راح مرجعش ()El JokeR

Tofa7et 7awa

Lyrics: El Joker & Mohab
Vocals: El Joker & Mohab
Music: Free Beat
Master and mix: El Joker

Tofa7et  7awa ( Remix )

الـــكـــلـــمـــات

بطلت أكلم حد لحد ما حد خد بإيدى
لو مكانتش إقتنعت بيا مكانتش ظهرت عبقريتى
كله أصاب فيما أصاب ، وأخطأ فيما أخطأ
الحق أحق أن يُتبع مهما هنوصل أبطأ

إنت عمرك ما اقتنعت بـ قد إيه بنكمل بعض
أنا لاحظت كون الفكرة بتقوى بنقد نقط الضعف
تعدد عصبياتنا فى العموم شيئ مفيد
وإن استمر الفيل فى إعتقاد إن الإله فيل

بلجألك إختصارا فى اللى أنا فيه فعلا محتاجك
مستحيل حد من الصفر لوحده يعرف كل حاجة
ده مش معناه إنى أقل ، ولا إن انت أعلى
أنا بقفل التآويل ، وانت بتغرق فى المعنى

لسه معرفتيش من إمتى مبتفهميليش ولا كلمة ؟
من ساعة ما كل حاجة معاكى إبتدت تكون مملة
عمرك ما شوفتى حقيقتى ، ولا فهمتى حقيقة ده كله
كل واحد شاف التانى الواحد اللى حب يكونله

مضطر أسيبك وأمشى منعا للمخاطرة
الورقة رافضة أعيشلك وأبقى أزورها كل فترة
أنا بشرح على قد عقولكوا ، ولسه متفهمش شرحى
انت كلامك مات ، وإنت لسه عايش ، إنت سطحى

أسئلة القرية دى محدودة جدا ، عالم تافهة
المدينة دى مبالغ فيها جدا ، عالم كافرة
البلد دى كاملة جدا بس أخينا عمره ما شافها
بقراها بمدنها بكل حاجة وحيدة بـ إختلافها

ظروفه كانت غير ظروفهم ، فخرج عن الإجماع
ظروفنا الآن شبه ظروفه فـ اجتمعنا على فتواه
مش فى صالحك يبقى مثالى طول مـ انت فى قمة متعدد
باب الإيمان قصير ، مبيدخلوش متكبر

سيبيلى حاجة أفتكرك بيها ، حاجة ريحتك فيها
حاجة استخدمتيها ، فى أوقات مش حبانى أعيش ناسيها
للهروب من واقعهم ، للأسف لازم توقيعهم
يؤسفنى أقولك -فى بعض الحاجات- شبة طيعهم

بس ده مؤقتا ، هما يقولوا بطل وأبقى بطل
وأوعى إنتظارهم إنك تقع هو اللى يسقطك
وتبدأ النهاية بـ إنى أقبل حاجات مرفوضة
واحدة بجمالك إنتى فى بالى صعب تكون موجودة

أجزاء شبه عشوائية سوا تبان مخيفة
انت سامع مـ الغنوة آله بتعزف صوت مؤامرة سخيفة
اللى فى صالح السيناريو طول عمرى بنفذه
لو أبرهة بيغرق قبل عام الفيل هروح أنقذه

أسئلة القرية دى محدودة جدا ، عالم تافهة
المدينة دى مبالغ فيها جدا ، عالم كافرة
البلد دى كاملة جدا بس أخينا عمره ما شافها
بقراها بمدنها بكل حاجة وحيدة بـ إختلافها

معرفتش أشكر مين ساعتها وعدى الموقف عادى
مجاش فى بالى إن أنا الشخص اللى أنقذ حياتى
براجع نفسى لما ألاقينى تهت فى التفاصيل
فـ أنفصل عنى الجزء اللى مراقبنى من بعيد

شايفك يا بلدى بتبصيله ، وإنتى بترقصيله
بصة فلسطينى لإسرائيلى ناهب محصول طينه
فى لوحات يادوب ، فيها بسيب كذا خط ولون
كوّنوا فى كل عصر كل رسمة تفيد الكون

