各位，你地好，歡迎大家收聽第一集嘅黃世澤聲音評論。呢個評論節目純粹係我個人嘅製作同意見，同D100係無關。

點解會有呢個節目，因為未必個個人都有耐性睇文字，而聲音係最快最簡便嘅途徑，去分享我對時事嘅見解。亦由於大家時間寶貴，所以呢個評論節目亦都唔會太長，暫時希望維持每集五分鐘左右嘅長度。

近排最熱門嘅時事，包括咗林慧思事件。林慧思任教嘅學校嘅校董會，係好值得研究嘅，但唔知點解，無傳媒認真幫呢班有份向紅衛兵屈服嘅校董起底。我發現法團校董會其中一位校董呂東明，就係其中一個好有問題嘅校董。

呂東明依家係沙頭角中心小學嘅校長，喺二零零八年獲頒榮譽勳章，呂東明做嘢有幾離譜紀念，喺今年五月，由於佢未有跟私隱條例，向佢任職學校其中一名女教師提供評核報告紀錄，而被人入稟法院。而呢間學校喺去年，獲香港政府封為國民教育先鋒。我手上仲有相關照片，大家可以去我嘅博客，或者我嘅Facebook Fan Page，就搵到有關照片。

大家睇到點解天主教香港教區最初反對乜嘢法團校董會，因為土共可以透過法團校董會，以家長或者校友名義滲透各學校，然後去搞國民教育，或者迫害佢地想迫害嘅人。大家見到李偲嫣呢啲人渣後，依家再嚟一件呂東明，土共真係無處不在。

如果大家真係要幫林慧思，一定要起清校董會裡面嘅人嘅底，要佢地付出為中共為虎作倀嘅代價。好明顯，校董會嘅決定係一個幫中共做劊子手嘅決定。而為防林慧思被進一步迫害，第一個要郁嘅校董係呂東明。天主教香港教區亦應該採取果斷行動，換走部分同中共合作嘅修女校董，因為已經有教會被滲透危機嘅存在。

幫林慧思外，對青年關愛協會施加壓力亦好重要。依家已經有明顯證據顯示，燕京啤酒係青年關愛協會其中一個大金主，大家要阻止青年關愛協會呢班紅衛兵作惡，亦要杯葛燕京啤酒，有幫燕京啤酒推廣嘅酒吧亦都唔好去。大家係時候以一個明確嘅態度，向呢啲野蠻人說不，否則香港肯定重演文革，到時仲衰過六七年。而且班蝗蟲搞到移民西方國家越嚟越難，唔係話你有專業資格或一啲財產就可以話移民就移民。香港是我家，清潔土共垃圾齊參加，行動勝於移民。

今日節目時間又差唔多，明日再分析過，再見。

黃世澤聲音評論第一集：起迫害林慧思校董底

歡迎大家聽第二集嘅黃世澤聲音評論。

喺2009年，我喺羅便臣道發現一架中國救護車嚟香港直接送雙非細路嚟生仔之後，由於引起社會關注，呢啲雙非專車嘅服務一度受到遏止。

只不過，最近我喺網上，發現有間嘅康怡救護服務嘅公司，聲稱可以提供嚟香港救護車服務，懷疑問題死灰復燃。為咗求證，我故意打電話去放蛇，證實有無呢種情況。以下分半鐘華語口音唔準，兼幾多螺絲嘅訪問，就係證實咗，呢間公司可以送大肚婆嚟香港生仔。

大家可以見到，只要《基本法》廿四條唔修改，中國人一定扭盡六壬，想嚟香港生仔，吸乾香港資源，否則呢類服務又點會有市場。作為本土派，一定要持續跟進呢啲情況，否則實死灰復燃。
今日黃世澤聲音評論時間又差唔多，明天再會。

黃世澤聲音評論第二集：雙非救護車

2013年8月25日


歡迎大家收聽黃世澤聲音評論第三集。

近日，香港嘅是非黑白好似倒轉晒咁，好多冤案到依家都沉冤未雪，但凶手就逍遙法外，甚至更上一層樓。好似殺死商台敢言名嘴林彬嘅凶手一直都未捉到，但發動六七暴動嘅暴徒楊光就攞到大紫荊勳章。殺死入境主任梁錦光嘅暴徒施君龍唔單只已經放番出嚟，仲要得到單程證嚟香港定居，簡直去到黑白不分嘅地步。

照常理，廣東省公安廳係唔會批單程證俾施君龍，因為施君龍曾經喺香港逾期居留，而喺佢香港逾期居留期間仲要殺過人，喺世界大部分地區，都唔會俾呢種人入境或者出境。只不過，依家施君龍竟然貴為中聯辦紅人，大家睇番施君龍喺過往嘅報章，呢條友隨時係靠出賣民主派或其他爭取居港權人士情報俾中共上位，才令佢得以落嚟香港。

