إهداء
لـ ابويا عشان
يشهد ع النجاح المرة دي
ولجنّتي ع الأرض عشان - دايمًا بتسمعني بدون ملل
ولو فيا وساخة الكون - مابتشوفهاش
ولباقي أهلي عشان - دايمًا شايفينّي عادي
لكل واحد شاف فيا بذرة أمل
للأكيد - والمُحتَمَل
لخلود - عشان مهمة زي نور بالليل
لفاطمة - عشان دي الحقيقة المتداريّة ؛ وكل دليل
لعيالي المستقبلية
ولاد الناس الأكابر اللي عافروا عشان ينولوا
لأشرف خلف - أخويا الكبير
بابا المجالس - والنصيحة الطيبة - وكلام ماينفعش اقولُه
لماكس - صاحب الضحكة الجميلة
والإفّيه ..
لعمرو الجندي - البيه
اللي من غير بِدَل - وَجهة حلوة
للزعل - اللي عُمرُه ما طَوّل
لترنيمة - حِلمي اللي هابدأ فيه من الأول
لروكي - صاحبي الوحيد ابو جِلد أبيض تلج
الدافي الحنيّن - الوحيد اللي شبهي
لما أكون فرحان - أو حزين
كائن جميل - باربع رجول ؛ وعينين
لشخصي القديم - والحالي
ولأي جايزة جَت - أو ماجاتش
أنا لا اُبالي
لكل جميل - مَد إيد المساعدة
ولعشريناتي - اللي ضاعت ع المافيش
وللسودا الطرية - ولباقي الحشيش ..

#كيرلس_عطية
#بين_سبحتين_وصليب

إهداء ديوان | بين سبحتين وصليب | كيرلس عطية

اخطفيني - نجمة من بين السما
هَتلاقيني - بين ايديكي السود بَياض
خربشيني - تكسبي قلبي البسيط
واعرفيني - زي ما انتي بتعرفي كل شيء من غير ما اقول

دَخَّليني - أسفل الكِتف الشمال
وقتها ..
هتصدّقي - أد ايه صعب ومُحال
لما اقولك فكّري - فيا من ناحيِة حبيب
لما اقولك فكّري - في الجواب من غير سؤال

فيا عاهة من اللا ديني - فيا كُفر الملحدين
فيا من ناحيِة يَميني - كل شيء كان غير سَليم
بس عايزك تعرفي - إن قلبي المُستَقيم
مال لقلبِك وقتها - كَفَّروه المؤمنين

بس لحظة من الثواني - حَوِّلوني لحد تاني
لما بتكوني في ضلوعي - لازم اتحوّل أناني
أصل عندك كلهم - هَيشوفوكي واحدة سهلة
يعزموكي لـ مُر قهوة - يحضنوكي الحضن شهوة
بس مش شايفين وَتينِك ..
لما نَبضُه يتوه لـ وَهلة - واحضنك - فَـ يسبّوا دينِك

قربيني لناحيتِّك - فاشهَد إنك شيء خُرافي
هُمّا شايفينك عادية - بس بيشوفوا احترافي
لما اعدي في كعبتك - بس مش شرط أبقى حافي
عَمِّديني - اُردُني عامل تَفاوُض
غَطَّسيني - نبقى جَدِدنا العلاقة
الصداقة - حِبري وَسَّخها بقصيدة
قَدَّريني لما اشوفك - كل يوم بعيون جديدة
وابقي هاتي المحفظة - حاسبي ع الطرحة العزيزة
ولّا اقول لِك هاتي إيدك - أصل هَنخُش الكنيسة
هاتي شمعة - وَلَّعيها
إنتمائك - مش ضروري
لو إيمانك جوة زمزم - هاطرُدُه بريحة بخوري
وأرجم الأفكار في راسك - لما نوصل حارة سَد
فَـ تزوريني كل جمعة - واجي ازورك كل حد ❤️

