1.) Run Away (Fck The World)

من وهو لسه صغير و الجيران بتحلف بيه
المتفوق ، المؤدب ، اللي جامع دنيا و دين
كبر و دخل جامعة و آن أوان تاء التأنيث
يمكن مشافش بورنو بس إتفرج علي ونيس

و رغم طول الرحلة فالوصول بينسي التعب
أخينا لقي أخيرا اللي تحبه و يحبها
دايما كان بيكلمها عن إن التعليم تجهيل
واحد زيه في بلد بتفهم كان زمانله شأن كبير

فهمها حاجات كتير ، في الآخر فهمته 
إن حوا مش لآدم، حوا لفلوسه و شقته
و في عز ما هو حزين ، الأتوبيس وقف في كمين
الظابط قاله "إنزلي" ، نزل ، زقه للأمين 

شاف بطاقته ، بدأ تفتيش ، "إقلعلي الكوتش" ، يا باشا معيش
ممنوعات ، فمتحرجنيش ، "طب جنب إخواتك يا برستيج"
روح بعد يوم طويل ملوش تعازي مقبولة
يمكن حزين من الأول بس نفسه مش مكسورة

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه (x2)

أخينا في عز الوحده قابل شلة ثانوي اللي 
كانوا خدوا طريق معاكس للى هو فيه بالمللى 
قالوا فُك يابنى وشك وإبدأ واجه الحياه 
واذا كنت مش مُتكيف ، ف العلاج مكيفات 

أخينا خد الرحلة لحد القاع دحرجة 
بس اخينا لسه اخينا ، فـعايش مع نفسه في معركة 
يقع ، يبطل مدة ، تيجى فلوس ، تيجى بكتره
تيجى بفكرة ، تيجى ببودره ، تيجى بقعده ، تيجى في سوسته 

فجأه حوا رجعت لما ابو شقه سابها 
والغريبة حال أخينا الحالى لسبب ما جذبها 
طبعا أجر نفسه ليها روميو بالفلوس 
ونام معاها ضمان لإنه يلاقي لما يعوز 

وزى كل كدبة صعب للآخر نداريها 
عيلة حوا صعايده ، عمر موتها ما يكفيها 
أخينا إتقتل ، هو ميت في الحالتين 
لو كان إنتحر بدرى شويه مكانش مات اتنين 

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي عالم لولا الصحبة عرفته 
على المخدر اللى جاب المخدر المعروف آخرته

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه

الجوكر اخينا


El Joker - Abyad w Eswed l الجوكر - أبيض وأسود
￼ الكلماتّّّّ.....
من حضن البيت لـ كف الدنيا ... نقله كبيره
قالوا صعبه ، بس لقيتها مستحيله
آخرك تغير فكره ، مش هتغير التصرُف
دى ناس بتحارب التطرُف بالتطرُف

قولت موجه .. نطيت .. محدش نط
أتارى ده إرتفاع المياه على الشط
والعادى إن انت تغرق شخص ، تنجى شخص جديد
قادر ياخد خطوه تانيه لمركز المُحيط

الواحد ليه من فتره محسش إنه تِعِب
خدى اللى نحّس ، ولا كفك اللى نِعِم ؟
أومال إيه بقينا تُقال أوى ، إنتى مش واخده بالك ؟
مرضاش تتاخدى منى وآخد أيا كان بدالك

بدون شك إختياري ، أنا اللى عارف ناري
إرتفاعي حقي ، وإنت هبوطك إضطراري
دول مش فاهمينى ، ومفيش أمل يفهموا
مفيش شخص عاش قمة إنتصار مذهبه

إنت اللى بتخسّرنى ، أنا اللى بكسب ليك وليا
إنت خطوة الجنون ، أنا الثبات عـ العبقريه
صح ـك بيبقى مُضر ساعات ، والغلط مُفيد
لوم عليا مع إن التناقض فيك

أيامى بينوكيو كانت مناخيره بتطول لو يكدب
أنا مُجرد إنت عاش وضوح أيام الأبيض وإسود
مُذنب ، وميشفعلكش إنك فى الأول كنت بريئ
عمرك ما هتغلب شخص بتبقى هو بالتدريج

مش مهم رأى الأحدث ، المهم رأى الأفضل
فكرك إنت إمبارح رأيه إيه فى إنت النهارده ؟
وهل إنت اللى عايش كل دول إرتحت كده ؟
ولا يادوب أنقذت منك اللى توصل بيه مركبه

