وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

وحشتيني

الـــكـــلـــمـــات

صحي في يوم مش فاكر من حياته اي حاجه
سأل نفسه : انا مين! ، و قام يدور علي إجابه
لقي في دولابه صورة صاحب عمره قال "محمد"
"انا فاكرك" ، و بدأ ييجي في باله أكتر من مشهد
لقي موبايله و لقي الرقم ، طلبه بدون تفكير
رد صاحبه بـ :يااه يا صاحبي ، فينك من كتير؟
انا فقدت ذاكرتي
عشان كده اتصلت
خليها تحكيلك إزاي علشانها بعت طوب الأرض
بعد ما اتقفل في وشه سأل نفسه مين اللي أنا
بعت عشانها صاحبي ؟ ، و هو بيسأل نفسه لقي
دبله و تحتيها ورقه ، مسك الورقه و بدأ يقرأ :
صعب عليا أقبل مكونش أم ... أتمني تفهم
إنهار وكسّر كل حاجه جت في طريقه ..إتجنن
فين و فين أدرك إن ده مش حل ..استسلم
بيُحاط بذكرياته مع مراته كأنه فيها
اي نعم ناسي كتير لكنه إفتكر حبه ليها

في حياتنا النسيان يُعتبر مرض و لا نعمه ؟!
أغلب ذكرياتنا حمل تقيل ، أكيد نسيانها إعفاء
إستسهلنا الغلط و إتجاهلنا صوت ضميرنا
دايما نشبع رغبات دلوقتي علي حساب مصيرنا(x2)

بعد يومين طوال قرر ينزل بين الناس
قعد على قهوه ، قابل عجوز مسميينه الخال
سأله: مالك يا ابني شايل هم الدنيا لوحدك؟!
رد : نسيت الناس ، و الناس نسيتني، إيه اللي يضحك؟
ضحك الخال .. الواد اتنرفز ، سأله: ايه مشكلتي تافهه؟
رد : يا ابني انا ابني رماني في الشارع ،اديني مرضك لفه
في الآخر خده يكشفله و قاله : يا ابني ثق في الله
و الدكتور طمنه : هتفتكر بالوقت و العلاج
رجع بيته و حبس نفسه لمدة اسبوعين 
أدوية و تمرينات ذاكره بالكاد إفتكر شيئ
قبل ما ينهار عصبيا قال ينزل يرغي مع الخال
قعد مستنيه عالقهوه و زهق بعد تالت شاي
سأل القهوجي عليه ، رد القهوجي بكره غريب 
الخال ربنا افتكره ، و الله ما أعرف ليه ناسيك !
طلع محفظته يحاسب كان زعلان أد ما مذهول
وقعت من محفظته صورة الخال ... بمعني اصح أبوه

اللي ناسي بيجري ورا ماضيه و لو دقيقة دقيقة
و اللي فاكر نفسه يبدل الحقيقة بصفحة جديدة
لو قدامك فرصة تصلح غلطة متسيبهاش
غيرك إتأخر علي ما فهم إن الحياة مبتستناش(x2)
________________________________________­____________

Ba3d El Nesyan

Written by: El Joker
Music: Free Beat
Vocals: El Joker
Master and mix by: El Joker
© 2016 El Joker