#كيرلس_عطية
#بين_سبحتين_وصليب

اخطفيني | كيرلس عطية

وانا باعرف أكتب شِعر ع الكنبة
وباعرف أكتب شِعر ع القهوة
وباعرف أكتب شِعر في المترو
وباعرف أبدأ صح , وبيِلفِت
وباعرف أبدأ بس مابيِكمَلش
وباعرف أبدأ والكتير كِتروا ..
وباقول : في حاجة مهمة ودي أوْلَىٰ

في الأوضة نايم راسي شَغَّالة
ع القهوة باكتب بس دون تَركيز
في المترو باكتب بس مابيِكمَلش
علشان وِصِلت وغَرَضى أتسَلَّى ..

وف كلبي باكتب
عادي مش إجرام
في الحلوة باكتب سَطر , وباشِدُّه
ودي حاجة تِغني عن الـ 3 جرام
في حد قالِّي ضَعيف فَـ باكتِب لُه
وباقولُّه باعرف عادي أكتب خام

في الناس باقول
والوَصف مش مُعجِزة
والوقت ساعة دِقيقتُه مش مُنجِزة
والشِعر سَهل عشان ضَريبتُه بـ كَذا
ودي حاجة أرخص من تَمَن أحضان

وانا أهلي ناس
رَبّوني ع الغالي
شافوا الدراسة دروسها بالغالي
فَـ سمِعت جُملة أبويا قالها لي ..
الصَنعة أفيَد , وانت داري الحال

الشِعر سَهل
الصعب إنك هنا
وَسَطَك مُمِّل
الخِبرة بالكام سَنَة !
قَلَمَك ..
لسان واحد ومش ألسِنة
النَص لو صادق
إشبَع بألفين هَنا
مش شرط تكتب يعني للشُعَرا

فانا عندي شِعر عشان حبيبتي
أهديه ..
وعندي شِعر عشان ديوان
يُجزيه ..
وعندي شِعر باقولُه للسوكسيه
وعندي شِعر باقولُه لامبارح ..
وعندي شِعر عشان يعيش بُكرة ❤️

#كيرلس_عطية
#بين_سبحتين_وصليب

مش شرط تكتب يعني للشُعَرا | كيرلس عطية

يا رب ..
أنا نِفسي أفرح بقى
عِشريني فين ؟
وانا حاسس اني عجوز !
عَمَّال باجَمَّع توب
يِداري عُمْر الشَقَىٰ
مالقيتش حد يسِّد لما باعوز
أنا ضهري مَحني
إوهِبلي ضهر يشيل
إبعِدلي إيد الناس
وايديك تكون مناديل
امسحلي دَمعي عشان
دايمًا ايدين الناس
بِتزيد ف قلبي الجَرح مش بِتزيل
والدنيا جاية بـ هَرس مش أدُّه ..
والسيف رِقَبتي بتبقى على حَدُّه
لو دي تجارب صَبري شال بالكيل
والحيل تقيل / بس الزَمَن هَدُّه .

أنا نِفسي بس أصرُخ بعِلو الصوت
مش لاقي صمت نهائي في سكوتي
جَبر الخواطر بيه باكون مبسوط
الدنيا قالِت : باقي جَبَروتي
أنا نِفسي بس الليلة دي أنسى
ورأيِك ايه يا دنيا في شروطي ؟
هاقلِب عليكي الضغط في دماغِك
فَـ صداع يجيكي تحسي فَـ تموتي

#كيرلس_عطية
#بين_سبحتين_وصليب

عشريني فين ؟! | كيرلس عطية

- الكلمات ..

لا تمِّد إيدك لبنت
ولا تسَلِّم ..
البنت إن سَلِّمِت
رَفَعِت عليك الشوق
فَـ تفوق وتتعلم
إن اللي جابَك فوق
وانت اللي تحت .