غلبانة ، بتقول للناس إنها بكره هتنسانا
مش عارفة إن اللى يعيش من غيرنا أكيد معاشش معانا
صدقى اللى إنتى بتحسيه ، كدبى اللى إنتى بتشوفيه
استخدمى البعد اللى إنتى عارفة إنك فى حضنى فيه

كان باين فى عينيكى الزهق
مبانتليش فى عينك غيرة
قلتلك إنى عارف إن دى الرقصة الأخيرة

أسئلة القرية دى محدودة جدا ، عالم تافهة
المدينة دى مبالغ فيها جدا ، عالم كافرة
البلد دى كاملة جدا بس أخينا عمره ما شافها
بقراها بمدنها بكل حاجة وحيدة بـ إختلافها

________________________________________­_

El Ra2sa El 2a5ira

Written by: El Joker
Music: Free Beat
Vocals: El Joker
Master and mix by: El Joker
© 2015 El Joker

El Joker _ El Ra2sa El 2a5ira I الجوكر _ الرقصة الأخيرة


كلمات أغنية 24 قيراط 
حبيبتي .. حافظي عـ العهد اللي بيننا ودايما افتكريني
لو الليل حاوطك في يوم ومتصلتش كلميني 
ودعها وسافر ، سنتين واكتر بيعافر 
18 ساعه شُغل ، وياكل أرخص شئ يتاكل

ويصبر نفسه بفكرة حوش أكتر ترجع أسرع 
ويوفر حتي السكن بإنه يبات مع أمن المصنع
وفي ليله اتقبض عليه نتيجة خطأ تحقيقات
لإنه كان بيصلي في جامع إتخطط فيه لتفجيرات

قال إيه بيهدد أمن الدوله فـ بالطبع إتخفي
في سجن فيه كورسات تعذيب يوميه ومكثفه 
مفادهمش بحاجه ، ومحتاجوش دليل إدانه 
علشان يرموه في زنزانه ، لحد ما كل التحقيقات تتقفل

إترحل لبلده بعد عذاب 16 شهر
مش باقي من تحويشة عمره طبعا الا قهر
دخل علي اهله البيت الكل حضنه في نفس الوقت
أمه وسط دموعها قالت لأبوه اهو عايش اهو ... صدقت ؟

الحياه ممكن تتعبك .. والمجهول يبدأ يرعبك
بس اللي لا يمكن يحصل تتجه لله ويخذلك 
اليأس نهايه .. كل شئ موجود لغايه
الشمس بتطلع كل يوم تقولك إبدأ تاني معايا

في عز ضحك الأهل سأل عن حبيبته سكتوا
الأب : يا ابني كله اتخطي حزنه عليك بطريقته
سأله بصدمه: يعني ايه؟ ... رد بعجز: اتجوزت
ثار و سأله: الاقيها فين؟ ... رد: إعقل ، موضوعكوا خلص

لفتره إكتئب بس لإنه مؤمن غلب 
الإكتئاب بفكرة لو كانت ليا كنت اتجوزتها 
و بدأ من جديد بطاقة اول مره إشتغل 
و استوعب بالتدريج ان النجاح وليد الفشل

من شغله بره كان اتعلم طُرق إدارة مكن
استخدامه هنا يضاعف الانتاج و يغطي التمن
عرض علي اصحاب المصنع اللي اشتغل فيه فكرته
عجبتهم ، نفذوها و عينوه مساعدهم

و أخيرا الحظ ابتسمله في طريق اترسمله
علشان رضي بنصيبه و كان مخلص لله في عمله
حقق أكتر من اللي حلم بيه ، بيت و زوجه وولد
من غير ما يبقي في بلد و كل حاجه عارفها في بلد

الحياه ممكن تتعبك .. والمجهول يبدأ يرعبك
بس اللي لا يمكن يحصل تتجه لله ويخذلك 
اليأس نهايه .. كل شئ موجود لغايه
الشمس بتطلع كل يوم تقولك إبدأ تاني معايا

محدش قال الدنيا سهله ، ولا النجاح واقف يندهلك
العمر بيجرى فـ مينفعش تعيشه على مهلك
مادام أخلصت إرضى بأى حاجه جاتلك
ثق فى ربك ، هو أدرى بالأفيدلك 


