الجخ



 

حبيت تدوس ارضى

ارضى ما حبّتشى

هتبات هنا الليلة

بكرة ما حاتبتشى

 

حمل قنابلك هات

كيّل وحملى

راح اموت ووقت ما اموت

عيل يكمّلى

 

معناش سلاح مـ اللى

ولا طيارات مـ اللى

والبندقية اللى فى ايدى

حـ يا الله كام مللى

 

بسمى وبصلى

بصيب بيها أباتشى

هتبات هنا الليلة

بكرة ما حاتبتشى

 

هشام الجخ - أباتشي

خبِّئْ قصــــــائدَكَ القديمـــــــــةَ كلَّها

واكتبْ لمصـــــــرَ اليومَ شِعــرا مِثلَــــــها

 

لا صمتَ بعدَ اليـــــومِ يفرِضُ خوفَهُ

فاكتبْ ســــلاما نيلَ مصــرَ وأهــــلَهــــــا

 

عينـــاكِ أجمــــلُ طفلتينِ تقـــــــررانِ

بأنّ هذا الخـــــــــوفَ ماضٍ وانتــــهى

 

ويداك فدانان عشقٍ طارحٍ

ما زال وجهُكِ في سَماهُ مُؤَلَّها

 

كانتْ تداعبُنـــا الشـــــــوارعُ بالبرودةِ

والسقيــــــعِ ولـــــم نفسَّـــرْ وقتَهـــــــا

 

كنــا ندفِّــئ بعضَنـــــا في بعضِنــــا

ونراكِ تـبـتـسـمـيـــن ننســـى بَـــــرْدَهـــا

 

وإذا غضِبنـــا كشَّفــتْ عن وجهِهــا

وحيــــاؤُنا يــــأبى يدنِّــــسُ وجهَــهــــــــا

 

لا تتــركيهـــم يخبـــروكِ بأنـنـــــي

متمـــــردٌ خــــــــــــانَ الأمــــانـةَ أو سَها

 

إني أعيذكِ أن تكوني كالتي

نقضتْ على عَجَلٍ وجهلٍ غَزْلَها

 

لا تتبعي زمنَ الرُوَيْبضةِ الذي

فقدتْ على يده الحقائقُ شكلَها

 

لا تتــركيهـــم يخبـــــروك بأننــــي

أصبحـــتُ شيئاً تافهــــاً ومُـــــــوَجَّــــــها

 

فأنا ابنُ بطنِكِ وابنُ بطنِــكِ مَنْ أَرادَ

ومَــــنْ أقـــــالَ ومن أقــــرَّ ومن نَـــهَى

 

صمتَتْ فلــــولُ الخــائفيــنَ بِجُبْنِهِم

وجُمُــــــوعُ مَنْ عَشِقُــــــوكِ قــــالتْ قَوْلَها

هشام الجخ - مشهد رأسي من ميدان التحرير

من كام شهر

خدت قرار مش هاكتب شعر

وإني هذاكر وانجح أفلح

واخد البكاليريوس وأتجوز

وأشتري عفشتي بالتقسيط

ن كام شهر أنا كنت عبيط

 

من كام شهر

زرعت الميه وطرحت فجلة

جاب العجل الفجلة لعجلة

وقالها مهرك

ريحة قهرك

فايحة في نهرك

قالت إوعى تعيش كسلان

بابا نويل بيوزع يويو في حرب إيران

 

شامم ريحة جبنة قديمة

فيلم السهرة مكنش سياسي

كان عباسي

عبدالناصر حب يقلب فينا الروس

ساوى الروس

 

لبرل نفسك

لأجل ما تبقى مثقف زي صاحبنا إياه

عندك ماركس عندك هيجل

عندك حسن البنا وحجي

عندك زحمة

صفي ونقي

 

منحنى عرض النسكافيه واخد إفيه

حاصل ضرب النكسة في حرب أكتوبر في معاهدة ديفد

بيساوي حاصل ضرب النار في التار في العار

مرفوعه لأس اتنين مخاويت

وزي إمرؤ القيس وجلامدة اللي بتنزل من عل

عندينا واد اسمه علي بيطلع الدبابة ويلف بيها في البلد

ومراته دايرة بشعرها تدور عليه

ومتسألوش أنا قصدي إيه

أنا نفسي مش فاهم كلامي

بس الكلام واعر حويط

أنا اللي دون الناس.. عبيط

 

من كام شهر وكنت بحبك

كنت بوضب روحي واحبك لأجل ما أقابلك

كنت في كل حلاتك قابلك

تفرحي قابلك

تزعلي قابلك

تتقلي قابلك

كنتي الأرض وكنت سنابلك

كنتي الحرب وكنت قنابلك

حتي في بعدك وإنتي مسافرة

وبيني وبينك ألف محطة كنت بقابلك

 

عمري يا "نانا" ما قلبي اتنازل

ولا ساب حقة زي ما سابلك

عمره ما ضحى بسهده وسهره

وجاب من عمره زي ما جابلك

 

هذا الوَجَعُ.. بَقَاياكِي

سِحْرٌ تمدَّدَ بَيْنَ ضِلْعَيَّ

وتَوَارَي خَلْفَ ُسلَّمِ مَنْزِلِكِ

تَرَكَ لَكِي رِسَالَةَ كُلِّ صَبَاحٍ وسَافَرْ..

 

يشهد عليكي السلم المستني خطوتنا

شهد عليكي الشبابيك اللي فتحتيها علشاني في نص الليل

وعز البرد يشهد عليكي محل الهدايا اللي ع الناصية

وكشك الورد

 

تشهد عليكي هدومك اللي قولتلك ما تلبسيهاش

تشهد عليكي إمتحاناتي اللي علشانك مدخلتهاش

تشهد عليكي ودني هوستن جورج مايكل

عم شوقي بتاع الفطير كيف يصير الحال كده

م الإبتدا أنا اللي غلطانلك

وأنا اللي محقوقلك

وأنا اللي دون الناس عشقتك

كنت عايش جوه صدرك حلم دافي

كنت بنسى الناس وأجيلك يوم معادك ياكش حافي

كنت أبسط من بسيط

واكتشفت إني ف هواكي

كنت دون الناس.. عبيط

هشام الجخ - قصيدة سكرانة

إتدلّعي واتبغدَدِي واتفاخري واتباهي

قولي لكل الناس .. ده عشقني والله

لِـمِّي العيال حواليا زِفُّـوني

ظاظوا عليّا وحَدِّفُوني طوب

ما انا اللي سِبْت عنيكي لَفُّوني

وانا اللي استاهل كل يوم مركوب

 

فاتدلعي واتبغددي واتفاخري واتباهي

آدي ضَحِيَّة كمان فِدا رِمشك الساهي

موت الضحايا جَزَايَـا ما انا اللي وَدِّيـتِـك

و لْـحَدْ حَدْ ما وَدِّتُـوش ولا حَدْ وَدِّيـتـك

و قلعت كل سنيني على خَصْرِك

ضَفَّرْت شَعْرِك عشّ جُوَّايا

بايَـعْت حُكمِك وابتديت عصرِك

ووقَفْت ورا عرشِك ومَسَكْت هـوَّاية

 

موت الضحايا جَزَايَـا وكُلَّها ضحايا

مين اللي قال الحب آخره عَمَار

الحب آخره نهاية في رحَاية

القسوة طاحنة والحجر دوَّار

 

فاتدلعي واتبغددي واتفاخري واتباهي

واستنكري من عزتي واستهتري بـجاهي

خَلِّيني مضرب مَثَل من بعد هيبة و وزن

كُبَّي المرار في العسل واملي الفرح بالحزن

 

يعني انتي أولهم ولا انتي اول همّ

ولّا انتي اول سهم إتْسَنْ لي واتسمّ

لو تكشفي ضهري تلقي السهام علامات

وانا زي زرع ف هوا وَطَّى حِيِـي وعَلا مات

 

موت العلالي شرف بس اسمها موتة

مش عدل تبقي ف ترف وانا باطفح الكوتة

ما يا إمَّا نَقْسَمْهُم وَخْزَة قصاد وخزة

يا إمَّا لا مواخذة توتة يا حدوتة

 

وابقِي اكدبي براحتِك واتدلعي براحتِك

طعم الهزيمة جِزَا للي يزور ساحتِك

وانا قلبي يا ما غلب.. مش عيب يبات مغلوب

اهو برضه فِدْتينا وكَفَّـرنا بيكي ذنوب

ولَـحَسْـنا من شَهْدِك وشرِبْـنا من رِيقِك

وسْكِرْنا من كاسِك وكَسَرْنا إبريقِك

وطْعِمْنَا من حُسْنِك وشْبِعنا بِـبَـريقِك

 

ومْشِينا في طَريقِك ورجِعْنا مَـلْـوِ اليَدّ

جَرْحِي قُصَاد جَرْحِك ولا حد ظالم حد

 

ولا انتي فاكرانا رجالة خيبانه

نبكي على النسوان ونْسِحّ في بكانا

كنتي اسألي نانا

اللي اسمها نانا

يا دوب زِعِلْنا يومين واهي دنيا لاهْيَانا

 

