحاجات غيرهم 
يكفيني أشيل بُرج إداري ، واغرس شجرة
ارفع عمدان من مطرحها ، وازرع أهلي 
اتبع خطوات ع السجادة وابني مكانها معارفي السابقين
مين المفروض دلوقتي يواسي ف مين

-- 

الناس ف الشارع ماشيه بناس مش حابّينهم 
عايشين ف أماكن مش مِنهُم 
واللي مصدّق ف الناس دلوقت 
بُكره يدينهُم 
انما بارجع أوقات وباقول : 
أنانيه ان انا افكّر بس ف نفسي 
لو كنت نجحت ف كل اللي انا دبّرتُه زمان 
كنت هاشرّد عشرين أسرة
هامنع رزق عن السينمات واكشاك الورد 
هامنع أطفال ييجوا العالم من باب غلطي 
واقطع بخيالي اللي انا ماملُكش سواه 
هافصل بين إيد واحد ماشي 
وبين الإيد اللي بتمشي معاه
وكإن المُخرِج مختارني أسلِّم لبديل
شغال عند الحظ مُجرَّد مندوب توصيل 
عقلي يقول لي : 
بإيديك قررت 
ومافيش حاجة اسمها مش عايز بعد امّا اخترتْ
اتفرج على فيلمك بحياد 
قلبي يقول لي :
لو كُنت ف يوم مازعلت هديت
لو كُنت ف يوم ما وقِفْت مشيت 
لو كنت نسيت 
كنت هاتبقى ف مطرح أحسن
بدل التواريخ ماتشيّد دنيا على كتافك 
ملعونه التواريخ اللي بتطلع على أكتافك 
لو كان فيهم واحد شافك زي ماتقصُد / مش زي ماقُلت
لو كان واحد فعلاً حسّك زي امّا بقيت / مش زي ماكُنت 
كان ممكن يبقى الفيلم جميل 
نهايات أسعد 
أعصاب أجمد 
وبيوت فيها ناس مش مهجورة
أحسن ما انت قُصاد الصورة 
بتبُص على الفيلم بحسره 
ولا منّك بتحقّق ايرادات 
ولا منك خارج بـ جوايز 

-- 

في الدنيا اللي بتحرِم محتاج 
وبتدّي لواحد مش عايز

https://m.facebook.com/kemiakarim?refid=7&ref=m_notif&notif_t=like

الفيلم اللي ماخدش جوايز | عمرو حسن

وف الغالب 
بُكا الرجالة مش بدموع 
بُكا الراجل / سكوتُه التامْ
وقد ماعاش من التفاصيل 
قد ما شاف من الأيام 
بيبقى سكوته مش عادي 
سكوت مرهون بصوت هادي وحزن قديم 
شرود عينه 
بيلغي سؤال اجابته ( مافيش ) 
وايه أصعب من الميّت إذا جرّب بموتُه يعيش 
أنا والله مش كارهك 
ومش ناوي أكرهك أبداً 
عقابي مش ف إني أكره / عقابي ف إني ماكرهكيش 
أشوفك زي كل الناس 
مجرد بنت بتعدّي التاريخ بسلام 
مطر تفاصيل بينزل ع الحنين الخام 
ف كل نهار أودّع حاجه من أثرك 
أشِّد إيديا من إيدك واضيّع صورتي ف عنيكي 
احس فضيلة النُقصان 
بنقص كبير ف قلبي اللي اكتمل بيكي 
ناسيكي لدرجة خضّاني 
لدرجة إني لو شُفتك ممكن أتعرف عليكي 
---