الجوكر 24 قراط

El Joker - Kolo Sabny - الجوكر - كله سابني.mp3

كلمات التراك
----------------------------------------------
كطفل كان عبقري ومع الوقت اكتشف ده
يعرف شدة وإتجاه الهوا أو يحتفظ بالسهم
كان كاره ظروفه ومش شايف في حياته حاجه مهمه
مولود القاع الي رافض ياخد نفسه غير ع القمة

شاطر في كل الي بيعمله لكن مش مؤمن بيه
فاكر متعة الحياه الوصول فعانى في الطريق
وعلشان متربي وسط ناس في عينهم كل شيء وسيلة
مترددش لحظة في إنه يدوس ع السلمه الأخيرة

بدأ يلعب على كبير بقى بيلعب على الدين
بدأ يشد ناس كتير بقى إمام مجاهدين
انا فاهم انتوا مش فاهمين
أطيعوني لو انتوا مؤمنين
الآيه كذا معناها كذا ، وانا اصطفيتكوا للتفجير

أتدعى إنه صاحب فكر ، وأتدعى إنه عنده خطة
وإنه هيقطع راس الأفعى .. من الآخر شاف فانديتا
وعلشان محاط بغرقانين في غل وخوف ونقص
كل ما يعزف سيمفونية الجنة يتسابقوا على الرقص

عارف إن منكوا كتير مروا بظروف مؤلمة
انا واحد م الي مش طايقين حال الدول المسلمة
ظلم فقر جهل ولسه الأسوأ في انتظارنا
نص العالم انتهكنا وأكتر من نصه احتقرنا

بس لا إنتوا مجاهدين ، ولا ده الحل ، ولا الدين
بالعكس ده انتوا حجر مربوط في رجل غرقانين
لو الي استغلك زاهد في الحياة كان هيسيبهالنا
هيسيبلك ليه الحزام الناسف لو طريق الجنة

ده كإنك فاكر قوة دينك من قوة دولته
وكإنك إله يأست من فلان فبتموته
أو كإنك لو حكمت العالم دينك كده إنتصر
يعني شويه حظ لهتلر كان بقى المهدي المنتظر

خليك مسلم حقيقي في كل فعل وكل كلمة
سلوكنا في الحياة دعايا حية لديننا
يا شيوخنا كفايه افتا في حرمانية الوشوم
أ ب الإسلام لناس كتيره لسه مش مفهوم

 الاسلام وسيلة والأهداف كلها شخصية
والمسيحية مش مسئولة عن قرنين حروب صليبية
ولا عن تاريخ من كره وقتل أتباع اليهودية
اللي أكيد بريئة من إنتهاك فلسطين الأبية

لكن احنا مجتمع عيان .. مجتمع عميان
تتفجر كنيسة تلاقي ال100 مليون نقاد أديان
قبطي ينشر م القرآن آيات القتل والتمثيل
يرد مسلم بآيات دعوة عيسى للسيف الي في الإنجيل

وده نتيجة ضخ بعض رجال الدين روح الكراهية
مش كل اللي مداسش ع الزناد بريء م المسئولية
ده غير الأم بتاعت متآمنش لأربعه ريشة
وبتاعت خليك مع اللي عارفينهم من الكنيسة

صدرنا إن الأديان لا تناسب هذه الألفيه
وخفى طوفان التعصب كل ملامح الإنسانية
اتدعاء وجود عداوة بين التلات أديان معناه
إن مصدرهم غرضه فتنه .. هل دي رؤيتك لله

الجوكر - السلمه الاخيره | Eljoker -Elselema_ela5era

الجوكر- متهمش

الجوكر - متهمش

الــكــلــمــات
__________

سلامنا على نفوس في حلقة البحث عن الضوء
مذئوب في ليلة البدر مال مع الدراويش بشوق
نجمه بتوعد ، ونسمه بتطبطب في ليلة شقا
سقانا بل ريقه لما آخر شخص اتسقى

