سجن أمشير

الكلمات:

ليه انحصر أمشير ما بين اربع حيطان ؟!
ليه الشتا بيلخصّوه بس في جراح !!
ليه الدموع مبتفتكرشي جريها
الا اما تسمع جملة مقفولة ب " ديسمبر "
ذكر الجمال ع الألسنة بيقلله
و الزهد في ذكر الجمال بيجمله
علي فكرة كل الفكرة ان الافترا
علي برد أمشير الحزين بيزعلّه
ليه شوهوا كل القهاوي والغناوي والشوارع والمداين والكنايس والجوامع والقصايد و المشاعر 
ليه كل مين ذم ف ديسمبر يبقي شاعر
ليه انحصر أمشير ما بين اربع حيطان ؟!
وحصرنا وسعه ليه ف غناوي المجروحين
رغم انّه عمره ف يوم ضاق
وحصرنا أكله ليه ف جراح العاشقين
رغم انه عمره ف يوم ما داق
طب ليه بقيتوا تقيدوه أو تربطوه في سلاسل القهوة العرب
وبتحبسوه ف أسوار غناوي ستّنا فيروز
ونسيتوا غزل كوفيّة روز
دفيانة ف ايدين جدّتي تغزل طرفها مع دعاها لو تشوف طيف جدّنا في الحلم
ونسيتوا بردو جاكتة صاحبي دقها علي كتفي لما البرد هدّد وقفتي مع انّه عارف مشهده مش جوه اي سيناريو خاص بالفيلم
 ولا عمره هيكون البطل
ونسيتوا كل ستارة لمّت طرفها واتجسست علي قيس وليلي جداد يادوب بيسطروا قصص الهوي ومش هاممهم اي قصة عن الحدود ان كان في حرب عليها ولا فيه سلم
ونظركوا فات دخانّه طالعة من بيوت سادها الدفا
وايدين بتشبك ف الايدين .. متكتفة
والنظرة اللي مهيش ف يوم متكلفة
كل الكلام ع الحضن بين ليل الشتا
ده كلام قديم محتاجش مني فلسفة
وسمعكوا فات صرخة سما متلخصة في الرعد
او فضفضة من واد الاتي في عشق السجاير فرط
والكيميا اللي ما بين زعيق الناي
وشرب الشاي
وندب الحظ من راجل لكّن بكاي
ليه انحصر أمشير ما بين اربع حيطان ؟!
كنا ف اواخر الشتا قبل اللي فات
كل اللي فات راح عصره بعده وانتهي
خلينا ف أوائل شتا قرب يهل
واصوات كناريا رفرفت في المنتهي
قطر الندي فوق الازاز والشيش
البرد قتال كل اللي زاهدين ف الحياة
لكن يهاب كل اللي قرر يوم يعيش
كم الهدوم غطي الصوابع والايدين
لكن مغطاش ورقة نتيجة تخص أمشير الحزين
أمشير بيستاء مننا علشان حصرناه جوه دور فاتن حمامة ف الصراع
علشان حصرناه في الكآبة وفي الفراق وف كل غنوة عن الوداع
ممكن يكون مستاء كمان جايز عشان كل البشر وصفوه بانه اوفي وفي 
مع انّه تعلب في الخداع
ليه انحصر أمشير ما بين اربع حيطان ؟!
فيروز وقهوة وجرح وف ضلمة أوضنا
وعمانا عن أشياء ف ايدنا أو قصادنا
ليه انحصر في سؤالنا مالكوا و ف ردنا ابدا مفيش
ليه انحصر ف الرعشة من ايد سلمت أمر الفراق
مستحملتشي طفح موج بحر الهوي
يا للأسف .. علي الكورنيش
رغم اقتتالي في الدفاع عن شهر أمشير الحزين
رغم اني حاسس ان أمشير اتظلم
لكن حقيقي كل ما يهلّ الشتا
تلقائي بلقي نفسي حسيت بالألم

Mahmoud Raheem

Popular tracks