pure

بـ100 راجل
*******************************************************
نص:غادة عبد العال
أداء وهندسة صوتية:زينب فرحات


بتعملي اللي انتي عايزاه\ في الوقت اللي انتي عايزاه \من غير ما تضطري تستأذني ..أو
 تألفي كدبه تخليكي تقدري تعمليه ؟
-بتشتغلي و بتصرفي على نفسك\ و بقالك سنين ما أخدتيش من أي كائن مليم أحمر\ و لا مديتي إيدك لحد و قولتيله هات ؟
- عندك شغل و هوايات \و وقت كافي تقري أو تخرجي\ أو تتعرفي على بشر جديدة و تسافري أماكن مختلفة \من غير ما تتعلقي في ناس و حاجات ما تهمكيش ؟
-إتخانقتي على الأقل 5-6 مرات في حياتك\ مع متحرشين في مواصلات \منهم مرتين تلاتة عشان واحدة تانية ..مش عشانك ؟ 
-وقفتي قبل كده مع صنايعيه في شغل\ و لا فكرتي.. و لا قلقتي ..و لا اتكسفتي ، بل بالعكس الصنايعي هو اللي كان مكسوف ؟ 
-الناس لسبب ما \بتبصلك بصعبنة\ و انتي نسيتي السبب اللي بيخليكي تصعبي عليهم\ و بعد ما بتفتكريه بتقعدي تضحكي \إنهم لسه شاغلين نفسهم بالموضوع إياه ؟
-بتتفرجي على أفلام رومانتيك كوميدي لوحدك \و تحسبني على رجالة نص لبه \و أمهات نص كم \مابيعرفوش يربوا ولادهم على اللي كان نفسهم يشوفوه من أجوازهم \و كأنهم بينتقموا من بقية بنات جنسهم \عقابا للكون اللي ما أسعدهومش؟
-كلمة "جايبالك عريس" بقت بتشكل عبء نفسي أكتر منها حاجة مفرحة 
 أولا :  بتشيلي هم اللي جاي  أكيدمافيهوش الرمق لأن فكرة الناس عن عريس "مناسب" ليكي بقت غير فكرتك تماما مع مرور الوقت
ثانيا : بتشيلي هم اللي هتسمعيه بعد ما تقولي لأ من باب "هي بتتأمر على إيه \و العمر بيجري\ و لازم تتنازلي \و مافيش حد كامل\ و لايميها بأه يا بنت الناس" 
 ثالثا: بتشيلي هم إنه يطلع كويس و تقبلي\ عشان ماعادش ليه في منظومة حياتك الجديدة مكان ؟

من كتر ما أهلك علموكي تعتمدي على نفسك\ بأه صعب قوي بالنسبة لك \تقبل فكرة "راجل" تعتمدي عليه ؟
-إتقدملك على الأقل 10 أشخاص حسيتي إنك أرجل منهم ؟
-بتخافي من الوحدة ؟
-بتحبي الوحدة؟
-ماعدتيش بتلاقي نفسك غير في الوحدة ؟
-لما بتزعلي بتصالحي نفسك ؟ 
 لما بتبكي بتمسحي دموعك بإيدك ؟ 
 لما بتقعي بتقومي لوحدك\ و تنضفي هدومك\ و ترفعي راسك \و تكملي مشوارك "لوحدك" من غير ما تستني إيد مساعدة من أي حد ؟
-بتدوري كل يوم الصبح \على شعراية بيضا جديدة مصممة تطلع في راسك\ و تشديها و تحطيها قدام عينيكي و بعدين تطلعلها لسانك و تضحكي ؟
...
إذا أنتي من فصيلة بنات مصر الثلاثينيات المختومات بختم "ب100 راجل" .
. اللي المجتمع رباهم عشان يبقوا ب 100 راجل و بعدين بيعاقبهم على اللي رباهم عليه ..
 إرفعي راسك و بصيلهم من فوق و قوليلهم أعلى كلمة "طظ" ممكن أحبالك الصوتية تسمح بيها .. عشان هما ما يستحقوش غير كده !