كل وعود السما مرسومة في عيون المريد
مختار حارتنا قال للظلم "لأ" بصوت عنيد
وردة خافت ع الحبيب .. شاعرنا قال الليلة عيد
حامينا بأمر من سلطاننا حشد جيش من العبيد

رجال حارتنا اجتمعوا حوالين الربابه الليلة
مختار بيتكتبله غنوة زي أبو زيد وغيره
دخل رسول حامينا برسالة .. عكر صفا ليلتنا
يا نسلم مختار ونعيش .. يا نموت وتدفن حارتنا

غضب سريع .. وقف ، وقال: هندبح المرسال
مختارنا قال قتل الرسول مش من شيم الرجال
مشي الرسول ، وسكتت الربابه ، وهتف صوت
رجال بتبايع المختار ع الحرب حتى الموت

طول الليل ذكي وجريء بيرسموا في خطتنا
وجيوش من العبيد بتزحف بإتجاه حارتنا
في الصباح كان طبل جيشهم جنب تكبيراتنا همس
والحامي الكلب لزم خيمته عشان مش حمل شمس

أما أسدنا كان على رأس جيشنا .. مخافش سهم غدر
قال هما كتره ، واحنا قله ، والنهارده بدر
من بينهم خرج فارس بيطوح عبيده بدرعه
وقال: أعتاكوا يجيلي .. وللأسف في مننا رجعوا

مختارنا قال أبارزك ، واللي يفوز يفرض شروطه
نحسمها بموت نفر ، بدل ما رجال كتير يموتوا
فارسهم ضحك زهوا ، وهجم بسرعة شديدة
مختارنا إتفادى الضربة ، وقتله بضربة سيف وحيدة

وفي عز تكبيراتنا ، وعز ما جيشهم كان مصدوم
الكلب قائدهم خان العهد ، وأمر بالهجوم
مختارنا قال هنحارب .. احنا رجال وبيننا ميثاق
والويل لجيش عبيد اتساق للحرب بالكرباج

كل شهيد من بيننا مات قصاده منهم سته
خبر صمودنا بدأ يلف كل بيوت الحته
ولقينا رجال من كل حواري الحي بينضمولنا
حسينا بكترتنا لما الأرض إتهزت تحت رجولنا

هابوا العبيد .. رموا السلاح .. وهربوا م الميدان
مختارنا قال: سيبوهم. الحياة عقاب الجبان
لفينا نعلن الإنتصار وسط إحتفال حوارينا
كل بيوت الحي حيت كل راجل فينا

وردة جت .. بخجل قالت للمختار: قلقت عليك
العيون بتقول كتير ، والبق بينطق: أنا بخير
شاعرنا قال يا فاكر إن البرق قبل الرعد
آدي اتنين بينهم مسافه ، لكن روحين في حضن بعض

قضينا الليل بنمجد كل راجل راح مننا
وبنتحاكى بإن مهدي الحي بحاله من عندنا
مختارنا قال: كفى إحتفال. اجمعوا شيوخ حارات الحي
اللي فات يادوبك خطوة ، والمشوار بحاله جاي
___________________________________________

El Mo5tar
7akawy 7aretna 1

Lyrics: El Joker
Vocals: El Joker
Music: Mostafa Ebrahim
Recorded at: Ganoub studio
Master & mix: Pola maher
Video by: Ahmed Samir
© 2018 El Joker

الجوكر - المختار

الــكــلــمــات
_________

اتلونوا التعابين ، ودخلوا بيننا .. قضا وقدر
حتى اللي بان مليان بالتقوى .. فجأة فضى وفجر
العوز كافر خلى أفلاطوننا مضى لغجر
والغابة اللي احنا بقينا فيها هي صدى الخبر

حلوين سيجارتين الدخان ، لكنه شخص دني
غريق محدش بيحبني .. عام بـ مفيش حاجه تهمني
وصل بر الـ انا ، فرمل الزمن قاله هتعدني
وتقتل حته منك كل اما الغربان تقول شدني

غلطنا اه .. اتعلمنا لأ .. مصممين نعاند
نازلين من الجنة عـ الأول .. طالعين النار عـ التالت
لا موتنا موت شريف ، ولا حياتنا حياة بهوات
شقانا كله في البضاعه في قاع الملاحات

