الأبنودي

قصيدة الميدان للشاعر عبدالرحمن الابنودي بموسيقى عمر خيرت

قصيدة الميدان - عبدالرحمن الابنودي

السيرة الهلالية الجزء الثاني عبدالرحمن الابنودي

السيرة الهلالية الجزء الاول عبدالرحمن الابنودي

ضحكة المساجين .. عبدالرحمن الأبنودي

صلاح جاهين .. عبدالرحمن الأبنودي

جمال عبدالناصر .. عبدالرحمن الأبنودي

قصيدة الشاعر الكبير المبدع / عبد الرحمن الأبنودي .. الأحزان العادية 1981 .. والصورة للفنان اليمنى شهاب المقرمى

عبدالرحمن الأبنودي - قصيدة الأحزان العادية 1981

حبيبتى كل ما بنسى تفكرنى الحاجات بيكى

ائنك تدمعك عينى كأنى مش هغنيكى

دمايا متستهلش تكون كحلة ليله لعينيكى

و انا الدرويش ..

انا السابح بمسبحتى .. ومبخرتى .. و توب الخيش

اغنى لك .. و امول لك مواويلك .. ماتسمعنيش ولا تشوفينيش

ومش لازم مادام عايشة .. مادمت بعيش

وياما بيكى عقلى اتجن

وانتى الأنّ .. انتى الظن

و أنتى قلمى لحظة فن

يا غنيوتى .. انا احزن اغانيكى

و انت الحلم .. اااه من حلم .. لا نسينى ولا نسيكى ..

حبيبتي كل ما بنسى تفكرني الحاجات بيكي - عبدالرحمن الابنودي

عبدالرحمن الابنودي - لسه النظام ما سقطش

 وجّي يا بلد الحرايق و اصرخى بجنون
و احرقيها مدن و كروم و ناس و سجون
ملعون ابوها الحمامة ام غصن زتون
معمولة لاجل الضحايا يصدقوا الجلاد

يا ايد يا متكتفه
يا ظهر يا منجلد
يا طفل مين  ورثك الاحتمال و الجلد؟


ملعون ابوها الحمامة ام غصن زتون - عبدالرحمن الابنودي

  " جوابات حراجي القط العامل في السد العالي و زوجته فاطنه عبد الغفار في جبلاية الفار"
الجواب 5 
-----------------------------------------------------------------------------------

الجوهرة المصونة
والدرة المكنونة
زوجتنا فاطنة احمد عبدالغفار
يوصل ويسلم ليها
في منزلنا الكاين في جبلاية الفار
مشتاق ليكي شوق الارض لبل الريق ..
شوق الزعلان .. للنسمة ... لما الصدر يضيق
مشتاق .. وامبارح..
قاعد .. قدامي عرق حديد .. وف بدي الفحار..
غابت عن عيني الحتة اللي انا فيها ..
وغابوا الانفار
تحت النفق
الضلمة يافاطنة
بتساعد علي سحب الفكر
تلاقيكي ولا عارفة الانفاق
ولقيت نفسي يافاطنة طيرة مهاجرة
والطيرة جناحها محتار
ولقيت نفسي علي بوابة جبلاية الفار..
باخد الاحباب بالحضن
كانس كل دروب الجبلاية بديل توبي
طاوي كفوفي وباخبط بيهم علي صدر الدار
قلتلي لي مين ؟
مسيت الدمعة ف حزنك بايدي ..
مسيت الدمعة اللي ف حزنك..
ماعرف خدتك في حضاني ولا انتي خدتني ف حضنك
وعزيزة وعيد حواليا بيشدوا الجلابية
ويشموا ف غيبتي وفي ايديا..
وقعدت بيناتكم .. وبكيت .. وضحكت
لما لمحت عصايتي وتوبي .. وفاسي .. ومداسي
يمكن ساعة .. وقف المهندس علي راسي ..
ولمس كتفاتي بصابعة .. قمت لفوق ..
طبطب علي كتفي ..
وخدني من يدي برة النفقات في النور ..
ضيعنا نص نهار
وسالني .. قولت الشوق
قاللي اسمع ياحراجي اقولك ..
ويافاطنة قعد يحكي ويتكلم ..
القط كلمة ومية تروح ..
وكلام .. م اللي يرد الروح ..
وحكي لي عن اسوان والسد..
وحكي لي عن اللفرنج وعن حرب المينا
في الجوابات الجاية يافاطنة عاقولك واحكي لك ..


