كل سنه وكل ام بخير . . ♥
وربنا يطولنا ف اعماركم ياااااااارب :)

النهاية

بتفكر ليه . . !؟

القصيدة :

طيب 
نعيد العمر من تاني 
نشوف مين اللي كان غلطان
نشوف مين اللي كان بايع 
ومين شاري ومين اتخان 
ومين فينا اللي متحول 
نعيد العمر من تاني 
نجيب العمر م الاول 
نشهد اي ناس تانيه 
نحكم اي حد غريب 
ونحكي القصة بصراحة 
نقول الوضع بالتقريب 
حاجات كانت حياه بينا 
حياه كانت بتبنينا 
نقصنا لما كملنا 
كملنا لما فاض بينا 
فقررنا نكون اتنين 
فشلنا نكون ف يوم واحد 
طريق مسدود ووفرناه 
وقولت ارتحت وارتاحت
ولكني ساعات يعني 
بحن لحاجة كات بينا 
بحن ساعات لضحكتها 
وخوفها عليا وعنيها 
بتوحشني ف يمنعني 
شعور العجز والذلة 
وتوجعني اما توحشني 
وديما بتوجع بيها 
سجين ساكن حيطان دايبة 
شروخ الحيطه ف وريده 
ايدين ف الاحتياج سايبة 
نيران الشوق تاكل ايده 
بنيت ليها قصور فيا 
رميت الدنيا ف اديها 
امنت ان الحياه هيا 
وهيا الجنة وما فيها
ماعوزتش اي حور غيرها
ماشلتش غيرها ف ضلوعي 
ماسبتش للدموع عينها 
وشلت وجعها ف دموعي 
انا كنت اللي تتمنيه 
بقيت اللي انتي بتمليه 
واهملتيه 
لدرجة ان وقت الاحتياج سبتيه 
وكان شاغلك حاجات تافهة
انا اللي قبلت فيكي عيوب 
ماحدش ف الحياه شافها 
ماجتش ف لحظة ونسيتك 
وقلبي اللي انتي اهملتيه 
ف وقت الضيقة كان بيتك 
انا مانكرش . . حبيتك 
وحبيت نفسي ف وجودك 
وحبيت الغنى بصوتك 
وشوفتك ف الحياه قبلة 
صدمتيني بإلحادك 
بقلبي فرض او سنه 
يا اكتر حد وصلته 
لحد حدود ماحدش 
غيري يوصلها 
وحد الله كأن عنيا بالملي 
عشانك قلبي فصلها 
بقيت شايفك ولو غايبة 
ماسك فيكي ولو سايبة 
لحد ما قلبي مل الوهم 
وحبك كان ف قلبي سهم 
طلعته 
ورق شعري اللي كان مكتوب 
ف حبك كله قطعته 
وخدت عهود على نفسي 
بإني انقض عهود حبك
وابطل اني اشتقالك 
وابطل اني اعيش سازج 
بقيت انسان يموت اسهل 
من انه ف لحظة يحتاجك . .

نِشهّد مين . . !؟

كراكيبك زحماك ع الفاضي 
خنقاك شنقاك بحبال شايكة 
واكمن الدنيا بقت عاركة
بتكرمش مشاكلها ف ايدك
واكمن الخلق ماهيش سالكة 
بتسيب قبل ما هيا تسيبك 
وبتبعد اكتر م اللازم 
مع انه ماكانش ف يوم لازم 
تظهر للدنيا بألاعيبك
وعشان رفضت تقبل عيبك 
قررت تعاقب كل الناس 
وبقيت تبليهم بكئابتك
واما ف يوم قررت تآمن 
زيك وعلى طريقتك سابتك
ماهي خافت تتكركب جواك
ف بقيت انت من كراكيبها 
والدنيا اللي انت ماحبتهاش 
هتلاعبك برضو بألاعيبها 
والبت اللي انتا بتعشقها 
هتحب الدنيا وهتسيبك 
واكمنك تايه بالفطرة 
من تاني هتسكن كراكيبك 
وهتفضل وحداني ومكسور 
وعشان الدنيا طابور بيدور 
وعشان ملزم باللي عملته
الكل بييجي عليه الدور 
والايام بتخونه ف خانته . .