خليك مسئول ، مش مُتماشى مع الموجود
إضرب السايب ، وإدى الفرصه للمربوط
ومتقولش مذهب بس .. إحنا مذهبين من مذهب
سيب اللى عاشنا يدى كل حاجه مقاسها

مفيش نظره تكشف دايرة المعارف
مفيش حد سعيد وأنا سعيد لإنى عارف
هو اللى يقول النار فى الآخر طلعت إيه
التواضع ضافلى نُقطه .. درس لينا إحنا الأتنين

إنت اللى بتخسّرنى ، أنا اللى بكسب ليك وليا
إنت خطوة الجنون ، أنا الثبات عـ العبقريه
صح ـك بيبقى مُضر ساعات ، والغلط مُفيد
لوم عليا مع إن التناقض فيك
________________________________________­___

Abyad w Eswed

Written by: El Joker
Music: Free Beat
Vocals: El Joker
Master and mix by: El Joker
© 2016 El Joker
الفئة
موسيقى

الجوكر أبيض وأسود

NINJA EL-SHAB7 ❂ 01152171281

اغنية 2 ابريل - الجوكر

كل ما تبقى الأرض أصلب تحت رجلي أترعب
لـ أنسى كوني شخص بكل معاني الكلمة تعب
وبستغل خوفي في إني اتقدم ، مش في إني اتحجم
عارف الفرق بين الراحه ، وبين ألم مطفي بمسكن

بقالي وجود لما بقالي أهداف أحققها
بسعى للمثالية ، وعارف إني مش هلحقها
بس هفضل ببقى أحسن كل يوم عن اللي قبله
وده يستاهل إني أتعبله ، ويطمنّي وانا بقابله

انا كنت شايفه رماني ، لا في زماني ، ولا في مكاني
وكنت فاكرني هبقى المهدي لو اتولدت في ظرف تاني
تلميذ مذاكرش ، وفاكر امتحانه اللي ميتحلش
مع إن الكل واخد نفس الامتحان مقلش

من هنا بدأت أحل الأزمة ، لما بدأت أشوف
إن العيب كان فيا من البداية ، مكانش في الظروف
آمنت بكون الله بيديني بس اللي استحمله
فبقيت بواجه أي شىء ، وانا راضي ، ومتقبله

فجأة بقالي دور .. بقالي حياه .. بقيت بتبسط
بقالي مكان في دنيا كنت رافضها .. خوف لأترفض
بقيت بفرح بحاجات كانت تافهه في عيني وصغيره
لما عالجت عيني وشلت من عليها المرض

لما تاخد فرصه تانيه وانت قبل الموت بمللي
يبقى صوت مـ السما بيقولك: جه الوقت تآمنلي
فـ تفوق تشوف كام موته .. كام أوفر .. كام شوطه
كام حادثه .. ليله سودا .. كان وارد فيها موتك

واتكتبلك عمر جديد ، وانت كنت أعمى وعنيد
تقوله أموت .. يقولك عيش .. تقوله ليه مبترحمنيش
وكل دي تجربه ، ومكانش فيها صدف
ده احنا وقعنا عشان نقوم ، وعشان نتعلم إزاي نقف

خطائين .. لكن ده مش هيحدد نوطى ولا نعلى
مش محتاج تغير نفسك ... محتاج تغير فعلك
عمر ما جوهر المُزارع  زاد أو قلل الحصاد
الفراعنة لما اجتهدوا شوفنا بعيننا الأهرامات

ولو تعبت في ص ، ولقيت النتيجه في س
بعد فتره هتعرف إن الـ س أحسنلك بكتير
آمن إن ربك أدرى بأفضل حاجه ليك
فـ بيكافئك في الميعاد ، وفي المجال المناسبين

فجأة بقالي دور .. بقالي حياه .. بقيت بتبسط
بقالي مكان في دنيا كنت رافضها .. خوف لأترفض
بقيت بفرح بحاجات كانت تافهه في عيني وصغيره
لما عالجت عيني وشلت من عليها المرض

Èl Joker - Forsa Tania l الجوكر - فرصه تانيه

الجوكر - متهمش

الــكــلــمــات
__________

سلامنا على نفوس في حلقة البحث عن الضوء
مذئوب في ليلة البدر مال مع الدراويش بشوق
نجمه بتوعد ، ونسمه بتطبطب في ليلة شقا
سقانا بل ريقه لما آخر شخص اتسقى

كل وعود السما مرسومة في عيون المريد
مختار حارتنا قال للظلم "لأ" بصوت عنيد
وردة خافت ع الحبيب .. شاعرنا قال الليلة عيد
حامينا بأمر من سلطاننا حشد جيش من العبيد

