كنت مرعوب من طريقي
والدروب متلخبطة
بين زفيري وبين شهيقي
بانزف الاحلام خُطى

وابتسمتي
ف ابتسامتِك كنت باهرب فيكي مني
واترسمتي
شباكين على كل حيطة بتقابلني

جرحي قالك اني خايف
صمتي قالك مش هاعارضِك
كفك اتحوّل شفايف
كفي حس بطعم نبضِك

وابتسمتي
ف ابتسامتِك كنت باهرب فيكي مني
واترسمتي
شباكين على كل حيطة بتقابلني

فجأة أول ما اتلامسنا
كل شئ جوايا طاوعِك
والحروف غايبة ف حديثنا
رعشتي اتهجّت صوابعِك

وابتسمتي
ف ابتسامتِك كنت باهرب فيكي مني
واترسمتي
شباكين على كل حيطة بتقابلني


Johnny George-‎‏-وابتسمتى

تأليف : محمود طه 
https://www.facebook.com/mahmoudtaha128

القاء : منة كُردى
https://www.facebook.com/Kawkabmashy?ref=tn_tnmn
 
ميوزك : Douja-- le trio joubran
https://soundcloud.com/memo_actor86/douja-le-trio-joubran


هـــــو:عارف امتى بحس ان انا مكسور..وان أنا مهما مشيت فى طريقى ..دايما الاقى أخْرُه فى سور؟
أنــــا:ساعة لمّا بنحلم حلم..ومش بنلاقى فى يوم تفسير..ساعة لمّا اتقلب الضحك..فى يوم والتانى بقى تكشير
هـــــــو:عارف امتى بحس بغربة ..ومهما أقرب ببقى بعيد؟
أنــــا:لمّا بكون عايش وسطيهم..وسط صحابى وبردو وحيد!
هــــو:عارف امتى بحس بخوف؟
أنــــا:لمّا فى وقت الحُزن بشوف..دمعتى تنزل كدا ع الخد..وزى العادة محدش شافها ..زى العادة محسش حد
هــــــو:عارف لمّا بخاف وبكشْ؟
أنـــــا:بستر نفسى بمليون وش ..واحد يضحك ..واحد يزعل..واحد تانى يقول معلش
هــــو:عارف امتى بحس براحة؟
أنــــا:لما بفضض..لما أتكلم..لما بقولها بكل صراحة
هـــــــو:عارف امتى ببقى أنا راضى..وان كلامى دا مش ع الفاضى؟
أنــــا:لمّا بحس بأنى ارتحت..وان مشاعرى لفوق مش تحت
أنـــا وهـــو:صمــــت !

عارف ؟ _ منّة كُردى

كلمات : إيمان الميهي 
https://www.facebook.com/eman.abdoullah?directed_target_id=0

أداء : منّة كُردى 
https://www.facebook.com/Kawkabmashy?ref=tn_tnmn

إيجار مؤقت _ إيمان الميهى  / أداء : منة كردى

كلمات : Abdelrahman Mohamed‎‏‏
www.facebook.com/abdelrahman.mohamed86

أداء : منّة كُردى
www.facebook.com/Kawkabmashy?ref=tn_tnmn

امي
بلاش تبصيلي البصة اياها
و متحضنينيش
حضتنك بقى كما دش ساقع
في عز البرد
وانا مبقتش حمل البرد
امي انا اصبحت زي التراب ع الارض
بتبعتره الاقدام
ومن حبة هوا بيطير
لكنه باقي كما الايام .. كما المشاوير
امي انا كاسرني السؤال
وكاسرني زيف المعاني
امي .. متغنليش
مبقتش حمل الاغاني
صوتك الدافي معادش بيلصم
امي متتضخضيش
من من صفار وشي
وشيب شعري
امي انا مكسور
كما وزن القصيدة في شعري
امي انا تعبان من الوحدة ..
من الزحمة وكتر الناس
و انا قلبي ياما انداس
وياما لم .. من صحبة و اغراب
امي .. انا بس نفسي تفهمي
فرط الحنان بيعلم القسوة
فرط الحنين بيجلب الغربة
بيخلي قلب الواحد كما التربة
بتلم ناس ياما .. وتضم ناس ياما
في حضنها .. لكن رفاة
وااااه يامي ع الوجع
لو تحضني الاموات
اموات يا امي .. يشبهوني تمام
امي .. سبيني انا عايز انام
و بلاش تبصيلي البصة اياها

البصّة إياها _عبد الرحمن محمد _ منّة كُردى

تتجوزيني؟ 
من ديوان ضحكة طالبة التأشيرة 
كلمات : Mostafa Eltelwany
https://www.facebook.com/mostafa.eltelwany.5?hc_location=timeline

https://www.facebook.com/pages/%D9%85%D8%B5%D8%B7%D9%81%D9%89-%D8%A7%D9%84%D8%AA%D9%84%D9%88%D8%A7%D9%86%D9%8A/309842119043025

أداء : منّة كُردى
https://www.facebook.com/Kawkabmashy?ref=tn_tnmn

_ تتجوزيني ؟
 _خايفة تفارق زيهم 
 _طب توعديني ؟
_ الوعد للأحرار وبس
وانا قلبي مربوط بالوجع
يمكن يكون قُربَك ونَس
لكن أكيد بُعدك شقا
خايفة العشم يقلب مقَص
لأي فرصة ف اللُقا
_ لو تحضنيني!
_ مش عايزة آخد ع الدفا
مش عايزة أشرب ضحكتَك
تفضى كاساتي ف غُربتَك
أعطش وملقاش ضمِتَك.
_ لو تسأليني ..! , أصلي بحب الفضفضة, يمكن أغيَر نظرتِك, يلا أنكُشي فيا بضمير, يجوز نغيَر ما مَضى.
_ ازاي تنول ضحكة قبول من بنت خايفة من الوجع, قول لو جدع!
 ............_

تتجوزينى _ مُصطفى التلوانى _ منّة كُردى

كلمات : حسن سرور 
https://www.facebook.com/Hasan.suror

أداء : منّة كُردى
https://www.facebook.com/Kawkabmashy?ref=tn_tnmn

موسيقى : مسلسل خاتم سيليمان

شُكر خاص لـ : أحمد فرحات _ ميرنا محمد

 
رسم الصورة بدون الوان,
 أبيض وأسود بِلا عنوان
 رتب كل مشاكل نفسه 
كتب المشهد بالتفصيل..
 الأوجاع هنا جنب الحيط, وانكساراته على البراويز , دقة قلبه نبرة غِيظ
 سّكن كُل مشاكل حلمه ;
 الأوهام ملهاش عناوين,
 والأحلام دي لناس تانيين.. 
حط حقايق مش موجودة.. 
قرر يبقى الحر العاتي ف أول طوبا 
وفكر مرة بعقل - آخر مرة -
 إيه راح يحصل لو هيموت وف شهر اتنين
 لو هيعاقب هذا العالم بجملة
 " آسف انا في التليين " 
لما كتير مثلا هـيقولوا ; 
الحُر العاقل بقى 100 مجنون 
مين راح يزعل لما هيسأل عنه فـ يوم 
ويرد سكوت مبقاش موجود

 علق صُوره وبتفاصيلها قرر يحكي..
 مرة البنت الحُب الطاهر 
أبدت ظاهر إن كلامها بيعشق صوته
 وان الخنقة في لحظة موتة تساوي دهور
 وان البسمة وشكل الدمعة فوق الوش وحلمه الواقع
, هما حياتها
 بس حقيقي الحلم فايتها  

أبدت مره إن كتير بيحاولوا يكونوا 
وان الصعب فـ يوم هتكونوا
 وان حاولوها غصبا عنها
حد يقول ازاي هتخونوا 
اصله عبيط قرر يعشقها 
وابتسامتها كتير صدقها 
وف احتضاراته, صدق موتة لجل حياتها
كل القصة والحدوتة 
إن البنت كتير موجودة 
بتعشق واحد مش موجود
 وبترسم من غير الوان 
نفس الرسمه والبرواز 
نفس الحلم الضايع أبدًا 
تفضل ترسم / ترسم / ترسم 
لحد أدان الفجر ما يدن 
لما الرسمة بتقدم جدا..
 لما المشهد راح يتلون
لما الصورة يا دوب تتكون 
الأوجاع هنا جنب الحيط
وانكساراته على البراويز 
دقة قلب ونبرة غِيظ
 سكن كل مشاكل حلمه 
بحيث تكون 
الأوهام ملهاش عناوين 
والأحلام دي لناس تانيين.