بعد النسيان_- الجوكر

An Farh Ghayb Live-(2017)-انغام عن فرح غايب حفلة الاسكندرية.mp3

بالنسبة لواحد زيه اتوفّى اتناشر مرة بأساليب مختلفة 
واترمى ف الأوضه لحد ما ضاقت روحه عليه 
بقى صعب يواجه أي مشاكل من نوعية امتى وليه 
بقى كل مشاكله تخص المزيكا 
مواعيد السينما وطعم الشاي ، درجات الطقس ونوع الأكل وتمن الوحده 
والبُعد لاخر بُعد متاح 
انما موضوع تتعب علشان ترتاح 
مابقاش له معنى مع الصدمات 
فلسفة فارغة 
وكإنه حوار بين واحد وصديقه اللي ماجاش 
مسألة الموت أملاً ف حاجات تتعاش بتخلي الواحد يضحك على نفسه
بيقول : 
" يومياً باطلب قهوة زيادة عشان البنت اللي انا ماعرفش مكانها 
بافتكر الفايت وبافكّر كان مين ساب مين " 
يتأمل ناس بقوا بني أزمات مش بني ادمين 
يتذكّر نصه اللي اتسحّب منه 
وازاي بقا واحد بيعيط بس ف مكانين 
ويقول بحنان معجون بحنين :
" واحشاني حبيبتي ومش هانكر ، وواحشني كلامي معاها بجد ، بقى مرعب انك تتعلق وتعلق مفاتيحك مع حد ، تتمشى مكان ما انتوا مشيتوا ، تتذكّر ساعة مابكيتوا ، وتخش السينما وتنسى فتحجز تذكرتين ، الكون بقا شيء مضروب ف اتنين "
يتنهد ويبصلى فجأة ويكمل بهدوء شخص حزين : 
" للدرجة اللي تخليك وانت بتشرب سكر معلقة واحدة 
اول هي ماتيجي ف خاطرك تتناسى وتشرب معلقتين ! "
كان طقس بيشبه هبه طوجي ف تراك " لابداية ولانهاية "
والدنيا فلاش باك التفاصيل 
نسيت سجايرها ف يوم عنده وهو مبطّل من ست سنين 
لو كان ممكن بايديه مثلاً انه يبطلها مع التدخين 
كان ممكن جداً يتحسن 
بس الادمان درجات ياما 
أعلاهم إدمان الغايبين 
بيقول والخمره ف ايده بتطوّح : 
بقى فين أيامنا وليالينا 
حكاوينا وشوقنا وغناوينا 
كان لينا ايدين بتشبّك قدام الأيام 
بقت الأيام بتشبّك بُعد ف ايادينا
ويحط الكاس على طرف البار 
ويزيح بايديه كل الموجود 
" ادي اللي كسبته معاك ياحليم ، مفقودٌ مفقودٌ مفقود " 
بعدها بينام زي ماهو 
ودموعه تسيل منه لجوه 
فتغرّق روحه عياط مدفون 
مش كل جراح شرطها ف جروح 
ولا كل البكا تلزمله عيون
شُفت يا صاحبي 
الورد اللي انت مشيت تلاتين كيلو علشان تعرف تتأسف بيه 
امبارح شُفته ف مدخل بيت قاعد خايف 
اترمي بايدين ناعمه وبارده 
الورد اللي انت فضلت تكوّن فيه وردة بوردة 
اتوفى الصبح من الإهمال 
شُفت ياصاحبي 
وفضلت احرّك فيه علشان يتهز ويرجع لحياته 
انما كان قرر يتحول مزيكا ماتسمعش نصايح 
الحب ازاي كله فضايح
وازاي الجاي أصبح رايح 
نفس الشخصين بقوا أي اتنين غير نفس اللي زمان اتقابلوا 
هي ف آخر العالم يمكن 
يمكن دلوقتي بتتعرف على شخص جديد 
ف مكان بيقل رومانسيه عن أول مطرح يجمعهم 
يمكن بتحط ف ماكياجها علشان سهره 
او نايمه ومش حاسه بحاجه 
يمكن ناسية ومش محتاجه بحد يفكرها بعهد قديم 
او يمكن زيه ف طرف البار بتعيط على حس حليم
ادخل بيته 
ابيض واسود من بيت ألوان أيام هي ماكانت ساكناه 
كان بيها بيقعد مع نفسه كان زي لوحده وهي معاه 
يادي المعاناه 
الكل اتورط كده وياه 
البيت اللبس الطفايه ، الشجر الميت ف المأساه
الأكل هدومه القصافه ، الفازة البارفان اللي معاه 
بقا كل جماد له روح وحياه 
الليلة 
لقيته بيتمشى ف شارع كان ليهم فيه قصه 
لحيته أطول من خوفي عليه 
كان ماشي بيتطوح وايديه فيها سجاره بعد مابطلها لست سنين 
دخل المطعم قلقوا القاعدين 
قاله الجرسون : 
كل ده محجوز 
وقبل ماتنزل منه دموعه 
مال على رجليه وبرق للنور 
بقا ميّت بعد ماكان مكسور 
ادي الفنان 
وادي الجمهور 
ادي اللي ماجاش ف خيالها اهو كان 
قتلت انسان 
كسرته بالبُعد وبالخذلان 
واتكاترت على نفسه همومه 
ماقدرش يكمل بقا يومه ريّح وارتاح 
ادي المايسترو 
بيموت ف مكان فيه مزيكته والناس سمعاها ومش سامعاه
فيه يوم هتخشوا عليا البيت 
تلاقوني مشيت 
من غير اسباب ولا شرح عبيط 
قالي وانا نسيت 
واديني باقول 
احترموا المتعوّر من دول 
حاوطوا المهموم قبل فراقه 
ان كان ساكت يبقى لأسباب
اوعوا تشيلوا ايديكم م الباب 
املوا حياته بحب وأحباب 
قبل ما يدبل قدام عينكم 
وان شوفتوا حبيبته ف يوم بينكم 
خلوها تكون عارفه مقامه 
وانها عدت من قدامه وخلته مقتول بغياب أعمى 
ملعونه ايدين مجرمة ناعمه 
مادتش الفرصه لحد يعيش 
مع انه اتوفى قصاد منها اتناشر مرة 
واترمى ف الأوضه لحد ماضاقت روحه عليه.