ما تكدبيش ع الناس.. الناس دي عارفاني

قلبي خشب لو غطس بِيْقِب من تاني

فماتحرجيش روحِك وتقولي ده عشقني

بدال ما صاحباتك يقولك آدي دقني

 

حِبِّي على قَدِّك واحكي على قدك

وان جت سيرتنا ف يوم ابقي الزَمِي حَدِّك

 

تتدلعي ماشي .. تتبغددي ماشي

وتقولي حبني موت برضه ما يـجراشي

بس انتي من جوا فاهمة ان زمنك مات

وبقيتي زي اميرة قلبها شحات

 

لِفِّي على صحابي .. سِبِّـيني في غيابي

قولي ان عمرك يوم ما وقفتي على بابي

لا كَوِيتي قمصاني و لا جِيتِي زُرتيني

و لا تعرفي مكاني و لا تعرفي تـجيني

 

واني يا دوب واحد دايب ف دباديبك

عامل كما عَيِّل شابط في جلاليبك

وانتي يا عيني أُف زهقانة مني خلاص

عملتي زار بالدُّف وسُقْتِي كل الناس

وانا برضه لازِقلك

معلش حظك كدة ربك ورازِقلِـك

 

روحي يا شاطرة هناك انضمي للالبوم

انا كل عشرتي بيكي 22 يوم

عملتي نفسك حكاية

ومحبة فيَّـاضة ومَخَدَّة بَكِّاية

وسهر وسُهْد وويل وبكا و غنا و مواويل

في 22 ليل

 

على أي حال شكرا وشكرا

ثم شكرا للقصيدة

قَلَّما تأتيني امرأةٌ بأفكارٍ جديدة

هشام الجخ - 24 شارع الحجاز

وضعوا على وجهي مساحيقَ النساءْ
الآنَ اكتبْ ما تشاءْ
كن شاعرا .. كن كاتبا
كن ماجنا.. كن ما تشاءْ
الآنَ أنتَ مُهَيَّأٌ كي تصعدَ الزفْراتُ منكَ الى السماءْ
ما دمتَ في زيِّ النساءْ
فاصرخْ وناهِضْ ما تشاءْ
وارعِدْ وهدِّدْ مَنْ تشاءْ
وسَنَرْتَضِي منكَ الضجيجَ ونرتضي منك السُّبابَ
لأن هذا ما نشاء..
 
واتمدَّدوا في أرضي
ما تقولي يا أرضي
مين شَيَّلِك بالطين ؟
مين حَبَّلِك غيري ؟
طب كنت انا ف "حطين" ؟
ولا كان صلاح غيري ؟؟
 
رافض أقولك يا وطن شعر وقصايد
رافض أصوغك يا وطن سطرين أدب
ما بَقِتْش قادر ع الأدب
يا بلادى يا (رحبه)
هى يا دوب سحبه فوقى و بزياده
بقى هما رجاله
و احنا اللى حبة نتى عليهم العاده
 
خمسين سنة !!! ( القصيدة كُتبت عام 1998 )
عُقبال يوبيلك الماسي
وابقى "هشام" صهيون
يبقوا اليهود ناسي
ولما حتجوز ويجيني صهيوني
راح اجَوِّزُه بنتي
ما انا خوفي لآدِّيها لعربي يسرِّحها !!
ما غارش على بلده .. حيغير على بنتي!!
 
السادةُ العربُ الموقرُ جمعُهم
الامةُ العربيةُ عروسٌ أنتم لم تصونوها عروسْ
هجَّ الجرادُ إليها .. فهربتم
واختبأتم في المساجدِ والكنائسِ
قاتلتموهم بالصلاةِ .. وبالبخورِ
وبالدعاءِ رُكَّعا وجُلُوسْ
عجبا لِهَا تلكَ الطقوسْ
لا جُرمَ عليكِ فلسطينُ
لا وزر على امرأةٍ تزني
ما دامَ الزوجُ الأصلُ ديوثْ
 
يا سادةَ حكامِ الامةِ الغفلةُ ليستْ للحكامْ
علَّمَنِي ( أكتوبرُ ) درسا كيفَ يكونُ هناك سلامْ
أولادي بَصَقُوا في وجهي .. كتبوا لي في الغرفةِ سطرا
إنْ ماتَ الابُّ فِدا وطنٍ .. ما أحلى عيشَ الايتامْ
يا وطني لا يمكنُ أبدا أن يرحلَ عربيٌ مِنَّا للغربِ بدونِ استعلامْ
فلماذا تفتحُ أبوابا وتُنَكِّسُ رأسا وظهورا
وتُسَلِّمُ بِكْرَ عروبتِنا  كي ترفعَ ساقيها سَفْحا
وتصفقُ للذَّكَرِ الأقوى وتَكَلُّ من التصفيقِ تنامْ
سبحانَ إرادةِ (أُنكِل سام)
 
وطني
يا وطنَ الموبوئين ووطنَ المهزومين
ووطنَ الحبَّاكين ووطنَ النَّفْطِيِّين ووطنَ الـ ..........
 
أنا والشعرُ مهزومانِ .. منفِيَّانِ .. مُعتَقَلان فيك
إذا ما استنجدَتْكَ القُدْسُ مَنْ سيغيثْ
يا وطني شكِّلْني رجلا
صنِّفْني عندَكَ في بَنْدٍ لا يحملُ تاءَ التأنيثْ
إن دبَّ الخوفُ بأطرافِكَ قَطِّعْ أطرافَكَ يا وطني فالمرضُ خبيثْ
 
كيف اقولِّك بحبِّك
وانا اللي فعلا بحبك بس مش طايق
تبقي انتي ويّايا ف سفينة حبنا الطارح ورق اخضر
وريحة البحر الوحيدة اللي تدوّخ رِقِتِك
تنزل عنيكي من الكسوف
خايفة لاشوف في عنيكي حاجة من اللي جوّا
وإيدك المرمر على رجلك ليِتْشَاقَى الهوا
من فرحته يخطف طراطيف الجونلّة
بضحكة هالّلة محمّلة براكين وشوق
ومخطّية كل الشقوق ويادوب افوق
القى السفينة بتمشي بينا تهزنا والقاني مش سايق
فارجع كما الأول.. نفسي اقولك بحبك بس مش طايق
 
الأربع اللي فات صِحْيِت حيطان البيت م الفجر صَحِّتْني
كان القمر كسلان والصبح معرفنيش
عيِّل ماليه الطيش بجري على ميعادك
وانا جاي في قلبي حكاوي
ولما تمشي بلاوي ف جِتِّتي قايدة
حاولت احاول اقولها رجعت بلا فايدة
حسيت بإيدِك ونفسِك وصدرِك غيَّروا لوني
نعسان يا جِفْنِك كما شلال
وكوم حبال دَلُّوني وعَلّوني
لِسَّاني شَعري اسود ودراعي قادر يشِيلك
بس العِلَل في الوطن هما اللي علُّوني
 
كان نفسي اقولك بحبك
خفت اكون كداب يا ام الهوى حقايق
كان نفسي اقولك بحبك بيروت رقصت في قلبي
لَقِتْني مش طايق
 
تمثالُ "سليمانَ" سيزحفُ ويجرُّ الجُندَ الى الاقصى
والنملُ العربيُّ مُطيعٌ عجبا لِغُزَاة لا تُعصَى
لن يُصْرَمَ شعبُكَ يا وطني فرجالُكَ كالفِيَلَة بطْشا
وذكورُ الفيلةِ لا تُخصَى
قاتلْهم يا نخلَ الوادي
قاتلْهم يا رملَ الوادي
إن قطعوا نخلَكَ يا وادي
ستظلُّ رمالُكَ لا تُحْصَى
 
سامحيني يا وحدِك بستسمحك وحدِك
انا اللي عمري ما اشتكيت هجرِك ولا بُعدِك
ولا اشتكيت من وجع صدك ولا ردك
بستسمحك وحدك
 
خايف عليكي من القصايد تدهنك أسود بلوني
كل كوني قِيلة .. كوني ف كوني ضِلّة
خايف عليكي من الكلام .. اصل الكلام في بلادنا عِلَّة
تحت البيوت عسكر جوا البيوت عسكر
فوق اللسان عسكر بين الضلوع عسكر
طب كيف اقولّك بحبك وضلوعي مُحتلّة
إنتي اللي من يومِك طريقي
وريقك السيّال كما شلال يا دوبك بلّ ريقي
الليلة بتمرد على ريقي وطريقي وبرفض البلّة
 
سامحيني يا وحدك
بكرة اما اجيب ارضي حِمْلاها ليكي طيوب
مقدرش اسيب حبي بذرة ف وطن مسلوب

هشام الجخ - آخر ما حرف في التوراة

نفسي أنام فينك؟

يا ام الرموش عنقريب

(العنقريب سرير يصنعه اهل النوبة من الجريد)

ماتدمّعيش عينك

الفرح جاي عن قريب

 

إزاي بتتحمّل؟؟

أنساها .. وتجيني

أسقي بنات الدنيا إلاّها

ولما العطش يكويني ألقاها

هي اللي تسقيني

 

تهديني يوم وردة

أدِّيها لفلانة

تجري على حضني

احكيلها عن نانا

 