كراكيبك (Karakebak)

فيلم الودانة

الكلمات : 

الوردة اللي إنت جايبهالها
مابقتش بلاستك زي زمان
مابقتش بترمي بسرعة الشنطة
وتجري عليها بالأحضان

وتغنيلها اغنية اشتغلت ف طابورك
وتدندن وياك بالالحان
وتقولك ايون عارفاها
دي بتاع شادية
وبنبرة صوت ديما هادية
بتقولك وانت كمان طيب

وانا عمري ماكنت ف يوم طيب
ولا طيب خاطري ف يوم غيرها
انا اكتر واحد بشغلها
بمشاكلي وعندي وتفكيري
ازاي رغم ده كله ولسه
ما يأستيش يوم من تغييري
دنا نفسي يأست إني اتغير

بترد تقولي ازاي يابني
وانا جنبك عايز تتحير
دنا عايشة عشان اصلب ضهرك
واكونلك قلب وعقل وعين

ماتشيلش الهم ع كتافك
وانا يعني كتافي دي راحت فين
دنا اصلا مخلوقة عشانك
وعشان ابقالك حضن وبيت

رغم اني كبرت لكني بكيت
رغم اني مابنساش بس نسيت
إن امي بتكبر ويايا

وإن الشنطة اللي رميتها زمان
دلوقتي بتتبدل بهموم
برميها وبجري لأحضانك
وبفتح عيني القاكي ف يوم
قطر العمر الخاين . . خانك
بدل كرسيكي ومكانك
لمكان بقى مكتوب فيه اسمي

كات عارفه الجاي من الاول
وإن حصونها مش هتطول
ف لأخر لحظة ف صحتها
كات عايشة بتنقلها ف جسمي

ازاي شعرك لونه اتحول
نفسك بقى ليه صوته مسمّع
ليه دلوقتي اما تبصيلي
مابقتش بشوف عينك تلمع
ليه دلوقتي اما تبصيلي
تلقائي القى عنيكي تدمّع

والله انا اهو يامه كويس
وانتي كمان لسه بميت صحة
والادوية بكره هنلقاها
مش هتفضل كده دايماً شاحه

تقرص ع ايدي وتضحكلي
وتطبطب ع صدري بإيدها
وتقولي إن النفس يا ولدي
لها يوم وبترجع لخالقها
وف جنة ربك لينا معاد

عمرنا ماهنبقى ف لحظة بعاد
لو حتى انا كنت ف سابع ارض
هدعيلك حتى وانا ف قبري
وادعيلي ف يومك سنة وفرض

خد بالك من روحك يابني
جه الوقت الفارق نتفارق
ماتخليش تعبك يتعبني
عمري ماكان غير تعبك فارق
ولا غير حبك كان يحييني

وماتنساش لو فاضي تجيني
وتكلمني وهكون سمعاك

وماتنساش الورده اياها
وتجيب كالعادة الشنطة معاك

. . . . . . . . . . . . . . . . .

#الوردة (القصيدة كاملة)
#ع_الهامش
#كتاباتي
#21-3

EL - WARDA الوردة

الكلمات:

 رسالة لآخر العايشين ف احلامي . .

انا عارف بإني ماكنتش الكافي
وان الحمل كان اكبر من اكتافي
واني يمكن اتعودت ع الكتمان

رسالة لكل شئ عايش ومات فيا
انا مش لسه نفس اللي عرفته زمان

بقيت ابرد . . بقيت اقسى
بقيت اقصد ساعات انسى
بقيت اللي انت فاكره انساه
عشان مبقاش هنا لسه

ولا فاضل لأرضي حدود
جسد موجود ف وسطيكم
لروح انسان ماهوش موجود

ف بتمنى ف مرسالي 
تلاقي مرسى ليك تاني
تدور ع الحياه جايز
تكون بالفعل ليها مكان
وبدعيلك وبالتالي
بشوفك خير وبدعي بخير
وبترجاك ده لو عايز
ماتمشيش يوم ورا العنوان

تاريخ اليوم حروف دايبة
ومُرسِلها : جسد بهتان
.................................
#الرسالة(القصيدة كاملة)
#ع_الهامش
#كتاباتي
#30/8

ع الهامش

EL RESALA - الرسالة

! هيا الدموع جفت 
ولا انت قلبك مات ؟

ولا الساعات وياك
مابقتش تمشي سعات 
والعمر ضاع ساكن

حنيت لناس لكن
كل البشر اوقات
كل اللي عدى عليك 
راح يبني ف الجايات
كل اللي كان ف ايديك 
راح يابني ماضي وفات

ف ماتلتفتش وراك 
ولا تنتظر غيرهم
انا اصلي كنت هناك 
ملهوف اشوف خيرهم
مالقيتش غير احقاد 

ف مالوش لزوم يعني 
وقت العمار يابني
تجري على الانقاض
وانت اللي بتعمر

خيرك ف مين يطمر
 ! لو كلهم خاينين
ماتقولش كان فيهم
! كان يعني فيهم مين

انصاف بشر عايبة
اصناف خطر سايبه
وانت اللي سايبهم
ديماً بييجوا عليك

دلوقتي شوف بعنيك
ازاي بقيت وحدك
 أثر ف مين بُعدك 
! غيرك يا غاوي عذاب 

هوا حنين كداب
انا عارفه وملازمه
مايفوتش يوم واحد
الا اما قال اسمه
وعاد عليا ماضيه