صورة بدون ألوان _ حسن سرور _ منة كردى

5/3/2014

عيد ميلاد أسامة عادل :))

https://www.facebook.com/justavio

حاجة بسيطة بقى :))
كُل سنة وانت طيب يا أسامة ♥


عيد ميلاد الليلة مين :))

كلمات : محمد السيد عزيز
https://www.facebook.com/Mohamed.Azizz 

أداء : منّة كُردى
https://www.facebook.com/Kawkabmashy?ref=tn_tnmn 

شُكر خاص لـ أحمد رامى 
اللى طلع عينه عشان يرجعلى برنامج الـ Mix :D

الهندسة الصوتية : للأسف أنا -_-

موسيقى مسلسل حكاية حياة لـ عادل حقى 


الكلمات : 


بنشد أزر ولادنا بالبسمة 
ونشد ازر اخواتنا بالاحضان
من فينا لسه ما حسش الازمة
من فينا حر ومين ورا القضبان

السجن اوسع من خيالاتك 
الدنيا اضيق مما تتصور
صوّر قلوب المسجونين صوّر 
تلقاها اكبر 
واحنا بس اصغر 

عشرين سنه 
ما يقدروش ع الهم 
والموت 
والجلد
شوف البنيه الشابكه ايدها مع الولد
شايله دموعه ف شنطة ايدها ف المناديل 
شوف الجموع 
تلقي بشر شايله بشر
بتوصل المأذون لهم بالرحيل 
...
احنا كلنا هنعيط 
بس حاسبو من وشاية الاندال لأمهاتنا 
الام مش مستحملة 
تشوف تحت عينا اسود 
ولا جفن عينا احمر وفاير 
ولا فوق شفايفنا الصدي 
من حرق السجاير
ولا مستحملين 
نقضي بقية العمر ف الصمت 
وانتظار البشاير 
نكتب كلام فوق الورق
ما يبل ريق 
ولا يطلق الحر من جوا القفص 
الأم منذ الام الطلق وهي حالمانه بولد 
بيشق كل المستحيل 
ويحوله لحلم , وفُرص
بكفاية حسرة قلبها علي اللي سافر
واللي مات 
واللي اتحبس 
واللي اتشنق 
يا جمعنا المبلول بدمع من الوجع 
حيّو الجدع 
بكره هيخرج م القفص 
اشجع كتير
اجدع كتير
واكبر كتير مما سبق 
...

احنا هنكتب
وانتو تفضلو مساجين 
احنا هنكدب
وانتو تفضلو الصادقين 
احنا هنبكي 
وانتو توزعو البسمات علينا
وتقولولنا الضحك زينه 
فـ "خذو زينتكم عند كل مسجد"
وابقو علي الموعِد 
ما تفترقوش .. 
واضحكو اكتر 
برغم برك الدم
ع الرصفان
وع الاسفلت
وتحت الكراسي 
وفوق الوشوش ..
اضحكو وما تقلقوش ..
..
بنشد أزر ولادنا بالبسمة 
ونشد ازر اخواتنا بالمغشوش 
من فينا لسه ما حسش الأزمة 
من فينا لسه اليأس ما قتلهوش

حيّوا الجدع _ منة كُردى _ محمد السيد عزيز

تأليف : مصطفى سعيد
https://www.facebook.com/Never.Try.Never.Fail

أداء : منّة كُردى
https://www.facebook.com/Kawkabmashy?fref=photo&ref=tn_tnmn

موسيقى : فيلم الحفيد 

هابتدي الحكاية زي ما ابتديت وابتدينا كلنا حياتنا واعلننا عن وجودنا بـــ وااااااااااااااء كبيره .. 
ولحد النهارده مش مقتنعه بالتفسير الرومانسي
بتاع اننا
 بنبكي عشان خرجنا من بطون امهاتنا المريحه لعذاب الدنيا والكلام اللي بيثبتونا بيه.
وبرغم ان كلامنا عن الحب الا ان اول شعور حسيت بيه لما جيت الدنيا كان كره .. كرهت الراجل اللي مخبي
 نص وشه وضربني على خوانه 
ماهو لو كان مش خايف مني مكنش خبى وشه واتحجج انه تعقيم 
.. رحمته مني الكمامه
 وكونه دكتور ومتعلم ومعاه شهادات ده مايديهوش الحق انه يضرب بنات الناس .. يلا المسامح كريم.
وعشان انا مش زي اي حد
 انا واحده من القليلين اللي ماكملوش الـ 9 شهور حمل 
مش من العصبيين بتوع الـ 7 شهور 
انا قعدت 8 شهور بس ..
 وطبعا لزم يدخلوني حضانه 
وهناك
 كانت اول قصة حب .
لما دخلت الحضانه ابتديت احاول اعرف انا فين ومين بيسيطر على المكان ..
 لحد ماوصلت حضانتي وعملوا معايا الواجب 
وفتحولي قزازة لبن مشبره 
وكانوا ناس زوق زوق بصراحه ... 
ريحت اتعودت ع المكان وابتدينا نتعرف .
الجميل اني كنت نازله عارفه اسمي 
لانهم اختاروا لي اسم منة من وانا لسه مشروع بني أدمه 
وعرفت بعد كده من جوابات
 ماما وبابا وهما مخطوبين انهم كانوا بينادوا بعض بأبو منة وأم منة ...
وحمدت ربنا لما لقيت اطفال كتير معايا مش عارفين
 هما مين ..
وشفت اتنين تؤم ماسكين في خناق بعض 
ده يقوله انت كنت بترفص 
وده يقوله وانت كنت بتشفط الاكل كله لوحدك 
ودوشه 
وزيطه
وفجأه سمعت احلى واااااااااء في حياتي 
وااااء كلها حنيه ورجولة في نفس الوقت.
وشدني ليه اكتر اني لقيته عمال يضرب الممرضه ويرفص 
عشان بتغيرله الكافوله قدامنا 
حسيت ناحيته باعجاب من الكافوله 
الاولى 
وأول ما الممرضه خلعت ابتديت اتعرف عليه ..
 كان لسه معرفش اسمه برضه 
بس قلت مش مهم الأسم 
المهم الحشو 
اللي هو الجوهر يعني 
وعرفت انه مش من هنا 
وانه جي من مستشفى تانية عشان معندهمش حضانات كفايه وقاللي ده من حسن حظي 
وابتدى يريل عشان يلفت انتباهي 
لحد ماحصل وريلت انا كمان 
وفهمت انه معجب بيا زي ما انا معجبه بيهه 
وقررت اني اعترف له واصارحه
 بأني حبيته وأنه 
الأنسان - بأعتبار ماسيكون - اللي هابقى سعيده انه يشاركني رضعتي وغياراتي 
ولسه بقول واااااااااااا...
 جت ماما عشان تشوفني هي وصاحباتها.
ودي كانت اول فصله في حياتي 
وقتها جاتلي فكره اعمل نفسي نايمه 
كان نفسي اصحي وبالمره فرصه اعرف ماما عليه بس 
قلت بلاش تسرع 
وبالمره لما انام هارحم نفسي من التفعيص ومن اني اشوف التعبيرات الغريبه اللي بيعملها الكبار 
كفاية 
الشويه اللي شفتهم قبل ما انام ...
ونمت وروحت في النوم لانى كنت واصله الفجر حوالي الساعه اربعه ده اللي عرفته
 لما كبرت 
واكتشفت كمان ان دي المره الوحيده اللي بابا ما زعقليش فيها عشان هتأخر.
صحيت متأخر ولقيته اختفى واخدت اول صدمه في حياتي ...
بس ما طولتش فيها لان وقتها قابلت رجل احلامي ... 
بابا ♥