إزاي بتتحمّل؟

غمز البنات

واوعر من غمزهم ردِّي

جاياني ملهوفة ما تلاقي غير صدِّي

أحزن في أحضانها وافرح هناك وحدي

يا ام القليب اتخلق معرفش غير يِدِّي

 

يا ام الفؤاد ولاّد معرفش غير يعشق

الصبر عدّى وزاد يا قلبها المتقاد

ما عرِفت يوم تزهق

كانت بتلبس لي اجمل فساتينها

ترمي ف صحاريا أفتن بساتينها

تِدْمع رياحينها

ولا قلبي يوم يشفق

 

وإزاي بتتحمل ؟؟

كُتر الكلام عني بحكاوي وانا غايب

الليلة كان سهران

الليلة كان سكران

الليلة كان عاشق والليلة كان دايب

 

يا ام الرموش طايشة

وام العيون لامّة

حضنك ما حيسعنيش

انا بَلْوِتي طامّة

أربع سنين يا هوا مِلْكِيّتي عامّة

 

كل البنات اتلبنوا بيا وتفُّوني

ورسموني خروف معلوف

وسمعوا قصايدى وابتسموا

وصحيم بدري يوم العيد ودبحوني

 

بقالي ييجي اربع سنين مسمار في غيط شواكيش

دَقُّوا على راسي لكن مثبتونيش

يوم التقي مرسى وسنين ياخدني الطيش

كل الالم فيّا ولا قادر اتألم

وبتصعبي عليا ومش بقدر اتكلم

انا نفسي بس افهم

كل البلاوي ديا ازاي مابعّدوكيش

 

سامحيني لما اغلط

وانا تاني رايح اغلط لجلٍ تسامحيني

احلى ما في التوهان اول ما باجي اوصل

واحلى ما في الاحزان انك تضميني

 

يا مسكناني ضلوع

جواكي راح وبراح

ما بينلهاشي رجوع

شكلي حاموت سواح

 

كان نفسي فيكي زمان أياميها كان لي قلب

كانت الحياة خضرا النخلة والبقرة

والقلب طين ابيض بينام على القرآن

وبيصحى وقت الحَلْب

أياميها كان لي قلب

ايه اللي قلب النور ضلمة وليل راسي؟

واشمعنى فوق راسي يحلا العذاب والقلب؟

واشمعنى سابوا الناس بقلوب خضار وعمار ؟

وف قلبي نِزْلوا سَلْب؟

انا اول اللي اتصلب بس التاريخ كداب

مفهمش معنى الصلب

ركعوا البنات ليا واتّنوا قدامي

وفي حفل اعدامي ضحكوا وقالوا كلب

 

انتي اللي دمّعتي

جمّعتي جسماني من مملكة ايزوريس

ويا ريت ما جمّعتي

طب كنتي سبتيني ادخل هنا غزوة

واعمل هنا هُدْنة

وما دمت انا ميت ايه تِفْرِق الدفنة؟

ما البحر راح يسبق لو مهما جدّفنا

 

انتي اللي بتعاندي

عشمانة في الجنة والجنة مش ليا

إزاي بتتحمل لوم الصحاب فيا؟؟

على ايه غرامك بيه؟

ده التبن من تحتيه باقي الماعون ميه

 

تضحك على قولهم وتبص في الساعة

وتقول زمانه صِحِي

زيدي كمان نورك يا ام الجبين الضَّحِي

جَنّنِي صوت حزنك إياكي يوم تفرحي

لا الفرحة تسرقنا

 

لا انا حِمل مهرك ودهبك

ولا جاي معاي عاجِك

ولا حمل توب من حريرك

ولا ماسة من تاجك

ده انا بالكتير حاجج

من وسط حجاجك

 

جيت لك في شهر حرام فمتهدريش دمي

ماتقربيش مني مانتيش كِفَا همي

وَلِّي لحجاجك يا ام الجبين عرفات

حبك كما الصلوات والقِبلة مش يَمِّي

 

يا معلماني الهوا ومسَكِّنة التباريح

حبك نخيل طارح ميهزهوش الريح

أرمي الحجر جارح تنزِل رطب مجاريح

إزاي بتتكسر اشواكي جواكي

ابكي على صدرك القى البكا تفاريح

 

إزاي بتتغير دنيايا جوايا

اول ما اكون جنبك

وإزاي يجيلك صبر تنشفي بكايا

والذنب مش ذنبك

 وهي ازاي بتتحمل؟؟

هشام الجخ - إيزيس

لو جم قالولك إنُّه مش باين عليه أثر الفراق

و انُّه مش بيجيب فى سيرتك و انُّه عادى

لا بان عليه أثر الفراق ولا فيه ألم ولا فيه اشتياق

حقاش قصيده كتبها فيكى

هى دى اللى طلعتى بيها

أما هو خلاص نسيكى

عادته ولاهيشتريها

و احنا قولنالك زمان ما بتسمعيش

فا ماتزعليش

 

ثم هو ماكانش نقوه

كان بيتأخر عليكى بالساعات

و كان مفلس و شاكله يعنى ماكانش هو

كل أصحابك عابوه

أهو غار فى داهيه

و بكره يركع تحت رجلك سيد أبوه

 

بس يمكن كان حنين حبتين

حبتين .. هم بس حبتين

كان برضه بيسخّف عليكى

كنتى فين و رايحه فين

بس كان بيبان عليه

لما اسمك ييجى فى الكلام تلمع عنيه

 

بس برضه كان سقيل

ما كانش بيقدر ظروفك

كام مره قلتى مستحيل

و يصر برضه انه يشوفك

 

و ما تزعليش من قساوة الدنيا و عنادها العجيب

أنا كنت فاكر نفسى أقوى من النصيب

و كنت بتّريق على اللى ما كملوش

مين كان يقول ان النهايه تكون فاشوش

 

أنا لسه فاكر و قفتك و سط البنات

فاكر هدومك و ابتسامتك و الكلام.. حتى السكات

اذا كان فراقنا صحى فيكى كام وجع

أنا كل ليله بتدبح بالذكريات

 

أنا عندى ركن بحط فيه كل الحاجات

كل القصايد و الألم.. كل البنات

جيت أركنك جواه رفض.. ماكفاكيش

فا ماتزعليش

 

أنا بس طبعى قعود و بكتم جوه منى

مش فاكره نانا و جرحها

طب بان عليا بعدها

مش كنت بتنطط و اغنى

والناس تشوفنى تقول حجر

ولا اتوجع ولا اتكسر

زى الجبل ما بينحنيش

ماتصدقيش

 

أنا لما سيبتك كل حاجه اتغيرت

ريحة الشوارع و الدكاكين القديمه و البيوت

كأنى ببدأ من جديد رحلة حياتى.. أو بموت

حسيت كأنى نهيت حياتى خنقتها

أنا كنت متخانق معاكى وقتها

ماكنتش أقصد أقولك امشى ما ترجعيش

بس انتى كنتى صغيره مافهمتنيش

 

الطبع غلاب و انتى عارفه و كنتى لازم تعذرينى

ماعرفتش اترجاكى و انتى بتدبحينى

ربونا عالهيبه و عالحب بقيامه

و ان لما البنت تتقل يوم عليك .. بالسلامه

 

صدقيهم لو قالولك إنى عصبى أو فلاتى

و انى بعرف ألف واحده و قلبى بيغير يوماتى

صدقيهم لو قالولك أى كدبه عن حياتى

بس أوعى تصدقيهم لو قالولك انه كان كداب معاكى ما حبكيش

وان جم قالولك انه مش باين عليه أثر الفراق ماتصدقيش

هشام الجخ - متزعليش

هَجَانى مَنْ بِهِ مَرَضٌ يُؤَرِّقُهُ

وَانَا بِصَدْرِى جَلْمَدٌ وَ حَدِيْدُ

 

عَلَامَ الْنَّفْسَ أُضْنِيهَا وَ أشغْلَهَا

بِرَجُلٍ يَجْرِىَ فِىْ دِمَاهُ صَدِيْدُ

 

فَللحَاقِدِينَ عِنْدَ الْلَّهِ وَعِيْدُهُمْ

وَلَيْسَ بَعْدَ الْلَّهِ ثَمَّ وَعِيْدُ

 

وَكَيْفَ جَرُؤْتَ يَا قَزِماً عَلَىَ نَفْيِّ

انّ كَانَ نَفْيٌ مِنْكَ فَهُوَ تَأْيِيدُ

 

هَاجَمْتَ أَشْعَارِىَ وَ تَعْلَمُ أنَّهَا

فِىْ كُلِّ افْوَاهِ البَرى نَشِيْدُ

 

هَذَا مِنْ الْلَّهِ فضلٌ لَمْ يُجَرِّدُني

فَكَيْفَ يَجِيْئُ عَلَىَ يَدَيْكَ تَجْرِيْدُ

 

أَلَا يَا نِصْفَ انْسَانٍ كَفَىْ غِلْاً

وَاقْنعَ بِمَا اُتِيْتَ عَلٌ يَزِيْدُ

 

قَدْ نْصبُوَنّىْ رَئِيْسَا قَبْلَ أنْ تَأْتِىَ

فَعَلَامَ حُزْنُك وَالْجَمِيْعُ سَعِيْدُ

 