وعاد عليا بإيه 
وجه عليا لفين
انا نفسي بين سدين
ومش لاقيلي حلول
مالقيتش ليا مكان
لا ف وسط دول ولا دول

ف بقيت كما البندول 
مش راسي على حاجه
ع الحال ده ليا سنين

تخبطني موجه شمال 
تحدفني موجه يمين
والاسم قال عايشين
 . . وقلوبنا تلاجه

::::::::::::::::::::::::::::::::::::::::::::::::::
#حنين كداب(القصيدة كاملة)
#ع_الهامش
#كتاباتي
#24/9

7ANEEN KDAB - حنين كداب

ف سنة ٢٠٢٠ فاكر
ان الدنيا اتقفلت فترة
كان بعد يومين فيهم مطرة
وعواصف وصريخ ناس وسيول
 
وفضل يومها الاعلام بيقول
دي ظروف وتروح بكره لحالها 
والناس ماشية تكلم حالها
ع الدنيا اللي اتشقلب حالها
والجو اللي ماكانلوش يوم زي 

وماحدش كان عامل يومها
. . ولا أي حساب للرعب الجي 

انا فاكر تفاصيل الذكرى
وكأن الموقف كان بايت
المطرة انزاحت من بكره
بس المشهد لساه باهت 

قالوا ان الغرب اتصاب بكابوس
ويومين ويقوموا بخير منه
لا اهو أول ولا آخر فيروس
علشان يبقى السابق سنه 

ويومين بيجروا يومين تانيين
والخلق بتبدأ تتوتر
وكعادة كل المصريين
اول مابنقلق بنهزر
من غير مانحس 

والعالم ولا اخبار ولا حس
على اي لقاح ولا اي علاج
كل الاخبار كانت رايحة للحظر وبس 

اقفل كل الدنيا وطبق حذر التجوال
طبق تعتيم من اي مكان على أي سؤال 
وامنع فورا اي انتقالات

قالوا ان مفيش ف بلدنا حالات
مع اننا كنا بنوعاها
نسمع اسعاف العربيات
وكأن الموت جاي وراها
والضحك بقى بيقلب بدموع 

قالوا ان طريق العزل طريق
مافي منه رجوع

وان احنا نحرص على روحنا
من يومها لا جينا ولا روحنا
على اي مكان 

قالوا طول ما الواحد كان وحده
هيعيش ف آمان
ف بقينا بعاد
بنموت ولا مخلوق كان عارف للراحة معاد 

والعالم رافض يستسلم
والناس خايفة حتى تسلم
وف مشهد ميئوس من روحه
العالم كله بيتكمم
علشان يهرب 

والجوع مابيتهزش بالخوف

ده بعيد عنك وحش لا يعرف
لا كوارث ولا معاناة وظروف 

و الناس مسجونة ف بيوتها
محشورة مابين قوتها وموتها
وحطان الجوع عمالة تضيق
وبتعصر كل دقيقة ضلوع 

والجوع عمره مايتسد بجوع

والفيروس عمال يتسحب
من غير ولا صوت 
وبيتسرسب زي الميه
وبيتسرسب وياه الموت 

والاعداد غصب عن روحها
بتسجل مكسورة الاوجاع
بتسجل كام ميت حلم وضاع
وبرغم ما تظهر كدابة 

والعالم بقى زي الغابة
وسباق مين يتفوق على مين
واتناسوا حياة البني آدمين
وبقوا بيتراهنوا على موتنا 
واحنا إكمننا دولة فقيرة
مهما بنصرخ مكتوم صوتنا

مكتوب بس المسموح يتقال 
مكتوب تفضل شايل ف شوال
شايل فيه بيتك وطموحك
وتحرص اكتر على روحك
علشان ماتصبش ف يوم مسئول 

ماهو اصل لقاحه ماهوش على طول
ولا عمرك احسن من عمره
ده لقاحه يادوب فعال كام شهر
واكيد انت يهمك امره 
لكن انت لقاحك ذل وقهر
وتعيش ديما ليهم شاكر
مهما بتتهان او مهما تضيع 

انا مهما انسى هفضل فاكر
. . نظرية لما شافونا قطيع

::::::::::::::::::::::::::::::::::::::::::::::::::::::::::
#كوفيد20
#ع_الهامش
#كتاباتي
#18-2

ع_الهامش

COVID-20

.  . ( Single ) مدام مش لاقي ليا شبيه طبيعي إني أعيش

El DoctoR

Popular tracks