يا الله يا اللي تستر الطير بالريش
                      ياللي على فضلك تعيش المواشـي
يا رب عبدن في ضميره نواهيش
                      تلعـب بقلبي لعب صـف النواشـي
انــا ليا منـي نويــت المطاريـــش
                      يخـف نومي ويتضايــق فراشــي
كنـه يـدق إصبي عينـي مناقـيــش
                      النور طافي واحسب النور واشي
وليا طرالي راعي الكبر والطيش
                      كنـه خشيـرن لي معي في معاشي
يا نافخن صدرك تكبر على ويش
                      والله وما قالـت ترى اللاش لاشي
الكبر منهــاج الخبـول الـدراويــش
                      مكبـريـن ظهــورهــم بالخيـاشـــي
يا الله لا تجعل طريقي على الهيش
                      هرع الكلام المستحيــل الهتـاشــي
رجال في طردن ورى لقمة العيش
                      وفي غيرها لد النظر وانت ماشي
الله مــن قلبـن إينـوشــه مناويـــش
                      تومي به اوماية إغصون الغواشي
لا والله الا صار فالجوء تشويـش
                       يبــاع فيــه الــدم الأشقـر بلاشــي
يا بايع الدم الاحمـر بالغلـط لـيــش
                       اهدرت دمك بين مرشـي وراشـي
مدري ظـلام وفرصتن للخفافيــش
                       والا سراج ونور والقـدر طاشــي
السالفـه مـاهـي هجـاد ومغـابـيــش
                      يبغى لها مجلس رجــال ونقـاشــي
إما زعلنا من زعــل قايــد الجيــش
                      والا قدحنــا النـار والعــود واشــي
مضاهرات الغرب حمر الطرابيش
                      ماهي لنا يا اهل السفــر والتماشـي
هدم البناء عيب وغلط يا شواكيـش
                      ما عاد نبغى من مطركم إرشاشـي

مصلح بن عياد الشلوي الحارثي  يانفخن صدرك تكبر غلى ويش ** والله وماقالت ترى اللاش لاشي

گنت احسب ان الغلا يدمح خطاي 
ليــن لـقـانـي علـى الـزلــه قــفاه 

جيــت ابشره من غلاه ومن غـلاي 
رحـت مجروحـ[ن] تبيـن لـه غـلاه

غيمة التجريح ! لو تحجب سماي 
تنجلي ! وتروح لاذعذع ( هواه ) 

علموه اني ! على باقي ،، وفاي 
غير لايبطي ! ولا يرفع ،، عصاه

اتمنى أن تنول على أعجابكم ..

كنت أحسب أن الغلا يدمح خطاي {الحب بلوى ** كلمات : محمد ال عمره - اداء : صالح الزهيري

 عذب المعاني 
 اداء : مبارك الدوسري

سر ياقلم واكتب على بيض الاوراق  **  ان خاطري سجل سمان المعاني
 البارحه نومي عن آلعين مآرآد     **     اعد ساعاتن مضت بالثواني

{ عذب المعاني >  اداء { مبارك الدوسري >

 كلمات الشاعر : حمدان المري
  أداء : هادي المري

تموت الأحلام فصـدور الفقـارى قهـر
ويملا هدبها الدمـوع وتصفـق كفوفهـا ..!!

تصبر لكن صبرها ماهوب يوم وشهـر
من جوعها يمكن انهـا تاكـل كتوفهـا ..!!

وتعيش الأحلام عند أهل الدراهم دهـر
و (تكبر) أحلامهـا وتزيـد مصروفهـا ..!!

ان كان ما خافـت الله فالخفـا والجهـر
تاكل بعضهـا حـرام وعينـك تشوفهـا ..!!

زرعت في كف غيري من جميلي زهر
وجنيت جحد الرجـال وقـل معروفهـا ..!!

خطبت شيمة عزيزٍ سـاق دمـه مهـر
وطلقت خوة بعض الأجناس وضعوفهـا ..!!

أصبحت اهوجس واشك أن النقاء والطهر
ضغينة صدور ناسٍ مـا بـرا جوفهـا ..!!