أَتُرِيْدُ تَّنْصِيْباً كَقَائِدِ جَمَعْنَا

أفَقطّ لِهَذَا تَشْتَوَىْ وَتقَيِّدُ

 

أنَا خَرُوْفٌ مَثَلُ قَوْلِكَ انَّمَا

لَيْسَ النِّعَاجُ عَلَىَ الْخِرَافِ تَسَيَّدُ

 

انَا الْجَخّ الصَعيدىْ الَّذِىْ

أمشىْ صَحِيحا و الْفُؤَادُ شَهِيْدُ

 

وِتَرَانىْ مَزْهُوّاً أخُبئٓ بَلْوْتَّىْ

فَتَقُوْلُ انّىْ مَاجِنٌ عربيدُ

 

فَبِأَىِّ حَقٍّ كَانَ حُكْمُكَ صَائِبٌ

وَ بِأَىِّ حَقٍّ صَابنى التَّنْدِيدُ

 

يَا أَيُّهَا السَطْحىْ حُكْمُكَ فَاشِلٌ

فَاعْكُفْ عَلَىَ شَئٍ تَكُوْنُ تُجِيْدُ

 

وَأَقْطَعُ لِسَانَك وَ ابْتَعدَ عَنِ بَلدَتَّىْ

فَعَلَى لِسَانِكَ لَا يَجِئُ صَّعِيْدُ

 

إنّ الْصَّعِيدَ أيا قِرْدَاً بِلَا ذيلٍ

حَدٌّ كَحَدِّ الْلَّهَ لَيْسَ يَحِيْدُ

 

فَاذَا اتَتْكَ جَرَاءَةٌ فِىْ سَبِّهِ

فالطالما سَبَّ الكِرَامَ عبيدُ

 

يَا صَاحِبَ الأشْعَارِ وَالاحْقَادِ فِقْ

فَأَنَا لِسَانِىْ لازِعٌ صِنْدِيْدُ

 

إن كَانَ بَعْضُ الْنَّاسِ نَصَرُوْكَ اتَّعَظَ

فَالآنَ تُشْتَمَ وَ الْجَمِيْعُ بَعِيْدُ

 

إنّىْ لَأَعْلَمُ إنّ مِثْلُكَ كُثّرِ

فَلِكُلِّ مَلِكِ حَاقِدٌ وَ عُبَيْدِ

 

لَكِنْ إذَا خَرَجَ الْكَلَامَ مُبَاشِراً

فَأنا كَفِيْلٌ وَالْقَصِيدُ سَدِيْدُ

 

مَا كَانَ عَجَبا أن تَخُوْضَ بِسيرَتى

شِيَمُ الْنِّسَاءِ الْخَوْضُ وَ الْتَّعْدِيدُ

 

مَاذَا فَعَلْتُ لِكَىْ تُهَانَ قَصَائِدَىْ

وَ لِمَنْ يَكُونَ الْحُكْمُ وَ الْتَسْدِيْدُ

 

أو مَا عَلِمْتَ بِأَنَّ شِعِرِىَ سَابِقٌ

نَامَتْ عَلَىَ كُلِّ الْحُرُوْفِ الْغِيْدُ

 

مَنْ حَرَّمَ الْشِعَرَ الَّذِىْ يَصِفُ الْهَوَىَ

إنّ الْقَصَائِدَ فِى الْهَوَىَ تَخْلِيدُ

 

أم أنّ غَيْرَتَكَ الَّتِى أخْفيتهَا

أَنْسَتْكَ أَنَّكَ فِى الطَّرِيقِ وَلِيَدُ

 

مَازِلْتَ تَحْبُو يَا صَغِيرُ بِجَانِبَى

حَتْمَا يُعْوِزُكَ مُرْشِدٌ وَ سَنِيَدٌ

 

انَّا لَا أَقُولُ بِأَنَّ شِعْرِيَ كَامِلٌ

فَاللَّهُ أَحَدٌ كَامِلٌ وَ وَحِيْدُ

 

لَكِنَّ مِثْلِكَ لَا يُعَدِّلُ لِى رُؤَىً

فَالطِّينَ لَا يَسْقِيَهُ أبَدَا بِيدُ

 

يَا مَعْشَرَ الْعُزَّال عُدُّوا غَيْظَكُمْ

وَ أُلُوا الْلِّسَانَ بِمَا أَقَوُلَ وَ عيدُوا

 

لَمْ تُفْلِحُوا فِى هَدْمِ شِعْرٍ صَادِقٍ

فَالشِّعْرُ لَوْ عَلِمَ الإناسُ عَنِيْدُ

 

يَا مَنْ هجونى إنَّمَا بِهِجَائِكُمْ

أَعْلُوَ وَ أَشْعُرُ رِفْعَةً فَأَزِيْدُ

 

سَأَظَلُ رَغْمَ انُوفَكُمْ وَ ذُقُونَكُمْ

نَغمٌ تَسَابَقَ نَحْوَهُ الْتَّرْدِيدُ

هشام الجخ - هجاء

وبقولها انا انت وانت انا

مين الحمار فينا

انا اللى حمار ولا الحب اللى نازل رجرجة فينا

طب انت انا ... وانا انت وجه فينا اللى جه فينا

حظوظ الناس مصالحاهم وحظنا ليه مجافينا

 

طظ يا حظ يا ملاوع هحبها ويكش تولع نار

هاكونلها بر وسفينة هنتحمل وهنكيدك ونضحك رغم ما فينا

وشوف غيرنا يا حظ خلاص مفيش والله رجا فينا

ده انا انت وانت انا طب مين حمار فينا

 

حمار الليل مطولش فيوم السهرة والزينة

حمار الواد بتاع اللب

فاكرة يوميها عالكورنيش

قطع احلامى وكلامى عن الترحال

ويوم سفرى ويوم ملقاكى عالمينا

 

حمارة صاحبتك لما بتمشى معاكى فالشارع

يبان حسنك يغطيها يخللى شكلها شوارع

بحبك ظايطة فاللمة واحب اللمة فعنيكى

وبفرح كل يوم لما تسافر ايدى فايديكى

 

ياعم حسين يا ملقانا

يا شاهد فرحى وشقانا

انا اللى حمار ولا هى

ولا الحب اللى ورّانا

 

حمارة سياسة التعليم فدى الدولة

وقال تعليمك العالى

ياولدى يبقى ليك اولى

بقالى سنين انع يا ناس

مابين ثانوى وبين جامعة

اقول ابنى سحابة شوق

تاخدنا لفوق وتبقى هى دى الجامعة

 

هاتجمعنا لوحدينا

تدارى كسوفها منينا

وانا فصدرك .. وانتى فحضنى

نرجع تانى نتلخبط

ما نعرف مين حمار فينا

 

ساعات اقعد مع نفسى

فليلة صيف وبلكونة

وقمراية ونص سيجارة

اروق حبة عن نفسى

وكام نظرة على اشارة

يطيروا منى للجارة

لو انتى جيرانا لزقالنا

وكاشف بيتكوا شباكنا

ماكنتش اكره الشقة ولا القعدة

هاشوفك كل يوم نايمة

وهشوفك كل يوم قاعدة

انا شايفك وشايفانى

وصوتنا موصله التليفون

اكن الكون بقى بتاعى

او احنا وبس جوه الكون

لكن حظى التعيس دايما

مخللى عمارة ولا اتنين

مابين بيتى وبين بيتك

وداروا بيتى عن بيتك

 

بس انا عرفت الحمار الان

فلان احمد فلان

عشان سايب كل المكان

وبانى عمايره وسطينا

وساب روحى تروح روحك

ويتلاقوا فنص السكة

مابينك وبين الكون

يطيروا فالهوا حبة

يدوبوا حب ومحبة

ابصلهم يا وخدانى

وقلبى صافى ومزقطط

وارجع تانى واتلخبط

ولا اعرف مين حمار فينا

 

بحبك نانا او ناعسة

بحبك ليلى او المظ

نعيمة .. تمر حناية

بحبك وانتى بالمينى جيب

واحبك شال ودلاية

بحبك وانتى فالتليفون وفالجوابات

بحبك.. وانتى ويايا

بحبك بت حكاية ورغاية

تصحى سكوتى جوايا

تلاعبينى واغمى عيونك السودة

صوابع ايدك الممدودة

بتدور على حضنى وتتدور

كسوفك عنى حايشنى وحاششنى

وطيش حبك مطيشنى

كفاية تعبت مالطيشان

مفيش مرسى يدفينا

ايديكى تنام على صدرى

فى حتة يدوب تكفينا

وليل نعسان يغطينا

تغير الشمس منينا.. تصحينا

يهيج قلبى ويتخبط

وارجع تانى واتلخبط

ولا اعرف مين حمار فينا

 

بحبك طايشة جواية

مسافرة ضلوعى فضلوعك

وانا طوعك

يزلزل صوتك الزلزال ويحينى

يخلينى انا.. عصفور فى شباكك

يا ناشرة فالمدى شباكك

ايديكى يوم ما ضمتنى

حضنت الكون بكفة ايد

وبالتانية سندت القلب فمكانه

بحبك... يااااه

يا نار فالقلب نوارة

انا حمار اللى حبيتك

وخليتك بحبى حمارة

يــــا حمــــــارة

هشام الجخ - حمارين حبيبة

حكاية هذه القصيدة النادرة إن شاعر صديق لهشام الجخ كتب قصيدة سماها " إختلاف 2 " رداً على قصيدة الجخ " إختلاف " https://soundcloud.com/algakh/e5tlaf ينتقده فيها ويتهمه بإنه السبب في فشل العلاقة التي يتحدث عنها في القصيدة ، فرد عليه الجخ بهذه القصيدة