رجال حارتنا اجتمعوا حوالين الربابه الليلة
مختار بيتكتبله غنوة زي أبو زيد وغيره
دخل رسول حامينا برسالة .. عكر صفا ليلتنا
يا نسلم مختار ونعيش .. يا نموت وتدفن حارتنا

غضب سريع .. وقف ، وقال: هندبح المرسال
مختارنا قال قتل الرسول مش من شيم الرجال
مشي الرسول ، وسكتت الربابه ، وهتف صوت
رجال بتبايع المختار ع الحرب حتى الموت

طول الليل ذكي وجريء بيرسموا في خطتنا
وجيوش من العبيد بتزحف بإتجاه حارتنا
في الصباح كان طبل جيشهم جنب تكبيراتنا همس
والحامي الكلب لزم خيمته عشان مش حمل شمس

أما أسدنا كان على رأس جيشنا .. مخافش سهم غدر
قال هما كتره ، واحنا قله ، والنهارده بدر
من بينهم خرج فارس بيطوح عبيده بدرعه
وقال: أعتاكوا يجيلي .. وللأسف في مننا رجعوا

مختارنا قال أبارزك ، واللي يفوز يفرض شروطه
نحسمها بموت نفر ، بدل ما رجال كتير يموتوا
فارسهم ضحك زهوا ، وهجم بسرعة شديدة
مختارنا إتفادى الضربة ، وقتله بضربة سيف وحيدة

وفي عز تكبيراتنا ، وعز ما جيشهم كان مصدوم
الكلب قائدهم خان العهد ، وأمر بالهجوم
مختارنا قال هنحارب .. احنا رجال وبيننا ميثاق
والويل لجيش عبيد اتساق للحرب بالكرباج

كل شهيد من بيننا مات قصاده منهم سته
خبر صمودنا بدأ يلف كل بيوت الحته
ولقينا رجال من كل حواري الحي بينضمولنا
حسينا بكترتنا لما الأرض إتهزت تحت رجولنا

هابوا العبيد .. رموا السلاح .. وهربوا م الميدان
مختارنا قال: سيبوهم. الحياة عقاب الجبان
لفينا نعلن الإنتصار وسط إحتفال حوارينا
كل بيوت الحي حيت كل راجل فينا

وردة جت .. بخجل قالت للمختار: قلقت عليك
العيون بتقول كتير ، والبق بينطق: أنا بخير
شاعرنا قال يا فاكر إن البرق قبل الرعد
آدي اتنين بينهم مسافه ، لكن روحين في حضن بعض

قضينا الليل بنمجد كل راجل راح مننا
وبنتحاكى بإن مهدي الحي بحاله من عندنا
مختارنا قال: كفى إحتفال. اجمعوا شيوخ حارات الحي
اللي فات يادوبك خطوة ، والمشوار بحاله جاي
___________________________________________

El Mo5tar
7akawy 7aretna 1

Lyrics: El Joker
Vocals: El Joker
Music: Mostafa Ebrahim
Recorded at: Ganoub studio
Master & mix: Pola maher
Video by: Ahmed Samir
© 2018 El Joker

الجوكر - المختار

اعملو repost  للاغنيه❤️

الــكــلــمــات

البشر غرقوا في شر نفوسهم وانت مش رسول
طول ما محدش عايز يسمع يبقى إياك تقول
الكلمة مبتغيرش إلا اللي بيسعى للتغيير
متقولش "هخسر ايه؟" عشان اعداء الكلمة كتير

لازم تفهم ان الناس بتكيل بمكيالين
والفرد بحد أدنى يمتلك وشين
مش هيبصوا اللي انت فيه دفعت إيه مقابله
كل يبكي على ليلاه وشيطانه بيطبطبله

اللي ادى استنى ياخد ، واللي خد خلع من بدري
القلم بص على الخشب اللي راح مبصش انه مبري
مستكترين عليك قيراط ما هما رضيوا ب شبر
اشمعنى آدم يتسجدله أنا أحسن منه كبر

لو لمحوا الهمة هيحبطوك بكلمة لأجل ما تهمد
عايزين يشوفوك بتموت بشفرة تلمة عايزك تجمد
ولا بيجروا في طريق ولا انت عقبة لازمها إطاحة
بل سولت لهم أنفسهم إن موتك راحة

الغل كل قلوبهم واللي اتبقى منهم غيرة
اسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض

هييجي من أقصى المدينة شخص عكس الباقي
أوعى تشوف بعين القاعدة ما هو إستثنائي
نحن نشك حتى نُدفَع أن نثق
الدنيا مره مش لازم تشربها سِك