بنجود مش بنزود .. لا بنكمل ولا نحود
لا بنمل ولا نتعود .. ولا نحب إلا اللي يموت
كائنات تميل لضرب دماغها في الحيطه الخرسانه
عدم أذى الغير وأذى النفس ده أقصانا

كل يوم بندخل حرب جديدة .. حياة مش سهله
بس مهما حصل كله إلا النداهة اللي بتندهلك
كل يوم بنوصل للسرير .. حياة مش صعبه
بيمشي الحال ، فمشي الحال .. بسط بلاش تستعمق

سما الحب متسيعناش .. أرض المصلحة تشيلنا
في كوابيس مفيش أحلام من كتر ما اتعشمنا
الهدف اللي انت بتستغرب هو انا إزاي وصلته
كان بيني وبينه حيط ضوافري بين حجارته

نفخ فيها ، وطفى سيجارته .. ابتسم ليها .. طول صمته
من ثانية كان متعلق بيها فـ بتتهان كرامته
قالتله روح .. هتيجي ، وبإرادة حرة
هتروحي فين يا شمس! .. ساعة الطلق مرة

وبيهرب الناجي الواحيد من الغابة الموبوءة
وتتحقق النبوءة ، تدب روح في عروق محروقة
واللي بيتعافى متجيبوش الأرض كام سكينه
مسكينه .. سنتين مش عارفه تجيب بوزك في الطينه

سنتين بتصحى معاك تمنها ، وعارف فين مكانها
سنتين مشتاق بشكل يومي ، وعارف تتجنبها
سنتين بتفكر نفسك إن الشجرة دي ملعونة
سنتين بتتوقع تعبان لما تحس بـ نعومه

كل يوم بندخل حرب جديدة .. حياة مش سهله
بس مهما حصل كله إلا النداهة اللي بتندهلك
كل يوم بنوصل للسرير .. حياة مش صعبه
بيمشي الحال ، فمشي الحال .. بسط بلاش تستعمق
_______________________________________

El Nadaha

Lyrics: El Joker
Vocals: El Joker
Music: Homage
Master & mix: El Joker
Design: Mostafa Karim
© 2018 El Joker

الجوكر - النداهة

اعملو repost  للاغنيه❤️

الــكــلــمــات

البشر غرقوا في شر نفوسهم وانت مش رسول
طول ما محدش عايز يسمع يبقى إياك تقول
الكلمة مبتغيرش إلا اللي بيسعى للتغيير
متقولش "هخسر ايه؟" عشان اعداء الكلمة كتير

لازم تفهم ان الناس بتكيل بمكيالين
والفرد بحد أدنى يمتلك وشين
مش هيبصوا اللي انت فيه دفعت إيه مقابله
كل يبكي على ليلاه وشيطانه بيطبطبله

اللي ادى استنى ياخد ، واللي خد خلع من بدري
القلم بص على الخشب اللي راح مبصش انه مبري
مستكترين عليك قيراط ما هما رضيوا ب شبر
اشمعنى آدم يتسجدله أنا أحسن منه كبر

لو لمحوا الهمة هيحبطوك بكلمة لأجل ما تهمد
عايزين يشوفوك بتموت بشفرة تلمة عايزك تجمد
ولا بيجروا في طريق ولا انت عقبة لازمها إطاحة
بل سولت لهم أنفسهم إن موتك راحة

الغل كل قلوبهم واللي اتبقى منهم غيرة
اسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض

هييجي من أقصى المدينة شخص عكس الباقي
أوعى تشوف بعين القاعدة ما هو إستثنائي
نحن نشك حتى نُدفَع أن نثق
الدنيا مره مش لازم تشربها سِك

لو لو رجع الزمن سنة مش هتمشي في طُرق تانية
اعرف ان مرت سنة من غير ما تكبر ثانية
لو غلطت راجع نفسك وهتدفع لو تمن بصه
واجه .. أوعى تدفن راسك في التراب وتندب حظك

في ناس بتحس بكبر على تجارب ناس سبقتها
كل اللي كانت دماغه ناشفة الدنيا دغدغتها
في ناس بتعرف تستفيد من كل شخص جرب
وناس لازم ايديها تتحرق عشان تحرم