وسبحانه اللي بيغيّر قلوب الناس 
من اللهفة إلي العادي 
وم العادي إلي اللاشيء
مافيش قطرين بيتقابلوا ويمشوا ف درب 
وحاسس اننا ف سلام 
أشد ضراوة من ميت حرب
ساعات الصمت رد الفعل 
بيووجَع ضِعف ضِعف الضرب
زمان لو حد يحلفلي بإني ممكن أتغيّر 
وان القصه مابيننا هيبقى عُمرها قصّير
ماكُنتش حتى هاسمعله
غرامك ربنا جعله علاج النصل للعلّه 
و ( انتي ) تنفع استثناء 
بيغني عن انتظار ( إلا )
وأي حلول غير الفُرقة 
نهايه بطيئه ومًملّه 
أي رجوع من المبدأ هيبقى خطّيه وسذاجة 
نكرّر كل حاجة بحُزن 
ونصحى نلاقي ولا حاجة 
رأيتي العالم ابن حلال وانا اللي شيطان 
وشُفتي الدنيا اهي لفِّت 
وابن الحلال ماخلاش لابن الحرام حاجة 
-----
ماتعتذريش 
عشان طعم الأسف بايخ 
إذا بعد الدبايح مرّ 
رُباط ف بلوفر العِشره
مسكتيه من رقبته اتكرّ 
وحزنك بعد كسر قلوب / بُكاكِ على اللبن مسكوب
———- 
ماتعتذريش
 لإني بخير
باسمّي الانسحاب أعراض 
وافوت ع الذكرى مش مهتم 
ألم بكسرتي الأنقاض 
من الجرح اللي عمره ما لمّ
ياريت ترتاحي ف غيابي
وتلقي حد من توبك 
يكون حظك ومكتوبك 
ويصبح نُصك التاني 
لآخر مره باطلبها 
ياريت تنسيني علشاني 
وبزيادة وجع صابح 
وعين شارده ونور رايح 
وبزيادة حنين لأغاني وروايح 
لأول مره بتأمِّل مرور العُمر قدّامي 
نزول الميّه من كفّي 
ف بيكفّي 
أملنا ف بكره بقا لازم يكون أكبر 
مافيش ف القلب مطرح للبُكا تاني 
أنا وانتي بُعاد عن بعض 
مسافة ماتتمحيش بكلام 
مافيش غير كرسي واحد بس 
وقطر الدنيا مايسعناش 
وفيه مليون مكان تاني 
ومليون شخص ما يسيبناش 
ولسه ف كل يوم فيه صباح 
بدون كسره وخوف وجراح 
وزي ماجالي حلم وراح 
فيه حلم حقيقي لسه ماجاش 

https://m.facebook.com/kemiakarim?refid=7&ref=m_notif&notif_t=like

بطريقة الشخص اللي حبِّك | عمرو حسن

بحبك رغم إدراكي 
بإني بارتكب غلطة 
ومبسوط اني وياكي 
ورامي روحي للورطة 
وسايبك قاعده تتمادي 
وبتجرّح واقول عادي 
وكل الناس بقوا قصادي
شيوخ بيأدنوا ف مالطة 