جوابات الأسطي حراجي وزوجته فاطنه : الجواب الخامس

  " جوابات حراجي القط العامل في السد العالي و زوجته فاطنه عبد الغفار في جبلاية الفار"
الجواب 4
-------------------------------------------------------------------------------------

الجواب الرابع
اسوان
جوزي الغالي
لاوسطي حراجي القط
العامل في السد العالي
جبلاية الفار
وصلنا الطرد وجانا المبلغ ياحراجي ..
احياك الرب وابقاك الفين عام ..
ولا عاد يقطعلك عادة ولا حس
ولا يقفل لك كف ..
ولا يطوي من قدامك سجادة الخير والسعادة..
اما بعد..
فاحنا وزعنا المبلغ زي ما قلت ..
ولعلك ما تشغلشي بالك فينا وتبقي في راحة بال
احنا ياحراجي - بعيد الشر - ان ضاقت بينا الحال يكفينا ريال
كفاية علينا البسطاوي الظهر يخطي عتبة ا لدار
عمبارح .. جانا (( الشيخ قرشي )) .. وخبط علي الباب..
جة ساعة المغرب
قاللي لا بدن ما نبص لعيد ..
قاللي : يابت المرحوم الواد لازمة
الكتاب ..
يوم السوق..
اتدلي هاتي لة قلمين يوص .. ودواية .. ولوح
وضحك .. بعدين قاللي : لاحسن يطلع لوح
وانا بيني وبينك ياحراجي عاوزاة يكبر
ويعوضنا علي الاهل ويعمل لنا قيمة
عاوزاة قيمتة في جبلاية الفار قيمة القيمة ..
اللي بتقولة علي اسوان يابوعيد..
حكاية ولا حكايات ابوزيد..
هيا يعني .. مش زي بلدنا.. ؟
امال ناسها بيسووا اية .. ؟
ما بيشتغلوش لية ؟
وانت .. طول عمرك راجل صاحب فاس
فهمهاني دي
لاحسن عاملة في راسي زي الخبطة..
كيف صاحب الفاس يصبح اسطي .. ؟
صاحبك (( تكروني )) لما اتي بالطرد
شيعنا معاة الوجود..
في الليل ياحراجي تقف عليا ما عرف كيف
هففان القهوة .. علي صاحب الكيف ..
وبامد ايديا في الظلمة القاك جنبي ..
طب والنبي صح ومش بكدب ياحراجي
وباحس معاك ان الدنيا لذيذه
كيف حال (( عبدالعال التابة )) و (( علي اب عباس ))
وقوللي ياحراجي ..
بتاكل كيف ؟ وبتلبس اية ؟ وبتقلع اية ؟
بتنام فين ؟
قاعد في المطرح مع مين ؟
مين اللي بيغسلك توبك
وبتتسبح فين
وفي نهاية القول ..
انا رح اشبع عيد ع الكتاب ..
فا ابعت لة ووصية علي
شد الحيل ..
وجميع الناس في الجبلاية
عايزين لك كل سعادة وخير ..
وبيتمنولك تاني ترجع في السلامة..
تعمر مصطبتك ..
وتقيد اللنضة في الدار..

زوجتك
فاطنة احمد عبدالغفار
جبلاية الفار


جوابات الأسطي حراجي وزوجته فاطنه : الجواب الرابع

" جوابات حراجي القط العامل في السد العالي و زوجته فاطنه عبد الغفار في جبلاية الفار"
الجواب 3 
---------------------------------------------------------------------------------

الجوهره المصونه
والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلاية الفار

أما بعد ..

