كل عيد ذكرى ومش كل ذكرى عيد
واصحابى كلهم جمبى ولوحدك انت بعيد 
فى الفرح كنت سندى فى الشده كنت حديد 
تنصحنى بالصح دايما وكنت دايما بستفيد

فاكر يوم وفاة صاحبنا والده
كنت جمبه كنت سنده
كنت بتواسى دموعه 
وتقوله ليها راحين اكيد

وانا لسه فاكر يوم وفاتك
ابص لصاحبنا تقول دموع 
كان لسه بيواسيك
راح خلاص مفيش رجوع
هو قالها الموت اكيد

ربك اختارك فى ايام فضيله
يا راجل هو حد قدك
وبعدين الدنيا ايام قليله 
وكلها شويه وهتلاقينا عندك


الذكرى الأولى

ذى انهارده فى يوم تانى 
ابص لعنيكي اتوه فيها 
وارسم طريق مليان بالورد 
وامسك اديكي ادفيها 
اضمك وانسى كل جراحى 
حضنك وحده يدويها 
الدوشه اللى جويا كل ما تيجي تبعدنا 
بنظره منك تمشيها 
وتاخديني لحته بعيد
عمرى ما مره مشيت فيها 
من مره واحده حفظت كل تفاصيلها 
وتفاصيل كل حواريها
ومش هنشوف سوى الفرحه
كلمة حزن تنسيها 
صوت الضحكه من قلبك
يرد الروح ويحيها 
بس انهارده ... 
مفيش ورد فى طريقي 
طريقى كله متهات 
جميله جدا دى عنيكى 
بس انا جوايا اصلا مات 
ملاه اليأس والإحباط 
يا اللى انتى حته من الجنه 
كبيره الدوشه جوايا 
خايف أمد ليكى أيديا  
يطولك هم ويايا 
خليكي بعيده عنى يا ريت 
انا اصلا خلاص مليت 
همى خلاص بقا صاحبى 
الوحدة صارت ليا بيت 
دموعى حفظت طريقها 
وعمرى ما مره منها شكيت 

ذى انهارده فى يوم تانى 
هقولك بحب ووحشانى 
وروحك ليكي وخدانى 
اكبتلك شعر وتحبيه 
تعيشه بقلبك ووجدانك 
واقولك طفل خديه خبيه 
واتمرمغ جوا احضانك
بس انهارده هقوم مفزوع 
من حلمى اللى بقاله سنين
بتتغير دايما البطلة
وكل الممثلين ثابتين 
وواقف بعيد هناك البطل
وحيد دايما وقلبه حزين

Mego Gamal

Popular tracks