 

باعته وجرت ورا زيف

وسابتله نار جوه

مَسّكِته في إيده سيف

إختار يموت هو

 

يَا حَبِيْبِي هَذِه الْغُلامّة إِن تَخْتَلِف

فَهُو إِخْتِلَافَك لَا إِخْتِلَافِي

أَنْت مِن أَحْبَبْتُهَا

وَنَسِيْت أَن مَسَافَة بَيْن الْجَنُوب وَبَيْنَهَا

 

يَا صَاحِبَي أَنْت الْإِلَه

لَكِنَّهَا أَبَت أَن تِعَصَاك فِيك

فعْصَتك فِيّ

فَهُو إِخْتِلَافُك لَا إِخْتِلَافِي

 

والفرق ما بيني وبينك بإختصار

إني واحد حب ستين ألف واحدة

وإنت ستين ألف واحد حبوا واحدة

 

الإختلاف اللي ما بينا مش أسامي

مش في نانا أو فلانه

الإختلاف اللي ما بينا في الديانه

في إتجاه القبلة من وضع السجود

إني في غرامي فرس

و إنت في غرامك قعود

 

الإختلاف اللي ما بيني وبينك

إني لو حبيت بخلي البت نعل

ألبسه وأبدأ طوافي

وإنت حبك زي بغل

شال حبيبته فوق كتافه وعدى بيها السكه حافي

 

يبقى لما نختلف تعترف

إن إختلافك عمره ما كان إختلافي

هشام الجخ - إختلاف 3

شعور سخيف

إنك تحس بإن وطنك شيء ضعيف

صوتك ضعيف

رأيك ضعيف

 

إنك تبيع قلبك وجسمك

وإنك تبيع قلمك وإسمك

ما يجيبوش حق الرغيف

 

سألوا جحا عن سر ضحكه

قالك أصل اتنين وشبكو

اللى كان من تحت ميت

واللى كان من فوق كفيف

دا شعور سخيف

 

وشعور سخيف

إنك تكون رمز الشحاتة

تبنى مبنى للشحاتة

تعمل وزراة للشحاتة

 

يا ساقية دورى عدى فوقى ودوسى

نصبوا عليا وشحتونى فلوسى

ربطونى فيكى .. حتى ما اتغميت

هما اللى فرحوا ووحدى أنا اتغميت

 

أنا اللى صاحب البيت

عايش بدون لازمة

ولما مرة شكيت

إدونى بالجزمة

 

مش لاقى تطفح اديك

هاتولنا و جيبولنا و ادونا ودونا

هنجيب منين نديك

طافح يا بلدى غدايا و لوعتى غدايا

و آدى الأحبه التفوا و اتجمعوا عدايا

 

أنا اللى زارعك دهب

بتأكلينى سباخ

إن كان دة تقل ودلع

بزيادة دلعك باخ

 

لا شفت فيكى هنا

ولا شفت فيكى ترف

كل اللى فيكى قرف

 

كرامتنا متهانة

واللقمة بإهانة

بتخلفينا ليه

لما انتى كارهانا

 

يعنى ايه تبقى إنتى هبة النيل يا بوبه

وكل يوم المية تقطع

يعنى ايه لما اشتكى غلو الفاتورة

يقولو تشكى بس تدفع

 

لما قش الرز ثروة بتتحرق

وأما نفط الأمة ثروة بتتسرق

وأما جلادك على ولادك بيبطش

وأما علمك ما يلاقيش يآكل فيطفش

 

يعنى ايه نرفع ايدينا بالسلام لجل الغزاه

ويعنى ايه لما ابقى ماشى فى حالى اتشد اشتباه

يعنى ايه لما اتحبس أربع سنين حبس احتياطى

حبس اعتباطى

يعنى ايه مش حاسة بالعمر وغلاوته

بتصبى مر العمر ليه

دة انا كنت ح اوهب لك حلاوته

 

أنا عمرى ما أتأمرت ولا حطيت شروطى

ومكان ما ترسى مركبك بابنى شطوطى

أنا كنت جيشك لما مماليلك باعوكى

وكنت يوسف لما عشتى سنين عجاف

وضلوعى دى اللى فى معركة قادش حموكى

وشفايفى دى اللى ما بطلتش فى يوم هتاف

 

دة انا كل شبر فى أرضك اتمرمغت فيه

وكل يوم عشتيه أنا اتغذبت بيه

 

على صوت أدانك جرس فى الشدة صاحينلك

من امتى كانوا الحرس هما اللى باقينلك

بعتينى علشانهم وعنيكى معصوبة

ياهل ترى خاينة ولا زيى مغصوبة

 

كل الكلام اتقال و الشعر بقى ماسخ

و الصبر علو جبال والظلم شئ راسخ

وطن وغرقان فى النطاعه

كل شئ ريحته نطاعه

علمونا بالعصاية

ورضعونا الخوف رضاعة

 

علمونا فى المدارس يعنى ايه كلمة قيام

علمونا نخاف من الناظر فيتمنع الكلام

علمونا ازاى نخاف وازاى نكش

بس نسيوا يعلمونا الاحترام

فماتزعلوش لما ابقى مش باسمع كلامكم

وماتزعلوش لما ابقى خارج عن النظام

 

مستنى ايه من طفل ربوه بالزعاق غير المشاكل والخناق

كل اللى بيقولك بحبك دول نفاق

أنا لما قلت لك بحبك كان نفاق

 

الحب يعنى اتين بيدّوا

مش ايد بتبنى وستميت تيت تيت يهدوا

الحب حالة

الحب مش شعر وقوالة

الحب يعنى براح فى قلب العاشقين للمعشوقين

يعنى الغلابة يناموا فى الليل دفيانين

الحب يعنى جواب لكل المسجونين

هما ليه بقوا مسجونين

 

يعنى أعيش علشان هدف علشان رسالة

يعنى احس بقيمتى فيكى إنى مش عايش عوالة

يعنى لما اعرق تكافئيى بعدالة

الحب حالة الحب

مش شعر وقوالة

الحب حاجة ما تتوجدش فى وسط ناس

بتجيب غداها من صناديق الزبالة

الحب جواكى استحاله

 

بَارَت مَرَاعِينا والبِئر قَد جَف

وَالْجُوْع يِكْوِينَا وَالْصَّبْرُ مَا كَفّى

وَالْقَلْب لَا يَهْدَا وَالْجُرْح لَا يُشْفَى

وَلِأَنَّنَا طَوْع زِنِّا لَهُم خفّا

جَاءُوَا بِمَوكَبِهم.. واشتغلت الزفة

 

الدفة مظبوطة وأصلا مافيش دفة

والكفة مش مايلة علشان مافيش كفة

و جحا اللى جاى بالليل لساه بيتخفى

 

شايف ديدان الغيط سارحة وما راحماشى

من جبنه شاف الدود سابه وراح ماشى

ولا اتكسف للناس ولا حس على طوله

الناس عشمها كبير جريوا بيشكوله

ضحك جحا ضحكة مواشى

مادام بعيد عن طينى ... ماشى

 

الدود قاعد لك يا جحا ولابد فى طينك

بعد ما يمص فى دمانا مش هيحلاله الا طينك

احنا اهلك احنا رجالتك عمادك

إحنا وقت الشدة سندك إحنا زادك

يا جحا احمى ولادك لو كنت عايز تحمى طينك

 

سوف أرحل ربما يلقانى من ارجو لقاه

هامشى ويا الشحاتين وابكى على حلمى اللى تاه

بس مش هاشحت رغيف

هاشحت وطن لله

هشام الجخ - جحا

تلات خرفان

ودي حكاية وكان يا ما كان

ولا يحلالي أي كلام

إلا بذكر النبي الهمام

عليه الصلاة والسلام

 

تلات خرفان

ومعزاية

وشجراية

وبير بترول

وديب فجعان

 

تلات خرفان ما يتاكلوش في يوم واحد

ما يتهضموش

 

راح للخروف

أتخن خروف

قال يا خروف

عيال اخوك متنعنعين ومتنغنغين

وانت هنا في اسوأ ظروف

يادي الكسوف

راح الخروف

علشان خروف

ضرب الخروف

الديب حيسكت

راح للخروف

تالت خروف

شفت الخروف

ضرب الخروف

أحميك انا

و ابات معاك في الدار هنا

واديني بس انت مكان

راح الخروف

علشان خروف

إدّاه مكان

 