لو لو رجع الزمن سنة مش هتمشي في طُرق تانية
اعرف ان مرت سنة من غير ما تكبر ثانية
لو غلطت راجع نفسك وهتدفع لو تمن بصه
واجه .. أوعى تدفن راسك في التراب وتندب حظك

في ناس بتحس بكبر على تجارب ناس سبقتها
كل اللي كانت دماغه ناشفة الدنيا دغدغتها
في ناس بتعرف تستفيد من كل شخص جرب
وناس لازم ايديها تتحرق عشان تحرم

بين طبقات الناس وتسلق جبل شبه بحت
كل بصة فوق لازم توزنها ب بصة تحت
لو فضلت باصص فاضل أد ايه ومين فوقيك
مش هتحس طلعت أد ايه ولا عمر شئ يرضيك

هتضحك عل انك بتقول دلوقتي جبت آخري
دايما اللي جاي أصعب ، إنشف لسه بدري
عايز جلدك تخين ، ولو يا تتكسر يا تميل
إتكسر تلحم عضم أنشف م العضم القديم

لو بصيت للسما بعين الغِل تلات تربعها
اعرف إنك ماشي في طُرُق بقى لازم ترجعها
أنت عدو نفسك ديننا بيمنعك تتمادى
آلهنا مش فوق الاولمب بيتنفس عبادة

في أصول الأعتقاد كل الفرق أصابت
الكُفر كبر .. مش اجتهاد في فهم غامض
لا تنغلق وتشخصن الأمور ف تبتذل
نحن أشاعرة في بعض الأمور نُرجئ أو نعتزل

هتحس الاختبار تقيل عليك .. ومين محسش
إبراهيم قال : أرني كيف ؟ .. وإبراهيم متهزش
فيه قبيح بديله أقبح ، وقريب بعيده أوضح
وصاحب جنتين اتمنى لو إنه كان الأصلح

هتبان الدنيا ظالمه متصدقش اللي انت حاسه
يوسف لو مترماش في البير مكانش هيرمي نفسه
ساعات شرور نفوس الناس تكون خطوة في طريقنا
مش عارفين رايحين لفين ؛ ف متقوليش بعدنا

الغل كل قلوبهم واللي اتبقى منهم غيرة
اسهل تبرير لشر النفس إن الحياة شريرة
العين بتكره كل اللي أحسن منها طول الخط
لو مش أد العيشة بين أحياء أموات إتعض

هتضحك عل انك بتقول دلوقتي جبت آخري
دايما اللي جاي أصعب ، إنشف لسه بدري
عايز جلدك تخين ، ولو يا تتكسر يا تميل
إتكسر تلحم عضم أنشف م العضم القديم
_____________________________________

El Wasaya

Lyrics: El Joker
Vocals: El Joker
Music: Mostafa Ebrahim
Master & mix: Youssef Anwer
Video by: Mostafa Karim & Adham Karim
© 2018 El Joker

الجوكر - الوصايا

الــكــلــمــات

بنقدم قبل النوم عرض شاش وميكروكروم
تهزيئاً لدراكولا .. بطولة الفيلم لفص توم
فاضل ألف جنيه على أول ألف في المليون
أو شفرة موس ، يا حبل في نجفة الصالون

آدي اللي إتلصم عطل .. الواقع يخذلك تتسطل
صعب تعيش بـ اللي منك فِضِل ، وصعب اللي فاضل فيك يتقتل
راسه مش في الطين عشان كرامته سوى البلاطة
لأ ،كان عنده إرادة .. بس هبت ريح وطاطا

في قمة الهيكل ده عين ترى الجميع
في أرض الذئب جُرِم إجتماع قطيع
ونادى منادي بكوننا اتنقذنا .. بحال المراكب اللي غرقت وعظنا
شكر كل اللي شارك ببصمة .. لقانا بنغرق نادى لقراصنة

صاحب الشيطان ومتصاحبش فكرة
الشر واقع ، والبلد دي خرم إبرة

اليأس سلاح ، وتلم .. يعشق اللي خاف فـ سِلِم
أما باني اللي بيتهدم .. لو مفاقش مكانش حِلِم
وطننا ضاق ، لكنه عشق .. الوضع ساء ، تحليته غش
وزيرنا مات ، وملكنا كِش ... وإتقال معلش

صمتك مش علامة رضا .. علامة الفرهده
كلنا أطراف في صراع على حتة جبنة في المصيدة
اللي متسطلش كفايه عاز فنون تسطله
ديلرات الكار نجوم طريق مخطيناش أوله

