
الحب جنة بتشتهي روحك
وأنا قلبي من كتر البعاد
كان سد
كل الكلام في المشتاقين كان ضد
لما الوعود اتحولت لجراح
كان قلبي طير وبيهجرك دايما
ولا مرة قرر يسكنك وارتاح
أنا كنت آدم ف اشتهيت الأرض
و عشقت حوا ف كلت م التفاح...
قلبك صديق...
دمعك طريق..
عينك بترسم م البكا ..فيا اشتياق...
"قبل الفراق"..انا وانتي كنا اتنين زمان
تشبه قلوبهم بعضها..
طعم الكلام..طعم السكات
أنا وانتي م الآخر حجات
الحب جمّع شملها
بس الزمان وياكي ليه
ما رضيش يكمل قصتي
كل اللي عيشته زمان ناسيه.
البعد غير نظرتي
كل الحجات اتغيرت..كل المشاعر ميتة
بعدك بيشبه رعشتي..أول يناير ف الشتا
عينك بترسم فيا خوف
م البعد لما يطول أوي
م الضحك لما يغيب سعات
ده كلامي عنك كان سوي
وعنيا بتملى السكات...
ف ما تمسكيش في الحضن وانتي بتحضني..
وما تسكنيش.. في ضلوعي لما بتنحني
وما تبعتيش طراطيش كلامك في الجواب..
أنا وانتي كنا اتنين صحاب..ما بيفهموش..
نظرة عيونك في اللقا ..كانت فشوش
ما سابتش فيا الشوق دليل
للذكرى أوقات الفراق
جواباتي في غيابك بديل..
بيسد نقص محبتك
وسطوري آمنت بالخداع
ومبادئي كفرت بالوداع
إحساسي بعنيكي إندفاع
ندّمني زي ما فرحك..
مع إني عمري ما أقول سلام
وكلامي كله يا دوب كلام..
كان شعري ف عنيكي إلتزام
ما قدرش يهجر حضرتك...
إحساسي بيبانلك حجر
وأنا قلبي أضعف م الشجر
لما الخريف...يتمكّنه
والريح بدونك تسكنه
ويلاقي فجأة إن القدر
بيحط قلبك ضيف شرف
وسيناريو فيلمك ..كان طرف
بيذله رغم معزتك..
سامحيني لو شعري انحرف
ما قدرش يوصف جنتك....

طراطيش كلام / مصطفى عناني

الشتا ..
بقا طعمه بارد عن زمان
كل النقط بعدت أوي عن بعضها 
كل البشر.. أمنت بحكم التفرقة 
وبناس خلاص مابقتش عارفة تروحلها
انا لسه مادد كفي لعيون السما
يمكن تشوفني ..تشوفها روحي
ف تتسند
الشوق ده أبوخ مما كنت انا بعتقد.!
بشتاق لمَن كانت هنا..وراحت خلاص
كل الأناس ..تاهت ف روح كل الاناس
والخوف أساس كل اللي بيحبوا بضمير
عيبي إني بربط ضحكتي ..ب حجات كتير
بربط وجودي الحي بوجودك
وبموت مع غيابك كمان
لأجل الأمان ..
وزعت من نسلك على كل البنات
ف اشتاقلهم ..
وكأنهم إنتي !
أنا مُت لما بعدت.. قربتلك مُتِي !
ليه الحياة مصممة
تعند في تفكيري
ما اقدرش اشوف روحك..ساكنة ف خيال غيري
ما أقدرش لما أحضنك..إني أستهين بالذنب
ما أقدرش بردو أبعدك.. فـ تحبي تنفيري !!
يا حبيبتي انا المقتول..من حيرتي ف عنيكي
بمشي ف شوارع حلمنا وأبكي
ليه يعني كُنّا..
ثم مااا كُنّاش
ده أنا لسه كنت هناك..
ومع الرصيف بحكي
حتى السما دمّعت..لخيالك الموجود
كل الشتا يشهد.. إنك فارقتيني
ف بلاش تخلي السما ..بينها وبيني حدود
وبلاش جوابي يخاف..إنك سمعتيني !!

