راحت 2014 وأجت 2015 
وتيتي تيتي ،،، تيتي تيتي ... زي ما رحتي زي ما جيتي

أجت 2015
ولسا احنا زي ما احنا ... محنة تروح وتيجي محنة
خسارة من بعد خسارة ... والمصيبة بنظن ربحنا

أجت 2015
وشعبي كـ الأطرش في الزفة ... إن كان بغزة ولا ضفة 
يعني من الاخر يا عمي ... تحفة وضع بلادي تحفة 

أجت 2015
وكله بيخون في كله ... وايادي الصلج بينشلوا 
وما في طفل صغير بغزة ... حقه من الهدنة واصله

أجت 2015
والمستوطن مستفرد فينا ... مرتاح وبيسرق ارضينا 
والأقصى بكل دقيقة ... حاخام يفوته بطحينة 
والإعلام العربي الفاضح ... يفضح عرضه شو خازينا 
ناسي القدس وناسي الأقصى ... طبعا عمدا متناسينا
وأهلي بغزة آآآه يا غزة ... مقهورة أغلب أهلينا 
تستنى الإعمار ولكن ... لا مطار مبين ولا ميناء

أجت 2015
ولسا الغزاوي متدمر ... ومتحاصر من قبل المستعمر 
والي زاد الطينة بلة ... معبر رفح المصري مسكر 

أجت 2015
والعيشة صارت مخيفة ... عم نركض وراء التعريفة 
والشب العربي لساته ... حلمه في خلقة وظيفة 


أجت 2015
يا متكتك تكتك تكتيكي ... دولتنا يا حسرة عليكي
مش رايح نتهنى بدولة ... بوجود الفيتو الأمريكي 
لو النفظ العربي المبيوع ... يتوقف ضخه أسبوع 
بتبطل أمريكا ترفع فيتو ... في وجه المشروع 

أجت 2015
ويا ابطال ويا اسرانا ... يا كل حر انسجن وعانا
قرب موعد حريتكم ... ما دام شاؤول معانا

أجت 2015
كل يوم والله بيشنقوه ... لشعبنا وبيقتلوه 
حتى ريسنا ورمزنا ... بسم غادر سمموه 
وعلى مرأى كل الملايين ... والشاشة والإعلاميين
في أرضك يا ترمسعيا ... استشهد زياد أبو عين 
أبو عين اترجل واستشهد ... غرس الزيتونة وما اتردد 
وما اسمعنا ولا حاكم عربي ... صرح , استنكر , أو ندد 
يا أبو عين قبلك أبو خضير انحرق ... والعرب ما واحد نظق
النخوة ماتت من زمان ... من يوم صدام انشنق

أجت 2015
وآآآآآخ آآآآآيا ‫غربتنا‬ !! ... والله طولت غيبتنا
ان شاء الله ترجع يا لاجئ ... تكحل عينك تربتنا ....

أجت 2015 
باليرموك أهلي ضحية ... وينوا ضمير الإنسانية 
أكثر من ثلاث سنين ... لا في أكل ولا في ميه 

أجت 2015
الفلسطيني الله يعينوا ... في لينان بأكبر محنة 
بدرس بتعلم بتخرج ... وممنوع يمارس ولا مهمنة 

أجت 2015
نحن الشعب الي نسيونا ... طلبنا دعم وما دعمونا 
ولما إيران بتدعمنا ... بيجوا الجهال يلومونا 

أجت 2015
وبا حكومة التوافق ... قومي على حيلك يلا فزي 
والمواطن متحير بيسأل ... مين الي عم يحكم غزة 

أجت 2015
واسمعوا يا فتحاويين ... واسمعوا يا حمساويين
خافوا الله بهذا الشعب ... الي بيعاني عشرات السنين
خافوا الله بقضيتنا ... وحاجة تبقوا منقسمين
خافوا الله منشان الله ... وارحموا للشعب المسكين
خافوا الله لسا الأقصى ... يقاوم للمحتليين
خافوا الله أهل القدس ... مقهورين ومعزولين
خافوا الله شعب الداخل ... مقبوعين ومنسيين
خافوا الله أرض الضفة ... مضلش منها دولمين 
خافوا الله أهل بغزة ... نصهم بالخيمة نايميين
خافوا الله منشان الله ... وارحموا للشعب المسكين
فلسطين اكبر من ‫فتح‬ ... ومن كل ‫‏الحمساويين‬

أجت 2015
والشعب العربي مو عايش ... حقوقه صارت عالعامش
والنفظ العربي مهدور ... بيحارب أو بدعم داعش

أجت 2015
وعلى مصر العالم متأمر ... والوضع مكهرب على الآخر 
وأبو الهول بيسأل خوفو ... شو صاب بلادي وشو صاير 
والشعب الليبي بيتحصر ... على أيام القدافي معمر 
متحير مع مين يصف ... مع الحكومة أو حفتر

أجت 2015
والله يستر الله يعين ... وضع اليمين ما هو زين 
في خطة غربية بتهدف ... اليمن يرجع يمنين
ويا لبنان بلاد الأرز  ... دربالك جيشك يهتز
قاوم كل الطائفية ... وبالمقاومة اعتز 

أجت 2015
ويا عراق الرافدين ... دمك سايل هين وهين 
ضاعت هيبتك يا العراق ... من بعد صدام حسين

أجت 2015 
ولسا سوريا بتعاني ... بالدم الأحمر غرقانة 
ومحل الياسمين الشامي ... طلع الشوكة الأمريكاني
يامو سوريا يا يامو ... شعبك عم بتضيع أحلامه
والعالم بيتفرج عليكي ... بيقدملك بس خيامه
يامو سوريا يا يامو ... زاد الوجع وزاد الهم
حتى فستق حلبك صار .. طعمو ولونو مثل الدم

#قاسم_النجار

Comments

islam selim

User 257161413

Ahmed Qudaih

amal9

Ãhmäd Bøss Âlãwï