لا تمِّد إيد على بنت
ماهي مش رجولة يا ذوق
انت اللي ضِلع ضعيف
واتكونت منه
من جنب كتفك نحت
واتسللت علشان
تِتبَع جمال روحك
وتنُط فيك تِغرَق
تنقذها كَـ البَحَّار
قلبك كَتَب أشعار
من مَحض تفاصيلها
إن جيت تحنلها
اذكرها بالأفضال
ماهي ليها كل الفَضل
وخلتك .. شاعر ❤️

#كيرلس_عطية
#بين_سبحتين_وصليب

من محض تفاصيلها | كلمات كيرلس عطية | غناء طارق اسماعيل

جاب الأزايِز
صَبّ كاس وَرا كاس
كان في مَجاز مايكونش مات دلوقت
جاب الصور جَمَّعها في البِرواز
أنا شوفتُه طالع / بس نازل تحت
بِيلِم وَجَعُه في التُّراب جايِز
ويجيب صليب ..
-ويحاوِط الضلمة-
تشبيه غريب مانا بَرضو ماسكِرتِش
الناس توَصَّل ناس بِدوْس الناس ..
وانا دُوسْتْ نَفْسي ولسة ماوصِلتِش

أنا شوفتُه مات ؛ كان هو شايف موت
الجون بييجي فِ قَبل وقت الشوط
والناس بتِبعِد / وقت ما يقَرَّب
وبتيجي بس لطَعم نَبْر الصوت
كان بان حَزين ..
إِدْفِنِّي ؛ وهاجَرَّبْ

جَبَّار دي كِلمَة بْتُجبُّر الخاطِر
أو برضو ممكن تتفهم جَبَروت
تعرف يا رب !
كان نِفسي قبل الموت
أسمع جميع الناس
بيقولوا ايه عني ؟
يمكن تكون حِكمِتَّك
إني أموت مرتاح
وماشوفش وش الناس على أُصولها
كان نِفسي اشوف الجنة مش أكتر !
مش ساعي شِبر ف أرضي لوصولها
تعرف يا رب ؟
الحُزن صَعب .. صَوابعي مَدفونة
مش عارف أكتب سطر لِوصِيِّتي
وحياة حَبيبَك !
مش هاقول النبي
ما أكيد باحِبَّك ؛ وانت بتحبني .

كان إسمي "شاعِر" فوق حدود أرضي
كان نِفسي اَدوق البنت في براندي
وَاسْكَر في عين الجسم وَاتغَذَّى
كان نِفسي اَحِبّ السُكْر والخَمرة
ونشيل بَواقي البُقعَة من عَ الأرض
فَ تصيبني لَعنَة وتبدأ اللَّذَّة
بَسْ الملاك جِهْ خَدْني مستعجل
طَلَّعني فوق ؛ ورَماكي جايِز تَحت
فَ لْقِيتني باسأل ..
فيه خمور في السما ؟!
ما ترُد مالَك قولِّي ليه تَنَّحت !
 
تعرف يا رب ..
إن الملاك ماعرِفش يِغلِبني !
فانا ليه مَصيري النار وهو معاك ؟!
رَد الإله بِجَلالة وبعَظَمة
قالِّي :- الشيطان هو اللي كان وَيَّاك
كات مَرَّة أولى فْ عُمري أتسَوَّح ..
بَصّيت لَقيت
صُحابي بِيشاوروا
من جوة عالَم مَطلي بالأزرق
وانا شوفت عينهُم
جُوَّة نور فيهم
شَدُّوني أسْكَر وَحدي جُوَّة البار
ولَقيت مَلاكي بيِفتَح الأبواب ..
على ناس في قَلب النار مِدَفِّيهُم
منظر غريب ؛ وانا لسة اهو
مَطرَحي ..
غَمَّضت عيني لَقيتني وِسطيهُم .

#كيرلس_عطية
#بين_سبحتين_وصليب

كان نِفسي اشوف الجنة مش اكتر.mp3

- كيرلس عطية ..
مواليد القاهرة ديسمبر 97 .. شاعر عاميّة

صدر له ديوان ورقي بإسم " بين سبحتين وصليب " في معرض القاهرة الدولي للكتاب عام 2021 ميلاديًا ❤️

Kyrillos Attia ✪

Popular tracks