" مِحتاجين حَد!!"

مفيش اجمل من ان يبقي فيه حد في حياتنا !! لكن حد يفهمنا من غير ما نتكلم .. حد يفهم اللي جوانا حد يفهمنا من عنينا .. حد يفهمنا نفسنا اللي مش فاهمينها
حد يحسسنا بالامان ويحس بينا ويطمنا .. حد يحسسنا ان لِسَّه جوانا حاجات حلوه .. ميحسسناش اننا عبء عليه ولا انه بيضحي بوجوده معانا

يسمعنا وياخدنا في حضنه وقت ما نزعل من غير مايقول مالك .. يسمع اللي جوانا وهو ساكت من غير ما نحتاج نشرحله .. حد يسمع ميقاطعش!!
مفيش اجمل من حد يبقي سند لينا ويقوينا وقت الضعف لو حتي بكلمتين وطبطبه .. حد يبقي عكاز لينا وياخد بايدينا ويبقي ضهر .. حد يبقي الحاجه المريحه اللي في حياتنا .. يبقي اخ وصاحب وحبيب وتوأم روح شخص يستاهل اننا نقولة فعلا "وجودك شئ مكملنا"

مفيش اجمل من حد يشاركنا افكارنا المجنونه .. او حتي يدينا مساحة حرية عشان نعملها لوحدنا .. يدينا من وقته وتفكيره واهتمامه .. يدينا ثقه في اختياراتنا وفي احلامنا .. يدينا طاقة ومتخلصش .. حد قريب عننا ميبعدش .. ولو قريب مننا ميزهقش .. ولو زهق ميتغيرش .. حد يطبطب وميتعبش .. يقوي وميضعفش

حد يقبلنا ساعة الغلط من غير عتاب .. حد يقبلنا زي ماحنا كده بخوفنا وكلاكيعنا وعصبيتنا ولماضتنا .. حد يقبل بحزننا وبكل اللي احنا عليه ويحتوينا حتي لو كان الاحتواء ده بالكلام .. حد يقبل الوحش قبل الحلو عشان احنا مش طول الوقت حلوين

مفيش اجمل من ان يبقي عندنا حد مختلف عننا تماما .. اهتماماته مختلفه .. بيبص الحاجه من زاوية مختلفه .. حتي لما بيغلط بيغلط بطريقة مختلفه

احنا محتاجين حد يقتحم حياتنا ويهتم بكل تفاصيلها .. حد دائماً يسال عننا ويطمن علينا ونحكيلو تفاصيل أيامنا .. يلهينا عن نفسنا وعن دماغنا شويه .. ينسينا وننسي بيه ومعاه الهم وميشلناش فوق طاقتنا .. حد يقدر مشاعرنا و يستحملنا بكل مشاكلنا وعيوبنا بعصبيتنا وبقرفنا .. حد ياخدنا للصح ويلحقنا قبل ما نقع في الغلط ويوقفنا من تاني .. حد يمشي معانا الطريق لآخره ميزهقش في النص

مفيش اجمل من ان يبقي عندك حد ياخدك في حضنه ويطبطب عليك .. وتعيط وميشوفكش ضعيف .. حد يجبر بخاطرنا شويه

حد عمره ما يمل منا .. يكون يحتاجنا في عز انشغاله ويقسم معانا كل حاجه بنعملها .. يهتم بينا ويفرحنا ويكون هو فرحنا وقت حزننا
ولما يشوفنا يطير من الفرحة .. حد اول ما يلاقينا اتخنقنا يعمل اي حاجه عشان نرجع تفرح تاني .. ويكون الحاجه الحلوه اللي في حياتنا

حد يحبنا ويهتم بتفاصيلنا .. حد يحبنا من غير شروط .. بدون أسباب واضحه .. و يحببنا في نفسنا .. حد نحبه من غير ما نخاف انه يسيبنا

الحياه صعبه أوي يا جماعه ومحتاجين حد يسعدنا فيها .. مهما كنت قوي ومتماسك بيكون عندك جانب ضعيف لازم يظهر مع ناس معينه ..الناس دي أغلي ما في الوجود وبيظهر الجانب الخفي ده معاهم هما وبس

ولاننا محتاجين دائماً ناس تقوي نقط ضعفنا وتسندنا !! لازم نكون احنا كمان مصدر قوه للناس اللي معانا بلاش العكس بس 
مع صعوبة الحياه دي والله الكلمة الحلوه بتفرق .. فرحوهم قد ما تقدروا حسسوهم بأهميتهم عندكم .. مش لازم تستنوا مناسبات للفرحه خليكم إنتوا الفرحه 
احنا محتاجين كلمه حلوه ضحكه حلوه كلام يريح حد يطمن قلوبنا محتاجين اهتمام وامان وهزار وضحك محتاجين ناس تقدر وجودنا في حياتهم 
عارفين الناس اللي عاملين نفسهم مش محتاجين حاجه من حد !؟
دي اكتر ناس مليانين احتياج .. حتي بصوا في عيونهم كده ...
هتفهموا.

لو عندكم حد وجوده مهم في حياتكم اعملوله #منشن وعرفوه ان وجوده شئ مكملكم :)

#محتاجين_حد نقوله
#وجودك_شئ_مكملنا
#خليكم_انتوا_الفرحه

Mena Medhat Zarief

Popular tracks