نيسكافيهك في مجك .. أفلامك في لاب توبك .. كتبك في مكتبتك .. اغانيكي على موبايلك .
. نجاحك بتاعك مش بتاع أي حد فيهم .
. اللي يقولك إنتي كائن ناقص قوليله بص لنفسك .. و اتبعيها بأعلى "طظ" تقدري عليها

بـ100راجل

كلمات :اسراء مقيدم
أداء زينب فرحات

نوستاليجا

نص: إسراء مقيدم
هندسة صوتية: شادي عبدالله
أداء:زينب فرحات
___________________________
وهتعمل ايه يابو قلب مصبوغ بالجَدَب
مع بنت تكوينها بيشبه للشتا؟
متلوّنة بريحة يناير
روحها عاشقة الكلفتة
واكمنها..مروّية فى القلب بتعب
كان فيها منه حجات كتير
يمكن دفاها..أو جفاها
أو شرودها عن دواها
أو هواها للسهر
وبرغم سقعة جوّها
تلقاها تقدر لو تعوز..تصبح غطا
البنت سكة للسفر
وانت المسافر فيها مهما كان قلبك عجوز
..لساك فتى
 كات جدتى بتحكى زمان
ان البنات..
تأويلها جوة الحلم دنيا
والحلم كان واجب نفاذه فـ خطوتين
"كام رقصة صولو من الوجع
على رتم أوتار الكمان"
وكأنه ديْن
وان الميزان..علشان يوازن كفتين
فـ البنت يلزمها تعيش كام ألف ضحكة
عشان يعادلوا حزنها
والحزن لو كان تُقل وزنه يسوى مَبْكى
بضحكة واحدة منّها.
يامفرّقين حبة دفا ع البردانين
قلب الشتا زى الرصيف
او زى شارع كان مداه ضلمة
ومخبّى وسط العتمة نور 
والبنت برضه قلبها شتوى
عكس الخريف
يسكنها حبة ضىّ رغم الليل
..كل البنات
تقرب لروح البرد فى البوح والسكات
زى الحكاوى الدبلانين
حدوتة كات متشتتّة
مكتوبة لكن ما اتحكتش
مش ميتّة..لكنها
تفاصيلها لسة ماتعاشتش
وعشان كدة
كل الصبايا فطبعهم..
بيكونوا أجمل فى الشتا
كل الصبايا فطبعهم
بيكونوا أجمل..
..
فى الشتا

بنت تقرب للشتا

لساك دفا

لسّاك بـ رغم البرد ساكن ف الضلوع

و مالكش حضن يكلفتك

و بـ رغم خوف ساكن ف قلبك من زمان

قادر تكون انت الأمان"

..قادر تكون انتَ الدفا

 

لساك مصرّ ان الدموع

قنديل فرح..

..نازل على خدودك بـ يرقص فى الخفا

لساك تداوى فـ القلوب

مع ان قلبك كان يادوب

بيدوب فى احضان الشفا

!..لساك دفا

 

ازاى بتعرف تبقى بلسم للجروح

مع ان جرحك لسة حىّ

مع ان عتمة دنيتك..

! علقم

بتعرف تبقى ضىّ

لساك بـ تتشعبط فـ حبل لحلم جىّ..

...لساك بتقطع بالمودة

كل احبال الجفا

 