انا لما قولت لأ .. كنت بقولها عشان شاريكي
انا عند حسن ظنك .. قالب الدنيا ومش لاقيكي
قالولك إني طايش .. وإني مش بفكر فيكي
قسموني أتنين إتغدوا ببعض .. عشان يتعشوا بيكي

قالي ملفك كِبِر .. جملة سياسة كمان وشكرا
قولتله متهددنيش .. انت متعرفش انا مين في شبرا
هما اللي إتمادوا ؛ فـ مخدتش الدوا في ميعاده
كُنا سته .. وسته مننا ماتوا

طموحك نازل أرض الواقع .. هيبططك
اللي عوزته ، واللي إتحقق .. شىء ، وعكسه .. وده أحبطك
نِداك في مالطا ربى فيك الكسل
معادش فيها حاجه حلوة ، أو سوادها عسل

مربوطين في ساقية أكل العيش .. من تعليم لـ جيش
لـ حب قتله سعر السوق .. فقالوا عنه طيش
مش صدفة كل الناس دي بقت بتحلم بـ اللجوء
محدش غيرنا بيعزف .. تيتانيك بتغرق .. فوق

البلد دي فيها ظلم والسكوت عليه جريمة
فاضل ايه عشان تحس إنك ملكش قيمة
إتهانت جوه قبل بره .. ألف بدل مرة
سكرهم يا نمل مرر .. إتحرر
__________________________________________

Mosem El Ze2ab

Lyrics: El Joker
Vocals: El Joker
Music: Hanto
Master & mix: Youssef Anwer
Des. by: Mostafa Karim
© 2018 El Joker

الجوكر - موسم الذئاب

El Joker

El Joker - Resala Rakam 1000 l الجوكر - رسالة رقم

الــكــلــمــات
ضهرك لحق مش من مصلحتك تنصفه
سبب جمال الغنوة قبح اللي بتوصفه
ساعات اللي انت شايفه يبقى اللي انت شايفه
أغلب الأوقات شجاعتك جت مـ الخوف اللي انت خايفه

من دوشة تل الغلطات .. مش سامع مـ السما أصوات
بـ الغل وبـ الخوف متحاط .. مش عارف تاخد خطوات
كله غرز بوزه في التراب في أول نطة
هما حاولوا تاني .. وانت اختارت حاجز أوطى

قتلوا مننا كتير بحجة شىء أهم
خلوا الهوا اللي بيني وبينك ريحته دم
مداقوش ازاي الوجع شىء ملموس وطعمه في بقك
ظنوك بتقول مجازا إن الظلم كسر شوكتك

مش أرق اللي مسهرك للميعاد ده
كل اللي عدى مستنيك على المخدة
واللي فاكره حب قالوا عنه غدة
معظم النجوم اللي بتحكيلها مات من مدة

قتلت جزء فيك عشان يعيش أغلبك 
معظم الحقيقة على ورقة في سلة مكتبك
لو رموا الشبك ، والتيار بدأ يسحبك
وانت عومت عكس الإتجاة للحظة ده مكسبك

فرض السكوت يموت شخص بالبطيء
قص كلام من السياق يضل ناس عن الطريق
بعض الوجع داين تدان ، وبعضه حظك كده
في ناس بتعبد الحياة ، والباقي كبش فدا

وبصراحة مفيش مؤشرات إن الزمن هيدور
الضلمة اللي في عالمنا قادرة تبلع أي نور
وضع معادش مبلوع .. خلافنا في أصل وفروع
ملكنا لا سيف ولا دروع .. ملكتوا الطلق والجوع

سعرك سعر ترس في عجلة الإنتاج
وبصراحة يعني من أسباب إيمانك الإحتياج
لبسّوا الرجلين فردة .. عبدوا الحس والمادة
نزعوا المعني مـ الوردة .. ينفوا المطرة لو تندة .. فوقهم

شوهونا .. أصبح زوقنا زوقهم
إتعاطفنا لما إتعاطفوا ، وقولنا قوم لوط بشوقهم
قصاد الريح تفضل جدور ، وجدور تتقلع
أول مرة أمسك كبريت العلم الأزرق ولع

قتلت جزء فيك عشان يعيش أغلبك 
معظم الحقيقة على ورقة في سلة مكتبك
لو رموا الشبك ، والتيار بدأ يسحبك
وانت عومت عكس الإتجاة للحظة ده مكسبك

الجوكر - المختار

الجوكر

Recent comments

Ahmed Kfafe

Mostafa K. Sayed

Ahmed

Abdelrazek Yahyai

Related tracks