فهذا تاني خطاب ..
باعتين طيه ما قدرنا المولى عليه ..
وعنبعتلك في ظرف الجمعه .. طرد
الطرحه والجزمه بتوعك ..
وكساوي عزيزه وعيد .
دورت الحسبه ف راسي وقلت يا واد يا حراجي ..
هو يعني قانون العيل ما يدوقشي الكسوه ..
غير في العيد ؟
أمال كيف العيل حيحس أبوه جنبه
إذا كان الأب .. بعيد .. ؟
بقى أول ما دلقنا يا فاطنه بابور السد على محطة إسوان
أنا والجدعان
حسيت بالدوخه
مش أول مره باسيب جبلاية الفار .. ؟
رحنا المكتب
طبعنا البطاقات ..
ومضينا على الورقات
أه يا (( فطاني )) لو شوفتي الرجاله هْنِهْ
قولي .. ميات .. أولوفات ..
بحر من ولاد الناس ..
إللي من (( درجا )) واللي م (( البتانون ))
واللي من (( أصفون)) و (( التل))
جدعان .. زي عيدان الزان .. سايبن الأهل .
وتطلي في عين الواحد يا ولداه ع الغربه ..
عارفه يا مرتي الراجل في الغربه يشبه إيه .. ؟
عود دره وحداني .. في غيط كمون ..
حسيت بالخوف ناشع في عروقي زي البرد .
قضينا الليله الأولانيه في أي مكان .
العين مشقوقه..
والبال ..
زي الغله اللي بتسرسب من يد الكيال
وندهت عليكي قلت : انا بنده
امعاني ؟
سامعيني يا عيال ؟
النبي لولا الخوف واللومه من الرجاله ..
لاركبت القطر وعدت
قبل ما أروح لموظف
قبل ما أرد سؤال.
وقعدت أعقل نفسي وأقول : يا حراجي يا بوي
أمال جيت ليه ؟
الخايف من الغربهة ما يجيش
اتحمل علشان كسوة عيد .. ورغيف العيش
لكإنك ياخي رحت (( الديش ))
من خوفي يا مرتي
قعدت أهدي الرجاله .
فاطنه ..
أول ما تفكي الخمسه جنيه
اطلعي ع الفور ..
وإدي حساب (( عمران )) وجنيه (( بمبة الصباغ ))
والباقي زيحوا بيه القارب
لما يعدلها الرحمن
سلمى ع الوِلد .. وع (( الحاج التايب ))
بلا كتر كلام ..
سلمي على كل اللي لينا فيهم نايب ..
وإوعي يا فطنه لما ارجع وأبص ف وش اللولاد ..
أعرف إن أبوهم كان غايب .
وإحنا هنا بنستنى الجوابات بفروغ صبر
طول ما الجوابات رايحه وجايه .
اعتبري كإني باجي أشوفك..
واجى .

زوجك الاوسطى حراجي
 

جوابات الأسطي حراجي وزوجته فاطنه : الجواب الثالث

" جوابات حراجي القط العامل في السد العالي و زوجته فاطنه عبد الغفار في جبلاية الفار"
الجواب 2
--------------------------------------------------------------------------------
    أسوان
    زوجي الغالي
    لاوسطى حراجي القط
    العامل في السد العالي