الحضّانة _ منّة كُردى _ مُصطفى سعيد

كلمات : عمرو أبو زيد 
https://www.facebook.com/amr.a.zeed

من ديوان : نوفمبر شهر ملائم للموت

أداء : منّة كُردى
https://www.facebook.com/Kawkabmashy?ref=tn_tnmn

موسيقى : أنين الناى جلال الدين رومى 

الكلمات : 
يقول واحد من المرضى
لا مش هرضى
ومش ميت
سيبوني لبعد رمضان
أقلّه أموت وأنا مِعيَد
و يخبَط دمعه في الشمبر
مسبب دوشة في العنبر
فيصرخ فيه مريض تاني
بصوت ناصح لكن مكتوم
مافيش ملجأ من المحتوم
صراخك ده مالوش داعي
مادام كشف السفر مختوم
واسمك وقته متقيد
فموت راجل
ده أكرملك
عشان حتى التاريخ يكتب
ده عاش مذلول
ومات سيد
وبعدين هي دي عيشة؟
بذمة أهلك الموتى..
هتخسر ايه؟
هتخسرنا؟
ياعم بلاش تحسرنا
وحق سريرك الدايب
ماهتشوف دنيا غير بالموت
لولاش بس النظام خايب
وأجِل دوري للأخر
ماكنت فضلت فيها حي
ياريت كان دوري هو الجيّ
عشان ياكل شقايا الدود
ياريت الكشف يلمحني
فيمنحني أمل منشود
قوم افرد ضهرك المحني
عشان ماتمُتش غير مشدود
ولو خايف جحيم مثلا
ماهيش فارقة
دي نار ودي نار
وفجأة النُصح صوته يضيع
في صوت عاصف لدق الزار
وييجي اتنين تمارجية
ينادوا الميت المُختار
يجروه لعزرائيل بره
وقبل ما يخرجوا يشاوروا
بإيدتينهم على الناصح
يقولوا تعالى بالمرة
زحامكم أصله مش جيد
فيصرخ لأ ده مش دوري
ومش ميت
طب ألحق حتى رمضان
أقلّه أموت وأنا مِعيّد



أكذوبة الموت والراحة_ منة كُردى_عمرو أبو زيد

كلمات : أحمد الراوى 
https://www.facebook.com/ahmed.elrawii 

https://www.facebook.com/AhmedElRawiii?ref=br_rs

إلقاء : منّة كُردى
https://www.facebook.com/Kawkabmashy?ref=tn_tnmn

موسيقى Background : أندرو عاطف 
https://www.facebook.com/androw.mories

ودى الموسيقى لـ وحدها ..
https://soundcloud.com/andrew-atef-mories/andrew-atef-rahal

الكلمات : 
الجريمة الشبه كاملة
.
" الأداة "
كل شئ موجود في أوضتك
ليه أكيد دلوقتي قيمة
ذكرى من آخر ديسمبر
فازة مـ الشقة القديمة
كدر ثابت في المرايا
جوز تذاكر فيلم سيما
كل ركن كئيب في أوضتك
و الخطوط المستقيمة
حتى تكشيرتك و طيبتك
و النوايا المش سليمة
كل دي أدوات مناسبة
وقت تنفيذ الجريمة
.
" الضحية "
كل حاجة في مرة فقدت روحها أو ما بقيتش هيَّ
كل مشهد كان بيخرج عن سياق النص قاصد
أو بيهرب مـ الدراما المنطقية
كل واحدة في مرة ماتت جوا منى
أو سابتني باموت وراها بحسن نية
مش ضروري يكون أساسا فيه ضحية
كل خطوة في الجريمة الشبه كاملة - كات جريمة
كل شئ في الدنيا قابل للأذية
.
" تهيئة الجو العام "
دوّر على كل منبه
و اظبطه عـ الساعة اتنين
و اقفل شبابيك الأوضة
و اتصاحب عـ النيكوتين
علق برواز عـ الحيطة
و ارسم صورتك جواه
بص لضلك و اضحكله
و اتناقش حبة معاه
و كلام هيجر كلام
هيئت الجو العام
و الساعة هتيجي اتنين
و هتتنفس معاناة
.
" مرحلة ما قبل الجريمة  "
مش هتفرق
طول ما إيدك إيد خفيفة
طول ما نظراتك بريئة و مش مخيفة
قول لنفسك
آخر النكت السخيفة
و ابتسملك
ابتسم بسمة مجاملة
و اجهز نفسياً جداً
لجريمتك شبه الكاملة
.
" وقت التنفيذ "
لو جالك قلب تنفذ
قبل التنفيذ بدقايق
دوّب في القهوة منوم
و اسمع " للصبر حدود "
سيب جزء في عقلك فايق
أو باب روحك مردود
و ادخل جواك بشويش
جرب كل الأدوات
لازم تنهي اللي بدأته
من غير ما تسيب بصمات
العبرة في أي جريمة
تركيزك في التفاصيل
فاقتل نفسك لو أمكن
لكن ما تسيبش دليل

الجريمة الشبه كاملة_ منّة كُردى _  أحمد الراوى

كلمات : سارة عاشور 
https://www.facebook.com/Sasooo

أداء : منّة كُردى 
https://www.facebook.com/Kawkabmashy?ref=tn_tnmn

موسيقى : OTTOMAN SUFI MUSIC 

الكلمات : 
يا رب نجّينا من نسيان التفاصيل
من بهتان ملامحهم في عنينا
من قلة دفا لمسهم
من حضن مايطمنش
من قرب شبه البُعد
من عمى العلامات
من استهلاك البُكا
من هلك الذكريات
ومن الحاجات الباقية
ومن فراق انكتب ومن رُحاه نِجينا

يا رب صبّرنا على انتظار الجاي
وعلى انتصار مش جاي
وعلى انكسار الحلم كإطار ملهوش ضمان

يا رب لصّمنا قصاد الصمت اللي له كام ألف معنى
وقويّنا على كلمة تطلع مننا فتوجع اللي يسمعنا
وقويّهم على بلعها فيبتسموا ولا يتفتفتوش قدامنا

يا رب سامحنا على كل مفروض مشينا فيه
وكل تحميلة حمّلناها على الغيب اللي ما نعلم بيه
وكل نرفزة حلت محل الطبطبة ف الحزن
وكل مرة قولنا أنها دي الأخيرة
وكل أخيرة اتكررت بعدها
وكل سؤال اتقابل بالجفا واللوم
وكل حنين انكتم
وكل مرة كدبنا
وكل مرة ضعفنا
وسامحنا عن كل دعا بالغلط مننا
وكل مرة كنا مضطرين نكون الشر
عشان نعيش على الهامش
مانحسبش من خسايرنا ما ينقصم معاها الضهر

يا رب كنا مضطرين نتبلى بقولنا أنك خالقنا كده سوادنا فينا متحكم ..



مُناجاة _ منّة كُردى _ سارة عاشور

كلمات : مى سلامة 
https://www.facebook.com/mai.a.salama

أداء : منّة كُردى
https://www.facebook.com/Kawkabmashy?ref=tn_tnmn

ياريت اللى عارف الموسيقى دى بتاعة ايه يقولى :D

الكلمات : 

عَزيزى القَريب جِداً البَعيد جِداً
أما بَعد
أخُطُ حرُوفاً أنهَكها طُولُ الخِصامْ وشَبحُ الفُراق وتَراتيِلُ الخَوف
حُروف أرجُو قراءَتَها بِعينِ المُحب
فأنا يا سَيدى قَبلك كُنتُ قَويةً ظَاهرياً هَشةً بِداخلىْ
كَورقةِ الشَجرِ بخريفِ نُوفَمبر
كُنت أُفكر كَثيراً واحسُبُ كَلماتى كَثيراً
لا أقتَرب .. أضَع مَسافةً بَينى وبَين الجَميع
وجِئت أنتْ
فَقلبتْ كُل المَوازين ونَسفت كُلَ شَىء
حين قُلت فَكرىْ بى .. تَنفسى بِى ..
ومِن ثَم أصبَحتُ طفلةً فَكانتْ الصَفعة
فأنا يا سَيدى أريد أن
لا تترُكنى عِند أولِ الطَريقِ مُهملةً
لا تَتذمَر مِنى ولا تُغلق أبوابَ حُبِك بِوجهى وتُلقِينى خَارجَ حِدودِ الكَوْن
أُريدكْ رَجُلاً
يَتحمل طِفُولتى المُتأخرة ..وغيِرتى وتَقلُبات مَزاجى وَثرثرتى البُكائيه
يَكُن مَعىْ بأضعَف حَالاتى
لا يَترُكنى فِى المَنتصَفِ ويَرحل