المايسترو

ابوس  ايديكي قبل أي كلام 
فرض احترام 
وحق حُب ف يوم من الأيام 
كان هو أجمل حاجه ف حياتي 
واتلو السلام كالرجال أوقات مابيفارقوا 
اديكي حقك عليا ف الغياب تقدير 
انا شفت منك برضه حلو كتير 
والله فرق كبير بين اختلاف وخلاف 
احنا اختلفنا ويجوز مابقاش ما بيننا نصيب 
لكن ما بيننا سنين كملها رب حسيب 
والراجل اللي يعيب ناقص مالوش ذمه 
باسم الحاجات المهمه 
باسمك ف بدأ القول 
وباسم كل عزيز كان له مكان بينّا 
ماتزوديش اللي بيننا بجرح هـيدينّا
خلى الحاجات طيبة 
ووشوشنا مترتبة 
والصورة متركبة مطرح ما سيبناها
وبلاش يكون حُبنا موجه ركبناها 
لا كلامنا كان عادي 
ولا كنا زي الخلق 
من يومنا متخانقين 
من يومنا جوز مجانين ومشينا على كيفنا 
مانكونش ليه على كيفنا واحنا متفارقين !
مانكرش فيه أوقات بيكون شيطاننا صديق 
وساعات بنرمي كلام مايكونش كله بريء 
وساعات بنتوعد بحاجات مانعملهاش 
بس احنا جوانا ماشيين وماكرهناش 
عن نفسي مش كاره 
أنا باحكي عن نفسي 
وبرضه عن نفسي باتمنى وادعيلك
كل الهنا يجيلك 
يارب منديلك مايشوفش عمره دموع 
وتكون ليالي الرضا بالسبعه ف الأسبوع 
يشهد عليا اللي خلاني اشوفك احن 
اني حزين مع إن 
ده قرارنا واخترناه
بس الوجع منطقي وان كنا فضلنّاه 
فياريت تقولي غلط 
لكن أكيد ماقصدش 
وان يسألوني هاقول أهو ربنا ما أرادش 
هي جميلة قوي
ومنظمة وطيبة 
وذكية وجريئة 
وقوية وبريئة 
لكن مافيش رابط 
طلقة فراق صابت 
والعلة ف المتصاب 
وعشان مابيننا صحاب 
وبيننا ناس عارفين ان احنا كنا اتنين 
بس بخيال واحد 
خلينا متفقين نقول كلام واحد 
قسمة ونصيب وخلاص 
وهتفضلي ع الراس مهما السنين مرت 
مهما الخيوط كرت والعمر فات بيّا 
هتفضلي الملهمه والبنت ف النية 
المخرَج اللي لقيته ف دايرة مقفولة 
وأول ظهور فعلي 
للسيدة الأولى 
شمس الغرام البكر 
أول دفا بيمر ف سقعة الأيام 
وهتفضلي الدبدبة من زهوة البدايات 
ريحة حنين لحاجات 
يسألني عنك قلبي قبل النوم 
تسألني عنك ياقة قميص أزرق 
أو كرسي عطفتي مرة عليه وسندتي ايدك 
يسألني عازف ايقاع عن صوت مرورك جنبي ف الشارع 
ويسألني الغياب 
يؤسفني أفتح باب لا تجلسي خلفه 
وانتي الكلام كله من ياءه إلي ألفُه 
هنعمل ايه ف اتنين اتفقوا ف اختلفوا 
كل الحلول اللي كانت ممكنه اتعملت
معادلة واكتملت 
وربنا الغالب 
سالب وجعنا في موجب التفاصيل 
بتساوي صبر جميل على ذكرى بالسالب
سيبيني افضفض بقا 
دول كلمتين يعني 
كان جرح ووجعني وقولت ما بدالي 
