amr abou zaid

دخلة ابريل
الشتا بيعافر في الصيف
والصيف بيعافر في الخلق
والخلق بتغرق في الزيف
والكلمة بتخنق في الحلق
وشوية تمطر على غفلة
وشوية عواصف وتراب
وشوية الحر بيتمكن
كروان بيخانق في غراب
وشوية نمل اللي قريب
وشوية نحب الأغراب
وتملي بحن
وبفتكرِك
وبروح على صورتِك
بالعافية
( الجو عيا )
على رأي أمي
باين من صوتي اني بعافية
دور برد شديد
المرادي
مانفعش معاه
مشاريب دافية
على فكرة أنا لسه عبيط جدا
وبحب أتفلسف ع البرد
ومصدق انه بيغسلنا
وبيغري الساكت بالسرد
وبيسحب من خنقة روحنا
فبتظهر خنقة على الصوت
لولا بس مضاد بينيمني
كان ممكن أقول لِك مبسوط
انشاله تكوني أحسن مني
يا شبيهة الشاي المظبوط
وحشتني عيونِك بزيادة
يا اللي انتي عيونِك كات ليا
فتشت خيوط السجادة 
 مالقتش مُسكِن غير هيَ
كان نفسي أحكيلِك كالعادة
وأوان الحكي
خلاص عَدى
أه صحيح بخصوص نتيجتي
شلت مادة
وسبت مادة



دور برد شديد

كلمات : عمرو أبو زيد 
https://www.facebook.com/amr.a.zeed

من ديوان : نوفمبر شهر ملائم للموت

أداء : منّة كُردى
https://www.facebook.com/Kawkabmashy?ref=tn_tnmn

موسيقى : أنين الناى جلال الدين رومى 

الكلمات : 
يقول واحد من المرضى
لا مش هرضى
ومش ميت
سيبوني لبعد رمضان
أقلّه أموت وأنا مِعيَد
و يخبَط دمعه في الشمبر
مسبب دوشة في العنبر
فيصرخ فيه مريض تاني
بصوت ناصح لكن مكتوم
مافيش ملجأ من المحتوم
صراخك ده مالوش داعي
مادام كشف السفر مختوم
واسمك وقته متقيد
فموت راجل
ده أكرملك
عشان حتى التاريخ يكتب
ده عاش مذلول
ومات سيد
وبعدين هي دي عيشة؟
بذمة أهلك الموتى..
هتخسر ايه؟
هتخسرنا؟
ياعم بلاش تحسرنا
وحق سريرك الدايب
ماهتشوف دنيا غير بالموت
لولاش بس النظام خايب
وأجِل دوري للأخر
ماكنت فضلت فيها حي
ياريت كان دوري هو الجيّ
عشان ياكل شقايا الدود
ياريت الكشف يلمحني
فيمنحني أمل منشود
قوم افرد ضهرك المحني
عشان ماتمُتش غير مشدود
ولو خايف جحيم مثلا
ماهيش فارقة
دي نار ودي نار
وفجأة النُصح صوته يضيع
في صوت عاصف لدق الزار
وييجي اتنين تمارجية
ينادوا الميت المُختار
يجروه لعزرائيل بره
وقبل ما يخرجوا يشاوروا
بإيدتينهم على الناصح
يقولوا تعالى بالمرة
زحامكم أصله مش جيد
فيصرخ لأ ده مش دوري
ومش ميت
طب ألحق حتى رمضان
أقلّه أموت وأنا مِعيّد



أكذوبة الموت والراحة_ منة كُردى_عمرو أبو زيد

كلمات: عمرو أبو زيد  
أداء صوتي: آية إيهاب
خلفية موسيقية: Away We Go (Piano & Oud)
بنت
شبه صورها بشكل غريب
شبه كلامها بشكل غريب
شبه تفاصيلها
وحواديتها
وأسبابها 
بشكل فريد
وغريب
شبه الأرواح اللي تملي
كثافتها 
تغرَّق كل قَريب
وبتطغى عليه بكُونها
ولُونها
لو مهما حرَّص
وانتبه 
وكمان شَبَه :

ميرفت أمين 
في فيلم ( زوجة رجل مهم )
القصايد الحلوة اللي فيها كسر في الوزن
المطر في الشوارع الفاضية
المزيكا اللي ماينفعش يتركب عليها أي كلام
الكلام اللي أصدق م المزيكا
المصاير
كلها
الدواير
كلها
الحاجات اللي مافيش في الدنيا ذكرى
قبلها
المسافة
والفواصل
والحواف
والحدود
الشكوك المستمرة
كل مرة في السجود
والتجلي للحقايق
كل ليلة ظلامها يدّن
الظنون عن جدوى واحدة
تبقى شافعة للوجود
والبُكا - فجأة - لدقايق
بعد فيلم عادي جدا
والصيام 
من غير مناسبة...
قالوا فيه 
حسنات عليها

.................................

عيونها المُرهَقة دايما
مافيش نظرات بتكفِيها
عيونها المُرهِقة دايما
بتسحب مجذوبين ليها
عيونها حلوة من زاوية
مافيش ليها حسبة بالدرجة
وواسعة بس مش واسعة 
وحادة وصادقة للدرجة ...
اللي جعلت هالة من روحها
بتظهر غامقة حواليها
هالاتها الدوامات توهة
وتاهوا كتير عيون فيها
في سحرها زي ايه مثلا؟
اذا كان ممكن أحكيها ...

بلوفر كان قديم عندي
وموجة البرد خلتني
أدعبس في القديم تاني
ولما لقيته كات ريحته
سجاير عمر بالكامل..
وأنا كان عشمي في سيجارة

عن بنت بتشبه للأخر
والأخر دايما 
فيه خسارة



عن بنت

ألحان وغناء : زياد سحاب 

كلمات : عمرو أبوزيد

amr abou zaid

klear nabil