حفلة محمد محسن في دار الأوبرا المصرية
14-نوفمبر-2013

محمد محسن - نشبه لإيه ومن زمان جدًا

حفلة دار الأوبرا المصرية
14-نوفمبر-2013

--

يارب كل من له حبيب وطال بعاده ولا قريب
ماتحرمهوش منه وهاته له بالسلامة

محمد محسن - والله تستاهل ياقلبي

سجلت في 11 مايو 2011
-------
ايام ابتدائى كنت بعرف ارسم.. او الناس كانت بتقول لى كدة. عمرى ما شفت انى بعرف ارسم.. كلها كانت فى نظرى عبارة عن شخابيط ملونة.. وحتى اختيارات الالوان عندى طول عمرها اعجب من بعض.. فى مرة حتى فكرت ان اكيد يا عندى يا عند الناس عمى الوان..
ويمكن حتى طول الفترة دى ما صدقت انى بعرف ارسم الا فى أواخر الاعدادية واوائل الثانوية… لما بدأت استخدم الفحم والقلم الرصاص..
بُعد تانى للصورة لما تبقى ابيض واسود ورمادى.. كانها صورة لعزف منفرد.. من غير لا بهرجة ولا دوشة ولا زحمة ولا وجع دماغ الالوان..
لوحة.. لوحتين.. تلاتة.. وبدأت أصدق.. أنا فعلا بعرف ارسم.. ومن ساعتها وبطلت..

كل واحد فينا محتاج يحس كل لحظة بشئ يميزه عن حد.. ذكاء.. ثقافة.. موهبة.. او حتى جمال او لباقة..
بنفضل طول عمرنا ندور على ركن نبان فيه وسط الصورة.. واوقات كتير رغم قربه لينا، بنعمى عنه.. معرفش السبب فينا لاننا مش مؤمنين بنفسنا للدرجة اللى تخلينا رغم كل الظروف نصدق ان فينا شئ مميز.. طب هى ثقة بالنفس؟.. ولا المشكلة فى تأثير غيرنا علينا.. ولا مجرد نماذج تانية شفناها خلتنا نفقد كل إيماننا بان ممكن يكون فينا شئ يستحق..

النهاردة مسكت القلم احاول ارسم بعد اكتر من اربع سنين انقطاع… ومعرفتش اجر خط.. زى ما اكون نسيت القلم بيتمسك ازاى… وازاى الخط بيتخط..

لاء.. هو مش ندمانة انى هجرت الرسم.. لان عمرى ما حبيت انى ارسم.. كان دايما يطلع فى حالة ضيق او غضب.. لكن ندمانة ان عمرى ما صدقت ان ممكن كان يبقى منى شئ.. ولو اى شئ..
كان ممكن.. وانا طنشت..

تسجيلات صوتية – قول للزمان ارجع.. مارجعش

سجلت في 15 مايو 2011

------

عارف لما تصحى الصبح وعلى غير العادة نفسك تكون مبسوط وهافف عليك أى شئ يحصل النهاردة يخليك فرحان؟..
تغسل وشك وتبص فى المراية حبة وانت بتسال نفسك ليه النهاردة مش عيد ميلادك مثلا، وحد.. أى حد.. يرن عليك جرس الباب بهدية ولا مفاجأة محضرها لك؟.. مع انك عارف انه حتى لو النهاردة عيد ميلادك، آخرك حد يكلمك يقول لك “كل سنة وانت طيب”.. وزى كل سنة، بعد ما اليوم يخلص، تمنى نفسك السنة الجاية بحد يرن جرس الباب..
وتفضل السنة الجاية مابتجيش..

تقعد تشرب فنجان القهوة بتاعك ولا الشاى باللبن اليومى، وانت نفسك فى حد.. أى حد يرفع سماعة التليفون عليك دلوقتى ويسال عن أحوالك.. وتقنع نفسك انه أكيد محدش ح يكلمك دلوقت.. وازاى يكلمك وانت قافل تليفونك اصلا.. مع انك عارف انه حتى لو مفتوح محدش ح يسأل عليك.. بس انت عامل نفسك ناسى عشان نفسك تكون النهاردة مبسوط..