يوماً سنقراُ في الجريدةِ يا بلادي أنّنا كنا خرافْ

سيجفُ هذا النفطُ فوقَ جلودِنا

ونودّعُ السبعَ السِمانَ ونلتقي ألفاً عِجَافْ

سيُدَوِّنَ التاريخُ اسماءَ الملوكِ العادلينَ

الصابرينَ

الساكتينَ

الكاتمينَ الصوتَ بينَ شعوبِهم مثلَ الزرافْ

سيحاكمُ التاريخُ حكامَ العروبةِ كلِّها

وسينزعُ الاظفارَ منهم في سبيلِ الاعترافْ

إني احبك يا بلادي مرغما

واقول شعرا يا بلادي مرغما

والشعر إن مسَّ السياسةَ يستحيلُ مصائبا

والشعر إن مسَّ الصعيديينَ مثلي

يستحيل كحدِّ سيفٍ لا يخافْ

انا لا أخافْ

 

 

من كام سنة بِنْهِشّ بإدينا الفيران

ونقول ما نتدَّخلش في امور الجيران

من كام سنه راسمين رجولتنا أدب

ناقشين إدينا نقش حنة وقلنا سنة

ورمينا من إيدنا سلاحنا وقلنا هدنة

وبلدنا بِكْر بتُغتصب

يِعلاَ صوتها غصب عنها نِتْهِمْهَا بالشَغَب

يا بلاد ماليها الاَّ العجب

يا ( معرَّمين ) شعر وادب

 

هي الرجولة تتوزن وقت الغضب غير بالغضب

هو اللي متَاخد غَصَب مش برضه يتاخَد غصَب

يا بلاد ماليها الا العجب

يا ( معرمين ) شعر وادب

الوزن هو اللي اختلف ولا الميزان اللي اتقلب

 

من كام سنة بنسأل "بهية" مين قتل

واحنا اللي قاتلينه بإدينا

مدِّينا إيدنا للغريب

وف بعض عضِّينا وعَادِينا

 

مين اللي ظالم في الحكاية .. ومين جبان

مانلومش ع الديب اللي خان

احنا اللي خرفان بالوراثة

الصبر وارثينه وراثة

والطاعة وارثينها وراثة

والحكم وارثينه وراثة

وحاجات كتيرة مش وراثة احنا خدناها وراثة

 

انا كل ما اتذكر تحية العلم يسرح خيالي

كان صوتي لسه عيالي .. بس عالي

كنت احسّ اني بهزّ المدرسة

كان العلم من فرحته يرقص على الساري شايله

طب كنتو ليه بتعلمونا نحفظ البرّ وجمايله

طب كنتو ليه بتعلمونا نكره الظلم وعمايله

لمّـا انتو ناويين تسجنونا في ارضنا

كان ايه لزوم العلم .. وهمومه .. ورزايله

 

طب كنتو سبتونا بهايم كنا نِمْنَــا مرتاحين

ازاي ابيع ارضي وعارف إن جسمي اصله طين

طب كنتو علمتونا مثلا إننا من أصل تركي

أو أوروبي

إن جسمنا أصله حلاوة.. أو مِلَبَّس

اشمعنى طين؟

طب ولما الطين يروح ايه اللي فاضل

ولمين نغني ونفدِي روح ولمين نناضل

ولمين اعود واشتاق واحب واغير واكافح

ولمين اغني و اقول ( بحبك يا بلد) والحب طافح

 

لاموا عليَّا الناس

عايزيني اقول اشعار في محمد الدرة

مش قايل

ما انا لما قلت زمان يا بلادي يا ( رحبة )

قالوا ده واد سافل

واللي اتلَوِتْ مني واللي اتقمص مني

ونزلت عنيهم م الخجل في الأرض

وبهدلوني وحَدَّفوني لبعض

وقالوا برضك عيب .. القاعة فيها بنات

طب يعني وفلسطين مش برضه فيها بنات

 

والله دي فلسطين نسوانها رجالة

هما اللي عمَّالة واحنا اللي قوَّالة

عندينا تِبْقَى الست وَلَدها طول الباب وتخاف يروح مشوار

وهناك حريم من غَضَب شايفين عيالهم دهب

وعشان ما يلمع زيادة لازم يدوق النار

وتقولوا اقول أشعار

 

هما 3 كلمات

نعم .. اكيد .. طبعا

وطول ما فيه جُبَنَا

فرعون بيتفرعن

 

والشعر اصله جبان

اللي يقوله جبان

واللي يعيده جبان

 

قولنا بلاش نكتب والحرب اولى بْنا

قالوا حرام والنبي خلُّولْنا اولادنا

خايفين على ولادهم م الجنة ونعيمها

شوفتوش خيابة و همّ

الاسم رجالة والاسم عندنا دم

دي ام موسى ( المرة ) خافت على ولدها

رمته في قلب اليم

 

واحنا ( بنتسولق ) وبنتشوي قرارات

تطلع قراراتنا صورة جماعية على صفحة الجُرنان

يا ما اشجع الفرسان

 

همست في وِدْني بحبك

كان جسمها مفرود والخمرة عامياني

وبياض إديها كان بيزعق لما تعدل شعرها

 

الواد بيعرج م الرصاصة اللي في رِجْلُه

 

شدِّت حزام الروب

وبانت زي شيء معرفش شعري يوصفه

 

كانوا العساكر قربوا والواد متبت ع الحجارة اللي ف إديه

 

مدّت إديها وقَّفِت كل الساعات

صوت الكاسيت نبَّهني اني ف شقتي

 

كانوا العساكر قربوا

بيقربوا

بيقربوا

والواد متَبِّت ع الحجارة اللي ف إديه

 

وَقَعِت قزازة البيرة من إيدي على طرف السرير

 

الواد صرخ في مخبأه

 

فاتلفتت قلقانة خايفة لاتجرح

 

جريت على الصوت العساكر

وابتدى صوت الرصاص يملا الجبل

 

دوَّرت عندي في الدولاب على حاجة تنفع لجل تِتْحَزَّم لي بيها

ما التقيت غير شال اخويا اللي اتقتل تحت الجبل

كان برضه يعرج لما يمشي من الرصاصة اللي في رجله

وكان متبت ع الحجارة اللي ف اديه

مين اللي خانك يا وطن

قلعت حَلَقْها لما عَوَّرني ف رقبتي

وحطته جنب السرير

 

نامت على الارض العساكر

لجل تسمع دَبِّة الواد اللي لسة مستخبي

اتكسف صخر الجبل من وقفته

هيَّج رماله ع العساكر

 

سامحيني يا وحدك

مقدرش اعيش هارب

انعس في حضنك كيف

والرملة في الصحرا واقفة وبتحارب

 

أعطوني عاما تقريبا لأجيد اللغة العبرية

فالجاري في وطني هذا

أخجلني صدقا أن أكتب

شعرا باللغة العربية

هشام الجخ - 3 خرفان

كرهـتك قد ما ضحكتى على شقايا

كرهــتك قد ما امى تحب رؤيـايـا

و قد رعشة ايدى وانا بكتب

أول قصيده أكتبهالك

 

آخر قصيده أكتبهالك

و آخر قصه فى كتابك

و آخر كلب فى كلابك

و آخر طيف يبات الليل على بابك

 

دا انا اللى كسّرت السهر

و رَقَصْت ويا الليل و رَقَّصت القمر

 

أنا اللى فَضّيت بِكر نجمه فى السما بَكّيت نجوم

و طلقت ايدى فى صدر نسمه اتلخبطت بين الغيوم

أنا الجخ و سامعه عنى و عارفه انى كل يوم

كنت قبلك ويا واحده و يمكن ويا اتنين فى يوم

 

تكسرينى؟! ... لا يا عينى

انتى واحده من ألوف

و ياما وانا عايش هشوف

انتى مجموعة قصايد بالمحبه بتبتدى

وهى دى

آخر قصيده أكتبهالك

و كان بودى اسمعهالك

 

نبرة الحزن فى كلامى مش ندم

ما أنا خدت منك كل حاجه وسبتلك حبة ألم

أنا خدت منك كل شئ

و فضلت قدامك برئ

 

كل ما فى الأمر إنى لسه ماشبعتش خيانه

تعرفى يا نانا الخيانه؟

مش خيانه تحبى غيرى .. يا خى حبى غيرى

همشى مع واحده تشوفيها و زى ما هغير انتى غيرى

مش خيانه

 

بس تبقى خيانه عظمى

يوم ما يبقى الحب كلمه

يوم ما تبقِى م البدايه

حاطه للقصه نهايه

 

يا ترى لساكى فاكره؟

فاكره يوم ما رميتى قلبى بنظرتك

قلبى اتجرح

كان فرح

أنا لسه فاكر.. كان فرح

كانت الرقاصه بتزِفّلِى حُبك

قلت احبك يمكن الحب يداوينى

وادى ادينى

 

بكره اليوم اللى شفتك

بكره الشارع بكره الليل اللى ضمك

بكره القمره اللى بتفكرنى بيكى

و بكره اسمى اكمنه اسمك

 

بكره انى ابتسم.. حتى اترسم

حتى اتدفن

بكره البحر اللى زغزغ صدرك السقعان فى حضنه

جيتى حضنى

حتى حضنى بكرهه لما اتّسعلك

بكره الشعر اللى خللانى ابقى نعلك

بكره القلب اللى سابلك صولجانه و بكرهك

واللى زانك طول سنين جه الليلادى و شوهك

 