يقولوا بلاش 
ومش شبهك 
وسيبك منها وامشي بعيد 
وانا لسه بشوفك عيد 
وداخل طوع ف طواحينك 
كإنك ف الطريق تكفير 
عن الناس اللي سابقينك
بتاخدي حق ناس غيرك 
بدون ماتكوني قاصداها 
باوزّع وقتي ف غيابك
على الريحة اللي سايباها 
محنن ربنا قلبي 
وامتى القلب كان له عنين 
كفيف العشق متعكز 
وماشي ماخدش باله لفين 
بحبك ليه .. مافيش أسباب 
انا أوقات مابعرفش بحبك ليه 
خصامنا كل يوم أيام 
وواصل قلبي ياما كلام 
من الناس اللي بيقولوا بتعشق بس ايه فيها 
مافيش بينكم حاجات تنفع تكون بكره 
لا من طينك 
ولا بلونك 
ولا خوفك 
ولا ظنونك 
ولا براها يشبه ليك
ولا مضمونها مضمونك 
وانا والله متأكد بإنك مش هتبقيلي 
لكن هعمل ف حبك ايه وف الوَحشه اللي بتجيلي
يفوت منديلي ع العالم 
واشوف روجك ف منديلي 
ومهما باقول خلاص جبرت 
أخيراً حكمتي انتصرت 
يدبدب قلبي لو واحد ذكر اسمك بدون قصده 
ونجمك رغم كونه بعيد خيالي ماتابش عن رصده 
باخرّج كل يوم ايدك من الابواب 
وبامسح خطوتك بالشوق من الاعتاب 
واقول خفّيت ومش هارجع لأحزاني 
اشوفك بس بتعدي يدبدب قلبي من تاني 
أكيد فيه حد ف العالم دعا مره عليا بقلب 
وقال : يارب بالأيام تسيب قلبك لوجع الحب
وكانت ساعه فيها جواب عن الدعوه اللي تإذيني
ياريتني كنت مش موجود ف ساعة لما شوفتيني 
يارب عملت ايه علشان 
يكون كل الألم فيها 
وايه يعني اللي زاد منها 
عشان ما اكملش غير بيها 
وليه مانشوفش حب قريب لناس بيحبوا يسقونا 
ومشاعرنا بتتبع أرض فيه شيء غيرنا هيرويها 
يا ناس بتقولي مابتكملش وعارف انهم على حق 
انا نفسي لكن قلبي صوابعه كلهم ف الشق 
مافيش ليلة تفوت من غير 
ما بدعي اني اصحى بلا طيفها 
واشوف الصبح دون نورها 
واجرد غمدي من سيفها 
واقطّع حته من قلبي 
عشان عماله تنصفها 
لكني لحد دلوقتي 
باطير م الأرض لو مرت 
ولو لمست ايديا بشوق 
الاقي التجربة اخضّرت 
ولسه بشوفها افراحي 
وتأكيد ان انا صاحي 
ولسه لما تهمسلي 
باكمّل ليلي صباحي 
ولسه بشوفها كل الناس 
بعكس ماهي شايفاني 
قتيل واضح ومجني عليه 
وكل مشاعره للجاني

https://m.facebook.com/kemiakarim?refid=7&ref=m_notif&notif_t=like

بعد ما تشوفك عنيا | عمرو حسن

ربك والحق
انا حابب أولّع عود كبريت واحدفه بالقصد على العالم
واقعد ف مكان عارفه لوحدي 
انا وامي وحبه من صحابي
اتأمل في المشهد واضحك 
وكإن النار عرض اضاءة 
اتخابث واضحك ببراءة 
واتفرج على كل مشاكلي وهي بتخلص 
والحفره اللي ف روحي بتنقص 
وارجع بني ادم من تاني 
لكن يزعجني يموت فني أسانسير 
كان جاي يصلح عطل قديم من غير أجره 
يزعجني يموت عاشق فجأة 
من غير ما يصرّح لحبيبته بأي مفاجأة 
وينتهي أمره وهو مجرد واحد شغال وياها ف شيفت 
أو جار بيغمض بسذاجة ساعة مايشوفها على السلم 
هاحزن على أوضة مزيكا ف مدرسة ثانوي 
على قطة بتتبع خطواتي ف شارع متفرع من روحي 
هاحزن على فرحي على جروحي 
وعلى بنت بتضحك لو ضلي فات على ضلها من غير ما اقصد 
هاحزن ع الوحده اللي لقيتها ف سن العشرين 
ومشيت وياها سنين بسنين 
الوحده اللي انا سميتها وفاء عبد الدايم 
وماكنتش بلقى صديق غيرها أوقات الكرب 
لكن والحرب !
ماقصدش الحرب ام السلاحين 
لكن قصدي الحرب التانيه 
حرب البني ادم والدنيا 
اتخيل كده واحد زيي ف سن التلاتين 
شاف حرب خليج أول تسعين 
والسينما هي بتتسلم للتجاريين 
والموضه طلوع م الشارلستون ولحد هدوم الفضائيين 
ووقوع برجين
وحضور ثورة ف وسط الملايين 
واحد شاف روسيا بتتحول 
تابع أمريكا بتتسول وبتدخل حرب البنزين 
والقوة العظمى وهي بتبقى ف ايد الصين 
واكتشف ان الكون الخالي من البني ادمين  
بقا ضيق جداً على وسعه 
بقا قرية حزينه ساكنها الخوف 
واتمنى ف لحظة ماليها الشوف 
يحدف بايديه عود الكبريت ويحط نهاية تليق بالفيلم 