على جدار الزمن كتبـت بيـت وشطر 
حسب معاناة بعـض الخلـق وظروفهـا ..!!

فالوقت ذا ما تعيش أن كان مالك ظهـر
الايـام قومـا" علينـا تومـي سيوفهـا ..!!

وكتبت لي كلمتين مـن الغبـن والقهـر
والله كتب وامطرت وانمسحت حروفهـا ..!! 

تموت الأحلام فصـدور الفقـارى قهـر  !!!  كلمات الشاعر : حمدان المري  أداء : هادي المري

ثلاثين عام وأشتمط عارضي بالشيب
وزهرة شبابي ذابله وأنبرى حالي

عن المجتمع قمت أتشطر وقمت أغيب
بعيدآ عن الضوضاء وأحب أجلس لحالي

في عزلتي باضل لين الجروح تطيب
ومعذور لو يمناي ما تامن شمالي

غدافي الثقات من أقرب الناس شك وريب
ولا عاد جات الموجعه كون من غالي

يزارقني بخبث وأنا ازارقه بالطي
وادور رضاه وهو يدور غثا بالي

وأنادي ولامن ميتين القلوب مجيب
لذلك نويت اصمت وقد صمتي أشلالي

أنا اسود من اللي في وجيه كفلاه يعيب
أذا اللي طرى في بالهم مر في بالي

ويحصدنا الندم والظن في الخايبين يخيب
وعزمنا على قطع العلاقات من تالي

مهذل بن مهدي ال صقور     ثلاثين عام

تباريحك على جمر الغضى ياقلب يالمهموم
ونبضاتك دموع مرسله وتهلها عيني


تعبت وتعبت عيوني معاك ولا اهتنت بالنوم
مواويل المواجع خلها مابينك وبيني


على مهلك بصدري لا تهزه وارض بالمقسوم
على جور العيون الي تنام ولا تراعيني


من اول يوم انا وياك انا وياك لاخر يوم 
على الدرب الطويل الي جهلته يا موديني


نصحتك قلت لا تحلم ترى بعض الحلوم حلوم
نهيتك قلت ماتسلم كسرت الشوك بيديني 


سألتك قلت ماتعلم بان النصر للمظلوم
سجنتك قلت تستسلم شكت منك شراييني


مدحتك وانت تتبسم بعيد من العتب واللوم
فهمتك انت ماتفهم رضيت انك تخليني


لمحتك وانت تترنم تغني للهوى المزعوم
سمعتك وانت تتكلم هلا يا باقي سنيني


هلا بالطيب وانفاس الغرام وريحة اليشموم
هلا باللي على بعد المسافه مانسيتيني 


تأثرت بكلامك خفت لا يخذل عزيز القوم
واعيد الكره الي قد مضت يومك تناديني


تذكرت الشوارع والظلام وطيرها المشأوم
على ذيك الغصون اليابسه والهم كاسيني 


اخذت شوي واصبحنا كلانا والامل معدوم
صبرنا غصب والدنيا دروس وذا يكفيني


رضيت وما معي حيله هو الحاكم وانا المحكوم
تشيل الحمل ياقلبي ولكنك تعنيني


احبك يابحر لكن اخاف وما اطيق العوم
تكفيني سواليفك على الشاطئ وتغنيني


كذا يرضيك ياقلبي اطيح وماقدرت اقوم
وانا ماني بحي الله بشر يومك تبكيني 


بكى حتى القلم من رحمتي مافارقه البهوم
نزف حرفي على صدر الورق عله يسليني


سمعت علوم ياقلبي ومنك ماسمعت علوم
مغير دموعك الي سقتها وتهلها عيني


شكيت وماشكيت الا عليه الواحد القيوم 
وغير الله ضعيف ولو عطاني مابيشفيني


الهي طالبك تغفر لعبد ماهو بمعصوم
الهي طهر القلب الضعيف ولاتخليني


الشاعر / فهد الشهراني 


 .. أتمنى أن ينول على أعجابكم ودمتم سالمين
  

المصدر: الـشعـبي رايــح جــاي ::

Ksa Mno

Popular tracks