وانتي ف جرح قديم قولتي مابدالك 
هابوس ايديكي احترام ان جيتي على بالي 
وانتي اسمحيلي ابوسها ان جيت على بالك 
دول برضه مش ساعتين 
دول عمر والله 
ده انا كنت علشانك بازعل مع العالم 
باتحدى كل الناس 
كنت ان تحوم سيرتك 
اضحك ويلقوني باصبح خفيف الوزن 
كنت ان يغيب اسمك يمُر فيا الحزن ويمد ف جزوره 
نتلاقي زي عليل لقى حد بيزوره 
وسط التعب والهم 
لو جيتي كنت أهتم واضغط على ألمي علشان مايوجعكيش 
وكنتي قبلة حياة تديني فرصه أعيش 
لولا شوية بُعد اتسللوا بالغلط 
وكبروا بغيابنا 
واتحولوا للبلاب ملفوف على بابنا 
لولا اللي نقلوا كلام وانسحبوا بالأيام 
ولولا تركيبتك 
ولولا تركيبتي 
لا كنت انا سيبتك 
ولا كنتي يوم سيبتي 
البعد ياحبيبتي كان حل ماله بديل 
غاب النهار واستنيناه ميت ليل
والوضع ده أحسن 
انا ناسي كل جراح مرت بايد منك 
انسيلي كل هموم عدت عليكي ف يوم 
قولي ده واد طيب 
بس الزمن جه عليه 
واداني ياما ايديه وسندت وأنا صافيه 
وهاقول دي ست النسا 
الطيبة الدافية 
بلاش نكون ف السوق ، سوق الكلام المر 
الحرة حبت حُر 
واتفارقوا بالأيام 
وابوس ايديكي بعد كل كلام 
يتقال عليكي او يكون عنك 
ماتزعليش وخلاص 
ولا يتزعل منك 
يا اللي انتي بيكي نسيت كل اللي كان بيغُمّ
يا طفلة ساعة اللقا أسميتها دوم دوم 
وقلبي من وقتها اتعلم الطيران 
واتعلمت تنورة تبتدي الدوران
أنعم وأكرم لقا 
لما الفراق بيطيب 
خليني ف التجربة 
أب وصديق وحبيب 
وقولي سيبنا وبس 
مش شرط مين بيسيب 
ماتفرجيش الناس على جرحنا المستور 
ولا كسرنا المجبور 
وصدقي حكمتي أو لوعة المكسور
اللي اتزرع ف الضل 
بيموت ف أول نور 
https://www.youtube.com/watch?v=l2h_NxD1GMs

El Sakia TV Concerts

كلام ماتقالش في جوابى الاخير - عمرو حسن

إنجاز

البوم: "1 ديسمبر"
كلمات: مصطفى عبدالرحمن
هندسة صوتية: Mustafa El-Mallawani
موسيقى: مجهول
copyrights © 2017 Mustafa El-Mallawani - all rights reserved

الكلمات 
_____

عملت الليله دي " إنجاز "
وشايف م الجدير ذِكره
باحس بفرحه واتنطط
واعيط كل ما افتكره!
طلع فيه حاجات
تسيبها تجيك !
وتلقي " نسخ " كتير منها
عظيم إنك تكون قادر
تبطل حاجه مدمنها ..
وبعد ما كنتي دور إدمان
وحاجه بتجري جوا الدم
هانام الليله وانا مرتاح
بدون ذرة زعل او هم
خلاص بطلتك الليله ..
وهابدأ بكره عمر جديد

لأول مره من سنتين ..
أشوفك وابقي مش مهتم

1 December | إنجاز

Mustafa El-Mallawani

Related tracks