بين طبقات الناس وتسلق جبل شبه بحت
كل بصة فوق لازم توزنها ب بصة تحت
لو فضلت باصص فاضل أد ايه ومين فوقيك
مش هتحس طلعت أد ايه ولا عمر شئ يرضيك

هتضحك عل انك بتقول دلوقتي جبت آخري
دايما اللي جاي أصعب ، إنشف لسه بدري
عايز جلدك تخين ، ولو يا تتكسر يا تميل
إتكسر تلحم عضم أنشف م العضم القديم

لو بصيت للسما بعين الغِل تلات تربعها
اعرف إنك ماشي في طُرُق بقى لازم ترجعها
أنت عدو نفسك ديننا بيمنعك تتمادى
آلهنا مش فوق الاولمب بيتنفس عبادة

في أصول الأعتقاد كل الفرق أصابت
الكُفر كبر .. مش اجتهاد في فهم غامض
لا تنغلق وتشخصن الأمور ف تبتذل
نحن أشاعرة في بعض الأمور نُرجئ أو نعتزل

هتحس الاختبار تقيل عليك .. ومين محسش
إبراهيم قال : أرني كيف ؟ .. وإبراهيم متهزش
فيه قبيح بديله أقبح ، وقريب بعيده أوضح
وصاحب جنتين اتمنى لو إنه كان الأصلح

هتبان الدنيا ظالمه متصدقش اللي انت حاسه
يوسف لو مترماش في البير مكانش هيرمي نفسه
ساعات شرور نفوس الناس تكون خطوة في طريقنا
مش عارفين رايحين لفين ؛ ف متقوليش بعدنا

الغل كل قلوبهم واللي اتبقى منهم غيرة
اسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض

هتضحك عل انك بتقول دلوقتي جبت آخري
دايما اللي جاي أصعب ، إنشف لسه بدري
عايز جلدك تخين ، ولو يا تتكسر يا تميل
إتكسر تلحم عضم أنشف م العضم القديم
_____________________________________

El Wasaya

Lyrics: El Joker
Vocals: El Joker
Music: Mostafa Ebrahim
Master & mix: Youssef Anwer
Video by: Mostafa Karim & Adham Karim
© 2018 El Joker

الجوكر - الوصايا

الــكــلــمــات

بنقدم قبل النوم عرض شاش وميكروكروم
تهزيئاً لدراكولا .. بطولة الفيلم لفص توم
فاضل ألف جنيه على أول ألف في المليون
أو شفرة موس ، يا حبل في نجفة الصالون

آدي اللي إتلصم عطل .. الواقع يخذلك تتسطل
صعب تعيش بـ اللي منك فِضِل ، وصعب اللي فاضل فيك يتقتل
راسه مش في الطين عشان كرامته سوى البلاطة
لأ ،كان عنده إرادة .. بس هبت ريح وطاطا

في قمة الهيكل ده عين ترى الجميع
في أرض الذئب جُرِم إجتماع قطيع
ونادى منادي بكوننا اتنقذنا .. بحال المراكب اللي غرقت وعظنا
شكر كل اللي شارك ببصمة .. لقانا بنغرق نادى لقراصنة

صاحب الشيطان ومتصاحبش فكرة
الشر واقع ، والبلد دي خرم إبرة

اليأس سلاح ، وتلم .. يعشق اللي خاف فـ سِلِم
أما باني اللي بيتهدم .. لو مفاقش مكانش حِلِم
وطننا ضاق ، لكنه عشق .. الوضع ساء ، تحليته غش
وزيرنا مات ، وملكنا كِش ... وإتقال معلش

صمتك مش علامة رضا .. علامة الفرهده
كلنا أطراف في صراع على حتة جبنة في المصيدة
اللي متسطلش كفايه عاز فنون تسطله
ديلرات الكار نجوم طريق مخطيناش أوله

انا لما قولت لأ .. كنت بقولها عشان شاريكي
انا عند حسن ظنك .. قالب الدنيا ومش لاقيكي
قالولك إني طايش .. وإني مش بفكر فيكي
قسموني أتنين إتغدوا ببعض .. عشان يتعشوا بيكي

