قصيدة عصفور - الشاعر شوقي عامر

يوم ما خبطت العساكر - الشاعر/ باسل الصباغ

قصيدة (طلقة في صدر الرياح) للشاعر/ ابراهيم ملكوت

قصيدة "سانتا كلوز في غزة" - للشاعر/ أحمد عمرو


عبث وتولى


(في مرة دخلت دكانُه لقيته بيقرا الجرنان بالمقلوب فضحكت!
قالي -وكإنه مجهز اللحظة دي- بلمعة عين ماكرة وهو مبتسم:
فيه أخبار عشان تقراها صح لازم تقراها بالعكس)
إلى روح الجميل عمي سامي ابو حديدة عليه رحمة الله



كل الكلام في الدنيا صمت 
وهوا بس 
اقواله صمت بينتفض فيها الكلام 
(يا هل ترى ذكرى الغريب تفضل بكام 
وبكام نخلد اسمنا في شاهد رخام)
رديت عليه بالنزف من شق السؤال:
(ما بقاش حاجتنا المال)
فقال:
(علشان كده مالناش في حاجة) 
وهات ياضحك لحد كرباج العياط

هوا اللي علمني الحكاية من الذهول للاعتباط
من وقت ما اختار الشهاب ..
يقطف من الشجرة ونزل
لـ ازاي بيسأل أية العمل

قال: (واحنا جايين الحياة كانت حياة
مين اللي زودها بضلامه وبالطمع ..
اداها على عينها
ماعرفش ..
بس اللي اعرفه
إن احنا نقدر ع الأقل 
ننور الحتة البسيطة اللي احنا ماشيينها)

والدنيا مش مدارية حاجة
لون السحاب والبحر والقارة
كاشفينها من برة
ساعات حلوة 
ساعات مرة
ليه الشهاب أول ما شاف
عيبها فميزتها التجربة الحرة، فخاف؟!
واستسلم الضي لعجاف

علمني إن الإختلاف مش للي خاف
وان السكوت.. 
أوقات وسيلة رد للجهل الجُزاف 
وان السكوت لو زاد.. 
خلاف..
حب الوسيله بيقتل الاهداف 
ويبكي على المعنى المصير

علمني اخرج نهر بيوارب ضلوع البير 
لغوايه النبع الاسير 
أخرُج 
اطير 
مع انه بيهزر كتير 

مع انه بيهزر كتير..
ضحكه العجوز بطل يراهن ع الفرح 
اول كلام قالهولي كان:
( مش كل ضحك بيبقى من باب المرح 
الضحك احيانا بيبقى من المرار)

آخر كلامه من الهزار:
(هابيل بيهذي في الشوارع 
م الخلل في كل اركان الحياة 
قابيل لَبَس بدلة سياسي محترف 
واتبدلت في غايته بس الاتجاة 
واتبدلت في ايديه عصاه ..
بالميكروفون 
قابيل بقى هوا الحكومة 
وقَتْل هابيل السجون 
اقرأ 
وفتش ع اللي باقي في عقلك المدفون ..
تكون 
هايضيعوك ..
لو ضيعوه 
يوسف ما ضاعش لانه واخد عين ابوه 
قَطْع القميص في البعد وَصَّل قُربهم 
آخر صحاب فاضلين سابوه 
مع انه فسر حلمهم 
وانت اللي مستني الوطن ..
ينصر وطن مسجون؟!
جنون ..
الخضر علِّم موسى ان الدنيا مش دار السلام 
الدنيا دون 
أو دار لديب 
عاش المسيح زي الغريب 
راح المسيح زي الغريب 
ويهوذا سلِّم كفِّنا لجوع الصليب 
قيصر ..
قتل 
سبارتاكوس بيلوم أمل "لم احنها؟!" 
مش كنت أولى تقول حقيقة..
إني من جيشه الذليل 
محني الجبين 
مربوطلي كف القدرة .. طوق 
وماكنتش اعرف إن من موت الملك..
البَص فوق 
وما كنتش اعرف 
-اني مش مفتاح قصيدة-
اني مفتاح الشقوق 
"يا ايها النمل" اخرجوا 
خرجوا ....
وفاتوني لطعنة القيصر 
عطشان باسِف الرمل من كاس الطغاة
طعم الهزيمة..
أمرّ من معناه 
"يا ايها النمل" اخرجوا 
خرجوا فاتوني استمتعوا بطعم النجاة
بيبرروا لموتي ف قلوبهم للهروب..
(كل الدروب ويانا مش ناسياه)
بس الحقيقه النايمة في المكتوب 
موت البطل بيعلم الراوي الحياة
بيعلمه يجيب الجنية..
بيرَزَّق الراوي
يكسب بطولة على الورق وعلى القهاوي
بيحط فجيوبه البلد،
والناس بتمشي ورا اللي عامل نفسه عاشق جاي يغنيلها
أما البطل ...
مش فاضي يحكى عن البطولة عشان بيعملها
بين البشر..
وَحدُه ..
في أنين
وانت اللي هاتقول للي خان -بعد اما أمِّن فرشته- نخرج..
فهايقولك امين؟! 
خرج الضعاف من ضعفهم للعالمين 
الدم ..
مين؟ 
والحي فين؟
السامري بيضحك على المتمردين
أول ما قالوا (اجعل لنا..
زي اللي عايشين في الجوار)
يا عجلة الإنتاج يامرساة المسار
النار قصاد قُصر النظر جنة،
والجنة نار
والراحة للي استعجلوا الراحة.. انهيار
من جبن جيبهم جابلهم عجل بخوار
استولي على كل القرار،
ومنَشِّف اللقمة الحلال
يا يضموا على اهل اليمين..
مستنظرين منصب ومال 
يا يهاجروا من كل الشمال
بالأغلبية السامري بيستهزى بقلوب العيال
ورسم لهم شرك الأُوَل 
الاغتراب..
ابن البلد..
والغربة مومس قوتها من عجز الدول
الارض... 
اولى بدمها 
والغربه مين بيروح لها.. ناكراه 
بتمص دمه تغرقه وتنساه 
الارض قوة وجاة 
والاقوى بيحب البقاء...
لله)

وقَّف كلامه لثانيتين، 
ورجع يهزر تاني قال:
(انا هسكت أحسن ينقرض منَّا السكات)
فاخدها منه سكوته جد وضمه للاموات 
واخذني منه سكوته حد المعرفه بالذات 
انا كنت أعمى ف كل شيء خايف 
لكن بقيت شايف من النهايات

#شعر
#قصيدة
#محمودـحامد








قصيدة "عَبَث وتَولَّى" - للشاعر/ محمود حامد

حلفنا نعيش _ محمود حامد _ محمد سرور

محمد حزين _ يامن هواه

"جوابات" - محمود حامد

قصيده "اعذريني" - محمود صابر

"التقينا" كلمات/محمود حامد _ لحن وغنا/أدهم طارق

"منحنيات" - الشاعر/مؤمن مجدي أنيس

قصيدة "المستني" - للشاعر/مؤمن أنيس

فليهبني الله ابتكارا عندما أغني
#بابلو_نيرودا

محمود حامد

Popular tracks