مش معنى الموت خروج الروح ..
ما أنا ميت وأنا عايش .. 
كفاكى فرجه على حالى وانا مدبوح .. 
قوليلى روح ولو مره كرهتينى .. 
بلاش ليهم تبيعينى 
بلاش بالحسرة تتلون دموع عينى ..
سمعت لهم وسيبتينى ..
أموت غرقان واموت محروق ..
واموت م الجوع واموت موجوع .. 
بقولهالك وانا موجوع .. 
بقولهالك بصوت مسموع ..
انا المقسوم وانا القسمه اللى مقسومه على جبينك ..
حروف اسمك حروف بنطقها تحيينى 
انا عاشقك برغم الآهه ف جروحى 
ومهما تقسى على حالى انا عاشقك ..
انا وانتى ف طريق واحد 
فاضل لينا يدوب خطوة نخطيها 
فساعدينى يا إما نعيش ..
أنا وإنتى أكيد هنموت !

Mohamed Sorour  معنى الموت


" فادك بإيه البُكا ؟ "
( 1 ) 
الاسم : أطول م القصيدة بميل .. 
الحالة : أعذب من وريد النيل ... 
المهنة : سارح والقُليب قنديل .. 
عنوانى : ساكن فى الشتا والليل .. 
السن : جايز لسه ماعرفتوش .. 
بس المقدّر سنى كان عشرين !
( 2 ) 
مين اللى يقدر يرمى همّه ف كفن ؟ 
مين اللى شاف الدنيا رحلة عفن ؟ 
موجوع وقلبك حظه مات وإندفن .. 
إيش ياخد الريح م البلاط يا ولد ؟ 
غير روح حزينه ومالها غيرك سكن ؟
( 3 ) 
فادك بإيه البُكى .. والنهنهه واللوم ؟ 
فادك بإيه السهر .. والدمع نُص النوم ؟
قلبك لا عُمره إشتكى .. ولا هزّه نَعق البُوم .. 
يا صخرة المُشتكى .. إيه فى الحمول بيدوم ؟ 
درويش وقلبى الصبى عايش مع الحرافيش .. 
حرفوش وسيدنا النبى .. صليت عليه بشويش .. 
حُضنى الفراق رقّعُه .. بقى زى حتة خيش .. 
سهم المُنى وقّعه .. كسّر ضلوعه الشيش .. 
والهم مهما إتكوى .. ما بيتوقف له نزيف .. 
كل اللى مسّه الهوى .. قلبه ماعادش نضيف .. 
مدمن غرام وإرتوى .. 
يا اللى إنتشيت بالجوى .. فادك بإيه الكيف ؟ 
عيل ماليش موهبه ... غير فى العياط والنوح .. 
عيل ماليش فى الصبر .. غير اللى شق الروح .. 
أيوب ياطيف النبى .. مش كل صبّار نبى ولا كل رُبّان نوح .. 
وأنا قلبى شق الندى .. رص الكلام وإبتدى .. 
يكتب قصيدة هدى .. سابنى الغرام مجروح !!!
( 4 ) 
إياك تِئن وتنكِسر زى العيال .. 
إياك تبين دمعتك لو جرح طال ..
إضحك فى وش الريح وعافر وإنتصر .. 
ده العيب عليك .. 
إنت اللى غاوى تكتأب وتصدق الدمع القزاز .. 
تماسيح بتبكى ليل نهار .. 
وإنت اللى عايش فى إنهيار .. 
مسكين بتمسح دمعهم وبتبكى نار .. 
حتى اللى كان صادق معاك .. 
مبقاش فى نقطة براح فى قلبك قادرة لحظة تصدقه .. 
ماتت حاجات كات جلوة فيك .. 
كان نفسها لو يوم تعيش .. 
ومافاتش غير يوم أو يومين ..
كات بين إيديك .. 
وأديها عايشه لحد تانى وقادره تنسى إنك مفيش ..
ما إنت الوحيد صدقتها وآمنت بالدين الحرام .. 
أدّيت فروضك والنوافل والزكاة بعد الصيام ..
سخرية القدر اللعين .. 
ضحكت عليك .. 
وفهمت كل الدين غلط ..
دينها رسالته مختصرها ف كلمتين .. 
طبع الخيانه ع البشر بقى فرض عين !
( 5 ) 
إعتزال الشعر واجب .. لإنكسار الحب فيا .. 
وإندثار الدمع سنة لإنشطار الجرح بيا .. 
زمّلونى بالقصايد يوم فراقى وإضحكوا لى .. 
ضحكة أوسع م البراح .. 
اللى ف ضمير عيل بيحبى .. 
وابنوا قبرى ف عُقر دارى .. 
وإمنعوا عنى الزيارة .. 
وزّعوا على روحى زمزم .. 
م الدموع اللى ف عنيها .. 
وإقرى م القرآن يا مريم .. 
هَزّ جذع النخل رؤية .. 
هَزّ نعش الموت كبيرة .. 
وإن لقيتوا فضيلة باقيه .. 
من حياتى اذكروها .. 
وادعوا ليا بظهر غيب .. 
ألف رحمة ونور عليا .. 
واكتبوا على باب قرافتى .. 
صدقة جاريه أغانى غاليه 
وأى غنوة بصوت منير ..
#محمدعبدالله