أنا يا سَيدى لا زِلت أخاف
أخافُ مِنك ومِنى ومِن تَقلُبات الزَمن
أعلمُ جِيداً أن الأمورَ لا تَسيرْ على وَتيرةٍ واحدة
لَكنى
إمرآة أنهَكها كُلُ شَىء وتَعرت مِن كُلِ شَىء
وإختَبئتُ بِك .. فَقط إختِبئت بِك
عَزيزى
كُن كَما أنت وكَما عَهِدتكْ وكَما كُنا وكَما سَنكُون

القريب جداً البعيد جداً _ منة كُردى _ مىّ سلامة

كلمات : يوسف حسن محمد 
https://www.facebook.com/Youshas.2014

أداء : منّة كُردى
https://www.facebook.com/Kawkabmashy

موسيقى : موسيقي - قهوة سادة عمار الشريعي
https://soundcloud.com/ahmed-frag-1/dmovwylc5nli
https://www.facebook.com/Kawkabmashlwa7do?ref_type=bookmark


الكلمات : 
كان قافل على نفسه الأوضه
كان خايف يظهر مـ الشباك
كان سايب بابه المتوارب
متوارب ..
ينده لو يحتاج ..
كان شاحب وشه
بلون أصفر
و ركود الدم فـ أطرافه ..
كان أكتر من أخر مره ..
و ملامح وشه تبان عاجزه
من قبل الحادثه دي كان أصغر
قبل أما يقولوا عشان يحيا
لازم هيضحي بأطرافه
أو الإ يموت بفساد فـ الدم ..
و الروح من جسمه هتتبخر
و بنرجع بالمشهد تانى
من داخل أوضته المقفوله
وشه المصفر المتغطي
باللحيه .. و زايد إصراره
ميشوفش الشمس ..
و يكمل عزله و يتأخر
و أما بيجي حد يصحيه
يصرخ و يقول دول قالوا معاق
و معاهم حق ..
لا أنا عارف أبص من الشباك
علشان ملمحش صحابى زمان
أو أشوفهم فى جيمات الكوره
و مشوفش الشمس أما بتطلع
و أفتكر المشي فـ عز الحر
نهجانى في يوم ما أطلع سلم
من تقل الشنطه على ضهري
و وصولي المدرسه متأخر ..
و الضحكه الساكنه فـ الصوره
صبحت صوره ..
و مش أكتر 

قفلت النور على نفسي
قفلت كمان بيبان قلبي
مسحت الذكري فـ خيالى
و قررت الهروب لـ سرير
بقيت قاعد بلوم نفسي
و إنى بحاجه للتخدير
الأقي من آلم رجلى ..
و وجع النظره فـ عيونهم
بإنى خلاص بقيت إسمي
و رسمي بكل تفاصيلي
صبحت - معاق -
و الأقي من وجع قلبي
و كسرة روحي من كربي
طلبت القرب من ربي
لإن أحلامى تقريباً ..
تقريباً ..
بقت موته عشان أرتاح
و مش أكتر ..
و أنا مش قادر أتعايش
ولا هقدر ..
مفيش أصحاب ولا عيله
و حالتى .. تزيدني فـ الشيله
يارب المره دى تقيله
و أنا مش حملها خالص
فى إيه فـ الدنيا يتعاشله
فى مين فـ الخلق يتعاشروا
بناقص حُبهم .. ناقص
يارب .. أنا عبد جاب أخره
معدش أنا فيا شئ حاسس
و نِفسِي أنتهي خالص
ينام من تانى كالعاده
و ضامم ركبته الباقيه
بإيده فى شكل وضع جنين
يحس فـ حضنه بالُآلفه ..
يحس فـ ضمته بحنين
مجاش من حد غير نفسه
ينام .. يقفل عينيه الإتنين
لأول مره من مده ..
بيفتح فيها ضُلف الشيش
و ميخافشي يشوف الشمس
ينام و عيونه مبتبكيش
و بسمه وشه مبتدبلش
ينام .. من تانى إنه يعيش
لكن روحه لفوق تصعد ..
و تعلن إنه راح و معاشش
و تعلن إن عاش مرتاحش
و تعلن إنه مات و إرتاح ..
لأخر مره مكتوبله ..
يشوف فيها ..
اللى كان مـ الشمس
عشان روحه دى كانت طير
و محبوسه ورا الجدران
و أول ما إتوجدله سبيل
طلعله مكان إعاقته جناح
و قرر موته .. بالطيران !


أبعاد الموت _ منّة كُردى_ يوسف حسن

كلمات : محمد دهشان
https://www.facebook.com/moh.dahshan

أداء : محمد دهشان ومنّة كُردى
https://www.facebook.com/moh.dahshan

الكلمات : 
انا يومي بيهرب مني 
عايش في بواقي الوقت .
- طب عامل ايه دلوقت .
انا حاسس ان انا تايه 
انا ناسي انا اصلا مين 
مش فاكر اي ملامح 
واسامي لبني آدمين
في جوه دماغي هلاوس 
مش قادر ابطل افكر 
مبقتش بشوف بوضوح
جوايا في شيء متعكر 
ان جيت للحق ساعات 
انا بنسى صحابي واهلي 
وساعات وفوسط مرايه 
انا بنسى ملامح شكلي .
- طب فاكر اسمك ؟
جايز .
- اعملك شاي ؟ 
مش عايز .
-طب شربة مية عشان 
-قرص الدوا ده وترتاح . 
انا حاسس اني تقيل 
ومفيش جوايا براح 
انا بحلم بيها كتير 
وبحس بروحي انصهرت .
-تحلم مع مين وبإيه ؟
فاكر اختي اللي انتحرت ؟ 
بتكون ويايا وتاهت 
وبشوف الالوان باهت 
وفآخر الحلم تقولي 
خليك كده دايما زاهد 
انا زاهد جدا جدا 
انا زاهد حتى الهوا 
انا كاره ان حياتي 
مرتبطه بعلبة دوا 
بيبصولي بصّة غريبة 
هو بجد انا مجنون ؟
فبنام ييجي نص اليوم ؟ 
والسما مبقالهاش لون 
اياك تسمع لكلامهم 
وياصاحبي تكون صدقت 
انا يومي بيهرب مني 
عايش في بواقي الوقت .

#محمد_دهشان


بواقى الوقت _ محمد دهشان _ منة كُردى

كلمات : نبيل عبد الحميد 
https://www.facebook.com/nabil.ab7meed

أداء : منّة كُردى 
https://www.facebook.com/Kawkabmashy

موسيقى : حلوة يا بلدى  لـ منال محى الدين 

الكلمات : 

بتجمعنا البيوت عيله
و تجمعنا الشوارع أهل ..
كتافنا بتِقْسِم الشيلَه
و كل الصعب يصبح سهل ..

في ضِل العِشرَه و الجيره
كبرنا ويّا بعض إخوات ..
شهامه و باقيه في السيرَه 
حكوها جدودنا في الحكايات ..

جَدَع عِتره و متأصَّل
بشوفه ما بين وشوش الناس ..
بياض القلب متفصّل
على الكف اللي كله حماس .. 

قابلته مرّه في الشارِع
يادوب قبل الأدان بمفيش ..
حِلِف لازم معاه أفطر
برغم إنه ميعرفنيش ..
و مرّه حاسبلي ع الأُجره 
عشان الفكّه مش كافيه ..
نزل قبلي و راح ماشي
و سابلي ضحكته الصافيه .. 