الشتا / مصطفى عناني

أكاد أجزم ..
بإنك بردو لسه وحيد
بتتدارى ف سواد الليل
عشان وحدك
بتاخد م الهزار ساتر.. 
على حزنك
بتتعلق بناس ف الأصل مش عايشة
مغفل يا جدع جدا..
بتربط روحك الحية ب عضام هشة!
يجوز إنك..
تكون خايف من الذكرى
يجوز كل أما بتقرب يروحوا بعيد
أكاد أجزم ..بإنك مت أحيانا
وإنك بردو لسه وحيد !!
زمان جدا ..بقا يشدك
وشكلك م الهموم ..خضك
بتاخد وهم على خدك ..
وتتمعشق في أحضانه
زمان الليل ده كان بيساع..
لكنه استكفى بالأوجاع
وأصبح زي سهرانه !
يا متعشم في ناس باعت
او اختارت
تبرر بعدها بشويش
ف ينسحبوا كما المطاريد
وفجأة تزيد ..
قوة خيوط المشنأة
بطل سذاجة وفوق بقا
عمال بتحضن م الهوا
ارواح خلاص متفرقة
إدمان لسوء الاختيار
كالعادة من كتر الحنين 
بتحب مين سابك خلاص 
ومش عارف حبيبك مين !
عبيط وبتعمل العملة
وشايل هم اوزارها 
عيونك م السهر جفت 
محدش منهم زارها
عشانك كنت بتقرب
ف تتغرب
وتتسرب مشاعرك طيش
تضحي ..
وهي ما تضحيش..!!
طريقك يحضن الاحزان 
ويستقبل مزيد..
ف يحيد
ف تستسلم لما صابك
وتفضل زي ما انت وحيد

لسه وحيد / مصطفى عناني

خطوات الدنيا بتترتب زي الشطرنج
الخطوة بطيئة ومربوطة ببعض الاحكام
صعبة الايام ! 
ولكنك خايف تتقرب طبعا للموت
وبترمي الضحكة كتير جدا..لكن بشروط
ف بتحزن من كل الاطراف ..مع أول طابية تكشّرلك
الدنيا سواقي بتندهلك ..
يا اهبل هتدوخ
الدنيا سواد.. جواه ابيض بيداري شروخ
شطرنج عقيم ..فكرته تستنزف أجزاءه
لحماية شخص !
الخوف جواك اصبح مندس 
وحصان مستعجل .. بيفوته الحلم بمسافات
كلنا فترات عابرة بتزرع.. بعض الفجوات 
تتسرسب منها فتات ماضي ..ل حاضر مشئوم
والليل مضطر بيسرق م المشتاق روحه..ويطعن في النوم
واهو كاس بيدور ..وبيشرب منه البني ادمين
سكران بيتوه مش عارف بس يقابل مين
والليل دخان
وأثار الذكرى بتتبعتر في خطايا زمان
ف يشوف الناس أغراب لكن ..مستني القرب
ويموت الملك الفاضل.. مجبر ع النسيان ! 

شطرنج / مصطفى عناني

الليل سراب خدّاع..وبيجذب الناظرين
بتشدك الرحلة ..لمكان ماهوش لـ اللُقا
ولا حتى كان مُفترَق
فـ تتوه مع المسافات..مقياس يكفّي الغرَق
الليل بواقي خيال..من ذكرى شفّافة
تِبسطله ليه ايدك ؟
الليل يحب الصمت ..
تحكيله
فـ يبيدك ! 
...................................
وخيط دايب ..مابين الذكرى والتانية
حدود فانية 
بتربطني بشريط كداب
يكُرّ ف كل لحظة تسُرّ..يشوف كل الغناوي عذاب
ياليل طوّل
يا ليل طوّل
وعيد الحزن م الأول في توب ضحكة
وخوض المعركة بقوة..ماتستسلمش
ماتذكرنيش..لمَن ضلّل طريقي بخوف
وسار هو
وماتفوتنيش وحيد لاجئ ..لـ روح حوّا
كفاية زرعتني مشتاق..في أركان المكان والوقت
خلاص صدّقت 
بإن الحلم كان صورة فـ سواد فاحش
وإن الحُسن كان هامش..في روح الزاهدين ..
لله
لكنّي ضعيف ..وعقلي إن قالي صوم عن شئ
بيرجع قلبي يتمناه !!
يا طيف سارح لحزن غويط..بيتخبّى ف سِتار جارح
فـ يتحلل بواقي الضحك
ويطلع منّه تنهيدة ...
بعيدة ..استنجدت بـ بعيد..
توقّع ..كام ايدين باشت !؟
يا ليل باهت 
ما توهبني ..من الماضي الضعيف مأوى
وروح حافية بتستقوى.. وتسرق م الزمن نفحة
توّصلني لزمان تاني ..
محدش فيه يتوه في الليل.. محدش فيه يغيب عن حد
بـ فِعل المشهد الفاني !!