قالي ملفك كِبِر .. جملة سياسة كمان وشكرا
قولتله متهددنيش .. انت متعرفش انا مين في شبرا
هما اللي إتمادوا ؛ فـ مخدتش الدوا في ميعاده
كُنا سته .. وسته مننا ماتوا

طموحك نازل أرض الواقع .. هيبططك
اللي عوزته ، واللي إتحقق .. شىء ، وعكسه .. وده أحبطك
نِداك في مالطا ربى فيك الكسل
معادش فيها حاجه حلوة ، أو سوادها عسل

مربوطين في ساقية أكل العيش .. من تعليم لـ جيش
لـ حب قتله سعر السوق .. فقالوا عنه طيش
مش صدفة كل الناس دي بقت بتحلم بـ اللجوء
محدش غيرنا بيعزف .. تيتانيك بتغرق .. فوق

البلد دي فيها ظلم والسكوت عليه جريمة
فاضل ايه عشان تحس إنك ملكش قيمة
إتهانت جوه قبل بره .. ألف بدل مرة
سكرهم يا نمل مرر .. إتحرر
__________________________________________

Mosem El Ze2ab

Lyrics: El Joker
Vocals: El Joker
Music: Hanto
Master & mix: Youssef Anwer
Des. by: Mostafa Karim
© 2018 El Joker

الجوكر - موسم الذئاب

الــكــلــمــات
ضهرك لحق مش من مصلحتك تنصفه
سبب جمال الغنوة قبح اللي بتوصفه
ساعات اللي انت شايفه يبقى اللي انت شايفه
أغلب الأوقات شجاعتك جت مـ الخوف اللي انت خايفه

من دوشة تل الغلطات .. مش سامع مـ السما أصوات
بـ الغل وبـ الخوف متحاط .. مش عارف تاخد خطوات
كله غرز بوزه في التراب في أول نطة
هما حاولوا تاني .. وانت اختارت حاجز أوطى

قتلوا مننا كتير بحجة شىء أهم
خلوا الهوا اللي بيني وبينك ريحته دم
مداقوش ازاي الوجع شىء ملموس وطعمه في بقك
ظنوك بتقول مجازا إن الظلم كسر شوكتك

مش أرق اللي مسهرك للميعاد ده
كل اللي عدى مستنيك على المخدة
واللي فاكره حب قالوا عنه غدة
معظم النجوم اللي بتحكيلها مات من مدة

قتلت جزء فيك عشان يعيش أغلبك 
معظم الحقيقة على ورقة في سلة مكتبك
لو رموا الشبك ، والتيار بدأ يسحبك
وانت عومت عكس الإتجاة للحظة ده مكسبك

فرض السكوت يموت شخص بالبطيء
قص كلام من السياق يضل ناس عن الطريق
بعض الوجع داين تدان ، وبعضه حظك كده
في ناس بتعبد الحياة ، والباقي كبش فدا

وبصراحة مفيش مؤشرات إن الزمن هيدور
الضلمة اللي في عالمنا قادرة تبلع أي نور
وضع معادش مبلوع .. خلافنا في أصل وفروع
ملكنا لا سيف ولا دروع .. ملكتوا الطلق والجوع

سعرك سعر ترس في عجلة الإنتاج
وبصراحة يعني من أسباب إيمانك الإحتياج
لبسّوا الرجلين فردة .. عبدوا الحس والمادة
نزعوا المعني مـ الوردة .. ينفوا المطرة لو تندة .. فوقهم

شوهونا .. أصبح زوقنا زوقهم
إتعاطفنا لما إتعاطفوا ، وقولنا قوم لوط بشوقهم
قصاد الريح تفضل جدور ، وجدور تتقلع
أول مرة أمسك كبريت العلم الأزرق ولع

قتلت جزء فيك عشان يعيش أغلبك 
معظم الحقيقة على ورقة في سلة مكتبك
لو رموا الشبك ، والتيار بدأ يسحبك
وانت عومت عكس الإتجاة للحظة ده مكسبك

