من كتر ما قولت
احييني النهارده وموتني بكرة.. 
مفيش نهارده لحقت اعيشه ...
وكل بكرة 
كنت فيه بموت.

مشيت جبان
و مشيت جرئ
و مشيت غبي وسط البيوت
فتشت كل شبر أبحث عن حنان
و جريت وأنا بلهث 
زي كلب 
فقد الأمان
وحاوطت قلبي .. بدراعيني المرعوشين .. وسألت.
يا ترى يا قلبي
لسة قلبي؟
ولا خونت الجتة أنت كمان؟

سألت وعنيا الدموع تملاها.
يا ترى اللي جاي قد اللي راح مني؟
يا ترى اللي راح بالفعل راح مني؟
ليه كل البشر ديّا ما راحمينني؟
سألت وعنيا الدموع سايباها.
ووشوش غريبة من آلاف الأماكن 
بتمُر جنبي
بتمُر كل عيون في ألف متاهة
ستين من الأيام تعيش حواليا
ستين من الأيام أتوه جواها
يقروا الجيوب 
و أقرى العيون
أنا الصديق المختفي وسط اللي ظهروا
في البداية
أنا الصديق الي زهد كل اللي عبروا
للنهاية 
أنا الصديق اللي صبر
لما مل الصبر منه
ولا مرة نال
 زي اللي صبروا
 طبع الغواية.
 
 يهتز بيا الريح على كفه السنون
 ألف مرة غشيم و نص حنون
 يرج عقلي في كل حتة، وطرف  
 زي أوضة صغيرة
  جواها ميت مجنون
  أهدى وأثور.
  أنعِم و أجور 
  ووقفت على طرف الورق ولقيت
  قلمي ف ايدي 
  وقلبي على شُعلة وابور
  وكتبت زي ما قال حداد وبكيت
  في أثر للعِشرة 
  في أثر للعشرة مهما تهون
  ووضعت ايدي في شق فيه تعبان
  ورضيت هوان الخسيس وآه م الهوان
  وقال حكيم بيمُر على قورتي بخشونة
  فتش في قلبك تلقى حكمة وصبر
   و صديقتي كانت قاسية أو كانت حنونة
  مصيرها تعرف، لما تفهم.
  يعني ايه إنسان.
  
  كات إيدي دايما ع الرحايا
  وقلبي دايما مش معايا
  دلوقتي قلبي على الرحايا
  وإيدي مقطوعة ومفيش
  بيعُض لحمي الليل ميألمنيش
  و يبص بس لقلبي أعيّط دم 
و ابص أنا وعينيا تنشع هم
مش دي ملامحي 
ولا دي ايديا 
ولا دي كمان نظرة عينيا .. لأي شئ
مش ده حسن
 اللي كان 
 بيفيض براءة
ولا حتى حسن الجيّ .. نُص برئ 
مش ده أنا 


كل المعاني غريبة قدامي 
وكأني لسة من ساعات مولود
وكأني بعد ساعات هكون مفقود
آدي الحياة لما تقع فيها الفريسة
آدي الضلوع لمّن تكون هي الحبيسة
و آدي الونيسة
بتنسى كل الذكريات 
وأنت...
وبتبدي تقرا الحياة طوالي
امشي واطوّح ايدي وأنعي.
أمتى يا زمن تصفالي؟
و أبكي
 وأغني
 وأغني 
 وأبكي .
 وأقول في موالي 

" كسى قلبي بالمُر وراح
أتعب من يومها ويرتاح
و يعيش كل الناس ليل واحد
وانا ليلي ما يطلعله صباح " 

ويصقفلي الرايح والجاي.
من كل ما أقول أنا مرة الآه
بيقولوا الله
 الواد شاعر
وغويط جوفه
وقلم واعر .. لما تشوفه 
 تلقاه البطن بتنضح بمعاني
و الله وعَز جلال حلفانه 
والله ورحمة ما خسرته وما اعظم شانه.
بكتب مش مستني التصقيف 
ولا لجل انتشي لو هَتَف الهّتيف
بكتب علشان والله يا ناس
 قلبي مِعاني.
 بكتب عشان اللي ما يعرفش الطريق
  يقدر يشوف
   ما يسيبش نفسه يتسحب من ديله 
    فار تجارب 
     شمعة
 من قبل اختراع ضي الكهارب
 بتسيح عشان ما بتقدرشي تقرا الحروف
 هارب من أشياء منططقية لشئ مألوف
 بكتب عشان تقدر تقارن 
 خوف ب خوف
 يعني اللي خوفه تمللي من قلبه
 ازاي تقارنه
 باللي خوفه من الظروف؟
 يعني أنا ..  كمثال
 أوقات بخاف علشان ..
  لازم أخاف
 مش لجل شئ متشاف 
 خوّفني ..
 أوقات بترجُف إيدي 
  مش من خضة
  ولا من برد 
  ولا شوفت شئ يصعب على القلب البرئ الني
   أوقات بخاف لجل انه بس
   لجل انه بس
   الخوف
   يعرفني ..
   إزاي نقارن بس خوف ممكن يموت
   بخوف حتى لو مرة مات 
   بيفضل حيّ
   إزاي تقارن خوفي بس بأي خوف تاني 
   إزاي تقارن حد يعني.
في مرة عانى
   بحد طول الوقت 
   مستني
    يعاني 
مجاني يا قلبي الألم
 مجاني
والراحة تسوى ألوف كتيرة مش معايا
  
آدي الحكاية 
مهزومة باكية ما بين إيدين راوي الحكاية
مكانتش تملك إيدي غير طرف البداية
ونص وقة صبر 
مبقتش تملك إيدي غير طبع النهاية
  
والصبر فييين؟
الصبر فين؟
الصبر فين دلوقتي؟

   
   
   
   















الحكاية - حسن محمد & حسام حسن

دا أنا زاد فى قلبى حنيـن
ودموعـى ماليـة العيـن
طمعـان بقـالى سنيـن 
إنى أزور المصطفى مـرة
واحشنا يا رسول الله <3 
صلى الله على محمد وعلى آله وصحبـه وسلم
المنشد/ أحمد عادل

واحشنا يا رسول الله l المنشد أحمد عادل

وارد باي كلام

الخير مالينا - محمد عزازى

رمضان جنه

ياعرب على ورق

2-حمزه نمره - بتحب حاجه - فوق من اللي انت فيه

0912138507

اتدللي

الحساب الرسمى لجمعية رواد صناع الحياة بالفيوم وهى جمعية تنموية واحد فروع مؤسسة صناع الحياة مصر التنموية والتى تهدف الى خدمة المجتمع من خلال المشروعات الصغيرة والمساعدات الطبية والخيرية

الخير مالينا - محمد عزازى

صناع الحياة الفيوم

Related tracks