طول الطريق للشغل ولا الكلية تفضل بتدور بين الأرقام على موبيلك على رقم.. نفسك فى حد.. أى حد تكلمه. نفسك تفضفض زى الفكرة القديمة فى الأفلام، تقعد على الشيزلونج وتتكلم مع حد تكون معاه مرتاح.. مش لازم تكون مشكلة ومحتاج نصيحة.. ولا حتى انك نفسك تجرب الكلام برة براويز “صباح الخير”، “مساء النور”.. “سلامو عليكم”… لاء.. لان عندك حاجات كتير جواك عايز تقولها وتسال عنها.. وحد يسمع.. بس حد يسمع.. مش عشان انت نفسك فى حد يسمع… برضو لاء… بس لان الحد دا نفسه انك تتكلم وهو يسمع..
بس عارف.. أراهنك وانت نازل من الأوتوبيس ولا المايكروباص… ح ترجع تقفل موبيلك تانى.. وتتحجج.. مش عشان مافيش حد.. بس انت المرة دي اللى مش عايز تتقل على حد..

وتمشى.. تمشى شارع.. وراه شارع.. وتدخل يمين وتلف شمال.. وتطلع سلالم سليمة ومكسرة… وتمسك ترابزين ملاه التراب.. وتشوف وشوش.. وشوش كتير حوليك.. فيهم اللى بيضحك لك.. واللى مكشر.. والمهموم.. واللى مش شايفك.. واللى شبهك.. وانت تفضل ماشى تمنى نفسك تكون النهاردة بس مبسوط..

تسجيلات صوتية – بس حكاية

Poems Grow - Marcel Khalifeh & Omayma Khalil

سجلت في 21 مايو 2011
----

الناس عادة بتقابلك في واحده من حالاتك وبيفتكروا ان ده الوضع التلقائي بتاعك. إنك طول الوقت عامل كده. بيفضلوا يبصولك من نفس الزاوية، لحد اما تلاقي فجأه حد عنده شغف طفولي انه يشوفك من زاوية مختلفة. في حين ان ناس تانية بتشوفهم كتير قوي، بيحبوك وبتحبهم قوي قوي، مافكروش يشوفوك أبعد من الحالة اللي يعرفوك عليها..

ويجي يوم تكتشف ان في حد بيبص لك من بعيد، من وقت للتاني وانت مش واخد بالك. وصدفه تتقابلوا.. وتلاقيه محوش أسئلة كتير وبسيطة، بس اجاباتها معقده. مش معقده عشان صعبه، بس عشان انت ماتكلمتش فيها بقالك زمن!. فتلاقي نفسك بتنفض التراب عن قلبك، وتجيب المفتاح المصدي، وتفتح الصندوق الكبير. وتحكي. تفتكر وتحكي حاجات بقالك زمان ماحكيتهاش وكنت قربت تنساها. عشان انت نسيت انك بني آدم عايش. نسيت ابعادك الظاهرة والمخفية. زي ماتكون كده روحت بعثة بره حياتك وذكرياتك وبعتوا جابوك علي ملى وشك من السفر وسألوك: وهو حصل ايه لكل دا؟

وفي وسط الحكي، تكتشف فجأه انك لسه بتستمع بتبادل الذكريات التافهة مع الأغراب. وانك مش المعتوه الوحيد علي كوكب الأرض اللي بتجيله رغبة مفاجأة في المشي واجترار الذكريات. وانك مش لوحدك اللي بتحب ريحة الفل والياسمين. ولا لوحدك اللي نفسك تشرب عصير قصب وتضحك من غير سبب..

وتكمل الصدفة بعابر سبيل. بغريب جديد ينضم في السكة وعنده برده ذكريات وهم عايز يفرغه علي الأسفلت. وتكتشف ان حواديتك لسه بتضحك الناس اللي عندهم حواديت زي حواديتك، وبتضحكك.. وانهم برضو زيك، قربوا ينسوها.. عشان احنا كلنا حزانا..

وفي الآخر تروح بيتك مبسوط انك عملت حاجة من عاداتك الكويسة: خليت حد ماتعرفوش مبسوط. أو علي الأقل مسحت حته من حزن ماقالكش عليه. وتضحك جدا من فكره ان في تلات بني آدمين مايعرفوش بعض اتقابلوا صدفة ودلدقوا همومهم علي الأسفلت.
وبعد ما تروح. تكتشف ان الصندوق اللي اتفتح من شوية مش عايز يتقفل، ونفسك تفضل تدلدق كلام كتير مجاش في بالك انك تقوله، فتكتبه.. وتكتب كمان غيره وغيره..

النص: لأمينة زكي

Lasto Adri

Popular tracks