    جبلاية الفار

    زوجي حراجي ..
    فوصلنا خطابك ..
    شمينا فيه ريحة الأحباب .. ربنا ما يوري حد غياب ..
    مش أول مره البسطاوي يخطي عتبة الدار ؟؟
    عمرنا يا حراجي .. ما جلنا جواب .
    النبي ساعة مرزوق البسطاوي .. ما نده ..
    كده زي ما كون .. دقت في حشايا النار .
    وكإن العمر بيصدق .. بعد ما كان كداب ..
    اتأخرت مسافه كبيرة كبيرة علي
    عارف فاطنه يا حراجي لاليها عايل .. ولا خي .
    ليه تتأخر كده يا حراجي .. ؟
    طب والنبي كأن ورقتك دي
    أول قنديل بتهز ف جوف الدار .
    أول ندعة ضو.
    الدار من غيرك يا أيو عزيزه .. هو .
    وعزيزه وعيد ..
    من غيرك يا حراجي زي اليُتما في العيد .
    الواد على صغره حاسس بالغربه والبعد .
    ولا عاد حتى بيطلع يلعب في القمَارى مع الولِد .
    اطلع وأخش .. أطلع وأخش القاه .. غيمان
    وكأنه محروق له دكان .
    ويقوللي : (( فين يامه أسوان .. ؟
    وأبا سابنا ليه يا مه ؟ ما يمكن زعلان .. ؟ ))
    شهرين يا بخيل ؟
    ستين شمس وستين ليل ؟
    النبي يا حراجيما أطول قلبك
    لاقطع بسناني الحته القاسيه فيه
    ..........................
    كل الجبلايه تسلم فرداً فرد ..
    م الحاج ((( طِلب حامد )) لعيلة بيت (( علي سعيد ))
    وانشالله يا حراجي ما يوريني فيك يوم
    وانشالله تكون تعلمت ترد قوام .
    ومادام احنا راسيين ع العنوان
    والله ما حنبطل بعتان..
    مفهوم..أسوان
    زوجي الغالي
    لاوسطى حراجي القط ..
    العامل في السد العالي

    زوجتك
    فاطنه أحمد عبد الغقار
    جبلايه الفار


جوابات الأسطي حراجي وزوجته فاطنه : الجواب الثاني

" جوابات حراجي القط العامل في السد العالي و زوجته فاطنه عبد الغفار في جبلاية الفار"

    الرساله الاولى

    الجوهرة المصونه
    والدره المكنونه
    زوجتنا فاطنه أحمد عبد الغفار
    يوصل ويسلم ليها
    في منزلنا الكاين في جبلايه الفار

    أما بعد ..
 لذا كنت هاودت كسوفي ع التأخير
    سامحيني يا فطنه في طول الغيبه عليكم
    وأنا خجلان .. خجلان .. وأقولك يا زوجتنا أنا خجلان منكم ..
    من هنا للصبح ..
    شهرين دلوقت ..
    من يوم ما عنيكي يا فاطنه .. بلت شباك القطر ..
    لسوعتي بدمعك ضهر يديَ
    لحضتها قلت لك :
    (( قبل ما عوصل عتلاقي جوابي جي ... ))
    نهنهتي .. وقلتي لي بعتاب:
    (( النبي عارفاك كداب .. نساي
    وعتنسى أول ما عتنزل في أسوان .. ))
    حسيت واليد بتخطفها يد الجدعان
    بالقلب ف جوفي ما عارف ان كان بردان .. دفيان
    والبت عزيزه والواد عيد
    قناديل في الجوف .. زي ما بتضوي .. بيقيد ..
    .......... والقطر إتحرك ..
    وقليبي بينتقل من يد لإيد .
    والقطر بيصرخ ويدَودِو
    اتدلدلت بوسطي من الشباك ..
    ( خذي بالك م الولد .. راعي عزيزه وعيد )
    والقطر صرخ ورمح لكإنه داس على بصة نار ..
    ولقطت الحس قريب .. قد ما كنتي بعيد :
    (قلبي معاك يا حراجي هناك في أسوان ..)
    ...........................
    ورميت نفسي وسط الجدعان .. وبكيت ..
    وبلدنا اللي كنا بنمشيها ف نص نهار
    كان القطر في لحضه .. فاتها بمشوار .
    سامحيني يا فطنه على التأخير ..
    ولو الورقه يا بت الخال تكفي
    لأعبي لك بحر النيل والله بكفيِ
    وختاماً ليس ختام ..
    بابعت لك ِ
    ليكي ولناس الجبلايه ولبتي عزيزه والواد عيد

    ألف سلام
    زوجك ... الأوسطى حراجي

جوابات الأسطي حراجي وزوجته فاطنه : الجواب الأول

عبدالرحمن الابنودى رساله الى الأخوان المسلمين

عبدالرحمن الأبنودي-إكتم أنينك

قصيدة يامنه للخال عبدالرحمن الأبنودي

عبدالرحمن الأبنودي والأغلبية الصامتة

عبدالرحمن الأبنودي.. -أذكروني لما تصطادني الأيادي

الأبنودي

Mõnã Mõhãmmed