فادك بإيه البكا

يسألونك ع اللى فيك ؟ 
قولهم أبدا مفيش .. 
وابكى بس قصاد مرايتك .. 
واحكى ليك على حاجه .. 
طعم كل بداية حلوة .. 
كل سهرة كات معاها .. 
صوت أدان الفجر بينكم .. 
طعم ضحكتها البنفسج .. 
لما كات تلضم جروحك .. 
صوت دموعها لما تزعل .. 
تبكى روحك من زعلها .. 
كل حلم عشانها عيشته .. 
كل هم عشانها شيلته .. 
وانكسار الحزن دايما .. 
وقت ماتطبطب عليك ..
يسألونك لون عيونك دابله ليه ؟ 
قولهم بسهر كتير .. 
حاله عارضه وبكره ترجع .. 
واوعى عينك فجأه تلمع .. 
الا وإنت ف عزلة تامه .. 
زى عادتك .. 
راجع الذكرى ف فراقها .. 
نبرة العشاق فى صوتك ..
نبض قلبك لما شافها 
لهفتك والشوق معاها 
لمعة العين اللى بالك 
مسكة الايد بانتفاضه 
والعرق دايب ف ايدها 
كان بيشفى الروح تملى
يسألونك هى مين ؟؟ 
قولهم بنت ف خيالى 
أو مجاز الشعر صاغه .. 
قول لنفسك كات حبيبتى وكات عشانى 
كات حياتى وكات " أمانى " 
بس وحش الموت خطفها 
الفراق كان عزرائيل .. 
من سكات موّت غرامنا .. 
قصدى لأ موّت غرامى 
وسابنى وسط الرحلة واقف 
برتجل ليها الأغانى 
ومش مصدق 
هو بعد الحب موت ؟ 
هو طعم البوح سكوت ؟ 
ليه فارقتى وليه بعدتى 
ليه كسرتى الروح ياتوت ؟ 
كنتى حلم بديت أطوله .. 
كنت آيه وكنتى سورة
كنت أنا حافظك تجلى .. 
ليه تِمِلّى وتخسرينى .. 
ليه بقيتى حرام لعينى ؟ 
الحرام أصلا بعادنا ..
يسألونك ليه فارقتوا ؟ 
قولهم كات ليا صاحبه 
وأخت فاضله وزى أخويا .. 
واحبس الأحزان لوحدك .. 
داوى قلبك وإبدأ إنسى .. 
قول أكيد قسمه ونصيب ..
ما النصيب دايما يصيب ..
باللى بيزيد من جروحك .. 
قول لنفسك مهما هعشق .. 
عمرى ما اعشق إلا هى .. 
وإن بنات الكون عشانى .. 
مش هشوفهم إلا غيه .. 
هى مالكه الروح وساكنه .. 
هى لحنى وسمفونية .. 
كنت ليها يمامه شارده .. 
وهى ماسكه البندقيه .. 
والعيون السود صادونى .. 
بين غرامها قيدونى .. 
والنصيب إداها غيرى ..
يسألونك طب هتسكت ؟ 
قولهم فى اليد حيلة ؟ 
هو بعد البعد غيره ؟ 
اللى باقى يدوب صورنا .. 
وجرح جوا الروح وجعنى .. 
كل جرح قوام بيرجع .. زى سابق ! 
بس جرح الروح بيفرق .. 
كل لما الوقت يمشى .. 
عمرى بيزيد بيا وأكبر .. 
كل ما أكبر جرحى يكبر .. 
والنهايه الموت علاجى .. 
‫#‏محمدعبدالله‬
أداء صوتى لــ : رباب محمد 
https://www.facebook.com/roroo.lodaa
كلمات : محمد عبدالله حموده 
https://www.facebook.com/mhmd.abdlla7

محمد عبدالله Darweesh

Popular tracks