نص "الليل " كلمات وإلقاء -مصطفى عناني-

كنتم معانا || مصطفى عناني

ماذا لو " شارلي شابلن " قال كلامه ، وسنّدوه بعكّاز
ماذا لو صوت الحقيقة ..سكوت
في شكل مجاز 
ماذا لو فيه بُسطَجي يطلع لفوق ..ويجيب رسايل قد ما كتبنا ، أو أقل قليل
يمكن ساعتها كنا نلقى بديل 
عشان نبطل بُكا..
الليل بينزف ذكريات بالكوم ، ومفيش كَتوم اشتكى .
ماذا لو عين اللي جيّ تبان ، من قبله بشوية
مستحيل يحصل..
القَدَر موشوم على عقرب ، 
كان عشان يلدغ..مش عشان يوصل !
الزمن ترنيمة منتظمة 
يبقى ليه نعزفها متأخر
ارتجالة عمر عشوائي ،
من بواقي المشهد الأكبر
الخطاوي تايهة ع السكة
والسنين سَكّة ، ماليها الحزن
الحقيقة قصادنا مرتبكة
خط سير الناس بياخد اذن
يبقا دايرة 
جوا قُطر الموت
التابوت ، 
مفتاحه كان جواه
والبشر شايلاه على كتافها
دي الحقيقة
مصيرنا هنشوفها 
خرم ابرة 
من جدارالخوف
ينظر المشهد ويستعجب
لما سِن العالم المقصوف ،
يكتب الماضي
يحنّ لمين !
البشر واقفين على الناصية
شفّوا روحهم ع الشجر والأرض
البشر مافضلش منهم حد
غير تراب 
على أرض بور صامتة
النهاية..
قد تكون نقطة 
من بداية خط سير تاني
الثواني ، 
قد تكون أكبر
من حقيقة
إنها ثواني .

النـهاية \ مصطفى عناني

انا مرة واحدة صحيت على الدنيا 
نفضت روحي على التابوت
ونفختها..
كان مين نفعني !
مش فارقة..
لو جواه براح ، ممكن يساعني 
طالع في سلّم بس مش نازل 
طالع بحقي..
بس متنازل 
عازل في قلبي بيمنع الضحكة
كل النُكَت مُبكية..
ومهازل
انا مرة كنت معاكو ولوحدي
انا مرة كنت لوحدي .. ولوحدي
انا مرة واحدة صحيت على الدنيا
ولقيت بشر بتموت.. علشان بشر هتعيش
الحزن متخبي..والضحك مش سكّر
انا مرة سيبت دموعي ع الشباك
حسبوها بتمطّر..
قفلوا عليا الشيش !
انا مرة خوفت .. عشان وحشني الناس
مع إني يعني بخاف من الزحمة
أنا مرة توهت ..ومااتلقتش دليل
الأرض سودة ، والسما رحمة 
بختار حجات اسوأ كتير مـ القدر 
بختار بشر ..معدنها بيصدي 
بختار حجات ضدي
بختاركتير..
مع إني ممكن اعيش بدون ما أختار
كان ممكن ارمي النرد في الدنيا
لو كنت عارف إني يوم هحتار
معرفش يعني لسه ليه بتضحكوا 
"والنكتة دي مااقصدش بيها هزار ! " .

النُكْتة / مصطفى عناني

بضعف.. / مصطفى عناني

نفضت روحي ، بس فيها ذنوب
نفضت قلبي، 
وقعوا منه الناس.. 
نفضت عيني
شوفت بيها عيوب 
طب دي الحقيقة.. ولا ده وِسواس !

الدنيا سودا ، ولا بالألوان
كان عندي سر 
بس عندي حيطان ..
كان نفسي أكون عصفور وما اصطادنيش !
ومكانش قصدي
إني أكون إنسان ..

هي دي جنازة ، ولا فرن العيش
هي دي جوازة
ولا وَكْر حشيش 
هي دي الأحلام 
ولا أرد الشيش
لما يطلع جوا قلبي نهار

كنت م الثوار ، ولا أنا خاين
ليا فيكو حجات
ولا متداين
خوفت م المسافات
ولا مآمن
إنكم جوايا مابعدتوش ..

أسئلة جوايا بتحارب
أسئلة
بتدق لي نَعشي
أسئلة بتدور ، وأنا دايخ
حد هيجاوب ؟
ولا أقوم أمشي !

مصطفى عناني/ Moustafa Anany

Popular tracks