بشوفه صنايعي في الحارة 
و ترزي حريمي ع الشارع ..
و بياع فُل في إشاره 
و دُفعه من  الحدود راجِع  ..
وشوشنا كلها واحده
بنشبه بعض لون و ظروف ..
نفوسنا بالنصيب ترضى 
و بيننا الطيبه و المعروف ..

يا صاحب عُمري يا ضهري
رفيقي فـ كل مشواري ..
معايا تملّي ع الدوغري 
و كاتم كل أسراري ..
تُقف جنبي و تفرحلي
في وقت الفرحة ما بتحصل ..
و في الشِدّه بتسبقني
و توصل قبل ما بوصل ..

جَدَع عِتره و متأصَّل
بشوفه ما بين وشوش الناس ..
بياض القلب متفصّل
على الكف اللي كله حماس .. 

#جدع_عتره


جدع عِتره - نبيل عبد الحميد - منة كُردى

كتابة : هديل عبد السّلام

https://www.facebook.com/Dooula

صوت : منّة كُردى

https://www.facebook.com/Kawkabmashy

محدش يلومنى عـ Resistant بتاعتى :D 
معرفتش أعدّل  فيها بعد ما 6 ساعات شغل


النصّ :

" ده أنا بترجّاك، الله يجازيك، يا شاغلني معاك وشاغلني عليك " 

لمّا الحياة بتُقَف هنا، وعند اللحظة دي بالذات، اللحظة اللي بتُدرِك فيها إنّك بتحب، فتلغي كل اللي قبلها، وبتعتبر إنه الزّمن وقف عندها، حتى بعد الفراق، إنت واقف عند نفس اللحظة، نفس الوقفة، حتى لو عدّى شهور، ولو عدّى سنة، 
" إن غِبت سنة أنا برضه أنا، لا أقدر أنساك ولا لِيّا غِنى " 
ويفضل مُنتهى أملَك وآخر رِضاك، ومُنيِتَك وأمنيتك في الحُب نفسه، مش لمصلحة معيّنة، ولا لإحساس معيّن، مش عشان نعيم القُرب، عشان الحُب نفسه كحالة وقيمة مُجرّدة من أي حاجة تانية، بعيدة عن كُل العوامل من مسافات وزمن وجفا وقُرب. 
" وإن كان أمَل العُشّاق القُرب، أنا أملي فـ حُبّك هوَّ الحُب " 
لمّا أملَك فعلًا بيبقى في الحُب نفسه، البِعاد ما بيأثّرش عليك، ولا بيغيّر من حالتك، ولا الجفا بيبعِد قلبك عن النقطة اللي واقف فيها من لحظة ما أدرك إنه بيحب،
" أنا لا اتمنّيت ولا قُلت ياريت، ولا بُعدَك عنّي جعَلني سَليت "
لدرجة إنّه أقصى طموحاتك هو بس إنه الناس تعرف وتقول إنّك بتحب، 
" ده أنا كل منايا أدوق اللّوم، ويقولوا عليّا الناس حبّيت " 
الواحد في الحالة دي بيبقى عنده حالة من النشوة المستمرّة كده، لدرجة إنه بيبقى متخدّر، مفيش حاجة بتأثّر معاه، الحُب لمّا بيوصل لمرحلة معيّنة، بيبقى من الصّعب جدًا الحاجات العادية زي الخصام والصُّلح دي تأثّر عليه،
 بيبقى Resistant لكُل حاجة
، بيعمل ابتسامة بلهاء كده مالهاش تفسير، مش واقعية ع الإطلاق ويمكن حلاوتها في كده، إنها مش عقلانيّة. 
" تخاصمني كتير تصالحني كتير، كُل ده يا حبيبي مالوش تأثير. 
توصِلني سنين، تهجُرني سنين، ما تغيّرنيش ده أنا حُبّي كبير " 
التوبة عن حاجة بتعملها بلا وعي أصلًا بتبقى حاجة مش منطقية، هتتوب عن حاجة بتعملها بغير إرادتك إزاي ! 
" أنا أتوب عن حُبّك أنا ؟! " ... أنـــا ؟!!!!

أنا أملى فـ حبّك هوّ الحب _هديل عبد السلام_منة كردى

قصيدة لـ إيمان الميهى 
https://www.facebook.com/eman.abdoullah

أداء : منّة كُردى وإيمان الميهى 
https://www.facebook.com/Kawkabmashy

من ديوان : فردة حلق 

معرض الكتاب 2015

قصيدة: بلوزة تريكو
النهارده ...-
 كات عيوني واسعة جداً
عايزة تلقُط نور كفاية
- دبّة النملة كمان
كات ملازماني ومعايا
-راسي -وبرغم انشغالي-
 كات حِمايا
-أمّا كل شعور فـ قلبي..
كان كفاية عشان أخاف
...
-رغم خوفي
كنت ماشية ثابتة جداً
مؤمنة ان الحق ضيّ
وان ذُلّي ماكانش وارد
طول ما عزّي فـ قلبي حيّ
-دنيا كانت ليل وضلمة
رغم برد ماكانش جامد
كنت لابسة هدوم كتير
كنت دفيانة بضمير
كنت خايفة
أي حد يشد فتلة من البلوزة
فجأة كل الخيط يكُرّ
-كات هدومي الشتوي واسعة
كنت خايفة اتعرّى فـ عيون
شايفة طعم العِزّة مُر
شايفة إن البنت "عورة"
وان جهل الأنثى "ستر"
...
-اتّاخدْتْ..  
فـ المواصلة
لما شفته حامي ضهر مراته جامد
بس لمّا بنت تركب
كان بيخبط فيها قاصد
...
-انهزَمْتْ
لما شفته بيقرا حادثة
بنت كانت راكبة تاكسي
وانتهتْ جوّاه بكارثة
طبّق الجرنال وتمتم:
تستاهلها
أصلها لو باحترامها
كان لايمكن طال ضافرها
...
-زيّ ما انت
-لسّه فارس جوّه قلبي
-لسّه دمّك حامي ضهري
-لسّه بتداري عليّا لمّا اصلّي فـِ الميدان
-آه صحيح معرفش اسمك
بس باتغطّى بعيونك
اللي كانت واسعة جداً
عايزة تلقُط نور كفاية
-لجل مبدأ
كان يوميها 
جاي معايا

ـــــــ
إيمان الميهي*
من ديوان: فردة حلق
27-12-2011
(إهداء لـ ست البنات)






بلوزة تريكو _ إيمان الميهى _ منّة كردى

كلمات : رامى وفا 
https://www.facebook.com/ramy.wafa?fref=nf

أداء صوتى : منّة كُردى
https://www.facebook.com/Kawkabmashy

Background : موسيقى بنتين من مصر

الكلمات : 

واحدة زيي تحب ليه ؟
و تحب مين ؟
و إزَّاي تحِب !
و إزَّاي تسلِّم قلبَها المقفول لقَلب 
أهلي لسَّه بيضغطوا .. 
و بيبنوا سور ورا سور 
و انا لسَّه عارفة أشوف النور .. 
و عارفة أشِب 
- سنِّك كِبر 
= حاضِر 
- هتعنِّسي 
= ماشي 
- فيكي العِبَر 
= حاضِر 
- و هتتنِسي 
= ماشي
بتستَهبِلي .. 
شاوريلي على عيب بس فيه 
يخلليكي رافضة تقبلي 
و عمَّالة تجري ورا حلمِك المجنون 
مُستقبَلي !
و مقدَرش أشوف مُستَقبلي 
لمرَّة أولى ف الصالون 
شايفاه زبون .. 
جاي يعاين البضاعة أو يدوقها 
واحدة زيي .. 
عُمرها حتَّى ما خدِّت أبسط حقوقها 
واحدة زيي .. 
كل يوم مرايِتها أتعس م اللي قبله ... 
و كل يوم ببعت رسايل .. 
للي مفروض إنِّي اقابله
واحدة زيي .. 
كفَّها متحَنِّي غُربة 
قلبَها متحَنِّي غربة 
جِسمها بتكره معالمُه 
و اللي آلمُه .. 
فيه خلايق لسَّه عايزين يشتروه .. 
شايفينه حَي و أرض صالحة تبقا تُربة
واحدة زيي 
بطَّلت تسمَع أغاني .. 
بطَّلت تكتِب معاني 
بطَّلِت كل الحاجات 
إلا الأرق 
لسَّه ليها اصحاب زمان 
بس ولا شيء مُشترَك 
بطَّلت بُكا ع الريق
بطلِّت تختار طريق 
سابت الحِلم البريء
و الأهم .. 
بقالها فَترة مبطَّلة تصديق 
أي حاجة .. و كل حاجة 
زي سكران تاه عشان 
ما شرِبش حاجة 
و لسَّه ماشي وسط الناس يقول 
كلُّه ... 
كلُّه كِدب 
واحدة زيي ..
تحب ليه ؟
و تحب مين ؟ 
و إزَّاي تحب !


