"  ليله وداع الشتا " ..

- لم الشتا أشيائه ومفارق ..
أخد هدومه التقيلة وحبة م السقعة ..
وخد حاجات من دلابي كات واقعه ..
وخد كوفية ف وقت البرد دفيتني ..
وخد حبيبتي معاه ..
" خد كل شئ وياه لكنه ساب أشياء " ..
زي اللقا والفراق ..
وساب ف قلبي حنين للمطرة ف يناير ..
وساب شوية مطر ع السطح ف عماير ..
وساب ضماير لسه متغسلتش ..
إزاي بتغسل قلبي كل نهار ؟!
وتسيب قلوبهم كلها وسخة ..
بيبانوا لينا إنهم ف الشكل مختلفين ..
بس الحقيقة بإنهم نسخة ..

عارفين !
أنا كل ما اكتب للشتا ,,
الاقيني بكتب عني مش عنه ..
يمكن لإنه كتير بيشبهني ..
بيحب صوت فيروز ,, وريحة القهوة ,,  ,, واللمة آخر الليل ..
والبوسه علي سهوه..
يمكن لإنه جميل ,, وإيجابي طول الوقت ,,
مع إن أنا سلبي ,,
" ركنت قلبي زي عربية ونسيته جوا الجراچ " ..
ورسمت صورة لحبيبتي بالمكياچ ..
نزل الشتا ف اتمسحت الصورة ..
" بيبان بإني قدرت أتماسك رغم إن روحي لسه مكسورة " ..

من كام سنة ف الشتا ..
كنا ف كافيه ع البحر ..
أنا وهي وفنجانين قهوة ..
كل اللي فاكره يومها بالتحديد ..
ضحكتها ,,
فستانها ,,
مسكتها للفنجان ,,
شكل الإضاءة الخافتة والدخان ,,
وهدية مني بدون سبب ليها ,,
وكلام كتير إتقال ونسيته بعديها ,,
لكني لسه برغم هذا البعد ,,
كل أما يجي الشتا ..
بروح لنفس الكافيه ..
واطلب لنفسي فنجانين قهوة ,,
واحد عشان أنسي كل اللي كان بيننا ,,
والتاني لما أشربه أشتاق كتير ليها ..

سبتيني ليه ؟!
نفس السؤال بسأله من يجي ست سنين ,,
ومفيش جواب منك وصل ف يوم بابي ..
بكتب عتابي ف كل أشعاري ..
ومفيش عتاب بيرجع الغايبين ..
كل اللي سابوا قالوا مش ماشيين ..
بس النصيب !!
" تلكيكة بيها بنفترق عن عمد " ..
واهو كل شئ إتهد ,,
الزهر أصبح شوك كما الصبار ..
وعينيا ليل مطلعش ليها نهار ..
وإيديكي لسه معلمة ف قلبي ..
والبرد حاوط كل شئ فيا ..
لو كنتي جنبي كنت هتدفي ..
وأستكفي بيكي عن أي شئ دونك ..
أبني ف عيونك بيتي وحياتي ..
واعرف مكانك عن طريق ريحتك ..
اغزل خيوط علي شكل تسريحتك ..
" واحكي الحكاية لكل زوج عشاق " ..
بس الفراق ,,
بيمر زي الشتا بين فترة والتانية ..
نبقي ف أغسطس معا بنغني للدنيا ..
وأول ما يجي يناير نغني للأشواق ..

فيه سر جوا الشتا ..
لكنه مش واضح ..
" الحب فيه غامض بس الحنين فاضح " ..
وعشان كدا ..
مش قادر أنصحكم ..
أو أقولكم بالظبط سبب الحنين للشتا ؟!
جايز عشان بيداوي ناس ميتة ..
جايز عشان بيودع الأشخاص ..
جايز ﻻنه بيعرف الإخلاص ..
زي إنه يسقي الورد من مطره ..
ويكون بديل لجيتار حين ينقطع وتره ..
ينزل كخير للناس لو ربهم ذكروا ,,
وعلاج زهايمر لخلق مش فاكرة ..
" كل أما يجي الشتا تلاقيهم افتكروا " ..

#ليله _وداع_الشتا
محتاج اعرف ررأيكم جداا❤

megoo mansor