باتخيل دكتور بيحل الحاله الحرجه 
وبيشيل الفيشة من الانعاش 
علشان عيان يوصل للراحة الحقيقية 
من غير ما يكون كداب ويقوله كلام عارف آخره 
نفس الموقف 
أوقات مابشوفش الا الحل الصح الأبدي 
حل اني اتخلص م العالم 
بالطفل اللي انا عايش جواه 
طاقتي بتتوزع ع الأخبار 
ع النوم ساعتين وياريتني بنام 
طاقتي بتتفرق ع التيك اواي 
والسوشيال ميديا وع الدخان 
طاقتي بتتفرتك ف الزحمة وقولة علشان 
روحي بيشربها الاداريين ومكاتب تكفير العملا 
روحي بتتقسط ع الزملا
ف موقف اتوبيس النقل العام 
دمي بقي ينقط بالجمله ف كل القعدات 
شجر الكام صاحب بقا طارح نفس الأحاسيس
بنصبر بعض وبنلزق قطعنا بالوقت 
وحكاية اني اسافر بايخه 
هنروح على فين 
كلها كدبة
هنا زي هناك 
تتهان علشان يبقي البنزين خمسه وتسعين 
تفقد نفسك  ف المول اللي اسمه التضحيه علشان التانيين 
وتعود كراتين 
او فيزا ببالطو وسد ملازم للشرايين 
تضحك على مين كلها واحده 
فاضل ف الدومنه يادوب كارتين 
اقفلها وقوم روح بدري 
احسن ما تاخدلك ساعه كمان شاي علي دخان 
اخسر علشان تطلع كسبان 
أو خيب ظني وقول بكره 
هنلاقي النور بعد الأُكره 
واتمنى الناس تسمع ظنك 
وماتسمعنيش
أنا اهو واقف مستني وف ايديا الكبريت 
ويا اما هموّت 
يا اما هجرب اني اعيش

https://m.facebook.com/kemiakarim?refid=7&ref=m_notif&notif_t=like

تقريباً مش فاضل غيرك | عمرو حسن

Minimum Charge | عمرو حسن

أول كلامي لجدتي : ازيك !
الدنيا من غيرك بدون فرحة
وحشني جداً كلامك ضحكتك ليّا
جلابيّتك والسبحة والطرحة
حِجرك ياتيتا اللي كان مفتوح علي الدنيا
حواديت ولعب وكلام أنا مستحيل انساه
تصحي ف نور الفجر باللحظة والثانية
تتوضي وتصلي وتقومي تبني حياة
كنتي كإنك شجر وصل السما التانية
أو كنتي زي المطر نازل بأمر الله

وحشاني ياجدتي
فيه كلام كتير متحاش
كبر الأمير واتهزم
وأميرته ماقابلهاش
والديب هجم ع الغنم
مافضلش فيهم سوى
واحد ضعيف هو أنا
قرر يموت قام عاش

الراديو لما اترمى
عيّطت ييجي يومين
صندوق بحجم السما
شايل غناوي دورين
فوازير وحكي وأمل
بنوتة بضفيرتين
وبراءة عاشت زمن
ماتت ف غمضة عين !

آخر كلامي لجدتي : سلامات
ياللي انتي فوق انما لساكي ف عنينا
عُمر النفر مننا مش كونه عاش أو مات
لكن بطول قعدته ف السيرة حوالينا
وحشاني ياجدتي ، ماتكفنيش كلمات
لكني لو هارسمك .. هارسم كذا جنينة

https://m.facebook.com/kemiakarim?refid=7&ref=m_notif&notif_t=like

Karim ElGayar ✪

Popular tracks