واحدة زيّى _ رامى وفا _ منّة كُردى

كلمات : يوسف حسن 
https://www.facebook.com/Youshas.2014?ref=ts

أداء صوتى : منّة كُردى
https://www.facebook.com/Kawkabmashy

الكلمات : 
عصفور و غادر رحلة السرب الأخيره .. للسما 
حينها و بس عرِفت .. إن السما سماوات ..
كانت بترسم من دموعها .. ذكريات ..
و الدمعه كانت إبتسامه مُبهمه ..
حتي الرحيل .. 
أسبابه كانت مُبهمه .. 
إنك تغيب و تعود .. 
شئ من طبيعة البشر 
لكن تغيب متعودش .. 
كان شئ جديد و إنتشر ..
ضحكتها كانت قبلها ..
بتدفئ أكتر من شموس زارت نهار الشتا ..
و الدمعه كانت فى الكالوس .. 
بتدُل إن الدفا فى الأصل كان كدبه .. 
و إن اللى ساري فى الوريد من دَم 
مش دمها المعروف ..
الدمع غير مآلوف .. 
و الذكريات و الماضي 
سحبوا اللى باقي من خيوط النور ..
في ضحكتها ..
صوتها اللى كان بيجمِل الغنوه ..
كل الأغاني ساعتها .. نسيتها 
عشقتها وِحدتها .. و نبذها ليه الكل ؟!
كانت ساعتها وحدها بالفِعل ..
رجعت تدوق المُر من تانى هو المُر ..
و الضحكه كانت كإنقطاع الوحي 
الضِحك جوه منها تاني .. لم يمُر ..
و الدمع كان بيفيض .. فى عينيها بإنتظام 
فارقت .. و جوه عيونها باقي الدّمع
و العُمر ضحكه بتتسرق .. 
و السرقه كانت مش حرام ..
بس الحرام .. 
أو فى نظرهم 
كان حرام 
لما شدت حّبل من بين الحيطان و السقف 
و رسمت بطرفه شكل بالونه ..
كل البنات لعبتها بالونه .. 
إلا إنتى كنتي بتلعبي بالموت 
كل البيوت .. ضحكتها .. مسنونه
إلا إنتى كانت ضحكتك .. بتموت
عصفور مهاجر .. مّر وحده فوق كل البيوت .. 
ملمحش فى دنيته غير حّبل كان معقود 
و الحّبل كان عِشه اللى عاش و بناه
كان اعتقاده .. إن اللى جاي حياه ..
و مكنش يعرف إن اللى جاي مفيش 
صوت خّبط كان بشويش ..
مشهد لأوضه مـ السما السابعه 
ضِل عصفور كان بيسكُن حّبل مّرخي بفِعل سقف .. 
و إن هذا الطير أساساً فى فـ بيوتنا منه ألف ..
بس فى الأصل الحقيقه .. 
هي من موتها .. بريئه ..
و إنها مكَنتش طير .. و إنها كانت بشر .. بس روحها كات أخف !


جناحات _ منّة كُردى _ يوسف حسن

كلمات : شروق نبيل 
https://www.facebook.com/profile.php?id=100001492402355&ref=ts&fref=ts

أداء : خلود إيهاب ومنّة كردى
https://www.facebook.com/505a.koka?ref=ts&fref=ts

https://www.facebook.com/Kawkabmashy

الكلمات : 
ﺧﺎﻳﻔﺔ ﻳﺎﻣَّﻪ ..
ﺯﻱ ﺑﻴﺖ ﻭﺣﺪﺍﻧﻲ ﻭﺍﻗﻒ
ﻭﺳﻂ ﻏﻴﻂ ﺩﺧﺎﻥ ﻭﺿﻠﻤﺔ
ﻭﺳﻂ ﻏﺎﺑﺔ ﻣــِ ﺍﻷﻓﺎﻋﻲ
ﺯﻱ ﺣﻲّ ..
ﺣﻲّ ﻛﺎﻥ ﻣﻠﻴﺎﻥ ﻳﻔﺎﻋـَـﻪ 
ﻋﺠّﺰﻭﺍ ﻣـِ ﺍﻟﻮﺣﺪَﺓ ﻳﺎ ﺃﻣَّﻪ
ﺯﻱ ﺧﻮﻑ ﺍﻟﺒﻨﺖ ﻟﻤّﺎ
ﻋﺮّﻭﺍ ﺭﻭﺣﻬﻢ ﻣــِ ﺍﻟﺮﺟﻮﻟـَﺔ ﻭﺇﺳﺘﺒﺎﺣﻮﺍ ﺭﻭﺣﻬﺎ ﻟَﻤَّﺔ
ﻓﻲ ﺍﻟﻤﻴﺪﺍﻥ ﺍﻟﺰﺣﻤــﺔ ..
ﺧﺎﻳﻔﺔ
ﺯﻱ ﺃﻭﻝ ﻣﺮّﺓ ﺑﻤﺸﻲ
ﺯﻱ ﺃﻭﻝ ﺑﺼّﻪ ﻣﻨّﻪ ﺟﺖ ﻓــِ ﺭﻣﺸﻲ
ﺯﻱ ﻳﻮﻡ ﻣﺎ ﻟﻢّ ﺭﻭﺣﻪ ﻣﻦ ﺿﻠﻮﻋﻲ
ﺣَﻂ ﺃﻭﻝ ﺧﻴﻂ ﻓﻲ ﻧــَﻌﺸﻲ
ﺑﻌﺘﺮﺗﻨﻲ ﺍﻟﻮِﺣﺪﺓ ﻳﺎﻣَّﻪ
ﺯﻱ ﻣـَﻄﺮﺓ ..
ﺑﻌﺘﺮِﺗـﻬﺎ ﺳﺤﺎﺑﺔ ﺳﻤﺮﺍ ﻛﺎﺕ ﻣﺨﺎﺻﻤﺔ ﺳﺤﺎﺑﺔ ﺑﻴﻀﺎ
ﻭ ﺃﻣﺎ ﺟﺖّ ﺗﺼﺎﻟﺤﻬﺎ ﻳﺎﻣّﻪ ..
ﺑﻌﺘﺮَﺗﻨﻲ
ﺯﻱ ﺧﻮﻓﻚ ﻟﻤَﺎ ﻫـَﺪّ ﺍﻟﺤــُﺰﻥ ﻣـَـﺘﻨﻲ
ﻟﻤﺎ ﺷﻮﻓﺘﻲ ﺍﻟﻔـَـﻜﺮﺓ ﻣَﺮّﺓ ﺭﺍﻭﺩَﺗﻨﻲ
ﻋﻦ ﺟﻨﻮﺣﻲ ﻳَﻢ ﻣﻮﺗﻲ
ﻗﻴّﺪﻳﻨﻲ 
ﻗﻴّﺪﻳﻨﻲ إن ﺷﻮﻓﺘﻲ ﺻﻮﺗﻲ ﺗﺎﻧﻲ ﻏــَﻨّﻲ
ﻋﺮّﻓﻴﻨﻲ !
ﻫﻮّ ﻟﻴﻪ ﺍﻟﻠﻪ ﻧﺰﻋﻨﺎ ﻣـِ ﺍﻟﻨﻌﻴﻢ ﻟﻠﻐﺎﺑﺔ ﺩﻳّﺎ
ﺭﻏﻢ ﺇﻥ ﺍﻟﺨــُﻠﺪ ﻋُﻤــﺮﻩ ﻣﺎﻳﻮﻡ ﻏﻮﺍﻙِ
ﺣﺘﻲ ﺃﺑﻮﻳﺎ ﻣﺶ ﻣﻌﺎﻙِ
ﺷﺠﺮﺓ ﺍﻟﺘﻔﺎﺡ 
ﺑﻌﻴﺪﺓ ﻋﻦ ﺩﻳﺎﺭﻧـَﺎ
ﻟﻴﻪ ﻧﺰﻋﻨﺎ ﺍﻟﻤُﻮﻟﻲ ..!
ﻟﻴﻪ ﻧﺰﻋﻨﺎ ﺍﻟﻤُﻮﻟﻲ ..! ﺭُﺩّﻱ ..!
ﻟﻴﻪ ﺭﻣﺎﻧﺎ ﻭﺳﻂ ﺧــَﻠْﻖ
ﻳﺎﻛﻠﻮﺍ ﻗﻠﺐ ﺍﻟﺤـَﻲّ ﻳﺎﻣّﻪ ..!
ﺧﺎﻳﻔﺔ ﻣﻨﻬﻢ
ﻏﻤّﻲ ﻋﻴﻨﻲ ﺟﻮّﻩ ﺣﻀﻨﻚ
ﺩﺍﺭﻱ ﻛَﺴﺮﺓ ﺿﻬﺮﻱ ﺩﺍرﻱ
ﺇﺳﺘــُﺮﻳﻨﻲ
ﺧﺒّﻲ ﺭﻭﺣﻲ ﻣﻦ ﻛﻼﺑﻬﻢ
ﺩﺛّﺮﻳﻨﻲ
ﺩﺛّﺮﻳﻨﻲ
‫