لا انتى ناعسه ولا انتى عبله ولا انتى شملوله الخجوله

اتكسر جوايه صوتك واتكسر جواكى عمر

بس عمرك هو عمرى

كان بودى أسيب فى قلبك ميت أتون من طين و جمر

بس قلبك هو شعرى

 

بكرهك ياللى ابتسامتك فرحتنى

و مرجحتنى و زحزحتنى و كبرت الله اكبر

من كلامك من غرامك من عينيكى السودا ليل

قلبك المكسور بيعلن لانتصارى ميت دليل

 

و انتصارى مال على ودانى وهمسلى

قاللى "أوزوَلد" البرئ ما بقاش برئ

قاللى إن "سيزيف" دا زيف

و ان قولة آه بتطلع م الصعايده فين و فين

قاللى أنساكى فى مساكى

و اما اشوف قلبك عساكى تفوقى من وجع البنات

قالى بالرغم انه عارف انى حبيتك.. هجيتك

و انه شافك كاتبه اسمى بخط نونو تحت بيتك

قاللى شافك ع المرايه بتكشفى صدرك لصدرى

قاللى صبرك.. يا دى صبرى

 

اياك فاكرنى من حجر

اللى قاسَى فى حب نانا لو حجر...كان انفجر

 

كنا زى اتنين فى صحرا

ما فى ناس ما فى عيب مافى خوف ما فى بكره

كنا خيل وليل و مهره

كنا سكر و كنا فجر و كنا سهره

كنا نتواعد بكلمه و كنا نتصالح بنظره

 

كنا لما تسافرى أو اسافر يصير الليل مالوش آخر

أكن عيونك النعسانه مجافيينك

و أكلم نفسى طول الليل و أقول فينك

و كان قلبى بوسع البحر..لملم موجُه فى سفينك

و نفس البحر دلوقتى لعنلك ميت سلسفينك

لا عاد موجه بيهواكى و حتى نجومه فى سماكى

رموكى بعد ما رماكى و كانوا فى ليلة زفّينك

 

و كانو يناموا فوق مريلتك الكحلى

ينقولك هدومك يوم ما نكون هنتقابل

أنا و نانا فى طول أيامنا ما كنا بنتقابل

ما كل الناس عتتقابل

احنا كنا..

احنا كنا..

والله ناسى كيف ما كنا ..بس كنا

 

يمكن الحلم اتقتل بس الجبل

لو هده ريح أو حتى مال برضك جبل

و انا مش جبل من طين وقش

ولا عضمى هش

إن كان على القلب اللى حبك آخره نعش

و انصِبله بدل الخمسه ألف و يبقى مات ولا اتخدعش

 

كنتي كيف السّبيه بيّه

و كنت ليكى عبد طايع

صرت ورقه و حبر ضايع

وقت فات ولا جابش عايد

مش بقولك.. انتى مجموعة قصايد

 

لمى ورقاتك خلاص الحبر جف

و احكى للجيل اللى طالع بكره يضحك

قولى لابنك فيه زمان واد عقله خف

اوعَى لتصيدك بِنَيّه و زى فرحه يولّى فرحَك

 

شيلى عمرك باللى فيه

خدت منك كام قصيده سامحى فيهم

حق كُرسيين معسل مش حكايه

خدت من عمرك بُكايه

و ابتسامتى سيبتهالك

يكفى إنى لسه مالك نفسى و بخبى البُكا

شوفى شاعر غيرى يوصفلك جمالك

 

أما ع القلم اللى فى ايدى

شاريه من دكان صعيدى

راسه ألفين دومه نَيّه لانسى حبك من أساسه

عشتى طبعا فى الصعيد و عرفتى ناسه

 

يبقى أسهل شى عليا

أنسى حبك و انسى حالك

وانى اقول ع القصيده ديا

آخر قصيده أكتبهالك

هشام الجخ - آخر قصيدة أكتبهالك

حـظَــك كـــــــده

 

 

 

 

مكتوب عليكى تحبى واحد قلبه صدى

لا الفرحه تقدر تنعشه ولا حزن يقدر يرعشه

ولا نكته حتى تفرفشه ولا حتى خضّه

مع ان قلبك من دهب

مكتوب عليكى تحبى واحد قلبه فضه

حظك كده

 

كل البنات اللى فى حياتى قبلك

أستنونى نمت وغدروا بيا

عِدِّى جوابات الغرام اللى فى دولابى

شوفى كام مره اتغابيت وفتحت بابى

مره بيضه ومره سمره

دى طويله ودى تخينه

وأردنيه ومغربيه وفى الروسيه

وفى العجوزة ..وفى الصبيه

وفى النهايه الكل بردك غدروا بيا

أحتمال العجز فيا

 

المهم انى خلاص ما بقتش قادر أحب تانى

جسمى نحس من السهر والانتظار ومن الاغانى

 

انتى أجمل واحده حبتنى فى حياتى

رقه الكلمه فى شفايفك

الخيال اللى محاوطنى

ومحاصرنى وانتى غايبه كأنى شايفك

العيون المعجزات اللى بخاف أرفع عينيه

يغضب المولى عليه

والله ما أنا عارفلى خوف

أنا ببقى خايف ربّى ولا ببقى خايفك

 

إنتى بِكْر كل

حاجه فيكى بِكْر

الشوارع والمدرج والأمانى

جوه منك لسه بِكْر

أما أنا جيش مالحريم استهلكونى

يا ما رقدوا و يا ما لعبوا ويا ما سكنوا

فيه إيجار وفيه اللى ملك وفيه خدتنى وضع يد

صبحت حكر

وانتى بكر

طب هاينفع؟

 

عارف أنها مش خطيئتك

إنى عيشتى معقده

بس اعمل ايه

حظك كده

 

هشام الجخ - حظك كده

مفيش حد مات
لِسّاه بشعره وقصايده وعبايته وفلتة لسانه
وكل الناس اللي ثارت عشانه
ولسة الحروف اللي شقّت كيانه
وشقت جدار الخضوع والسكات
مفيش حد مات
لسة الكلام اللي طاير حمام
وضرب الرصاص اللي من عود (إمام)
ولسة الضمير اللي رافض ينام
بيسهر يوماتي في كل الحارات
ويعلن إنك وشعرك وفنك .. حاجات ميغلبهاش ممات
مفيش حد مات !

هشام الجخ - مفيش حد مات - رثاء عم نجم

قصيدة المكالمة للشاعر هشام الجخ

جديد : هشام الجخ - المكالمة

إهداء للعساكر المصريين في النكسة اللي صدرت ليهم الأوامر العشوائية بالإنسحاب .. ومنسحبوش !

هشام الجخ - إنسحبوا


 
ماكنتش في شلة صحابك ساعتها
ماشفتش دموعك و كسرت جناحك
و لما الحبيب الوحيد استباحك
ماكنتش معاك
ماكنتش فى وقت انبساطك.. بساطك
ماكنتش فى وقت اندفاعك.. دفاعك
و لما عرفت السهاد و السهر
و أول ليله تناجى القمر
وغامت عليك السما و الليالى
سامحنى يا غالى.. ماكنتش سماك
فى اول بحبك.. ماكنتش معاك
و اول واحشني.. ماكنتش معاك
فاتتنى الحاجات المهمه في حياتك
ولما دموعك بتحكى اللى فاتك
بحس انى عاجز افسر بكاك
يمكن لانى.. ماكنتش هناك
 

هشام الجخ - مكنتش هناك Hisham Al Gakh - Maknotsh Hnak


 
يا حبيبي هذه البدايةُ تختلف
هذا البريقُ الساكن الجفنين
مابين البدايةِ و البدايةِ يختلف
هذه الوجيعةُ حين يُذكر اسمُها
او حين يعلو في الدماء ندائها
هذه السطورُ تألفتو تجمعت كلماتُها
كي تستحيل قصيدة
هذه القصيدةُ تختلف
 
و ادى اللى صار
من يومي مطلوق تحت فوق
عايش حياتى بالإختيار
من غير حصار
 
لا أنا ناوى احب ولا غاوى احب و لا فاضى احب
ولا لاقى سمره ترُجّنى و تخُضَنى
و تصحى فيا الحبر يكتب على الورق
قلبى اتسرق
 
و أنا باعترف
هذه الغلامه تختلف
 
(يا - تيبيارو - بِلو)
أَنَّنِى أَحْبَبْتُك رَغْم زِحَام الغَيَدَاوات
وبِرغم الْسَّفَر و رغْم الْضَجَر و رغْم الَوَجَع
و رغْم الْقَسَم بِأَن أَتَحَجَّر فَوْق سُعَال الْسَّهْو
 
نَانَا تَتَشَبَّث فِى جِلْبَابَك
فَلبَابِك رِيْح يُزْعِجُهَا
يُخْرِجُهَا مِن هَذَا الْحَيِّز يَسْخَر مِنْهَا
إنّى أَحْبَبْتُك رُغْما عَنْهَا
 
و كل ليله كنت باحكي للقمر و باشهّده
واما تِشتي كنت باحكي للمطر و باعهِّده
لما ينزل فوق إزاز شباكك المقفول يقول
هذه القصائد تختلف
هزي سكونى قد مللت الأن أن لا اعترف
 