ياللى انت عكاز للخطاوى فى الدروب

لسة الوجع عارف يطبطب ع القلووب

لا الدنيا عن لوع الوجع ناوية تتوب

..ولا انت ناوى انك تبطل

فى العكارة...تكــون صف

----------------
كلمات: إسراء مقيدم
هندسة صوتية: رغدة أيمن
إلقاء: زينب فرحات

لساك دفا

لما تعمل اي حاجة اديها حقا 
يعنى أما تزعل أزعل أوى علشان لما يجى الفرح تعرف تعرف أوى
و لما تكتئب أكتئب أوى علشان لما ربك يفك الكرب ترتاح أوى
و لما تحب حب أوى علشان تعرف تدى أوى
و لما تسامح سامح أوى بس ماتنساش علشان لما يفيض بيك تبقي عملت كل اللي في وسعك
و لما تضحك أضحك أوى علشان تعرف تبكى أوى
و لما تنبسط أنبسط أوى علشان تعرف تتكدر أوى
و لما تغلط كرر غلطتك علشان تعرف تتعلم 
و لما تعمل أى حماقه خد بالك علشان تتعلم الحكة
أعمل كل حاجة لأخرها و أديها حقها و أتعلم من كل اللي حواليك أتعلم من قليل الأصل و ابن الاأصول أتعلم من الكريم و البخيل أتعلم من الغبي و الذكى أتعلم من المتواضع و المغرور أتعلم من اللي شايف نفسه و اللي مقلل من نفسه أتعمل من المحبط و من المتفائل أتعمل من كل ده علشان هيمر عليك مواقف تبقي فيها مرة كدة و مرة كده و أعرف إن اللي فات لو كان وحش الأوحش جاى و إن كان حلو الأحلي و إن ياما دقت علي الرأس طبول و إن كل ده هيخليك أحسن بس أهم دى كل حاجة وقتها ماتسمعش اللي قولك أنت عايش في الدور لكن أسمع اللي حاول يواسيك بكل أو نصيحة مش مهم تعمل بيها المهم تحطها في بالك علشان هيجى يوم وقتها أعمل كلب اللي نفسك فيه اوى طالما لا حرام و لا عيب و أعرف إن هتلاقي ناس كتير منهم اللي يكمل معاك و اللي يفارقك و اللي تأخده الحياة أو يأخده الموت كل ده هيأثر و أعرف إن فيه اللي فاهمك و حابك كده و معاك و فيه اللي مش فاهمك بس مرتحالك بس أهم أدى كل حاجة حقها و ماتكتمش جواك
---------------------------------
خواطر: ماجى إيهاب أنور
هندسة صوتية: رغدة أيمن
أداء صوتى: زينب فرحات

أوى

لأى حد موجود هنا           

النوت دى استغاثة

نداء أخير

قبل الهروب

 

 بس لو مسمعتوش

حصل خير

ومانتش ملام

------------------------

"محمود درويش بيقول: "الجميلات هن القويات يأس يضيء ولا يحترق

 

بس للأسف ساعات اليأس بيتحرق من غير ضى

اليأس نفسه بييأس ويبقى عايز يهرب لمكان بعيد يتحرق فيه

 

بعيد عن أي حاجة وكل حاجة

 

"نمرة عربية أبويا" 169 س أ ى

ودايما بقراها يأس

 

--------------------------

علمنى كيف تموت الأشجار واقفة، فمثلى لا يمكنها السقوط

(أسماء حسين)

 
زمان وأنا صغيرة أول مرة أفتح فيها المعجم كنت بدور على معنى اسمى

اكتشفت إن "زينب" فى اللغة يعنى شجرة عطرة الرائحة

ومع كل يوم كنت بكتشف إن ليا نصيب من اسمى

بس انا ما أخترتش اكون شجرة ، غيرى هو اللى اختارلى اسمى وبيحاسبنى على ضعف جذورى وإزاى مش قادرةأثبت ضد الريح


غريبة؟ مش كده


وعمر طاهر بقى قال( تخيل انك شجرة، واثبت لأنك شجرة ، ضارب فى الأرض مسافة، وثابت وأنت أدرى

)

أنا فعلا شجرة

بس أنا مش أدرى

ومش عارفة مسافتى فى الأرض قد إيه

ومش قادرة أغامر وأعتمد على حاجة مش عارفاها

------------------------------------------


منير عنده أغنية بيقول فيها

الكلمةإيد .. الكلمة رجل.. الكلمة باب

الكلمة كوبرى يمر فوق بحر العباب، الجن يا أحباب ما يقدر يهدمه

فأتكلموا أتكلموا إتكلموا)