خايفة يامّة _ منّة كردى _خلود ايهاب

كلمات : محمد البرّى
https://www.facebook.com/mohamed.b.elbery

أداء : منّة كُردى
https://www.facebook.com/Kawkabmashy
مُسعد أوزيل
https://www.facebook.com/Ozil.UA07

Music by : Mohamed Hamam
https://www.facebook.com/muhammad.hamam.90?fref=ufi

الكلمات : 
الشاعر خلّص إلقاء
والناس بتسقّف وعيونها مليانة دموع
صوت التسقيف يفضل يِعلى
وفي أخر القاعة صوت واحد بيقول " الله "
البنت دي لسه بتتمشى بعيدان الفُل في كُل مكان وتقول " لله "
اتنين ماشيين عكس الأشارات
واحد بيونّس غُربة أخوه بمُكالمة بتِختصر المسافات
بنوتة جميلة بتتمشى بتسابق في سحابة وبتشوف
مين فيهم يشتي دموع أكتر
شاب الأحلام سرقت عُمره
ورمته على ناصية بار يِسكر 
مومس بتبيع الهوى بفلوس
كزا صورة في أيدي المُعتصمين
وعساكر جيش وبوليس مرصوص
وهِتاف بيزلزل أي ميدان
وماحدش حدِّد كام ريختر
والشاب العاشق كتب إسمه
مع إسم حبيبتُه على الدفتر
إقرا الأخبار .. 
إكتشفوا علاج للبني آدمين
بيعالج كونهم بني آدمين
وفضيحة عضو المجلس " ميم "
مقفوش مع مُزة يُقال في كمين
ومازال الصمت دا حوت بالع في حقوق الناس
والدم السايل في مدينتي
بقى خمرة بنشربها في كاس
وندوّر للأيام ساقية
ونعيش تاني فـي نفس الأحداث
ونحوّل كُل حياتنا روتين
ونتيجة كُل سنين الصبر
مكتوب في ورقها
" الناس مساكين "

مشهد عبثى خارج النص_محمد البرّى_ منّة كردى_ مسعد أوزيل

كلمات : رامى وفا 
صاحب ديوان : " مايم " معرض 2016
https://www.facebook.com/ramy.wafa?ref=ts&fref=ts

أداء صوتى :
 منّه كردى
https://www.facebook.com/Kawkabmashy

خلود إيهاب
https://www.facebook.com/505a.koka?ref=ts&fref=ts

هندسة صوتية : منة كردى

الكلمات : 

آه ....
آه من اللي نعوزه ما نلاقيهوش
و ألف آه من اللي ما بنعوزهوش
و ألف مليون آه ..
من اللي بنعوزه غلَط .. نلقاه
و ألف ألف مليون آه من اللي بنعوزه صح .. و بييجي ف الوقت الغلَط
أعوذُ ..
أعوذُ بالله من كل جَرح ..
مفتوح .. و عمره ما يتجلَط
من كل عُمر بينفِلِت ..
من كل بحِّة صوت بُكا ..
من كل صحِّة معركة ..
من كل دمع بيتحبَس ..
و كل دمع بيتبِكي
و كل دمع بيتِّكي ..
على خد متشقَّق دموع قَبلَه
أعوذ بالله ..
م الطبَّالين و م الطَبلة ..
م الشيَّالين و م الشيلة ..
من كل المعاني المُفتعَلة التقيلة ..
و م السنين القصيرة .. الطويلة
من كل نظرة اتدَّارت ف كلمة ..
و كل كلمة اتدارت في ضحكة ..
و كل ضحكة اتدارت ف تنهيدة
من كل حاجة قريبة .. قريبة جداً بعيدة
من كل كل العشَم ف النهايات السعيدة
من كل مرَّة ننهي المكالمة .. و تكمِّل ف روحنا أو على روحنا
من كل حبل أحزان منشور على سطوحنا
من كل مرَّة نهرب فيها .. و نوصل لنفَس الغُربة .. و نفس الغُرب
من كل وَعد .. و كل بُعد متعشِّم ف قُرب
من الأعادي اللي ف زِي الأعادي
و الأعادي اللي ف زِي الصُحاب
و من الصُحاب اللي في زي الصُحاب .. و دول أخطَر كتير جداً
أعوذ بالله ..
من كل مَرة فيها بنفتكِر اننا ضامنين أو اننا هنِضمَن
و اننا آمنين أو اننا هنئمن
و من كُل مرَّة أسيب الأغنية شغَّالة و الآدان بيدَّن
أعوذ بالله من كل حُضن لا يُغني من خوف و لا يطمِّن
أعوذ بالله م الهزيِمة ..
م الهزيمة
م الهزيمة كمان مرة
الهزيمة اللي بتخللي كل حاجة جوَّه غير برَّه
أعوذ بالله ..
من العالَم المُشَتَّت ..
المُفَتَّت ..
السريع ..
الوضيع ..
الجبان ..
المُهان ..
اللي ما يستاهلشي ازازة حاجة ساقعة رهان
أعوذ بالله ..
م الوِحدة ..
اللي بتخللي كل الحاجات ..
كُل الحاجات واحدة
الصِدق زي الكِدب
التوبة زي الذنب
الكُره زي الحُب
البُعد زي القُرب
الحُضن زي الضَرب
الوِحدة اللي بتخللي كل الناس و كل الحاجات غُرب
أعوذ بالله
م التوهة في الزحمة و الدخول ف الدوَّامة
ومن ساعات آخر الليل ف العوَّامة
و م الخساير كُلَّها حتى اللي ما بتسيبش علامة
أعوذ بالله م الهروب ..
لأ ..
الهروب لأ
خللينا نهرب لحد ما نقابل يوم القيامة
#رامي_وفا


الهروب كـ حلّ أخير_منة كردى_خلود إيهاب

أداء صوتي : منّة كردى
https://www.facebook.com/mennakordii

كلمات : أحمد السعيد
https://www.facebook.com/ahmed.elsaeed.1865

هندسة صوتية : منة كردى

الكلمات :