(هَا – رِي – سَا)
إنّى احْبَبَتُك فِى زَمَن مَا قَبْل زَمَان الْأَرْوَاح
مَاقَبْل النَّهَر و قَبْل الْبَحْر و قَبْل السُّكّر
و قَبْل الْفَجّر و قَبْل الْرَّاح
انّى احْبَبَتُك فِي زَمَن لَا يَعْرِف كَيْف تُسَافِر فِي الْأَوْرِدَة جِرَاح
 
و شايفك عاتترعشي
و شفايفك
بدها تقولي
(اي-كا-دوللى)
 
بحبك قد مانا مشتاقه لبلادى
و قد الوادى من النوبه لحد البحر
بحبك قد يوم العيد و لبس العيد
و رعشة جسمى وانا واقفه بشوف النحر
 
هَذَا الْحُزْن الْسَّاكِن جَوْفَى يَعْرِفُ خَوْفِى
يَحْلُم يَوْمَا أَن يَتَقَيَّأ صَدْرُكَ هَذَا الْجَسَد الْمُتْعَبَ
إِنِّى أَلْهَمَتْك أَشْعَارِى.. فَحَذَارِى
 
بحبك حب صعيدي جوانى
بحبك كيف ما سكن الليل في صوت فيروز
و سكن الصوت في ليل قلبي و جوانى
بحبك حب حّيانى
 
و زود شوقى للحرقه وللقيا و للفرقه
وللدمعه اللى تنزل تحرق الجوابات
و كلمه ماما مش راضيه
و عندي مذاكره مش فاضيه
 
و زود شوقى للمواعيد و للعربيد
و مشتاقلك و واحشانى و محتاجلك بحبك
 
بحبك حب كان مكسوف يبين نفسه قدامى
و كان يطلعلي في منامى
في صورة جوز عيون صافيه
و بنت جمالها كله سمار
و انا شايلك عروس الدار
و ضرب النار في كف عمامي مامبطلش
غريب الحلم لما يواعد النعسان و مايطولش
 

هشام الجخ - اختلاف Hisham Al Gakh - E5tlaf


 
انطردي الآنَ من الجدولْ
 
 
موتي فالكلُّ هنا ماتوا
وأنا اعتدتُ حياتي أَرْمَلْ
 
واعتدتَ الهَجرَ بلا سببٍ
وبرغمِ الحيرةِ لم أسألْ
 
وظلَلْتُ أسجِّلُ أسماءً
وأسطِّرُ خاناتِ الجدولْ
 
ضُنِّي إحساسَكِ ما شئتِ
فأنا مَلِكٌ لا أتوسَّلْ
 
لا أبكي لفراقِ حبيبٍ
أو أترجَّى أو أتذلَّلْ
 
رقةُ شِعري قَوْلٌ إفكٌ
فَفُؤادي مِن صَخْرٍ جَنْدَلْ
 
علَّقتُ نساءً في سَقْفِي
وجلسْتُ فخورا أتأمَّلْ
 
وغزوتُ عُيوناً لا تُغْزَى
غافلتُ رموشاً لا تَغْفَلْ
 
و زَرَعْتُ النُّسوةَ في أرضٍ
لا آخرَ فيها أَوْ أَوَّلْ
 
ديكتاتوريا إن أُعْطِي
ديكتاتوريا إن أَبْـخَلْ
 
 
فانطردي الآن من الجدول
 
 
غِيبِي فَلَكَمْ قَبْلَكِ غابوا
لا شيءَ يَـجِيءُ وَ لا يَرْحَلْ
 
ما الوردُ إذنْ لَوْ لَمْ يَذْبُلْ ؟؟
ما الشمسُ إذنْ لو لم تَأْفُلْ ؟؟
 
لا تَنْتَظِرِينِي نَسْنَاساً
أَقْبَلُ يَوْمَاً أن أتَسَلْسَلْ
 
وَ يَـجِيءَ الناسُ إلى قَفَصِي
لِيَـرَوْا عُشَّاقاً تَتَـحَوَّلْ
 
تتقافزُ كالقِرَدةِ عِشْقَاً
وَ تَـمُوتُ هَيَاماً وَ تُوَلْوِلْ
 
لُمِّي أشياءَكِ و ارتَـحِلِي
بَحثاً عن آخرَ قَدْ يَقْبَلْ
 
أمَّـــايَا .. فلا ثَمَنٌ عِنْدَكِ
تَقْبَلُهُ يدايَ لِتَتَكَبَّلْ
 
إن كان غرامُكِ لِي نَبْعَاً
فَنِسَاءُ الدنيا لي مَنْهَلْ
 
وَ الجدولُ مُكْتَظٌّ جِدَّاً
بِكَثِيرٍ مِثْلِكِ بَلْ أجمَلْ
 
 
فانطردي الآن من الجدول
 
 
غِيبِي وَ تَمَادَيْ في جَهْلٍ
فأنا لا أعشقُ مَنْ يَجْهَلْ
 
إني بَحَّارٌ تَرْفُضُنِي
كُلُّ الشُطْآنِ فَأَتَنَقَّلْ
 
اِعتدتُ السفرَ على مَضَضٍ
وَ قَضَيْتُ حياتي أَتَجَوَّلْ
 
أرتشفُ بلاداً ونساءً
فَهُنـا عَسَلٌ وهُنا حَنْظَلْ
 
وهنا عشت كلص نذل
وَ هُنَا كُنْتُ نَبِيَّاً يُرْسَلْ
 
و هنا ذَبَحُوا شِعري عَمْدا
وهنا شعري صارَ يُرَتَّلْ
 
وأنا والغُربةُ ما زِلْنَا
نبحثُ عن وطنٍ لِنُظَلَّلْ
 
صادقتُ الغُربةَ في الغربةِ
وقضيتُ سنيناً أَتَعَلَّلْ
 
بَرَّرْتُ جميعَ حماقاتي
وَ ظَنَنْتُ بأني أتَجَمَّلْ
 
اليومَ أُزِيلُ عباءاتي
وَ أُكَشِّفُ عن وجهي الأَوْحَلْ
 
مَلِّي عينيكِ بِلاَ خَجَلٍ
فأنا الـمَوحولُ ولا أخجلْ
 
أَغْرَتْنِي أحلامُ الصِّبْيَةِ
فَعَدَوْتُ إلى حُلْمِي الأمْثَلْ
 
وَ بدأتُ السفرَ بلا زادٍ
وظننتُ بأني أتعجَّلْ
 
وَ نسيتُ اللهَ.. فأَهْمَلَنِي
مَنْ ينسَى اللهَ وَ لا يُهْمَلْ ؟
 
حُمِّلْتُ بأثقالِ الدُّنيا
أهربُ مِنْ ثِقْلٍ للأثقَلْ
 
و التفَّتْ طُرُقِي مِنْ حَوْلِي
واختلطَ الأَقْصَرُ بالأَطْوَلْ
 
واخْتَلَطَتْ أحْرُفُ لافِتَتِي
فَوَقَفْتُ مَكَاني كالأخْطَلْ
 
لَمْ أُسْطِعْ أن أُكْمِلَ سَيْرِي
فجلستُ وحيداً أَتَسَوَّلْ
 
وَ بَنَيْتُ مَزَاراً وَ مَبِيتاً
لا يَصْلُحُ إلاَّ لَلثُّمَّلْ
 
وَ قضيتُ حياةً واهِنَةً
لا تَسْوَى في نَظَرِي خَرْدَلْ
 
فَعَلامَ تُرِيدِينَ بُكَائِي ؟
وَ أنا ذو قلبٍ مُسْتَعْمَلْ
 
أَبْلاَهُ الماضي لم يَتْرُكْ
شيئاً لِبَلاءِ الـمُستقبَلْ
 
لا تَتَّهِمِينِي في عِشقِي
فأنا أعشقُ حتَّى أُنْحَلْ
 
والجملُ وإن يعطشْ يصبِرْ
وَ كَفِعْلِ الجَّمَلِ أنا أفعَلْ
 
أَهْلِكْتُ شَبابي وسنيني
فَرَمَتْ بِي في صفِّ الكُهَّلْ
 
وَ وقفتُ بعيداً لأشاهدَ
قصةَ عُمرِي وهِيَ تُمَثَّلْ
 
رفعوا خنجرَهم ودموعي
لم تجعلْ أحداً يَتَمَهَّلْ
 
والتهبَ المسرحُ تصفيقاً
وأنا أُطْعَنُ وأنا أُقْتَلْ
 
فَعَلامَ تظنينَ بِأنِّي
آتٍ مِحْرابَكِ أتَبَتَّلْ ؟؟
 
دَوْرُكِ في الـمَشْهَدِ فَرْعِيٌّ
بِوُجُودِكِ أو دُونَكِ يَكْمَلْ
 
وَكِلانا مكتوفُ الأيدي
وَ سِتارُ المسرحِ لا يُسْدَلْ
 
والـحُكْمُ الصادِرُ في أمرِي
حُكْمٌ فَصْلٌ لا يَتَأَجَّلْ
 
فدعيني في موتي وَحْدِي
فأنا والغُربةُ لا نُفْصَلْ
 
ما دامَ الوطنُ بلا شيءٍ
فالموتُ على شيءٍ أفضلْ
 
 
فانطردي الآن من الجدول


الجخ

m2nd0