大家睇番施君龍被捕呢段期間嘅報紙，施君龍經常獲天主教香港教區主教陳日君探望，後來亦受洗成為天主教徒。以羅馬教廷同中共關係之差，施君龍正常 唔會成為中聯辦紅人，更加唔好講落嚟香港。但好可能施君龍喺呢段期間攞到唔少關於教區、泛民甚至爭取居港權行動嘅情報，因為佢立咗大功，中共一般都會對呢類反骨仔給予豐厚報酬。施君龍依家著到身光頸靚，佢得到嘅報酬當然唔只係一張單程證，隨時仲有各類物質上報酬。

呢次廣東省公安廳批施君龍嚟香港，唔單只顛倒黑白，而且更令人擔心中共為咗自己嘅政治需要，每日放咗幾多罪犯同反骨仔嚟香港，香港真係唔變臭港就 奇。所以香港人千祈唔好對施君龍嚟香港當睇佢唔到，香港一定要收番中國移民嚟香港嘅審批權，同埋修改《基本法》廿四條，徹底解決完全邏輯上講唔通居港權規定。

今集嘅黃世澤聲音評論時間又到，明天再見。

黃世澤聲音評論第三集：反骨施君龍

各位，又到咗黃世澤聲音評論嘅時間。雖然傳媒想開始淡化林慧思事件，但依家追殺迫害林慧思幕後元凶嘅工作至啱啱開始。其中一位有份迫害林慧思嘅人，係新界校長會會長朱景玄。朱景玄有喺網上用新界校長會會長名義，寫文聲討林慧思。

新界校長會可以講係中共港澳工委控制嘅組織，新界校長會嘅榮譽贊助人包括中聯辦新界工作部部長劉林，名譽贊助人有中聯辦新界工作部副部長張肖鷹，而會務顧問有中聯辦新界工作部宣教處處長區劍偉。仲有譚惠珠、李國英呢啲港奸做法律顧問，一睇就知係土共組織。

新界校長會呢個組織，除咗頒咗個「國民教育基地」名銜俾沙頭角中心小學外，呢個組織仲有組織一啲出賣香港利益嘅活動，例如同新家園協會合辦一啲洗腦活動。新家園協會係中聯辦用嚟吸納中國南嚟移民嘅組織，所以朱景玄係港奸係無庸置疑。

但朱景玄仲有一個身份好值得留意，佢係宗教極端組織明光社嘅董事。呢個亦可以解釋到，點解明光社喺打擊蘋果方面不遺餘力，花好多時間喺歧視同性戀者上面，但對社會上好多不公不義嘅事就不聞不問。梗係喇，其中一個董事擺明係土共控制嘅人，點會俾明光社花時間喺社會公義相關嘅事情上。

土共嘅特色，就係佢地嘅頭上頭銜特別多，方便迷惑傳媒同群眾。當你知道明光社其中一位董事係香港其中一個土共組織嘅核心成員果陣，你根本就唔會再信呢個組織打住耶穌基督之名所散播嘅歪理。呢次繼續追殺有份迫害林慧思有關嘅土共，就提高各位對土共嘅防禦能力係好有幫助。

今日嘅黃世澤聲音評論時間又到，明天再會。

黃世澤聲音評論第四集：起新界校長會和明光社董事朱景玄的底

又到咗黃世澤聲音評論嘅時間。

薄熙來審緊，法庭不斷傳出衰過TVB電視劇嘅情節果陣，依家中紀委話查緊中國石油副總經理王永春，加上依家無人知周永康究竟去咗邊，就令到依家中國局勢變得好詭異。

薄熙來喺法院上夠膽翻供，有兩個可能性，一係支持薄熙來嘅勢力授意佢翻供，令成個審訊變得好尷尬，迫中共對佢輕判。一係薄熙來依家明知死硬，既然係唔係都死，就嚟個大攬炒。

但無論邊個可能性都好，都反映咗周永康、薄熙來呢班友根本唔諗住放手，所 以掌握住中紀委嘅人，就索性嚟個絕地大反攻，依家就向周永康呢幫人嘅油水來源石油部門落手。

問題在於石油涉及嘅利益太豐厚，周永康又好，薄熙來又好，實唔會放低呢舊肥豬肉，分分鐘有人你做初一，我做十五，特別周永康同薄熙來，分別喺執法部門，同軍隊有影響力，屆時佢地發動兵變又有乜好令人奇怪，反正中國並唔信仲信呢兩條友嘅傻佬，特別係老咗仲走去信毛澤東呢個魔頭嘅傻瓜。

睇起嚟中國嘅事唔關香港人事，但實情並唔係咁，依家中共內鬥咁玩法，加上中國經濟硬著陸，演變成政變甚至內戰係唔出奇，以香港嘅地理位置同戰略重要性，兩派人喺香港玩嘢，再溝埋佔領中環，到時實嚟個六國大封相。所以各位要保持留意中國局勢，見勢色唔妥就要諗辦法應對。如果有外國護照果啲，依家其實已經可以考慮送家人去海外住，避一避風頭先。

今天嘅節目時間又到，明日再會。

黃世澤聲音評論第五集：中共內鬥

陶傑廁紙包頭論 - 2013年11月6日－政府總部

風波裡的茶杯 聽眾陳生踢爆機電署帶頭剝削外判員工

Martin Oei

Popular tracks