 
طول عمرى بحلم أبقى صوت وبس ،

صوت قوى يسمع لبعيد
 

برغم إني ما بتكلمش كتير، بس دايما اللى كان بيراهن على لحظة كلامى بيكسب

بس دلوقتى مش قادرة اتكلم

 

زمان كانوا اللى يعرفونى بيقولولى بطلى تنطى فى دماغنا وتقوللى اللى على لساننا قبل ما نقوله

واللى كنت بحبهم، ماكانوش بيحتاجوا يحكوا ع اللى فى قلوبهم عشان كنت بعرفه لوحدى


 

بس دلوقتى أنا بقيت خرسة

بسجد وببتهل من سكات، اللى خلقنى مش محتاج كلامى عشان يسمع انين قلبى

بس عباده مش كده



نفسى أدور على لغة من غير حروف تحكى على اللى جوايا من غير كلام

تفتكروا هقدر

وأنا أصلا ما بقاش جوايا اى قدرة؟

-------------------

خاتمة

ما بقيتش بعرف اقول غير

"وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ

-------------------------
مونتاج وإخراج: رغدة أيمن
خواطر وأداء صوتى: زينب فرحات

استغاثة .. من سكات

قصيدة: عمرو شاهين
أداء صوتى: زينب فرحات
مونتاج وإخراج: رغدة أيمن
-----تفاصيل بسيطة

 

قولهم 

إن الغياب .. نُص المسافة للقا 

و أن اللقا

خط البداية للغياب 

قولهم 

طعم العتاب

يشبه التلج اللي ب يدوب ع اللسان 

بارد أوى وقت الدخول للفم 

و يدفّى ريقك لما داب 

فاكر مرورك من هنا 

صوت الجونله 

وهى ب تطبطب على سجاده الصلاة المفروشة زينه 

لسه ب يرن في عامود السرير

ريحه الدفا 

وطعم خوفك

سكر القهوة الزيادة وريحه الدخان 

كلهم

اقنعونى إن الفراق … 

محطة تانيه في العلاقة المستمرة 

مش ضروري إن البكا 

ينزل من عينك دموع 

مش ضروري إن الفراق 

يخطف م الشفة ابتسامه 

و لا هوش ضروري 

إن كل حضن أنا ها اخطفه 

ها أدفع قصاده

حسنه

في يوم القيامة 

ف اصرخي لما تجيلك الضحكة بجنونها 

الصرخة ضحكه قديمه مكبوتة 

أنا اللي عايش لحظه الحب وشجونها 

وأنا اللي بعمل م اللحظة دى ..حدوته 

الملايكه 

ضمة كفوفك للجاكت 

طعم الهوا بعد المرور بين خصلتك

كلها تفاصيل بسيطة 

بتخلق القصة .. وتديها الحياة 

الشمس أنتي 

والليل في ستره للمشاعر يبقى أنا 

ضدين ب يجروا عكس بعض 

لحظه لقاهم .. مشهدين ملهومش وصف 

مشهد شروق

" ..اقسم لذاتك بالوفاء

اقسم بكل تفاصيل الحياة .. على البقاء "

مشهد غروب 

" أوعدك أنى ها رجع من جديد

أوعدك .. مش ها أسيبك تحضني الأشواق كتير "

...

قولهم 

إن الزهور ..

قادرة حقيقي ع الغنا رغم الخريف 

وان الخريف ..رمز الشجن .. 

قادر يضيف على جَنَتَكَ .. لون احتضار 

و باختصار

ورق الشجر .. اصفر خريفي 

والسنابل .. اصفر حياه 

و عينيكي أنتي 

شماعات الحلم .. في دولاب الوجود 

قادرة تحافظ ع الفرح

ترتر ب يلمع

على بطن فستان الزفاف

و أنا قلبي يرويه الجفاف .. 

والبعد.. يَّمْ

يسقى تفاحة اللقا 

علشان نسيب الأرض عذرا

للكواكب والنجوم

pure

Manar Ahmed D