-"وحشتنى"
شيلت الخناجر من قفص صدرى وفتحته للهوا
ورجعت لاختى بسخريه قلتلها "انتى اوحش"
-"طمنى فاضل قد ايه؟"
-"لأ لسه...مَبعدّش"
وإيديا واحده بتعدل الهيدفون
والتانيه شرطى غشيم بيكتم بوق قلبى عشان ماتطلعش الحقيقه
فى لسه فاضل ٦٧٢ يوم وست ساعات ونُص وكام دقيقه
.
فى حاجات غلط
من ضمنها
*كِدب اللى قالوا القُرب بالنيّه
*خوفكو عليا من انى اجوع ..خافو.. م الاكل وحديّا
*كون اللى قبلى خانهم التعبير فقالو
"كل الحاجات المؤذية ف الغربه قادره"
كان قصدهم
كل الحاجات القادرة مؤذيّه
.
"يا مسافر وحدك"
مش بس أغنيّه
.
أنا وِشّى حَجّر م التصنّع ف الصور
وعنيا لمّا قلبى زغلل شُفتها بتدُق
كل الحاجات -بيقولو - حلوة اشمعنا انا
فتّحت عين شباك أوضتنا الصبح خفت بجد
شافو القصور والسيارات والروشنه
وانا شفت خرسانه وناس "هى كالحجارة أو أشد"
هما اللى صح..اتمتعوا بالراحه والجو النضيف
وانا قروى ساذج ماتبسطّش لما بدّلت القهاوى بالمولات
والناصية بالتكييف
.
وبيسألو
ايه اللى ممكن يكسرك ف الغربه دى
وانتا ابن شتل الرز والسوق والعتاله؟!!
قلت..
الكفاله
الشبشب الباغه العبيط طيب
و "السيفتى" قاسية ومؤذية
جرحت صباع قلبى الصغيّر لما داست بافترا رقاب العماله
.
نفس المكان بالظبط..
أبرهه لم يموت
الفيل بقا العمال
واحنا بقينا السوط
انا كنت شاعر فى بلاد المرمطه
ازاى بقيت جلاد ف بلد القوت
.
ملّيت صرخت كأنى بيت بتهد
"انا احب اقول الشعر ف الحلوين"..
محدش رد
" أتحبُنى بعد الذى كانَ"..
محدش رد
"صوتك أرق من النايات"
جعلو اصابعهم ف تاتش الأيفونات
وانفضّوا من حولى
.
أمى اللى عبّت شنطتى شافت
ان الهدوم والأكل و الشاى والصابون أولى
من صوت ابويا وحضنها و عيون كريم ورنا
أو ربّما ..
-علشان منظلمهاش-
خافت من الوزن الزياده وخنقة التفتيش
أول لمّا شافت إن ضيق الشنطه ميساعنيش
ضحّت بإنى احيا..
ف مقابل انى أعيش
.
.
.
هارجع ..
لأن الميّه ف الحنفيه لا تصلح هنا للشرب
لأ القُرب لازم يتسند بالقرب
لأن اخواتى رابطينّى بأستك لم يفكه الغُرب
هارجع..
لأن لمصر ريحه وصوت ولون ..
وعيون بتستنى العيون
لإنى مستحيل اسمح
أنقّط حقى ف مراتى ..
مكالمات فيديو وعيالى..
صور خلفيه ع التليفون.
.
ان جيتو للحق بصراحه..
الوضع مش بالحزن دا
كان ممكن اكتب نَص أبهج من كدا
لكنكم
بتميلو أكتر للبكا ولأنكم
انتو بكايا..
بميل لكم

سِيدَا _ منّة كردى _ أحمد السعيد

برومو ديوان " بوسه زرقا " لـ الشعار أحمد السعيد 
بمعرض الكتاب 2019

هندسه صوتيه : منه كردي

شارك ف العمل :
أحمد عبد الرحمن
حبيبة الزين
محمد السيد عزيز
محمد دهشان
مصطفى ناصر
منه كردي
ياسمين محمود

برومو ديوان " بوسه زرقا " لـ أحمد السعيد

قصيدة " إيجار قديم " من ديوان " فاطمه " للشاعر " أحمد فرج

https://www.facebook.com/ahmetfarag

أداء وهندسه صوتيه : منه كردي

https://www.facebook.com/mennakordii

إيجار قديم _ منه كردي _أحمد فرج

قصيدة تقرير الوفاة من ديزان " سجن أسّ أربعة " للشاعر حسام إبراهيم
https://www.facebook.com/hosamibrahimm

إلقاء وهندسة صوتية : منّه كُردي
https://www.facebook.com/mennakordii

مكتوب في تقرير الوفاة الآتي :-

جسم الضحية سليم مافيهش خدوش ..
و مفيش آثار للضرب و التعذيب ..
سم الفيران في الدرج مأخدهوش ..
و مفيش سلاح للقتل في الدواليب ..

ساكن لوحده .. الناس مابتروحلوش ..
و مفيش صحاب بتزوره لما يغيب ..

كان عنده عَجَلة معوضاه أهله ..
و بيمشي دايما بيها جنب الحيط ..
في الجري حتى بيجري على مهله ..
و يخاف أوي م الزحمة والتخبيط ..
و ساعات يخاف عربية تندهله ..

أتفه من إنه يبقى له عداوات ..
أو حد صاحب مصلحة في قتله ..
أتفه من إنه يبقى له صداقات ..
أو سيرته تيجي و حد يشتاقله ..
مالهوش آثار أقدام ولا بصمات ..
مايحبش الأحلام ولا البطولات ..
ولا له مقولة هتبقى تاريخية ..
عاش الحياة بالظبط كما هيه ..
ماعملش ويا الخلق أي وعود ..

علشان كدا لما عملها و مات ..
لا لقينا عنده جروح ولا كدمات ..
كان جسمه سالم مية في المية ..
و كأنه لسه من مفيش مولود ..

قولنا ساعتها دي سكتة قلبية ..
و فتحنا 
لقينا قلبه مش موجود ..

تقرير الوفاة - حسام إبراهيم - منه كردي

مالقوش معاه
غير ورقة و12 جنيه
وكتُب كتير
مترصصين حواليه
من كتر قعدتهم معاه
بقى في شبه بينهم
مايحسهوش غيرهم
ولا يفهمه الاه
هو اللي لما بيتخنق
"يكتب"
بقى صعب يكتب اي شيء 
وان حد سأله ف مرة "اخبارك!"
بيرد عادي ف وقتها ويكدب
"ماشية الحياة"
مع انها مش ماشية من مدة
واقف وكل شيء حواليه بيمشي
مش بيستناه

وبرغم ان سجايره فرط
أصابه تضخم الغدة
فهدى الشرب ع الآخر
لدرجة انه كان ينساه
ولما يحس بالوحدة
يطلع قلمه ويشخبط
عاش الحياة لوحده
عاش الحياة مُحبط
مانطقش كلمة "آه"
لكن الوجع جواه ... 
كان فوق ما يتحمله
فماكنش في ف ايديه
ولا حل غير يقتله
ويروح مكان تاني
مافيهوش فراق
أو وجع

مات الجدع
يوم لما طل على الحياة
مات، واما مات بيفتشوه 
مالقوش معاه 
غير ورقة و12 جنيه
والورقة كان كاتب عليها
 "البقاء لله" 


كلمات : البراء حسن
https://www.facebook.com/albraa.hassan

صوت وهندسة صوتية : منة كردي
https://www.facebook.com/mennakordii

لما مات _ البراء حسن _ منة كردي

سلّمت قلبي للهوى- آية رزق- منة كردي

شوفوا الفيديو على اليوتيوب:

https://www.youtube.com/watch?v=bPmQ4SUqZ4g

 أداء منة كردي 
https://www.facebook.com/mennakordii/

 كتابة ياسمين عبداللطيف 
https://www.facebook.com/yasmine.abde...

مونتاج واخراج محمد دهشان
https://www.facebook.com/moh.dahshan/

... قررت ان تكون رسالتي الاخيرة له 
 ..بقالي كتير مبعتلكش
مش ملل قد ما هو رد فعل طبيعي لصدك ليا ولمشاعري كل مرة

رسالتي الاخيرة | منة كردي

هنا مش مكان لـ معلومات وتفاصيل روتينية مُملة ...
بس أقدر أقول انى بحب هنا ..

Menna kordi

Popular tracks