الجوكر - عالم رابع

Lyrics
سفينتي متبنيتش عشان جماهير عريضة
لو شىء بغنوة إتهد يتبني بقصيدة
لا اختارت جاري ، ولا قُطر فتحة غاري
مصمم ع اللي اختارته ، ومش حزين مع اختياري

لا شىء لا يمكن استبداله .. عالج التعلق
ناس كتير ع القمة لا تفقه التسلق
أغلى من حاجات ، وكافرة بالتدرج
تيجان ملوك دابت نتيجة التملق

غير العامة .. بنطارد الفراشات بشغف
ع المشانق أطفال إذا فرعون ارتجف
جيوشنا لفت من غير ما تضرب سهم
من قصاد حصون ورق كانت مدهونة وهم

أرواح فرادى اتطفت لما قلدت الإجواز
بوظت اللوحة لما حاوطتها ببرواز
تجار إصلاح لكن من يوم ما فهموا الناس
تاجروا في الغضب والطوب .. وسط بيوت إزاز

عمري ما اسأل اللي سابني ليه سيبتني
حاسس اللي كتبته ، ومش مهم انت تحسني
الحاجة اللي تهمني إن مفيش حاجة تهمني
ع اللي إتهد مش حزين ، ومش سعيد ب اللي بيتبني

فينا حته أغمق من أغمق مكان في الكون
أقدم حتة غسيل لسه بتطفح لون
في ناس مكان ما تشوط ينصبولها جون
احنا اللي حاربنا ده في عز ما كننا دول

بغير الأسامي وأحكي نفس القصة
كل شىء بيغلى ، وانتي رخيصة لسه
بغطس في الوجع بدون أنفاس حابسها
ريحتك في كل حاجه كنت بتنفسها

تعالي قبل النوم وانا احكيلك حكاية
عالم سلبي طول ما الأكسجين محايد
في فرق بين كويسين وبين بطلنا
الناس مبيبانوش بجد غير في الضلمة

كان بيننا خيوط لكن مش باقي غير أرفعهم
بينطوا من عماير والهوا بيرفعهم
قالتلي مبتعرفش تحب ليه ترتبط؟
انا بحب انا .. حتى لو اتشقلبت

عمري ما اسأل اللي سابني ليه سيبتني
حاسس اللي كتبته ، ومش مهم انت تحسني
الحاجة اللي تهمني إن مفيش حاجة تهمني
ع اللي إتهد مش حزين ، ومش سعيد ب اللي بيتبني

مش عارف .. انا الحقيقي ولا غش
بقطع وش ألاقي تحته وش
أشك في اللي بنى ، وأشك في اللي اتبنى
أصعب اكتشاف في العالم اكتشاف ال انا

عصاه تبلع عصيانهم ؛ فبيصبح مكروه
يقولوا عليه من ضهره ، ويخافوا يناظروه
لا دينه دينهم ، ولا عايز رضا التمثال
يبص على معبدهم يضحك من عدد الإقفال

ده بسبب كشافات الليل بقى النهار مليل
مادام بياخدوا اكتر منك .. الكتير قليل
في ركن في الفضاء ، وجنبك اكسجين متسيل
لا حمل إنك تشيل ، ولا إنك تشيل

إسأل فحم المكن عن معنى رأسمالي
بفضل اخواتنا في فلسطين بقى للطوب معاني
لو مش عارف ابن آدم كنت لومتك
جرب تكونني ساعة .. تنفجر جمجمتك

غبي لدرجة ان الرد اللي انت قولته
بكتب قصايد ، وده شرف عمرك ما نولته
الجامد الروش ده أعلى لقب طولته
فيلمكوا رخيص ، وانا انسحبت من بطولته

عمري ما اسأل اللي سابني ليه سيبتني
حاسس اللي كتبته ، ومش مهم انت تحسني
الحاجة اللي تهمني إن مفيش حاجة تهمني
ع اللي إتهد مش حزين ، ومش سعيد ب اللي بيتبني

الجوكر - الوصايا

الجوكر

Recent comments

Ali Zain

كہٰہٰلاشہٰہٰنہٰ كہٰوف

Mohamed Aref

hajar

Related tracks